Bismillah-ir-Rahman-ir-Rahim

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

20 Février 2009

 

(Résumé du Khutba Jummah lors Zikr Allah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

 

« O bane ki ena la foi ! Ki zot richesse et zot zenfants pas détourne zot dépi Zikr Allah. » (Ch. 63 Al-Munaafiqun V. 10)

 

Bane ki agir coumsa zot bane perdants ! A la lumière de sa verset là, nous comprend ki bane bien matériels pou fini tandis ki Zikr Allah pou profite zot ici aussi et dans Akhérat et dans sa verset là, Allah pé donne ene sévère avertissement à bane ki amène Iman (la foi) lors Allah et So prophète (s.a.w), ki faire attention ki zot richesse et zot zenfants pas faire zot détourne dépi Zikr Allah. Si zot agir dans sa façon là, sans faire attention avec zot la foi, et zot occupe zot richesse plisse et occupe avec bane plaisir de zot zenfants plisse, sa pou faire zot détourne dépi Zikr Allah et amène zot vers zot perdition dans la foi (Iman) et zot détacher avec le Zikr.

 

Zikr Allah faire le cœur ene croyant (ki ena la foi) vine sensible et mou. Par contre ene dimoune ki li dire, li ena la foi lors Allah et So prophète, mais so le cœur attacher avec so richesse et plaisir so bane zenfants plisse, kot li occuper avec sa bane zaffaires là et li délaisse Allah, kot li pas faire Zikr, so le cœur vine sec et dur à cause chaleur intense ki sorti dépi so bane passions et désirs, avec comme resultat, kot tous zotte membres le corps vine également durs et zot refuse pou soumettre devant Allah.

 

Et si essaye pou faire sa bane parties le corps plier devant l’ordre Allah, et couma Allah (swt) fine dire dans sa verset la : « bane ki agir coume sa, zot perdants » ; en d’autre mots pé dire ki zot le corps vine tellement sec à cause péna le Zikr Allah, bé sa le corps là même vine tellement sec, couma du bois sec ki juste pou couper et brûler.

 

Chanceux à bane dimounes ki ena la foi ! Zot prend sa verset Quran là comme ene avertissement et zot ena la crainte d’Allah dans zot le cœur ; zot pas laisse zot richesse et zot zenfants détourne zot dépi Zikr Allah. Au contraire zot dépense zot richesse pou faire Allah plaisir et en plus de sa, zot engage zot dans Zikr Allah. Zot pas laisse zot richesse ou zot bane zenfants détourne zot dépi Zikr Allah et zot pas oulé vine bane perdants dans sa le monde ici-bas là, et dans Akhérat.

 

C’est ene réalité ki chaque dimoune engager dans zot bane l’occupation, que ce sois zot travail ki sa aussi li ene obligation pou zot rozi (manger-boire), dépenser lors zot famille, mais si zot consacré un peu le temps, tous les jours pou Zikr Allah, zot pou gagne bane grands récompense avec tiguite zéfforts ki zot pou faire. Vraiment, li pas difficile pou consacré ene heure temps dans vingt-quatre heures temps dans nous la vie pou pratique sa action extraordinaire là. Si nous guette bien, est-ce qui boucou le temps pas fini aller dans banes kitchose sans l’importance et inutiles ? 

 

Qui sa pou coute nous si nous sacrifier ene ti moment pou sa action très profitable là ? 

 

Dans ene Hadith rapporté ki Hazrat Mohammad (s.a.w) fine dire et sa Hadith là confirmé par Hazrat Abu Hurairah et Abu Saïd ; tous le deux confirmer ki zot fine tanne Hazrat Mohammad (s.a.w) dire : « Bane Anges entoure sa l’assemblé kot pé faire Zikr Allah, Rahmat Allah enveloppe zotte, Sakina déssane lors zot et Allah mentionne zot (avec fierté) parmi bane ki autour Li, (c.à.d) dans l’assemblée Anges.

 

Abu Zar (r.a) rapporté ki Hazrat Mohammad (s.a.w) fine dire : « Mo conseille toi pou développe la frayeur Allah, parceki sa même, racine tout bons actions, reste occuper dans Telawat Quran et dans Zikrullah, par sa moyen la to nom pou mentionner dans le ciel et li pou ene lumière pou toi dans sa le monde la, la plupart du temps reste tranquille pou ki to dire juste bane bons paroles et sa pou garde shaytan loin avec toi et li pou aide toi accomplir to bane devoirs religieux, pas rier boucou parceki sa affaibli le cœur et retire la lumière lors figure, prend toujours part dans Jihad parceki c’est ene signe de piété pou mo Ummat. Content bane dimounes pauvre et reste dans zot compagnie, guette toujours bane dimounes ki en bas toi, pas guette bane ki là-haut toi et (sinon) to pas pou reconnaissant envers Li (Allah), toujours garde (bon) relations avec to bane proche même si zot essaye pou casse li, pas hésiter pou cause la vérité même si li amer pou lézotte, pas gagne peur ki lézotte critique toi quand to pé obéir Allah, toujours rode to propres défauts et jamais pas rode défauts lézotte, pas critique lézotte pou défauts ki trouve dans toi. O Abu Zar, péna pli grand sagesse ki clairvoyance, pli grand piété (taqwa) ki reste loin avec Haram et pli grand noblesse ki bon manière (Akaba). »

 

Dans le 1er Hadith ena le mot « Sakina » ki fine mentionner, ki veut dire ‘tranquilité, la paix, ene grâce spéciale ki vine dépi Allah’ et aussi « Sakina » c’est ene l’état spécial ki inclure tranquilité, faveur, grâce ki déssane dépi le ciel avec Anges sous  commandement Divine, ki Allah (swt) donne l’ordre Anges pou envoye sa tranquilité (Sakina) là, dans le coeur So serviteur. Fine mentionner aussi dans plusieurs Hadith kot fine mentionne bane Anges ki faire partie ene groupe spécial ki fine gagne comme travail pou visite bane l’endroit et participer dans l’assemblées kot pé faire Zikr et aussi fine mentionne dans ene l’autre Hadith ene groupe de bane Anges, zot alle autour kot pé faire Zikr Allah et quand le Zikr Allah fini zot disperser et quand ene parmi zot (Anges là) tanne Zikr Allah quique part, li apelle tout so bane camarades et li dire : « Vine ici, nous fine trouve sa qui nous ti pé roder (c.à.d ene place kot pé faire Zikr). »

 

Alors, zot rassemblé dans sa l’endroit là et zot remplit l’espace ki ena entre la terre et le ciel couma fine mentionner dans bane les autres Hadith.

 

Mo profite quelques minites pou dire certain zaffaire lors bane Anges. Anges, zot péna aucaine penchant pou faire le mal, donc, zot toujours engagés dans Ibaadat, soumission et obéissance Allah, mais parcontre l’homme dans so nature même ena penchant pou le bien et aussi penchant pou faire le mal.

 

Quand nous analyse la vie de l’homme, nous trouver ki l’homme entouré avec tous qualité attractions ki pousse li vers négligence et désobéissance. En même temps, désirs et passions toujours circuler en dans li (l’homme).

 

Donc, quand l’homme faire Ibaadat, soumettre et reste loin avec péché malgré tout sa bane handicaps la, li mérite ene pli grand l’honneur et appréciation plisse ki bane Anges.

 

Quand tous sa bane tentations satanique là entoure l’homme, mais l’homme faire ene Jihad-é-Nafs extraordinaire pou pas laisse li tenter avec Shaytaan so bane jolie tentation ki li présente devant l’homme pou excite li pou vine dans so chemin, mais, malgré sa, bane ki ena la foi ferme dans tous zot bane Ibaadat et sans oublier le Zikr Allah, alors définitivement zot éna ene superiorité plisse ki bane Anges.  Et quand tandique bane Ange zot pas entouré avec bane mal satanique et péna aucaine désirs, passions satanique ki circuler dans zot, c’est sa ki tous les temps zot reste dans l’obéissance d’Allah et kot zot faire bane Zikr Allah n’import ki coté zot rassemblé dans sa place kot pé faire Zikr la et zotte rempli l’espace ki ena entre la terre et lé ciel.

 

C’est pou sa raison la, récompense dans Jannat pou bane ki ena la foi sincère, li entouré avec toute sorte qualité difficulté et obstacle pou l’homme ; pou sa raison la, quand l’homme fine soumette li complètement à Allah et Allah So bane commandement et montré ene l’obéissance totale envers Allah et pou li reste loin avec péché, malgré tout sa bane mauvais tentation satanique là, li reste engager dans Zikr Allah, à part bane lézot Ibaadat ki li faire.

 

C’est pou sa ki l’homme (ki ena la foi sincère lors Allah) mérite ene pli grand l’honneur et appréciation, kot Allah Ta’ala même montré So fierté, So contentement pou sa bane dimounes ki engage zot dans Zikr. Pou ou comprend sa bien mo raconte zot ene hadith, kot Hazrat Mohammad (s.a.w) fine demande bane Sahaba (r.a.) pou faire serment afin ki li sur ki péna ene l’autre kitchose à part Zikr ki fine faire Allah Ta’ala fier. Li fine confirmer ki c’est bien à cause Zikr ki Allah Ta’ala ti pé montré so fierté et contentement pou sa bane Sahaba là, kot Allah fine accepter zot Ibaadat et zot Zikr kot zot fine gagne bon nouvelle dans sa lé monde ici bas là, ki zot Zikr fine vine ene source de « fierté pou Allah Ta’ala ».

 

Ici fierté Allah Ta’ala veut dire ki Allah Ta’ala addresse avec bane Anges dans sa façon  là. Guette sa bane dimounes là ! Malgré zot Nafs, malgré Shaytaan ki toujours derrière zot, malgré zot l’envie, malgré nécessité le monde ici-bas ki toujours poursuivre zot, malgré tout sa, zot occuper dans faire Mo éloges, tout sa bane obstacles là pas empêche zot pou faire Mo Zikr ; par contre zot (bane Ange), Zikr et Ibaadat, li pas vine ene obstacle pou zot comparé avec l’homme parski l’homme li entouré avec toutes sortes kalités tentations sataniques.

 

Mo arrête là-même pou azordi. Ki Allah donne sakaine parmi nous le Tawfiq pou nous engage nous dans bane Ibaadat et surtout Zikr Allah beaucoup plisse.  Ameen