Text Box: Bismillah-ir-Rahman-ir-Rahim

. KHUTBA JUMMAH
HAZRAT AMIR’UL MOMENEEN MUHYI-UD-DIN 
AL KHALIFATULLAH
MUNIR AHMAD AZIM

25 Juillet 2008

(Résumé du Khutba Jummah lor le Tawheed (2ème Partie))

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :

Ch.6 Al Anam V.163 & 164



Qul inna Salaatii wa nusukii wa Mah-yaaya wa Mamaati lillaahi Rabbil-‘aalamin: Laa shariika lah: wa bizaalika ‘umritu wa’ana awwa-lul-Muslimiin.

Dire zot: “Mo la prière, Mo dévotion, Mo la vie, Mo la mort, tout sa pou Allah, Maître l’univers entiers. Li pas ena associé. Ça, c’est l’ordre Ki mo fine gagné et mo le premier pou soumette a Li. 

Mo Allah, Li dissipe tous bane soucis, Li supprime tous bane tristesses, Li annule l’efficacité du poison, Li propage la lumière, Li faire ou victorieux, Li ene telle Souverain ki So Majesté pas capave décrire. Mo Allah Li conne l’état d’âme de So bane serviteurs, Li conne bane secrets de nous les cœurs, Li détruire bane tyrans, Li conne tout, narien pas capave cachiette Li et celui ki cherche So secours Li pou trouve So protection. Celui ki fine amoureux de Li, Li pour trouve zis Li même partout. Celui ki marche dans So chemin li pou sous So protection. Celui ki délaisse tous bane kitchoses ki Allah fine défende li faire, Li pou trouve Allah So aide. Alors, neque ena pour tape la porte d’Allah ! 

Et seki fine éloigner d’Allah retourne à Li. Si nous but c’est pour gagne le créateur, ki faire nous pé discute tant de choses lor le créature. Quand le plus honorable des hommes et l’homme le plus parfait, Hazrat Mohammad (s.a.w) celui ki fine vini comme ene bénédiction pou l’univers en entier pour faire conne le créateur. Alors chacun parmi nous bizin attraper sa la corde d’Allah là fort. Ki ça la corde là ça ? C’est le Tawheed ! 

Et si nous quitte ça chemin de Tawheed là, alors tous sa z’effort là dans vide. Nous pas pou gagne narien de sa. Alors quand nous faire éloge d’Allah, nous bizin faire nous l’intention et nous conviction vine plus ferme et solide. Nous bizin faire nous bane nouveau génération aussi réaliser ki tous bane z’effort ki nous faire, c’est pou la cause du Tawheed. Nous faire serment au nom Allah ki Unique, ki nous pou reste attacher avec le Tawheed dans ene tel façon ki même si zot coupe nous licou, ou bien coupe nous la main, avec ki nous attrape le Tawheed, mais zot pas pou capave coupe relation ki nous l’âme ena pour le Tawheed. Si nous remercier Allah pour So bane faveurs avec ene tel vigueur, alors mo ena la certitude ki aucaine la force de l’opposition pas pour capave intercale lors sa bane faveurs ki pé descende couma la pluie là! Bane dimoune lors la terre pas capave arrête bane récompense ki descende depuis lors le ciel, parceki sa li pas trouve dans la main de l’homme. Si nous mette ça dans nous la tête ki la corde d’Allah c’est le Tawheed, bé par la grâce d’Allah sa bane faveurs, récompense et manifestation ki pé descende dépi lors le ciel, li aussi ena le même caractéristiques, parceki sa la corde là c’est pas la corde du créature, c’est la corde du Créateur. Pou poursuive le sujet du Tawheed, mo ti pou envie cause ene ti peu lors le Chirk. Ki été Chirk ? Ki faire Allah jamais pas pou pardonne le Chirk ? 

Mais mo fine pense bane lezot question ki capave lévé de sa.  Alors mo fine penser ki li important pou explique  le Jamaat Ul Sahih Al Islam et faire analyse ki été le Chirk, et couma bane relation zot différent et distinct de Chirk, chacun ena l’amour pour so madames et so z’enfant, so camarade et en même temps li déclarer ena l’amour pour Allah aussi.

Est-ce ki tous sa l’amour la c’est signe de Chirk ? Est-ce ki Tawheed veut dire ki dimoune bizin prive li de tous les zot l’amour ? Si li conne sa alors le monde rempli avec bane Moushrik, bane idolâtres. Ou pas pour trouve aucun Mowahid aucun part dans le monde. Bane prophète aussi ti ena l’amour pour zot dimoune. Pas seulement pour zot famille et zot bane proche, mais zot ti ena l’amour pour bane étranger aussi. 

Alors ki sa l’amour ki appelle Chirk la et ki ça l’amour ki pas Chirk là ? Au contraire li ene signe de grâce du Tawheed. Ça sujet la, bizin claire pour zot tous. Et sa li  ena profond relation avec la survive et l’unicité dans le Jamaat Ul Sahih Al Islam. La question c’était ki faire Allah pas pardonne le Chirk ? Beaucoup bane religion du monde ena relation avec le Chirk. Dans Chrétienté et d’autre religion aussi ena le Chirk. Est-ce Ki nous capave dire, avec certitude, ki zot tous pour alle dans l’enfer ?

C’est Allah ki décidé ki sanla ena pour alle dans l’enfer – Pas l’homme, pas créature – Chirk fine pénétré dans plusieurs réligions de Tawheed. Et ena aussi plusieurs bane Mowahid dans bane religion des Moushrik. C’est la cause sa même ki humain pas capave décider ki suivants de tel et tel religion pour alle dans l’enfer, ki suivants de tel et tel religion pou gagne paradis. 

Deuxièment, ki dans Chirk, ou, ki dans Tawheed, ena des stages et de grade ki dans différent profondeur dans le cœur. Parfois si ou fouille le cœur ene Mowahid, ou alle trouver ki ena en peu Chirk dans fond, comme si je monte ene bâtiment de Tawheed lors ene fondation de Chirk. Parfois Tawheed là, li dominer. Ça c’est ene question très sensible ki nous bizin quitte lors Celui ki ena connaissance de l’invisible et du visible. Juste Allah ki conne ki sanla ki en vérité Moushrik et ki sanla ki Mowahid. Nous bizin gagne connaissance, d’après bane Sunnat de Hazrat Mohammad (s.a.w) et comprend ki Chirk été et ki Tawheed été, et nous bizin aussi comprend différence entre les deux, de sorte ki péna la moindre doute rester dans nous le cœur. Et ensemble nous bizin faire duah, parceki c’est Allah ki ena pouvoir lors tous kitchoses. Li capave puni celui ki li oulé et pardonne celui ki Li envie. 

Nous bizin lire : غُفْرَانَكَ رَبَّنَا وَإِلَيْكَ الْمَصِيرُ «  Ghufranaka, Rabbana wa ilaykal maswir » c.à.d : O Allah nous tourne vers toi pour le pardon, nous bizin tourne envers toi, nous péna aucun lotte chemin. Alors Ki nous bizin retourne kot toi-même, de Ki encore nous capave alle rode pardon, surtout car péna personne. Si nous comprend ça dans ça façon la et nous faire duah, alors mo ena certitude ki Insha Allah, Allah pou garde nous tous le temps ferme dans le Tawheed. 

L’amour pour le prophète (s.a.w), li pas contre le Tawheed. Au contraire li supporte le Tawheed. Pli nous montre l’amour pour le prophète (s.a.w), pli li ene signe de Tawheed. Ça li ene zaffaire logique et pas imaginaire. Ena ene relation entre le Tawheed et l’amour pour bane humains. Si en conséquence de l’amour pour quelqu'un ou l’amour pour Allah li augmenté, ça c’est pas le Chirk, c’est le Tawheed pure. Par contre, si en conséquence Allah So l’amour commence diminuer dans ou, image Allah pali dans ou vision, si ou commence reculer et l’amour pou humain conquérir ou le cœur, alors ça c’est pure Chirk et li péna aucaine relation avec Tawheed. Plus grand signe dans l’amour pour le prophète (s.a.w) c’est ki pli ou content li, pli l’amour pour Allah augmenter dans ou le cœur. Et parfois ça l’amour la crée ene certaine émotion ki faire bane croyant prononce bane paroles ki paraitre offensant, et nous penser ki li pé causer ! C’est ene zaffaire temporaire, parceki l’amour pou le prophète fine transforme dans ene tel intensité, ki ça dimoune la alle même oublier l’existence du prophète (s.a.w). 

Donc, le Tawheed ena grand relation avec l’amour pou le messager d’Allah. Si l’amour pou le prophète (s.a.w) augmente jusqu'à tel point ki ou commence quitte Allah, si ou penser ki Allah exister à cause Mohammad (s.a.w) et ki Allah pas ti ena l’autre choix ki content Mohammad (s.a.w) et si nous pense coume ça même, concernant les autres savants, alors tout la vie rempli de Chirk. Li impossible ki vrai l’amour pour le Saint Prophète (s.a.w) basé lors Chirk. Autrement, li pas vrai l’amour. Li possible ki fanatisme fine prend place l’amour. Parfois ene dimoune content quelqu’un ou ene kitchose a tel point et li vine si tant fanatique ki li flatter jusqu'à ene tel point, ki li perdi raison. Alors parfois zot flatte le saint prophète (s.a.w) pas par l’amour pou li, mais par fanatisme. L’affection pour le saint prophète (s.a.w) ena ene tel stage bien élevé, mais en meme temps bizin l’amour pour Allah reste toujours supérieur et bizin augmenter aller meme. Nous pas bizin penser ki Allah pas exister sans Mohammad (s.a.w), comme si Allah ti exister simplement pour créer le Saint Prophète (s.a.w) et après So divinité fini. C’est ene sujet bien sensible, mais quand il s’agit de Tawheed, nous bizin bien prend précaution. Guette dans le Ummat en entier, ou pas pour trouve ene l’amour ki pli grand ki l’amour ki Hazrat Massih Maoud (a.s) ti ena pour le Saint Prophète (s.a.w). Allah conne pli bien ki ene dimoune ena dans so le coeur. Par so bane poèmes, so lecture, so parole de nuit et jour, ene l’amour profond ki déborder, apart Hazrat Massih Maoud (a.s) ou pas pour trouve personne dans le Ummat. Aller, alle faire recherche guetter ou pour trouver ki Hazrat Massih Maoud (a.s) ti supérieur. Mais so l’amour pour le Saint Prophète (s.a.w) ti toujours servi Le Tawheed. Aucaine place, dans so l’amour pour Hazrat Mohammad (s.a.w), ou pas pou trouver la moindre trace de Chirk.

 Mais dans lézot dimounes zot déclaration de l’amour Chirk li apparent. Ena beaucoup de preuves pou démontrer sa, mais astère la mo ena des choses pli important ki mo ti pou content causer.   

Donc, au lieu de vrai l’amour profond et sincère pour  le Saint prophète (s.a.w), nous montrer fanatisme, alors ça c’est Chirk et li si tant bas ki li couma idolâtrie. Tout bane ki alle demande duah are bane saints, ki alle prier lor bane tombes, ki sacrifice zot propre la vie pour ça bane dimoune mort la, pour zot comme si Allah ti éna pour créer ça bane dimoune la même et Allah fine rempli tous So divinité dans zot. Astère c’est juste zot ki existé. Ou pas trouve zot ena aucaine l’amour directe avec Allah. Zot prier ene wali et so tombe, zot mette drap lor la, ça même tous la religion pou zot. Et quand zot fini mette drap et retourner, peu importe si wali là so nom dans zot le cœur ou non, mais définitivement péna Allah so nom dans zot le cœur. Tout longue zot la vie zot reste sans Allah. Si l’amour pour ene grand sage pas créer l’amour ardent pour Allah, ça l’amour la, li Chirk. Ça Chirk la fine détruire plusieurs Ummat. Guette la Chrétienté, fondamentalement zot ti ena même Chirk dans zot ki fine donne zot destruction éternelle. Quran explique ça bane signes la clairement. Si zot ti vraiment attaché avec le Tawheed, alors quand nek prend nom Allah, ene l’amour ti bizin levé dans zot le coeur, pareil couma ene amoureux tender pé prend nom so l’amour. Mais sa bane Moushrik la pas satisfait aussi longtemps ki avec le nom d’Allah ou pas prend le nom de Issa (a.s). Pour zot pas faire narien si ou prend nom de Issa sans prend Nom d’Allah, et en effet Issa (a.s) fine prend place Allah. Dans chaque nécessité, chaque tracas et pendant chaque problème le nom de Issa (a.s) vine premier entête, et Dieu le père fine attacher couma dire ene serviteur are sa. Sinon, pour zot (Chrétiens), c’est Jésus même ki possède divinité. Ça c’est signe de Chirk ki ancré dans profond zot le cœur et ki finalement détruire ene Ummah. Mille zot dire ki Allah Li ene, Li ena ene garçon, Li ena ene Saint Esprit ki fine manifester dans forme so garçon, mais en fait chacun so le cœur témoin ki li ene Moushrik, et pas avec Allah, mais avec Issa (a.s) ki « mo » (Chrétien) ena plis l’amour. Dans propage ça Chirk la, Saint Paul fine joué pli grand rôle. Li fine présente sa sujet la dans ene façon si philosophique ki ti embête dimoune, et bane la pas ti capave comprend. Bane ki ti content Jésus fine gagne l’appui philosophique et zot Chirk fine grandi. C’est ene sujet ki Saint Paul fine décrire dans ene lettre ki, « Jésus fine vine envers nous comme le fils de Dieu ». 

Dieu c’est Dieu, mais jusqu'à Qayamat Dieu fine donne tous So pouvoir dans la main de Jésus. Et avec sa pouvoir la lerla Li rassembler nous, li pé en fait rassemblé nous are dieu. Alors quand fine ena la question est-ce ki ça pour reste coumsa même ? A la fin so lettre li dire : Jour Qayamat ler tous dimoune fine rassembler devant dieu, Jésus pour vini et pou dire: «O dieu, mo pé rende toi to dignité et to pouvoir. Mo fine faire tous sa ki mo ti ena pour faire. L’heure la pour ena juste ene seul Dieu. C’est dommage ki avec bane philosophie banale comme ça zot fine détruire plusieurs Ummat. Et sa kalité ignorance fondamentale la existé partout et dans tout niveau et stage.

Bane dimoune ki content Hazrat Ali quelque fois zot alle un peu trop. Zot exagérer et zot donne li rang en comparaison avec rang de Hazrat Mohammad (s.a.w) et zot dire d’après principe fondamental, Hazrat Ali ki héritier de l’apostolat. En fait c’est Chirk dans Khilafat. Rappel ki ene Chirk donne naissance à ene lotte Chirk. Pareil couma la haine donne naissance la haine, coumsa même Chirk donne naissance à Chirk. Dans commencement zot faire so comparaison avec Hazrat Abu Bakar (r.a), après avec Hazrat Umar et puis avec Hazrat Usman, et finalement mette li dans grade supérieur, l’heure arrive jus’quà le Saint Prophète (s.a.w), zot dire ki c’est Hazrat Ali ki so héritier et li même bizin hérite tous bane qualité du Saint prophète (s.a.w) et fine faire testament en faveur Hazrat Ali. Apres zot fine faire testament en faveur Hazrat Ali. Apres zot traite ça sujet la dans ene tel façon ki, zot accepter ki Hazrat Mohammad (s.a.w) li ene Ameen (digne de confiance) ; mais pareil couma jour Qayamat Jésus pour rende Allah So divinité, zot fine faire testament la so phrase paraite couma dire Hazrat Mohammad (s.a.w) fine rende héritage à celui pour ki li ti appartenir. Mo donne quelque l’exemple couma zot exagérer. Dans bane difficulté et souffrance zot dire : « Ya Ali ! ». Celui ki dire sa li même dans meilleur position pour dire si pas li pé faire sa par l’amour pour Ali ou soit li pé faire Chirk. Etant donné ki nous pas Allah, l’heure nous guette sa la haut la haut, nous pas capave dire avec certitude ki sa c’est Chirk. Mais autant ki nous conné l’heure nous faire recherche lors zot tendance, c’est bien ene forme de Chirk. Si au moment de souffrance, au lieu pense Allah ou pense ene lotte c’est Chirk, li non seulement Chirk, mais li aussi ignorance, imbécilité et éloignement depuis kot Allah. L’heure demande zot, zot dire sa bane la ena relation avec Allah, Allah fine donne zot bane qualité et pouvoir extraordinaire et nous, nous prend avantage de zot. Parce ki Allah fine rapproche zot et donne zot certain pouvoir éternel.

Quran fine donne règlement claire lors là avec explication, le Ummat prend  Hazrat Muhammad (s.a.w) comme intercesseur, mais jamais dans difficulté li crier: « O Muhammad (s.a.w), toi donne nous tel affaire. Aucun Saheba, ni aucun Khalifat pas fine crier coume sa. Génération après génération fine passé et jamais kikaine dire : « O Muhammad (s.a.w),  Mo zenfant pé mort, sauve li. Mo la vie pé sorti, sape moi. Tous le temps fine addresse Allah directement. Quran fine enseigne nous sa clairement (Surah Al Baqarah V.187) : O Muhammad, annonce quand Mo banda appel Moi, demande a propos Moi, dire zot ki Mo près are zot.  Ici pena le mot : dire zot, mais c’est sous-entendu. Kan kikaine crier Moi, Mo tender et Mo réponde. Ici pas fine dire faire Muhammad (s.a.w) vine intermédiaire et demande avec li !

Quran so l’enseignements li claire et pena aucaine doute là-dans. Prétexte l’avantage tous ça là li fausse. Celui ki pense autrement li mette li-même dans l’erreur et noirté absolu et c’est pareil couma suicide.     
  
L’amour pour Hazrat Ali fine élève so grade khalifat et fine faire gagne grade Nabuwwat de Hazrat Mohammad (s.a.w). Apres fine dépassé et fine vine égale à Allah. Chirk commence lors éne ti point et finalement vine Chirk ouverte. Dans Shia zot Tafsir-é Safi, dans page 432 ena ene commentaire Surah An- Najm ki dire ki dans Amali Sheik Sadook (ene livre Hadith bane Shia), Hazrat Mohammad (s.a.w) fine raconté ki : pendant Mehraaj l’heure mo fine arrive bien près kotte mo créateur, ene la voix demande moi: «O Mohammad (s.a.w) parmi tout bane dimoune ki sanla to pli content ? Mo fine réponne: « O Allah, c’est Ali. »  ler la Allah dire moi: « O Mohammad, guetter. L’heure la mo (Hazrat Mohammad (s.a.w)) fine guette a droite are moi et mo fine trouve Ali ibn Abu Talib, couma dire dans Mehraaj Hazrat Ali ti alle avant Hazrat Mohammad (s.a.w) et ti pé ti pé assizé kot Allah. Dans ene lotte livre Tazguiratul a’imma, Hayat-ul-Qulub écrire : « Dans la nuit de Mehraaj, Hazrat Mohammad (s.a.w) ti trouve portrait Hazrat Ali dans Sidratul Muntaha, et ange ti pé faire so Sajda. Sidratul Muntaha ene limite ki aucun créature pas capave arriver. Personne autre ki Allah, même so bane serviteurs préféré aussi pas arrive là-bas. C’est dernière limite pour bane dimoune. Mais (d’après zot hadith) Hazrat Mohammad (s.a.w) fine trouve portrait Hazrat Ali et ange pé faire Sajdah.
 
Par sa mo pas oulé dire ki, Nawzobillah, tous bane Shia Moushrik et tous bane Sunni Mowahid. C’est ki mo oulé dire ki ene Chirk amène lotte Chirk, li grandi jusqu’à li détruire Oummat boute par boute. Pas prend Chirk dans n’importe ki grandeur li été, pour ene ti zaffaire.

Hazrat Massih Maoud (a.s) dire, ‘Nous paradis li dans nous Bondieu. Nous pli grand contentement li dans nous Bondieu parski nous fine trouve Li et nous fine trouve tout kalité beauté dans Li. Sa du bien la li vaut la peine gagne Li, quant même ene dimoune bizin donne so la vie, pour gagne li, sa rubis la li vaut la peine acheté quant même ene dimoune bizin fini li même pou gagne Li. O zot ki péna narien, galopé alle kotte sa la fontaine la et li pou assouvir zot la soif. Sa, c’est la fontaine la vie ki pou sape zot. Ki mo bizin faire et ki tambour mo bizin tapé pou faire sa annonce la ki c’est sa zot Bondieu, pou ki dimoune capave tendé ? Ki médecine mo bizin mette dans zot zoreille pou ki zot capave écouté? Si zot appartenir à Allah, reste assurer ki Allah pou certainement appartenir à zot. Écouté zot ki ena zoreille pou écouté : ki Allah oulé de zot ? Nek sa, ki zot vine pou Li tousèl et zot pas associé narien are Li ni lors sa la terre la ni dans le ciel. Nous Bondieu, c’est Li, ki vivant azordi pareil couma Li ti vivant tout le temps. Comme sa même Li causé azordi couma Li ti causé dans le passé, Li tendé couma Li ti pé tendé.’ Si ou penser ki Li nek écouté mais Li n’a pas causer dans sa l’époque la, sa li ene croyance vaine. En vérité, li faire tous le deux : li écouté aussi et li causer aussi. 

Donc tous séki considère zot membre Jamaat Ul Sahih Al Islam, nek kan zot pou vraiment marche lors la droiture et attrape la corde d’Allah fort (le Tawheed) l’heure la ki dans le ciel pou compte nous comma bane vraie Mouslemeen. Insha-Allah.  



« Lillaahi maa fissamaawati wal- arz : Innallaha Huwal Ganiyyul- Hamid. »

A Allah appartenir tout ce ki dans bane le ciel et la terre. Allah indépendant de tout, et Li mérite nous louanges. » (Ch. 31 Luqman V. 27)

RÉVÉLATION : 

Après Khutba, Hazrat Khalifatullah fine recevoir ene révélation en anglais de 15 minutes lor maintenir l’amour et le respect entre bane membres, afin ki zot travaillent ensemble, pour la propagation de l’Islam. Ensuite Allah fine donne ene sévère avertissement à bane ki pé calomnier, ridiculiser, et pé répande bane mensonges lor Hazrat Khalifatullah et bane membres du Jamaat. Ça message d’Allah là fine vini ki bane membres pena aucaine relation avec n’importe ki kikaine ki fine rejette la manifestation divine, et de ce fait zot pas bizin prend compte bane instructions de ça bane kalité dimounes là, et zot pas bizin attache l’importance à bane palabres ki ça bane malfaiteurs là, parski bane membres du Jamaat Ul Sahih Al Islam pena nannié à faire avec zot. Nous pena aucaine compte pou render avec zot. Allah fine choisir nous pour faire ene travail (So travail), et de ce fait bane membres du Jamaat bizin guette pli devant et bizin ignore zot complètement. Allah fine place les deux Oummoul Momeneenate à côté de Hazrat Khalifatullah, ki pou supporte le Khalifatullah et seki Allah fine décider, personne pas capave objecter avec le décret d’Allah. Ene duah fine descende de la part d’Allah pour l’équipe ki pé travaille lor le website du Jamaat.