بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

27 Mars 2009

 

(Résumé du Khutba Jummah lors le Messie Promis)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

Le Messie Promis, Hazrat Mirza Ghulam Ahmad (a.s) ti élu par Allah Ta’ala Li-même pour ene mission bien précis lors ça duniya (la terre) là. Li ti ene humain pareil couma zot tout mais séki ti rende li spéciale, c’est ça l’honneur ki Allah fine faire li kan li fine élève li comme ene Messie, Mahdi et comme ene “Nabi”.

 

Le Messie Promis (a.s) fine dire concernant so proclamation : “Mo faire serment lors Celui dans ki So la mains mo la vie trouver ki c’est Li-même ki fine donne moi le nom de Nabi (Prophète) et c’est Li-même ki fine appelle moi par le nom de Massih Maoud (Messie Promis). Pour attester mo véracité Li (Allah S.W.T) fine manifester bane miracles extraordinaires.” (Haqiqatul Wahi p.150)

 

Ça titre de Nabi ki li fine recevoir là, pareil couma mo fine expliquer semaine dernière dans mo Khutba, li attaché avec Nabuwwat de nous Bien-aimé prophète Hazrat Muhammad (s.a.w). Hazrat Massih Maoud (a.s) ti en vérité ene reflection du Saint Prophète (s.a.w) dans so l’époque. Li ti vini pour faire revivre la gloire de l’Islam et le Tauhid (l’unicité d’Allah). 

 

Maintenant mo pou mette devant zot la description du Messie Promis de l’époque :

 

So teint ti clair, avec ene lécorps bien proportionné ki aucaine difficulté, choque, chagrin, et tracas ti capave faire li vine pâle. So visage béni ti pé tous les temps briller pareil couma ene boute l’or pure. A chaque fois, li ti ena aussi ene sourire gaillard lors so la lèvres. Bane ki fine trouve li ti pé dire: ‘Si ene telle dimoune ti capave cause menti, et si li-même li ti conscient de so mensonge, couma est-ce ki li ti pou capave garde li-même confiant et garde ça sentiment de bonheur, de victoire et de tranquillité ki reflecter lors so figuire?’ Ça bane signes de piété et de droiture extérieurs là pas capave reflecter ene fond de noirté. Pareillement, figuire d’ene imposteur pas capave reflecter la lumière de la foi.

 

So visage zamais pas ti pé paraîte dans la peine, et Allah conné combien problème li ti bizin faire face. Bane ki ti pé vine guette li ti pé toujours trouve li avec ene visage souriant et confiant. Avec l’habitude, so lizié ti pé reste demi-ouvert, et li ti ena ene front ki ti pé révèle ene don spéciale pou discerne bane kitchoses, pou analyse bane choses avec prévoyance et intelligence. Dans la façon ki li ti été et la façon li ti pé habillé, li pas ti pé montré li formelle. Pareil couma so modèle, le Saint Prophète (s.a.w), li ti ena ene certain considération dans façon ki li bizin paraîte, mais li ti contraire à so nature pour faire trop attention à ça (façon li habillé) ou pour perdi trop so létemps lors là.

 

Ça bane description physique là li accompagné aussi d’ene grâce masculine avec ene profondeur spiritual. So visage ti éclairé avec ça meme la lumière d’Allah là et pareil couma li ti envoyé par Allah pour démontrer bane beauté de l’Islam, so physique aussi Allah fine béni et par ça bane lékaire de bane dimounes ki ti pé guette li fine être attiré vers li. Couma le Quran démontré, tous prophètes zot caractère pas ti pareil. Allah donne zot bane caractères spéciales ki pou faire ça bane messagers là deal avec zot peuples et faire zot comprend le message d’Allah.

 

Et assurément tous prophètes sans exception, malgré zot différents caractères fine vine lors ça la terre là comme ene porteur de bonne nouvelles et ene Avertisseur. Si nous guette le Quran et Hadiths, nous trouve l’example de Hazrat Musa (a.s) ki ti ena ene caractère chaud. Ena bane les autres prophètes ki Allah qualifié et honore zot dans Quran comme étant pur et patient. Ena l’example de Hazrat Ayuub ki malgré ki Allah fine éprouve li par ene maladie et ki zot tout, meme so bane zenfants, so madame et so bane disciples fine quitte li, mais zamais li ti plaigné avec Allah et li fine garde confiance en Allah et prend patience. Allah tellement fine content avec li, ki Li fine guéri li et rétourne li so madame, so bane zenfants et ene partie de bane dimounes ki ti croire dans li et ki Allah fine pardonne zot kan zot ti abandonne So prophète. Caractère d’ene prophète, d’ene Rassool li important dans l’époque ki li pé vivre. Ena moment Allah dire So messager pou dibouté et pour pas peur bane créatures et pou dire certains kitchoses ki Allah fine ordonne ça Messager là pou dire, mais seulement pas tous dimounes ki comprend ça Messager là.

 

Kan Allah élève So Messager pour la réforme de l’humanité; depuis so jeune âge meme Allah guide li pour parfaire li-même dans l’amour d’Allah, de So Livre Sacré en l’occurrence le Quran Shareef et aussi dans l’amour du Saint Prophète (s.a.w) le modèle parfait pour l’humanité. Pareillement, depuis so jeune l’âge meme c’est Allah ki fine guide So Messie Hazrat Mirza Ghulam Ahmad (a.s) dans divers phase de so la vie. En vérité, kan Allah fine décide pou envoye So Messager, So la lumière et ene Miséricorde pour ça l’univers là; Li nék dire “Kun” (existé) et ça kitchose ou quelqu’un là exister. Depuis  so l’enfance ziska so dernier moment lors ça la terre là, Allah fine manifester beaucoup signes, révélations, rêves, catastrophes, bonne nouvelles et témoignages du ciel en faveur du Messie Promis (a.s).

 

Dans ene place, le Messie Promis cause lors l’amour d’Allah comme ene dimoune qui fine intoxiqué lor cause à propos l’unicité Allah. Li dire:

 

“Mo pas capave compte bane signes ki mo fine trouver mais le monde pas fine trouve ça. Allah, mo conne Toi, Toi tousél mo Bondié. Mo l’âme li réjouir à To nom, pareil couma ene zenfant ki content kan li trouve so mama. Mais la plupart de bane dimounes pas fine reconnaite moi, ni zot fine accepter moi.” (Tiryaquoul Qouloube)

 

Brièvement mo pou raconte zot à propos so l’amour pour Allah: En vérité, l’amour ki Hazrat Massih Maoud (a.s) ti ena pour Allah ti extra fort et spéciale.

 

Dans ene l’autre place, kot li cite Allah comme Témoin, li dire:

 

“Voici, mo l’âme pé envoler vers Toi en toute confiance, couma ene zoiseau envoler vers so nid. Mo rode bane signes de To Majesté et de To Puissance, pas pour moi, mais pour ki tous dimounes conne Toi et accepter To chemin pur (saint).” (Tiryaquoul Qouloube)

 

Dans ene de so bane poèmes persans, li fine adresse avec Allah comme suite:

 

“En vertu de bane relations ki mo fine cultivé avec Toi, et au nom de ça l’amour tendre ki mo fine planté au plus profond de mo lékaire, mo faire appel à Toi Qui mo refuge (protection), mo soutien et mo fortresse, pou vine lave moi de tous bane blâmes ki mo victime.

 

Éclaire mo visage avec la lumière de ça difé ki To fine allumé dans mo lékaire, kot To fine brûle et détruire tout sauf To-même et change ça noirté de la nuit là en la lumière lizour.” (Haqiqatoul Mahdi)

 

So confiance en Allah (SWT) ti bien solide.

 

ANECDOTE: Hazrat Maulvi Abdul Karim (r.a) fine rapporté ki le Messie Promis (a.s) fine dire ki pareil couma kan faire extra chaud et l’atmosphère lourd, dimoune attane la pluie, pareillement kan li (Massih Maoud) pena l’argent, li mette so confiance entièrement en Allah pour approvisionne li.

 

Nous observe ça confiance en Allah ki li ti ena là aussi face à so bane l’ennemies. Lors de bane discussions religieux, Hazrat Massih Maoud (a.s) fine ena beaucoup l’ennemi. Ena ene partie de bane dimounes fine reconnaite bane arguments ki li fine avancer pour défendre l’Islam comme étant véridique tandis ki bane les autres, ki li de bane les autres religions ou dans l’Islam meme, zot fine oppose li malgré ki li (Ahmad as) fine amène devant zot bane preuves irréfutables ki li lors l’Islam, le Tauhid, le Saint Prophète (s.a.w) et so proclamation comme le Messie et Mahdi ki bane musulmans ti pé attane. Li fine ena l’ennemies couma Pandit Lekh Ram, Dr. Martin Clark, Abdullah Atham, Mohammad Hussein de Batala, Alexander Dowie et meme bane membres de so propres famille et bien d’autres encore dans so lutte pour faire l’Islam triompher.

 

ANECDOTE: Ene de bane mauvais dimounes ki ti exister dans so l’époque c’était ene prêtre de Londres, en Angleterre ki ti declare ki li meme Bondié. (Ça li ene rappel aussi ki à l’époque de Hazrat Musa, ti ena Pharaon ki ti prend li comme Dieu). Alors Hazrat Ahmad (a.s) fine prié concernant ça prêtre là ki ti appelle Pigott et de ce fait li fine trouve dans ene rêve bane livres kot fine écrire 3 fois: “saint, saint, saint” et après li fine recevoir ene révélation en Arabe: “Allah sévère en punition. Zot pas pé agir correctement.” (Tadhkira)

 

Le Messie fine expliqué ki Pigott li dans ene mauvais position et ki li pas pou répenti et pas pou non plus croire dans Allah. De ce fait ça ene indication ki li pou recevoir ene mauvais la fin pour ça proclamation ki li fine faire là.

 

Hazrat Mirza Ghulam Ahmad (a.s) ti ene dimoune tellement pieux ki Allah ti pé écoute so bane duah et informe li lors condition de so bane disciples et bane les autres pour ki li ti pé prié. Mo pou mentionne quelques miracles de duah ki Allah fine témoigné en so faveur:

 

ANECDOTES:

 

1. Ene jour, Dr. Nur Muhammad ki ti ena ene l’usine ki fabrique médicine, so garcon fine tombe bien malade. Mama garçon là ti tellement affecté ki le Messie Promis (a.s) fine chagrin li et fine faire beaucoup duah pour ki zenfant là régagne so la santé. Effectivement kan li fine faire beaucoup duah, li fine recevoir révélation ki garçon là pour bien. Alors le Messie fine dire ça révélation là à bane dimounes ki ti proche de li et par la grâce d’Allah, zenfant là fine bien complètement.

 

2. Le Messie Promis (a.s) raconté ki li ti malade pendant plusieurs jours mais ki dépi 3 jours so bane garcons Bashir et Mahmud (r.a) fine gagne la fièvre fort. Li ti pé alle commence faire duah pou zot kan li fine rappelle ki Mufti Muhammad Sadiq et Maulvi Nur-ud-Din ti aussi malade. Alors li fine réssenti ki li bizin prié pour zot aussi. Alors li fine recevoir ça révélation là et ça révélation là ti vine en Arabe: “To duah concernant to bane disciples et to bane zenfants fine être entendu.”

 

3. Ene jour, li fine recevoir ene télégramme d’ene so vrai et camarade sincère Seth Abdur Rahman de Madras ki ti tombe bien malade et Hazrat Massih Maoud (a.s) ti bien tracassé avec ça situation là. Vers 9.00 du matin li fine rentre dans ene kashaf kot li fine recevoir ene révélation en urdu ki dire: ‘Signe de vie’. Couma li fine fini gagne ça révélation là, li fine recevoir ene l’autre telegram ki dire ki Seth Abdur Rahman so la santé mieux et ki pena nennié pour inquiété.

 

4. Ene l’autre fois, Massih Maoud so madame (Hazrat Nusrat Jahan Begum) ti tombe bien malade et fine gagne la fièvre fort. Alors Massih Maoud (a.s) fine recevoir ene révélation en urdu: “Joie et contentement”. Avant àsoir so madame fine bien.

 

5. Hazrat Massih Maoud (a.s) fine ene fois souffert de vertige et li pas ti capave faire aucaine zaffaire ni écrire so livre, ni concentré. Li ti pensé ki so la fin fine arriver. Alors dans ça condition là, li fine recevoir ene révélation ki bane capacités de so jeunesse pou révini. Ensuite li fine senti li assez fort, tellement fort ki li fine réussi écrire plusieurs pages avec so propre la main.

 

Par la grâce d’Allah, Allah fine démontré So grandeur kan Li fine envoye la Révélation lors so humble Messie. Pareil couma Jamaat Ahmadiyya Al Mouslemeen ti témoigné et aujourd’hui la Jamaat Ul Sahih Al Islam pé témoigné; à l’époque du Messie Promis Ahmad (a.s), li ti pé recevoir révélation de côté d’Allah en plusieurs langues. Pareil couma mo fine mentionné plus là-haut, li ti recevoir révélations en langue Urdu et Arabe – li ti pé aussi recevoir révélation en Persan, Punjabi, Anglais et Hindi.

 

Et couma tous bane musulmans Ahmadi conné; Allah ti annonce Hazrat Massih Maoud (a.s) la naissance d’ene fils promis et Réformateur Promis (Musleh Maoud). Allah ti donne li ça nouvelle là en ça bane termes là: “Ene de to bane garcons pou vine ene jour Mo Bien-Aimé. Depuis ça la lune là Mo pou enlève tous bane l’obscurité. Mo pou démontré ça à travers li. Mo fine tourne ene l’univers en entier. (Hazrat Massih Maoud dire) : “Ça bonne nouvelle là li ene nouriture (réconfort) pour mo lékaire. Saint est Celui ki fine humilié mo bane enemies.”

 

Ene anecdote ki rapporté par le Musleh Maoud (r.a):

 

Ena ene anecdote très intéressant ki rapporté par Hazrat Khalifatul Massih II, Mirza Bashir-ud-Din Mahmud Ahmad (r.a) ki indiqué commié Allah content So Massih (a.s) dans n’importe ki situation ki li été; Allah envoye So grâce et So révélation pour réconforte li. Le Musleh Maoud raconté:

 

“En 1907 le Messie Promis (a.s) ti pé gagne extra toussé. Kan li ti encore dans ça l’état là, ene camarade depuis dehors fine vini et fine amène pour li bane fruits comme ene présent. Mo fine mette fruit là devant li. Li fine guette fruit là et fine dire: Dire li: ‘Ki Allah récompense ou.’ Après li fine prend ene banane et fine demande moi si ça (banane là) bon pour li (à cause li ti pé gagne toussé). Mo fine réponne: ‘li pas bon’. Li fine souriyé et fine plisse banane là et fine commence mange li. Mo fine dire li: ‘Ou pé gagne extra toussé et ça pas bon pou toussé.’ Li fine sourire encore et fine contigne manger. Par stupidité, mo fine contigne répété ki li pas bizin mange ça; et de ce fait li fine sourire encore ene fois et fine dire: “Mo fine fék recevoir ene révélation (urdu): “Toussé fine enlever”, et dépi ça mo pena aucaine toussé.”

 

Alors azordi nous bizin honore bane paroles et pratiques islamiques du Messie Promis (a.s) en honorant le Quran et Sunnah de nous Bien-Aimé Rassool-é-Kareem Hazrat Muhammad (s.a.w). Allah faire séki Li oulé et personne pas pou capave objecter à la volonté d’Allah. L’Islam, meme après Moi (Munir Ahmad Azim) pou conne bane les autres hommes pieux ki pou vini de la part d’Allah pour réforme lékaire de bane dimounes et pour faire revivre bane ki fine morts spirituellement et pou donne réconfort à bane ki croire en l’unicité d’Allah, ki pareil couma Allah ti cozé par le passé, Li pé cozé azordi aussi et pour continié causer tous les temps.

 

Mo pou cite zot ene poème ki Hazrat Massih Maoud (a.s) fine écrire kot li pé adresse Allah :

 

“O Toi à Qui mo l’âme, mo lékaire, et tout mo lécorps li dévoué, ouvert pou moi par To grâce et To bonté tous bane la portes de To bane revelations. Ene philosophe ki rode Toi par so l’intelligence et so logique li pena aucaine raizonnement, car le chemin secret ki amène vers Toi li pli là-haut de tous bane intelligence et logique. Aucaine bane ki ena ça pas conscient de To presence sacrée; Tous bane ki fine gagne ça, fine gagne li zis par To grâce infini. En vérité To accorde tous les deux lémondes à tous bane ki content To Visage la lumière; mais dans lizié de To bane serviteurs et To bane bien-aimés, ça deux lémondes là ene nennié ditout.” (Chashma-i-Massih)

 

Nous faire duah ki nous tous ki présents ici et sans oublier nous bane les autres frères, sœurs et enfants du Jamaat Ul Sahih Al Islam ki trouve à l’extérieur ki zot reste ferme avec Allah et So serviteur choisi de ça siècle présent là et ki nous bane descendants conne aussi ça meme faveurs ki nous pé témoigné là et ki zot accepter avec ene lékaire pur et sincère ça Manifestation Divine ki pou vini là ziska le jour du Qayamat.

 

Nous continuer faire duah aussi pour l’âmes de nous frère et sœur Musalmane Ahmadi ki ti mari et femme, Dr. Shiraz Ahmad Bajwa et Dr. Noreen Bajwa ki fine assassiné le 14 Mars dans zot la caze dans Multan dans Pakistan, ene pays traite envers bane l’enseignements de l’Islam. Avant ki zot être tué, bane ki fine attack zot fine torture zot beaucoup. Nous bizin ressenti ene profond connection avec nous bane frères et sœurs ki fine mort pour zot Islam, pour zot la foi. Ki Allah ena pitié lor zot et lor bane Musulmans Ahmadi ki pure et sincère et ki tenir zot la foi dans Allah et So Rassool Muhammad (s.a.w) plisse ki tous bane zaffaires de ça lémonde là.

 

Li malheureux ki dans ene pays soi-disant Islamique, ki ça bane kalités dimounes là fine faire bane actes de barbarisme pareil couma bane Qureish ti faire avec nous bien-aimé Aka Hazrat Muhammad (s.a.w) et so bane suivants. Jour pas loin kot ene Azaab bien douloureux pour saisir le Pakistan. Allah pé amène zot vers zot destruction. Allah fine clairement dire dans Quran : « Laa Ikraaha fid-Deen » (Pena aucaine contrainte dans la religion) et aussi Hazrat Muhammad (s.a.w) fine dire ki l’Islam c’est ene la religion de tolérance, et fine expliquer aussi couma pou respecté bane les autres zot la foi. La tolérance dans l’Islam c’est ene vertu. Alors guette ki dégré de bassesse zot fine tombé ça bane soi-disant Mullahs et Gouvernement Pakistanais kot zot pas hésiter pou juge la foi de bane dimounes et tire la vie de bane dimounes ki fine amène Imaan lor le Messie Promis Ahmad (a.s). Zot fine bafoué bane vrais l’enseignement de l’Islam, kot zot fine mette zot égoisme et zot l’autorité de l’avant (zot donne ça priorité ki le Quran et Sunnah du Saint Prophète (s.a.w)). C’est ene la honte pou ene pays couma Pakistan, ene pays soi-disant islamique mais kan ou guetter et ou lire seki pé passer là-bas, c’est ene la honte pour l’Oummah de Hazrat Muhammad (s.a.w). Mo ti déjà donne le gouvernement Pakistan ene avertissement concernant ça bane tortures ki zot pé faire bane Ahmadi, mais zot fine faire sourd d’oreille, comme si dirai zot pas pé tende nannié, et mo pé dire zot maintenant, si zot pas arrête torture bane frères et sœurs Ahmadi dans Pakistan, bé laisse mo dire zot ki Allah So Azaab pas loin pou tombe lor zot, d’ene façon bien bien horrible. Mo conseille zot, alle faire Istigfaar avec Allah, et réforme zot conduite, et arrête torture bane Musulmans Ahmadi dans Pakistan et donne zot tous zot droit pou pratique le Deen-é-Islam pareil couma tous bane les autres citoyens et Musulmans de lézot sectes aussi. Lerlà Pakistan pou trouve ene lumière, kot li pou sorti de l’obscurité, sinon si zot vire lédos avec ça avertissement là, alors zot la fin dans tout so aspects  li pas loin !

 

Nous prier ki le Ummaté Mohammadiya (s.a.w) et l’humanité en entier vine enfin ene Ummaté Waahida (ene Seul Communauté) kot “Laa-Ilaaha Illallah” pour primer dans zot lékaire. C’était ça le vœu de nous Bien-Aimé Aka Hazrat Muhammad (s.a.w) et le voeu de Hazrat Massih Maoud (a.s) et avec l’autorization et l’ordre d’Allah, ça aussi mo voeu ki l’humanité en générale tourne vers ene sel Allah et adore Li ki so Créateur et ki Allah vine zot véritable Camarade.

 

Ki Allah (Tabaarak Wa Ta’ala) pardonne nous tous et aide nous pour reste ferme avec Li et So Rassool dans tous circonstance de nous la vie. Ameen.