Bismillah-ir-Rahman-ir-Rahim

 

KHUTBA JUMMAH

DE HAZRAT AMIR’UL MOMENEEN MUHYI-UD-DIN

MUNIR AHMAD AZIM

 

20 JUILLET 2007

 

(BAIT-UL-ZIKR – NORD DE MAURICE)

 

 

Après le Salaam, Tashahhud, Taouz et Surah Al-Fatiha, le Muhyi-uddin fine lire quelques versets de Surah Al-Furqan, V.58, 63, 64, 65, 66, 67, 73 & 74.

 

V.58: Met to confiance dans Celui qui toujours vivant, jamais pou mort. Faire so louanges, annonce So gloire. Li suffit pou toi et li bien informé des péchés de So bane serviteurs.

 

Alors ça c’est ene message très important, ene message pou bane croyants et aussi ene bon nouvelle pou zot, parce ki Allah dire mette ou confiance, partage tous ou problèmes et difficultés devant Celui qui toujours vivant, ki jamais pou mort. Ou, ou pou mort lor ça la terre là et ou pou alle dans Akherat, càd, que se soit lor ça la terre là ou ki se soit dans Akherat, ou la vie après la mort, càd, qui ou pou reste toujours avec Allah (swt), le Créateur de ça l’univers là, Celui qui fine donne ou la vie et qui après ou la mort, c’est vers Li même qui ou pou aller, pou ou rendre ene compte. Alors qui plus grand camarade qui ou capave partage ou problème et demande Li aide et place ou confiance. C’est bien ou Créateur ki fine donne ou ene le corps et ene l’âme, càd, Allah (swt).

 

Ou, ou pou mort mais Allah (swt) jamais Li pou mort. Li pou reste vivant éternellement. Alors si ou fine fini créer ça l’amitié là entre ou et Allah lor ça la terre là même, lor ça le monde ici-bas là, ki se soit dans ene difficulté ou dans la joie, alors Allah pou reste toujours avec ou et pou provide (donne) ou tous ou bane besoins et certainement ou pou gagne ene récompense dépi kot Allah. Mais astère là, couma ou pou faire pou créer ça l’amitié là, entre ou et Allah? Li très simple pou ou faire, ou pas pou ena pou dépense ene sou, ni ou ena pou mette terrain en gage, pas bizin nannié, juste bizin ene natte et ou Quran; ou bizin donne ou le temps pou faire  louanges Allah que se soit kot ou été. Et quand ou faire louanges d’Allah et ou faire Zikr Allah et ou annonce So gloire et en même temps ki ou faire ça, ou bizin obéir Allah dans tous kitchoses ki Li fine dire ou faire, ou faire. Faire So louanges pas seulement lor la lèvres, Non, mais ou bizin faire ça avec ou le coeur, totalement sincere. Et ou faire lézot bons travail et actions couma ‘Khidmat-é-Khalq’ (service à l’humanité). Dawa (amène dimounes vers l’unicité d’Allah), aide bane dimounes ki malade, ki dans souffrance. Alors, tous ça là li forme partie d’ene nécéssité et ene MUST pou ene croyant, qui croire dans Allah, ki li bizin mette ça en pratique. Et ça li ene zaffaire ki très très important pou ene croyant ki li bizin adopter ça bane l’attitudes là et tous ça là li forme partie d’ene acte d’ibaadat, d’adoration. Et Allah dans ça verset là Li continuer Li dire, ‘O prophète (s.a.w), Allah tout seul suffit pou le prophète, alors Li suffit pou tous bane croyants ki fine croire dans Allah et So prophètes. Si nous Créateur avec nous, bé ça même nous plus grand satisfaction, désir, plaisir, plus grand la paix et tranquilité, veut dire ki si nous Rab avec nous, alors tous ça là avec nous. Nous Créateur jamais Li pou abandonne ou. Dimounes capave quitte ou, rejette ou, pas aide ou, mais Allah jamais pas pou faire ça, ni Li pou trahir ou. Au contraire, si ou faire appel à Allah, Li pou vine vers ou et Li pou soulage ou, en enlevant tous ou bane difficultés et ou bane la peine. Pareil si ou faire ene ti pas vers Allah, alors Allah Li pou marcher Li pou vine vers ou. Et si ou marcher ou vine vers Allah, alors Allah Li, Li pou galloper vers ou. Qui qualité ou Seigneur Li bon, Li généreux, et guette ki manière dimounes ingrat envers so Maître. Mais juste bane dimounes ki ena ene la foi sincere pou capave comprend ça bane paroles divine là. C’est ça ki appelle Allah Li suffit pou ou. Assuremment Allah, Li le Connaisseur, Li conne tous le coeur de banes dimounes, et aussi ki péchés zot faire. Pas croire quand ou pé faire ene zaffaire secrètement ou bien ouvertement, Allah pas conné. Au contraire Allah Li conne tous péchés ki So bane serviteurs et créatures faire.

 

V.63: Bane serviteurs du Tout Miséricordieux, c’est bane qui marche lor la terre avec humilité et qui, quand bane imbecile adresse zot, dire à ça bane là: “Salut”.

 

Alors Allah pé dire, ‘O Mo bane serviteurs, càd, bane serviteurs du Miséricordieux, bane Ibaadur Rahman. Quand nous adresse Allah nous dire: ‘Ya Rabbi’, Allah dire: ‘Ya Ibaadi’ – càd, O Mo serviteurs, ki prier Li la nuit et le jour, faire So Louanges, glorifier Li, pense Li, que se soit dans moment tristesse, ou dans moment problèmes ou même la joie. Alors Allah dire Li plus avec So bane serviteurs ki quand zot marche lor la terre zot marche avec humilité. Zot marcher dans ene tel façon ki zot montrer ki zot humble, zot pas montrer aucaine fiereté ou l’arrogance, ça parce ki ça bane dimounes là zot ena la Miséricorde d’Allah lor zot et aussi Allah So faveur lor zot. Pareil couma ene pié (arbre) ki rapporte fruits, li pas lève so bane branches là-haut, mais li baisse li, parce ki li charger tellement avec ça bane fruits là, li près pou touche la terre pou li montrer so humilité.

 

Alors ene dimoune ki ena Miséricorde Allah lor li, li pareil couma ça pié là et quand li marcher li respecter bane créatures, dimounes  qui autour li et li faire zot le salaam. Mais seulement quand zot rencontre bane “Jahil”, bane imbécilea, ki kan zot trouve ou, zot tire tous zot les dents devant ou mais derrière ou le dos, zot mange ou la chair, zot faire ‘ribat’, faire palabres. Alors, quand bane dimounes  ki ena miséricorde Allah lor zot, alors quand zot rencontre ça bane kalité dimounes là, alors faire zot juste ene ‘salut’ et fini par la même avec zot.

 

Alors si zot essaye parle ou adresse ça bane kalité dimounes là, ki ena faveurs d’Allah lor zot bé ou aussi faire zot ene salaam. Et ki bien important, ki Allah pas fine dire à ça bane dimounes ki pieux là, ki faire ene salaam complet (Wa alaikum salaam Warahmatullah Wabarakaatuh), mais juste ene salut, car salaam complet, c’est salaam en même temps ene duah.

 

Alors pou ça bane kalité dimounes là, Allah pas pé dire faire zot ene salaam complet.

 

V.64: Zot passe la nuite, prosterné ou diboute devant zot Seigneur.

 

Après Allah pé cause lor ça bane qualités Ibaadur Rahman là, càd, Allah, le Tout Miséricordieux So bane serviteurs – kot zot été zot reste mazine Allah, zot Créateur. Ça bane serviteurs là zot prêt à faire tous qualités sacrifice. Même qui qualité l’hivers été, zot pou lever et passe zot la nuite à prosterner ou diboute devant zot Bon Dieu, Allah. Et surtout zot pas pou  paresse. Et kot tous dimounes pé dormi, kot li seul dans la nuit, li prosterner et so larmes couler et li adresse So Seigneur. Et à ça moment là, Allah Li descende dépi plus haute le ciel ki Li été, pou Li descende jusqu’à le ciel le plus bas, pou entendre so bane serviteurs – Pou entende zot demande pardon avec ene le coeur mou, lourd de douleur et très sincere envers zot Maître. Lerlà à ce moment là, Allah Li accepter tous séki So serviteurs là pé demande Li. Ça dimoune là li absolument couma ene planteur ki li pas attendre soleil lor so la tête pou li fouille la terre, pou li plante la grains ou sois pou li arroser.

 

Mais li vine tôt le matin li planter, li cultiver – Mais quand li plante ene la grain tout de suite li pas pousser, non plus li rapporte bane fruits tout de suite. Mais si arriver ki li fine planter et li fine aller aussi, càd, ki li fine quitte ça le monde là alors li conné ki li fine faire kitchoses pou so bane zenfants et so generations – pou ki zot capave gagne ça fruit de so labeur là. Malgré ki li fine faire ça pou so generations, mais li aussi li pou gagne so récompense avec Allah, dans Akherat (l’Au-Dela) beaucoup plus encore; doubler, triblé (Masha-Allah). Et ça bane qualités dimounes ki zot lever pou Allah, juste pou Allah, pou zot alle faire So louanges, glorifier Li et demande pardon pou zot péchés. Et ki surtout zot donne priorité Allah, zot Maître lor tous kitchoses, même zot quitte zot lili ki bien confortable, zot molton etc...

 

Alors ça bane dimounes là, assurément zot pou gagne ene grand récompense de côté zot Maître, l’Unique, le Genereux. Et quand zot faire ça, Allah même fier de zot, Malgré dans ki l’état zot été, zot lever, et si pas capave lever zot assizer. Si pas capave assizier zot allonger et faire signes bane mouvements du salaat avec zot lizié. Alors ça bane dimounes là, Allah content et fier de zot.

 

V.65: Zot dire: “O nous Seigneur, répousse de nous punition l’enfer, parce ki so punition dure toujours.

 

V.66: Ki mauvais la caze et l’endroit pou rester ça!”

 

V.67: Quand zot dépenser, zot pas ni jette zot l’argent ni faire avare, mais zot tenir zot entre les deux.

 

V.73:  Quand rappler zot bane versets Allah, zot pas montrer zot indifferents couma bane sourds et bane aveugles.

 

V.74: Et zot dire: “O nous Maître, donne nous femme et zenfants pou raffraichi nous lizié et faire de nous des examples pou bane qui suive bon chemin.

 

Alors zot demande Allah, O mo Maître, plus grand grâce et faveur ki To capave faire lor nous c’est ki To répousse To punition de l’enfer là lor nous. Nous bane dimounes rempli de péchés, ki à chaque minute, chaque seconde nous faire péchés. Si To ti ena pou puni nous même, alors dans ene fraction seconde même To ti capave détruire nous, et nous pas ti pou exister même dans ça le monde là. Alors O nous Créateur, nous demande Toi pou répousse de nous ça grand punition là, difé l’enfer là, li ene punition ki extrêmement douloureux et nous gagne crainte de Toi. Alors gagne pitié de nous O nous Maître et ki ça punition là li pas juste pou ene jour ça mais pour toujours. Ça c’est ça même duah ki ça bane dimounes d’Allah là faire pendant bane la nuite là. Et aussi zot demande pardon pou zot péchés et ki zot pas envie vine bane héritiers de l’enfer, car en vérité li ene très très mauvais la caze et l’endroit pou rester. Alors, ou trouver ki ça bane qualités dimounes là zot tellement ena ene la foi sincere en Allah ki zot prêt pou sacrifier tous séki zot ena dans chemin Allah ou pou Allah même, ki zot prêt pou dépense dans ça chemin là. Et surtout zot pas faire gaspillage avec zot l’argent, zot pas jette li dans bane zaffaires inutile parce ki zot conner c’est Allah ki fine donne zot ça, comme-ci c’est ene faveur d’Allah. Et zot dépense li kot bizin dépenser et zot pas peur pou dépense dans chemin Allah. Et zot tourne vers Allah pou ki zot capave métrize zot l’argent et surtout pou zot pas faire vantard, parce ki zot conner ki zot pou bizin rétourne vers Allah ene jour et zot pou bizin rende ene compte.

 

Et aussi bane croyants, bane Ibaadur Rahman, zot kan Allah So bane prophètes dire zot et faire zot rappel bane paroles et versets Allah, alors zot marcher, et obéir ça bane commandements et la loi veridique là sans aucaine discussion. Et kan cause parole Allah avec zot, zot pas montrer zot indifferent couma bane sourds et aveugles. Et zot écoute parole Allah avec attention, et ki en meme temps zot le coeur vine lourd et zot lizié rempli de larmes. Tandis bane ki sourds et muets, c’est pas physique mais c’est bane dimounes ki pas envie écoute ça bane paroles là kan cause ça avec zot couma dire bane paroles là pas faire l’effet lor zot et lor zot le coeur, couma dire zot na pas pé tender. Et kan montrer zot bane signes d’Allah, zot faire couma dire zot pas pé trouver. Alors ça bane serviteurs choisi d’Allah là, kan zot montrer et cause avec zot lor bane paroles et signes d’Allah, alors zot pas faire couma bane sourds et muets. Au contraire zot ki zot faire? Zot faire ça duahs là avec Allah; zot dire: ‘O nous Maître ... donne nous bane madames et zenfants – Faire zot vine bane bon dimounes ki kan zot tende ça bane paroles là, zot tourne vers Toi avec toute sincérité et ça encré dans zot le coeur, ki zot conne bane commandements, versets ki vine de Toi et aussi zot mette ça en pratique.’ Et kan ça missié là pé faire duah pou so bane madames et so bane zenfants, ki faire zot tourne vers Allah, alors kan li pé faire ça pou ki li capave gagne fraîcheur de so lizié, la paix de so lizié, couma dire li trouve so bane zenfants attacher avec deen, avec l’unicité d’Allah, avec Quran, lor bon chemin, alors couma dire li pé gagne ene la paix, ene fraîcheur dans so lizié. Et lerlà zot demande Allah ki faire zot vine bane l’exemples pou bane ki suive bon chemin (bane ki pieux, ki Muttaki), càd, bane ki croire dans Allah et So prophète.

 

Si ene Imaam faire ça duah là, lerlà li bizin dire: ‘O Allah! Faire moi vine ene chef juste pou bane dimounes ki pieux, bane mouttaki, non pas bane dimounes ki impure et malhonnete ou bane ki hypocrites, ki pas ena sincérité dans zot le coeur.’ Alors pense à ça bane duahs là et faire ça bane duahs là parce ki tous ça là pou amène nous dans chemin Allah meme séki Allah faire ki nous ena ene sincérité, et obéissance totale envers Li et ki nous dépense tout nous létemps dans travail deen parce ki ça meme travail ki nous pou recolter so fruit dans Akherat et ou zenfants ki pou vini après zot aussi zot pou gagne ça faveur et ça l’habitude là et ki Insha-Allah zot pou vine bane zenfants mouttaki. Si ou manière na pas bon, ou pé cultive bane mauvais manière alors normalement ça zenfants ki pou vini là, alors li pou cultive ça meme manière là. Alors nous bizin faire en sorte ki nous cultive bane bon l’habitude ki Allah faire nous vine bane dimounes ki mouttaki, pieux et humble. Et ki Allah enlève nous bane problèmes et mette nous lor le droit chemin. Insha-Allah. Ameen Soumma Ameen.