Text Box: Bismillah-ir-Rahman-ir-Rahim

KHUTBA JUMMAH

HAZRAT AMIR’UL MOMENEEN MUHYI-UD-DIN
AL KHALIFATULLAH

MUNIR AHMAD AZIM

24 Octobre 2008

(Résumé du Khutba Jummah de plus de 1½ hrs)

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là, ki ene continuation de Khutba Jummah lor:

TAWBAH (REPENTIR)


Wallazina amilus sayyiaati summa taabuu mim badihaa; wa aamanuu inna Rabbaka mim badihaa la Gafuurur Rahiim.

Tandis ki bane ki faire des mauvais actions, mais après ça zot repentir et gagne la foi – eh bien, to Maître après ça Li pardonne zot et Li accorde zot So grâce. (Ch.7 Al-Arraf V.154)


Alam ya-lamuun annallaaha huwa yaqbalut tawbata an ibaadihii wa’annallaaha huwat-tawwaabur Rahiim.

Est-ce qui zot pas conner ki c’est Allah seul ki capave accepter repentir so bane serviteurs et ki recevoir bane sadaqa, et ki c’est Allah ki accorde nous So pardon et So grâce ? (Ch.9 At-Taubah V.105)


Fiihi rijaaluuyy yuhibbuuna ayy-yatatah’haruu. Wallaahu yuhibbul muttahhiriin.

Là-dans ena dimoune ki cherche purifier zot, et Allah content bane dimoune ki purifier zot. (Ch.9 At-Taubah V.108)

Innallaaha huwat Tawwaabur Rahim.

C’est Allah ki pardonne toujours et ki gracier. (Ch.9 At-Taubah V.119)

Après ki ene dimoune fine faire ene constatation de li-même ki li fine faire ene erreur ou li fine faire ene péché, donc ça par la « repentance » sincère et grâce au don de perfectibilité ki Insaan (dimounes) fine gagne ça faveur divine là.

Couma Allah dire dans Ch.24 An-Noor V.31 : « Tourne en repentir vers Allah, ou tous ki ena la foi, afin ki ou réussi (dans la vie) ». Kan ou analyse ça verset là, ou arrive à ene conclusion ki c’est ene invitation d’Allah ki pé adresse à tout le monde. (Pas désespérer).

Le mot « Tawba » (repentir) dans ene langage ordinaire, signifie « se tourner », mais comme terme théologique, li veut dire : Ou détourner lor bane choses mauvais et ki capave apporte  aussi ene blâme et ou détourne ou lor là et ou tourne ou vers bane choses louables. Pour comprend ça, le péché li faire ou éloigner de ou Rab, mais pour s’abstenir avec le péché kan ou pou étudier et pratique le sunnah du Saint Prophète (s.a.w) et kan petit à petit ou pé mette Rassool (s.a.w) so sunnah devant et en même temps ou pé rapproche ou avec ou Rab. Pareil couma Allah fine faire bane croyants comprend ki ou bizin kitte tous ou bane propre désire et comme récompense de ou Rab ou pou gagne le salut et bonheur.

Mais ça repentir (Tawbah) là li bizin, couma Allah oulé, ki li pure et sincère, couma Allah même fine dire dans Ch.8 V.66 (Surah Al-Anfaal) : « En ce moment, Allah fine allège ou fardeau, parce ki Li conné ki ena ene faiblesse. »

En effet, si nous repentir sincèrement, si nous faire nous Namaz ponctuellement sans nous alle dans le vice et bane péchés, et nous faire ene zeffort ki satan pas tente nous et nous assume nous responsabilité devant Allah en faisant le zikr temps à autre alors ena la possibilité ki doucement doucement nous pour éloigner avec ça bane péché là, et kan nous fine faire nous zeffort pour éloigner avec péché, c’est pour plaire nous Rab, et ça jusqu’à dernier souffle de nous la vie.

Kan zot faire ene kitchose, zot bizin faire li pour le plaisir d’Allah ; pas pour lizié dimounes. Mo fine toujours tendé kan mo ti tipti, dans bane classes Atfaal ki tout bane bon actions ki ou faire, ou bizin faire li pour le plaisir d’Allah tousel – même si bane membres de la famille pas conné à propos de ça bane bon actions là. Parceki tous ça bane bons actions là, ou faire li seulement pour Allah, et ou récompense pour avec Allah seulement.

O bane membres ki devant moi aujourd’hui, et bane les autres ki fine témoigne plusieurs nombres de bane signes de côté d’Allah, rappel ki meme dans Jamaat Ahmadiyya Al Mouslemeen, mo ti pé dire zot – dans plusieurs de mo bane Khutba Jummah (ene série de Khutba ki mo ti faire lor Surah Al-Hujurat), et bane les autres discours, ki faudé ki jamais ou vire ledos avec ene dimoune, et ou mock li kan li vine devant ou. Si ou faire ça, ou consequences pou bien grave. Astaire, imaginer ki kalité grave li grave kan ene dimoune kan li trouve le Messenger d’Allah et li vire so lédos avec li et moque li. Consékances de ça bane kalité dimounes là pou extrêmement grave, parce ki li calculé ki li pé vire lédos avec ça Messager là, mais en fait, li pé vire lédos avec Allah.  Tout bane ki fine calomnié moi, en tant ki ene humble serviteur d’Allah, et ki fine vire zot lédos et moque de moi, en vérité, zot consékances pou bien grave. Ene fois, Allah fine déjà dire moi et fine répète li kot Li dire ki kan Li pou attrape ça bane dimounes là (ki fine faire moi dutort dans tous façon) – ridiculise moi, moque de moi, blame moi – avec So punition, et ki kan Li pou faire moi trouve ça bane dimounes là zot consékances, mo pou gagne pitié pou zot, mais lerlà pou trop tard pou zot – parceki Allah pou fini attrape zot, et même si pou demande zot pardon, Allah pas pou pardonner. Dans l’époque du Saint Prophète de l’Islam, Hazrat Muhammad (s.a.w), ça bane kalité dimounes là ti exister, kot ti ena bane infidels et bane hypocrites ki ti pé mock li et lève zot la main lor li, mais Allah ti So protecteur. 

Ena ene anecdote kot bane Kafirs fine zoure nous bien-aimé Aka Hazrat Muhammad (s.a.w). Hazrat Abu Bakr Siddiq (r.a) ti avec li. Ça bane dimounes là fine continuer zoure le Saint Prophète, et tout ça létemps là, Hazrat Muhammad (s.a.w) fine garde so silence. Mais kan Hazrat Abu Bakr (r.a) pas fine capave tini ça bane insultes là, contre so bien-aimé prophète, li fine commence refute zot. Alors, kan li fine faire ça, Hazrat Muhammad (s.a.w) fine lévé et fine aller.  Hazrat Abu Bakr (r.a) pas fine comprend ki faire le Saint Prophète (s.a.w) fine lévé fine aller. Kan li fine demande li la raison, alors Hazrat Muhammad (s.a.w) fine dire li ki aussi longtemps, ki ça bane dimounes là ti pé zoure li, bane anges ti pé réponde pour li, mais kan li (Abu Bakr) fine commence réponde zot, bane anges fine zot fine aller. 

Alors, Allah definitivement pour defende l’honneur de So Messager, dans n’importe ki circonstance li été. Allah faire séki Li envie. Li envoye So Réprésentant dans ça le monde là pour toute l’humanité, pour ki bane dimounes capave prend compte le message ki Li envoyé à travers So Messager. Alors, mo invite zot tous pour alle repentir devant Allah (pour tous ou bane péchés parski l’homme fine être créer faible) et prend le droit chemin, et jamais tourne le dos avec le Messager d’Allah (n’importe kan Allah envoye So Messager), parski Allah pou vine so protection contre ça bane kalité dimounes là ki tourne zot lédos et calomnier li. 

Bane mal ki ti pé faire, nous bizin perfectionne ça avec le bien (par bane bons actions). La nécessité de repentir s’impose à tous dimoune, par l’idjma (consensus omnium). Allah content bane ki repentir et zot cherche pour purifier zot de zot péchés. En vérité Allah content bane ki tourne vers Li, Li content bane ki faire zeffort garde zot pure.

Bane ki faire Tawbah, ki adore Allah, faire louanges Allah, garde Roza, tourne devant zot Rab avec dévotion, prosterner devant zot Rab pour cherche So pardon et zot recommande les autres faire le bien et défendre pour faire le mal. Zot respecter bane limites imposées par Allah, zot apporte bane bon nouvelle à bane croyants.

Ça bane dimoune là, zot vine reconnaissants envers zot Rab et zot vine fidèles à la loi divine, et l’heure là même zot aussi recommande les autres faire le bien et défendre zot faire le mal.

Ça bane dimoune ki pé donne conseil les autres là, pour le bien, zot fine tellement goûte ça fruit de la miséricorde là et zot conseil les autres par vine dans ça condition là et zot donne l’assurance avec ene full conviction ki zot aussi zot pour gagne récompense de côté zot Rab. Nous Rab li pas ene Rab injuste.

Le Khalifatullah fine élabore encore plus ki ça lor le sujet de Taubah et fine explique beaucoup lor le Taubah ki nous pou Insha-Allah mette li lor website plus tard. Insha-Allah, la semaine prochaine le Khutba lor Taubah pour continuer.