Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 29 Août 2008 RAMADHAN 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine dire : Alhamdolillahi Rabbil Aalameen, le mois de Ramadhan pé vini. C’est ene très grand contentement pour tous bane musulmans sincères dans zot la foi en Allah et So Prophète (s.a.w). Hazrat Muhammad (s.a.w) fine dire : « (Ramadhan) C’est ene mois kot so premier partie li ene miséricorde, so milieu li représente le pardon et so dernier (partie), la libération du feu de l’enfer. N’importe ki sanlà pour diminuer fardeau de bane serviteurs d’Allah ça mois là, Allah pour pardonne li et pour libère li du feu de l’enfer. Dans ça mois là, zot bizin dévoué zot pour faire quatre kitchoses en grande quantité ; deux pour le plaisir de zot Rab et deux (kitchoses) ki zot pas pou capave s’en passe ça. Bane (kitchoses) ki faire pour zot Rab c’est : réciter en grande kantité Kalima Tayyebah : « La ilâha illallâh » et demande beaucoup pardon (Istighfar). Et quant à ça deux kitchoses ki zot pas pou capave s’en passe zot, c’est : implore Allah pou gagne So Paradis et demande Li (Allah) protection contre l’enfer. » « O peuple ! Mois Allah fine vini avec so miséricorde et so bénédictions. Ça li ene mois ki meilleur ki tous bane mois. So bane jours meilleurs jours, so bane la nuits, meilleurs nuits, so bane l’heures meilleurs l’heures. » O bane croyants, Ramadhan li ene mois sacré kot Allah pé constamment tester So création et donne l’humanité l’occasion pour atteindre la joie infinie. Roza li ene purification complète et ene moyen pour développe conscience de la présence Allah. Reconnaissance présence Allah, Taqwa, li ene protection contre bane plans Shaïtaan et souffrance dans ça le monde là. Allah informe nous : « Et celui ki peur Allah, alors Li (Allah) pour tire ene chemin de délivrance pour li. Et Li (Allah) pour approvisionne li depuis côte li pas penser. Et celui ki confier lor Allah, eh bien Allah suffit pour li. Sans doute Allah Li pour accomplir so travail ; sans doute Allah fine garde ene mesure pour chaque kitchose. » Beaucoup Musulmans zordi ena ene mauvaise conception à propos Roza et activités ene Rozédaar. Zot alle dans ene l’état de semi hibernation, passe la majeure partie zot létemps la journée lor lili. Si zot peur Allah, zot lever l’heure Namaz, mais zot ré-alle dormi après. Ça sommeil là faire zot vine paresse. Et zot activités diminuer. Ramadhan li actuellement ene moment d’activités intense pour bane croyant, ki léger de poids manger et boire, besoin plisse faire zeffort dans chemin d’Allah. Hazrat Muhammad (s.a.w) fine passe à peu près neuf Ramadhan après Hijra. Chaque Ramadhan ti rempli avec bane décisions bien importants et li fine montrer nous aussi ene l’exemple sacrifice et ene soumission totale envers Allah. Dans le mois de Ramadhan ena beaucoup leçon important pour nous tiré et mettre li en pratique dans bane lézot 11 mois ki pé vini. Le mois Ramadhan, nous pé prend ene bain générale pour ki nous reste propre et éloigne nous de bane zaffaires malpropre de ça le monde ici-bas là. Nous purifier nous, spirituellement et kan Ramadhan aller, nous reste toujours propre et continuer lor ça l’entraînement purification spirituelle ki nous fine gagner dans le mois de Ramadhan et nous faire duah avec Allah (twa) ki nous pas révine dans nous la vie d’avant. Alors, nous profite le mois de Ramadhan le maximum, dans Ibaadat, récitation du Quran, Zikré-Ilaahi, cultive le Taqwa, gagne patience (sabr), cultive bane bons manières, lutter pour droiture et sincérité, ressentir l’unité musulmane, c’est-à-dire, couma Allah dire « Attrape la corde d’Allah fermement », zot tous ensemble et entre zot même pas besoin diviser…, n’importe ki frères et sœurs musulmans ou joindre, faire Salaam et si kikaine faire ou salaam, pas faire « alaikum » et pas mette boycott lor personne ; non plu nous pé mette grand grand paneaux partout, dépi lor la caze d’Allah (Maison de Paix), zot pé mette « LOVE FOR ALL, HATRED FOR NONE » zis comme ene show pour montrer dimounes, kan tandique, c’est zot-même ki pé sème la haine plisse dans le cœur dimounes au lieu ki l’amour. Ça c’est pas l’enseignement du Quran Shariff, ni pratique de nous Aka Hazrat Muhammad (s.a.w). Chacaine parmi nous profite le maximum de ça mois Ramadhan là pour purifier nous l’intérieur et l’extérieur, et retire tous bane coltar la haine et jalousie ki fine tâché dans le cœur et kot ça fine faire lécoeur là vine noir. C’est ene moment propice pour chacaine ki senti li vizé par ça et ene l’autre conseil c’est ki bizin, éloigner avec palabres, veille zaffaire dimoune dans mois Ramadhan ; au lieu de ça, faire le maximum Istighfaar et Zikr-é-Ilaahi. Pas perdi ou bane létemps dans ça mois béni là, pas reste nek dans bane préparation de bane grands grands Iftaari. POUR LA SANTÉ : Roza ena plusieurs profits médicales et li montrer nous bane musulmans pour prend soin de nous la santé et pour gagne ene lécorps sain et solide. Voilà quelques conseils concernant couma nous bizin faire le Sehri et l’Iftaar. Ramadhan li ene mois kot ene dimoune li régler li-même au niveau spirituelle, aussi bien de côté so la santé. Li ene mois d’entraînement kot ena l’espoir ki zot régler zot l’habitudes pendant ça mois là, et zot continuer ça bane bons l’habitudes là ziska lotte Ramadhan et ainsi de suite ziska zot régler zot bane l’habitudes dans bon façon, le reste de zot la vie entière. Ki li de côté, ene contrôle alimentaire aussi, bane bon l’habitudes ki Allah faire nous bane Musulmans prend, li ene l’entraînement pour ki So bane serviteurs poursuivre ça bane bon régime là après Ramadhan. Aussi mo pou cause plisse lor bane bons conseils alimentaires ki li souhaitable ki ene Musulman suivre afin ki li profite de ça mois béni là, dans tous so l’aspé ; ki li de côté spirituelle, ki li de côté la santé. Le mois Ramadhan li ene mois kot li entraîne nous pour nous pas manger plisse ki à l’habitude. Et de nous côté aussi, faudé pas nous exagère nous façon manger et boire. Alors, nous bizin ene régime équilibrer, même si li moinse de quantité manger ki nous habitué consommer en temps normale. Ça li suffire pour garde ene dimoune en bonne santé et garde li en forme pendant ça mois béni là. Si au lieu nous contrôle nous manger pendant ça mois là, nous alle consomme bane manger bric à brac, sans guetter si li bon pour la santé ou pas, alors ça bane kalité manger là pour engraisse ça dimoune là, et ça philosophie de consommation alimentaires là li loin de philosophie de l’enseignements ki Quran et Hadices fine amener. Derrière pratique du Roza, ena aussi question régime alimentaires pour bon la santé de bane créatures d’Allah, afin ki zot reste en bonne santé, et ainsi ça pour permettre zot concentrer plisse lor Ibaadat. Hazrat Muhammad (s.a.w) fine dire : « Détrois bouchées, bizin suffire (pour dimoune) pour ki li tenir déboute. (Si li oulé manger), le mieux pour li c’est ki li consacrer ene tière (de so l’estoma) pour manger, ene tière pour boire, tandi ki dernier (tière) bizin reste vide. » Li préférable pour ene Musulman, kot le fait ki pendant l’été, letemps de Roza li prolongé, et de ce fait bane manger couma diblé, oatmeal, roti (farata), dipains ki faire avec la farine diblé et haleem li conseiller pour consommé pendant Sehri. Ça c’est parski ça bane manger là zot tardé pour digérer. Et de ce fait, li pour bon, kan nous considère létemps prolongé ki ena pour reste Roza (environ 8 heures temps) et de ce fait, ça pour diminuer l’effet de la faim ki nous capave ressenti pendant la journée. Li pas conseillable aussi pour boire dithé et café pendant Sehri, parski si nous consomme ça en grande quantité le matin de bonheur, li pour cause déshydratation kot li augmente production urine dans lécorps. Astaire si nous guette de côté manger préparé pour Iftaar, Hazrat Muhammad (s.a.w) fine conseille mange dattes (tames), au moment Iftaar. Et dattes li ene extra bon moyen pour gagne di sucre, carbo-i-drate, fibre et bane minérales ki excellent pour la santé, surtout si nous prend en considération le fait ki ene dimoune fine reste roza pendant toute ene journée. De ce fait, ça bane dattes là li donne ene Rozédaar bane l’énergies nécessaire dans so lécorps et li ré-stabilize taux de glucose dans disang rapidement. Si nous alle trop manger pendant Iftaar, ça capave cause bane problèmes d’indigestion, et par conséquent, li rendre ene dimoune incapable pour faire so Namaz le soir couma bizin, et li manque concentration dans so Namaz. BANE RECOMANDATION ALIMETAIRES ET MÉDICALE : En premier lieu, nous bizin prend ene l’habitudes pour pas prend bane manger ki pou faire nous engraisser. La graisse li augmente kantité cholesterol dans nous disang, et par consékan li augmente risque de bane problèmes cardiaques. Alors, nous évite mange bane manger ki bien frire dans de l’huile couma, chips, samoussa, catless etc. Nous essaye consomme bane grillades dans so place. Nous évite servi et pour consomme bane produits ki faire avec « Ghee » (mantègue), et nous consomme moinse de l’huile kan cuit manger. Li préférable pour servi bane de l’huile poli-insaturés (e.g, de l’huile tournesol, z’olive, soyabean etc.). Li conseillable aussi pour consomme plisse de poisson et poulet et moinse la viande rouge couma bœuf, mouton et cabri. Bizin aussi essaye réduire consommation du beurre et fromage. Li pas conseillable aussi ki dans ça mois là mange trop beaucoup gâteau, biscuits et chocolats. En deuxième lieu, nous bizin essaye réduire consommation di sucre parski li contenir beaucoup calories et li faire dimoune grossi, et pareil couma la graisse, li augmente risque de bane problèmes cardiaques (lécoeur). Nous Musulman Mauricien, nous content nous ti « alouda » pour Iftaar. Li ene la boisson ki contenir sirop, la mousse, du lait, et toukmarria. De ce fait, li ene la boisson ki donne beaucoup l’énergie, mais faudé pas nous abuse lor là et trop boire li parski à cause li contenir beaucoup di sucre. Ena aussi bane gâteaux ki faire avec mantègue, de l’huile et di sucre. Parmi ça bane gâteux là, ena barfee (ki concentrer avec dilait et di sucre), dilaibi, laddoo, Goolab Jaamun, rasgoullah etc. Après nous bizin aussi veille ki nous pas consomme beaucoup disél, parski ça capave faire nous tension augmenter. Donc li bizin consomme li avec modération et pas mange trop bane gâteux ou snacks salé. Beaucoup bane musulmans content mange bane fruits confi après Namaz à soir, que ce soit Esha ou Tarawee. Li bon pour mange bane fruits, mais li préférable pour mange bane fruits frais, kot pour gagne bane vitamines. Bane fruits contenir aussi bane fibres ki bon pour la santé. Si toutefois zot pé mange confi, zot bizin prend précaution pour pas abuse lor disél et piments. Bane les autres manger ki contenir fibres li inclure aussi bane légumes, bane grains secs couma lentilles, gros pois, dhall etc. Ena aussi bane céréale ki contenir beaucoup fibres par exemple, weetabix, bran, cornflakes, oatmeal etc. Pour bane préparation de roti (farata) et du pain, li préférable aussi servi la farine diblé au lieu la farine blanc. La farine du blé li contenir plisse fibre. Ena aussi la mousse li bien utiliser pendant Ramadhan. Li bien bon parski li contenir fibre, mais bizin faire bien attention pour pas mette trop beaucoup di sucre là-dans kan prépare li pour consommer. Ki faire consommation fibre important ? Fibre li bénéfique pour nous lécorps et lécoeur, et li ene bon moyen pour évite constipation et bane brûlures de l’estoma. Nous bizin consomme aussi beaucoup de l’eau avant et après Roza pendant le mois d’été pour évite dés-hi-dratations. Capave aussi boire sérome de temps en temps et mélange li avec de l’eau, parski ça pour faire ou diboute lor ou lipié bien et de ce fait, li pour évite dés-hi-dratations. Si ou ene dimoune ki ena plusieurs problèmes de santé, couma diabète, hypertension, problèmes l’acide et gastriques, li conseillable ki ou consulte ene docteur avant, et guetter si ena bane médicaments appropriés ki ou capave prend, si toutefois ou senti ki ou capave garde Roza, sipas ena médicaments ki ou capave prend zis deux fois par jours (ki ou pou prend l’heure Sehri et Iftaar). Ene dimoune ki sous médicaments li conseiller pour pas arrête prend so bane médicaments parski sinon ça li pou dangéré pour li si nek ene coup pendant Ramadhan li arrête prend li. Bane ki soufferts ki zot gagne l’acidité et gastrique, li souhaible ki zot prend bane médicaments approprié ki pas pou faire zot gagne ça bane complications là, si zot pé faire Niyyat pour garde Roza et si malade là et so l’état pas aussi graves. Mais seulement pour ene dimoune diabétique, Roza capave dangéré pour li. Alors li bizin toujours alle demande ene l’opinion médicale, et si li pé garde Roza, li bizin toujours veiller ki li pas dépasse limite dans consommation bane aliments. Li bizin évite bane manger ki contenir beaucoup di sucre tel ki bane gâteaux ou bane la boissons ki contenir di sucre. Ene diabétique ki so l’état li contrôlé seulement par bane mesures alimentaires, li bon si li garde Roza, et si li gros, Roza pour donne li ene moyen pour régler d’avantage so condition. Si li ena médecines pour prend, li bizin prend li pendant Iftaar, et si nécessaire pendant Sehri, d’après prescriptions so docteur. Li pas conseillable pour ene diabétique ki faire bane injections d’insuline pour garde Roza. Alors, l’opinion de so docteur lor so cas li très important. Docteur là capave choisir pour faire bane traitement spéciale d’après so cas, et guetter couma li pour capave prend so bane injections d’insulines, soit Sehri ou Iftaar. Bizin ene contrôle lor taux di sucre dans so lécorps et bane analyses pour détecter ça bizin faire dans ene l’heure kot patient diabétique là li pas Roza. Même zaffaire pour bane les autres patients ki souffre de bane malades cardiaques et hypertension. Zot bizin demande l’opinion zot docteurs, parski ça bane docteurs là capave faire bane check-ups approprié pour guetter si pas zot capave garde Roza ou non ; si li pour prouve fatale pour zot la santé ou non. Si docteurs là trouver ki capave garde Roza et donne ou bane médicaments approprié pour ça mois là, alors bizin prend bane précaution dans façon garde Roza, et kalité manger ki consommer pendant ça mois là. En Islam li malheureux pour dire, ki ena beaucoup Musulmans ki fume cigarettes. Le mois de Ramadhan offert zot ene l’occasion béni pour ki zot commence zot traitement pour arrête consommation de cigarettes. Cigarettes augmente risque de bane malades cardiaques et li donne aussi cancer poumon. Le fait ki dans cigarettes ena ene matière ki nous appelle « Nicotine », ça li fatale pour la santé, et li détruire poumon ene fumeur cigarettes. Alors, le mois de Ramadhan li donne ene l’occasion en or pour nous bane frères ki addicte avec cigarettes pour diminuer consommation de cigarettes, ziska ki zot réussi arrête prend cigarette nette complètement. A aucaine moment, nous, bane Musulmans faudé pas nous néglige nous la santé. En négligeant nous la santé, nous pé néglige ene très grand faveur et bénédiction ki Allah fine accorde nous. En dernier lieu, Alhamdolillah, préparation pour Ramadhan la Jamaat Ul Sahih Al Islam fine fini faire, et bane horaires Ramadhan et tous bane programmes ki pour ena fine fini alle dans tous nous bane branches ici et aussi le Hazrat Ummoul Momeneen Sadr Saheba de Siraj Makîn fine prépare ene programme pendant le Ramadhan tous les Weekends pour bane jeunes filles et dames. Et au niveau du Jamaat, nous ena le plaisir pour annoncer ki bane les autres branches à Maurice, zot pé prend le Khutba Jummah en directe par téléphone et aussi bane Darus Quran. Nous fine envoye nous bane programmes couma nous pour passe nous Ramadhan 2008 et ki bizin faire ; fine envoyer à tous bane présidents du Jamaat Ul Sahih Al Islam à travers le monde et mo ena le plaisir pour dire ki trois pays, l’heure Jummah coïncide avec nous l’heure Jummah à Maurice et zot fine prend la permission pour zot prend tous bane Khutba Jummah dans mois Ramadhan en direct et Daras Quran et les autres programmes aussi (surtout pour bane Siraj Makîn). Nous bane frères et sœurs de bane lézot branches fine souhaiter et ça faire zot ene grand plaisir et contentement pour mo vine faire Tarawee et Daras Quran – mo fine classe bane jours, dans mo l’absence ici (dans Markaz) pour Namaz, Hadices ou Malfoozat Hazrat Massih Maoud (a.s). Mo fine fini nommé ki sanlà pour lead Namaz et les autres programmes. Toujours, mo pé dire bane frères, sœurs et zenfants, ki avant Iftaar, 20 minutes avant, zot tous préparer et faire duah et fine envoye zot ene série de bane duah ki zot bizin lire. Mo termine là-même. Après Namaz dans mois Ramadhan, mo pour donne zot encore bane directives. Alors, nous demande duah avec Allah (twa) ki Li protège nous dans tous nous bane travails de Deen et donne plisse courage, la force, et détermination pour amène l’Islam aux quatre coins du globe dans la même manière ki nous Aka Hazrat Muhammad (s.a.w) ti pé faire so bane travail. Ki Allah faire nous parmi bane ki relève l’Islam pendant Ramadhan et après et ki Allah pas faire nous parmi bane ki dire séki zot-même pas faire. Insha-Allah, Ameen. Soumma Ameen.