Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 19 Décembre 2008 (Résumé du Khutba Jummah de 1 1/4 temps) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset suivant là: CH.2 AL BAQARA V.209  “Yaa ayyuhallazina aamanud khuluu Fis-silmi Kaaffah wa laa tat’tabi uu khutuwaatish shaytaan. Innahun lakum aduw-wum Mubiin.” O ou ki ena la foi, entre dans Islam complètement et pas suive les pas de Shaytaan, parceki ouvertement li ene ennemi pou ou. L’Islam contrairement à certaines croyances, li pas juste ene système de foi et d’adoration, rites et cérémonies, mais c’est ene mode de vie complet. C’est la raison pour laquelle chaque Musulman besoin accepter L’Islam pleinement (Ch. 2 V 209). Pareil couma fine dire dans verset Quran ki mo fine récité là-haut, kot Allah pé dire : « O ou ki ena la foi, entre dans Islam complètement et pas suive les pas de Shaytaan, parceki ouvertement li ene ennemi pou ou. » De ce fait Allah demande ene soumission complète et totale. Quand quelqu’un accepter L’Islam li besoin engage li à obéir à bannes commandements dans n’importe ki situation excepté kot ena Shirk et péchés. L’islam mette beaucoup l’emphase lors bonne conduite ki capave atteindre par bon utilisation bannes mots soutenue par bannes bon actions. En fait L’Islam c’est porte flambeau de sa bannes bons actions ki rende nu séjour dans sa la terre, dans sa le monde là agréable. Pou nous séjour vine agréable dans sa lémonde là, nous besoin ena bannes bonnes conduites. Rassoollullah (s.a.w) ti divise sujet bonne conduite en deux parties : 1. Droit Allah 2. Droits bannes humains DROIT ALLAH (Haquq-Ullah) DROIT ALLAH (HAQUQ’ULLAH) OU ACTES D’ADORATION ET ARTICLES DE FOI Droit fondamental Allah c’est acceptation de So l’unicité absolue ki veut dire ki péna l’autre Bondieu apparte Allah et Muhammad (s.a.w) So messager. L’Islam insister ki bannes croyants accomplir tous bannes actes d’adoration et ki zot reconnaissants envers Allah (Ch. 2 V. 153) : « Donc rappel Moi, Mo pour rappel zot et gagne reconnaissance pour Moi, et pas vine ingrat envers Moi. » Bannes peuples fine instruire ki la pratique religieuse rapproche zot avec Allah. Pratique qui nous Créateur attane de nous zot : Namaz, Roza, Hajj, Zakaat, Qurbani, Sadaqa etc… DROIT HUMAINS (Haquq-Ul-Ibaad) DROIT BANNES HUMAINS (HAQUQ-UL-IBAAD) Bannes peuples fine instruire pour respecter droits les autres. Fine demande bannes zenfants (garçons et filles) pou complète zots devoir envers zots parents. Ene femme li besoin redevable envers so mari. De la même façon ene mari, besoin comporte li couma ene homme prudent et avisé et pas bagarreur. Li besoin aussi veille à l’intérêt so femme. Bannes voisins aussi ena zot droits ki besoin respecter. Bannes frères besoin respecter droits bannes sœurs et bannes familles besoin respecter les autres et faire zot respecter. En fait comportement idéale li ene de bannes sujets le plus important dans l’enseignement Islamique. COMPORTEMENT IDEALE Islam fine montré nous ki bizin ena ene comportement idéale. Comportement idéale demande garde bannes meilleurs relations avec bane humains et ena bon considération pour zot. Comme le Saint Prophète (s.a.w) fine montré nous la base de l’islam, c’est développe l’entente mutuelle, l’harmonie et l’unité parmi bannes humains. L’importance ki l’islam fine donner à bon comportement li pas égale par rapport à n’importe ki l’autre religion. L’importance ki Quran Shareef donne à bon comportement capave comprend par Verset 59 dans Surah An-Nisa. « Sans doute Allah ordonne zot pou remette bannes dépôts à bannes à ki sa appartenir, et ki quand zots juger parmi banne dimounes, juge avec la justice. Sans doute, couma ene bon conseil Allah pé donne zot. Sûrement, Allah (Li) tendé, Li observe tout. » Sa Verset là mentionne deux aspects de bannes bonnes conduites : 1. Retour du bien à so propriétaire légitime - Amaanat (ene zaffaire ki ene dimounes fine confier ou pour garder pou li, et ou pas faire malhonnête avec sa, et ou surveille li couma Allah (twa) fine enseigne nous); 2. Dans tout décision besoin ena la Justice. AMAANAT : Ene personne ki garde Amaanat li besoin honnête et digne de confiance, li besoin commande le respect et li besoin de bonnes réputations. Bannes dimounes besoin capave faire li confiance et garde zot dubien en so possessions sans tracas. Dans sa contexte là sa Verset Quran là bien claire ki besoin rendre à zot proprietaire légitimes tous du bien ki pour zots. Bannes personnes ki obéir sa l’ordre la zot respectées en société. Rassoollullah (s.a.w) fine montre nous couma pour faire. So bannes pires ennemis pas ti hésiter pou quitte zot du bien avec Li et en retour Li ti honore so réputation même quand bannes la ti faire li quitte so l’endroit, li ti faire li ene devoir pou retourne zots, zots Amanat, même si pou faire sa li ti besoin mette en péril la vie so cousin Hazrat Ali (r.a). Apparte guide pratique, Rassoollullah (s.a.w) ti insister lors l’importance bonne conduite bannes individus. Hazrat Umar (r.a) dire : « Pas laisse ou embêter par Roza et Namaz ene personne, mais le plus important c’est si sa personne la ene Amine (celui ki digne de confiance ou celui ki garde Amaanat et li pas faire malhonnête kot li cokain la sueur d’ene travailleur ki fine travail temps des années, et ki même après ki envoye li détrois lettres pour gagne so la sueur, li pas refuser et li pas dire ki « mo pé donne seulement ene « ex-Gratia ») honnête. Celui ki pas respecter sa, li pas ene vrai Amine. LA JUSTICE : Second aspect de comportement idéal c’est pour faire la justice. C’est ene aspect ki ena bien relation avec premier aspect - Amaanat. Nous nomme ene juge seulment quand nous ena confiance totale en li, nous assure nous ki li honnête et li ena bon caractère. Naturellement kan ena deux personne alle kot ene juge pou gagne ene décision lors zot différent, zot oulé qui juge la, li honnête, véridique et qui capave faire li confiance et li plus capable (qui li ena la capacité de juger sans faire bane préférence) qui zot. Si juge la mal jugé, et pas faire la justice, li ene oppresseur. L’islam pas approuve l’injustice (Ch.4 V.59) : « Sans doute Allah ordonne zot pou remette bannes dépôts à bannes à ki sa appartenir, et ki quand zots juger parmi banne dimounes, juge avec la justice. Sans doute, couma ene bon conseil Allah pé donne zot. Sûrement, Allah (Li) tendé, Li observe tout. » Rassoollullah (s.a.w) ti mette beaucoup l’emphase lors l’enseignement de sa grand qualité ki la justice. Li même li ti personnifié la justice. Ena plusieurs hadiths authentique kot Li fine faire la justice dans n’importe ki cas sans prend en considération rang, statut, etc. Fine rapporté ki ene fois quand Hazrat Usama (r.a) ; fils de Hazrat Zaid (r.a) ti essaye pou faire ene représentation dans ene cas de vol, Rassoollullah (s.a.w) so visage béni ti vine rouge et li ti demander si Hazrat Usama (r.a) oser faire ene représentation concernant mise en pratique ene punition ordonné par Allah ? Rassoollullah (s.a.w) dire ki ene bannes raison destructions banne communautés (religions) avant, c’est ki quand ene respectable ti pé faire ene faute, pas ti faire li narien, mais kan même faute ti faire par ene personne normal et pauvre, ti pé condamne li. Rassoollullah (s.a.w) faire serment par Allah qui même si so tifille, Fatima (r.a), ti faire ene vol, li ti pour sans doute donne l’ordre pour qui coupe so la main. EXAMPLE PRATIQUE L’example pratique de sa l’enseignement là ti mette en avant par Hazrat Umar (r.a). Ene madame ti présente li dans la cour rempli de bane personnes et dire : « Mo demande la justice depuis ene personne ki so garçon ine déshonore moi. » Sa ti ene crime ki, si prouvé, li appelle punition cent coups fouets. Ti ena ene personne ki li tende Rassoollullah (s.a.w) dire ki même si so tifille, Fatima (r.a), ti faire sa faute là, li ti pour sans doute donne l’ordre pour qui coupe so la main aussi. Hazrat Umar (r.a) appelle so garçon dans la cour et demande Li : « Est-ce ki to fine faire sa crime là ? » So garçon fine admette et le Calife (Hazrat Umar) fine donne l’ordre ki so garçon ti besoin gagne punition pour so faute. Ti ena sensation dans la cour et ene courtier dire : « O Amir’ul Momineen, l’histoire pour écrire pou tous létemps ki pou vinni, ki garçon ene calife ti faire sa crime la. Est-ce qui sa pas pour donne mauvais nom à Musulmans et spécialement ou même ? » Hazrat Umar (r.a) réponne li dans ene ton dure : « Rappelle, to capave gagne ene bon renom, et respect, juste en obéissant to créateur. » Fine fouette garçon Calife et li fine mort avant ki termine so quantité coup de fouette. Fine complète so punition lors so cadavre. L’heure le papa (Hazrat Umar (r.a) fine vine près cotte lécorps so garçon, prend so la tête dans so ‘godi’, pleurer et prier : « O Allah, c’est nous devoir pour obéir Toi et li à To discrétion pour pardonne nous, mo demande Toi pardon pour mo garçon. » L’Islam fine prêche la justice dans ene façon doux et le Musulman capave pratique li dans la même façon. Souhaiter ki nous tous capave vine banne vrais Musulmans et faire nous problèmes que ce soit familiale, national ou ayant trait au monde musulman pour capave résoudre. Qui Allah inculquer dans nous sa grande qualité de justice qui capave amène nous tous lors chemin progrès et la joie. Bannes Verset Quran dans Surah Bani Israël mette grand l’emphase lors l’importance de bannes bonnes conduites, couma Allah dire dans Quran Shareef (Ch.17 V.24-39) : Et to seigneur fine ordonné ki, zot besoin pas prié personne excepté Li Allah, et faire du bien envers mama, papa. Si ene parmi banne là, ou bien tous les deux vieillit devant Toi, alors pas dire : ‘ ouf’ avec banne là, et cause avec douceur avec zot. Et étale le bras d’humilité pou banne là avec sensibilité du coeur, et dire (faire doah) : ‘ O mo Seigneur ! Gagne pitié lors zot couma zot fine nourri moi kan mo ti encore zenfant.’ Zot Seigneur conne bien ce qui ena dans zot les cœurs. Si zot banne pieux, eh bien sans doute Li (Allah) Li pardonner pour banne ki repenti. Et donne banne proches zot droit, et ainsi à banne pauvres, et banne voyageur, et pas faire dépense extravagants. Sans doute, banne ki faire extravagance, zot banne frères Satan et Satan li ingrat à so Seigneur. Si to tourne figure avec banne là en cherchant bénédiction de to seigneur, ki to ena l’espoir pou sa, eh bien cause avec zot ene parole gentille. Et pas laisse To la main serrer vers to licou (comme ene avare), et ni ouvert li complètement sinon To pour reste assizé, blâmer et fatiguer. Sans doute To seigneur accorde bane provisions à bane ki Li oulé, en grande quantité ou bien en quantité restreint. Li au courant et observe So banne adorateurs. Et pas tuer zot zenfants par frayeur de pauvreté. Nous pou donne zot, zot provisions pareil couma Nous donne ou. Touye zot, sa ene grand péché. Et pas approche avec l’adultère. Sans doute sa c’est ene indécence et ene très mauvais chemin. Et pas tire aucaine la vie ki Allah fine rendre sacré, excepte par la justice. Pou celui ki gagne touyé injustement, Nous fine donne so héritier l’autorité (pou demande dommage). Mais faudrait pas ki li exagérer, kan ena ene meurtre, parce ki li pou gagne aide. Et pas approche du bien de l’orphelin, excepté par ene façon ki meilleur jusqu'à li arrive so maturité. Complète ou engagement, parski bizin rendre compte pou tout engagement (ki ou prend). Et donne mesure correcte kan ou mesurer, et pèse avec ene balance exacte. Sa, li pou ena ene meilleur et plus joli résultat (le jour du Jugement). Et pas galoupe derrière séki pas concerne toi, parski to z’oreilles, to lizié, to lécoeur, tout sa pou bizin rendre compte. Et pas marche lors la terre comme ene vantard. Sans doute, jamais to pour capave fendre la terre, et ni to pour capave arrive jusqu’à hauteur montagne. Tout sa ena so mauvais côté ki pas faire plaisir à to Maître. Sixième partie Surah Al Baqara avise nous plus. Dans Ch.2, V.178, Allah dire : « La dévotion (c’est pas seulement) si ou tourne ou figure vers soleil levé ou vers soleil couché, mais la vrai dévotion, c’est kan quelqu’un accepter Allah, le dernier jour, bane anges, le livre et bane prophètes, kan par amour pou Allah li partage so du bien avec so parents, bane orphelins, bane pauvres, bane voyageurs, bane mendiants et bane esclaves. Li besoin aussi pratique la prière, donne la charité (zakaat), complète bane engagements ki li faire, supporter dans la peine, dans malheur et dans bane moments difficiles. Sa bane là, zot vive dans la vérité et dans chemin Allah. » Surah Al-Hujurat (Ch.49 V.10-14) donne plus guide lors banne conduite : « Et si deux groupes de banne croyants faire la guerre entre zot, essaye faire la paix parmi zot. Et si ene des deux groupes dépasse limites, contre l’autre, combatte groupe ki dépasse limite là, jusqu’à ki li accepter l’ordre d’Allah. Si li accepter, faire la paix entre zot avec justice. Faire l’égalité, parski Allah content bane ki faire l’égalité. Certes bane croyant zot frères. Etabli réconciliation entre zot frères. et craindre, pou ki ou gagne So miséricorde.  O bane croyant ! Ki ene groupe pas moque ene l’autre groupe. Possible ki sanlà meilleur ki l’autre groupe là. Pas laisse bane madame moque les autres madames. Possible ki second groupe la meilleur ki premier groupe la.  Et pas diffamer entre ou, et pas lance l’un à l’autre bane sobriquets (bane mauvais noms). Couma mauvais ene nom vicieux à kikaine ki déjà ena la foi ! Bane ki pas répentir, zot de vrais malfaiteurs. O bane croyants ! Reste loin beaucoup dépi doute. Certes certain doute li péché. Et pas espionner et pas médire (cause derrière les dos) les uns des autres. Est-ce qui ene parmi zot ti à content mange la chaire de so frère mort, zot ti pou trouve li horrible. Ena la frayeur d’Allah. Allah li pardonner et li miséricordieux. O bane dimounes ! Nous fine crée ou d’ene mâle et d’ene femelle, et Nous fine faire de ou bane nations et bane tribus, afin ki ou faire connaissance entre ou ; et li plus noble parmi ou dans lizié Allah, c’est celui ki suive plus près So chemin droit. Allah conne tout et Li bien informé. » Dans Surah Al-Arraf (Ch.7 V.200), Allah fine décrire bonne conduite comme suite : « Accepte séki dimoune donne toi de raisonnable, ordonne séki raisonnable et tourne lédos à bane imbéciles. » Dans Surah Al-Imran (Ch.3 V.135), Allah dire : « Banne ki dépenser dans chemin Allah dans moments de prospérité et dans difficulté aussi, et ki zot retenir zot colère, et zot pardonne banne dimounes. Allah content bane ki faire du bien. » Banne Versets ki cité plus en haut indique nous clairement, en détail grand l’importance ki fine accorde à banne bonnes conduite et manière. Fine ordonne nous pou adopter sa bannes valeurs là pou gagne respect et grandeur dans le monde. Jour Qayamat, sa bannes qualités là pou aide nous. Fine aussi ordonne nous pou reste loin avec bannes choses ki faire nous perdu nous dignité. De l’autre côté, ene personne ki pas occupe bane pauvres, ki maltraite banne orphelins et mal servi zot du bien, faire crime, commettre adultère et faire tyrannie et oppression li pas considérer en société et la société pour haïr ene tel personne. C’est la raison pou laquelle li traiter comment ennemis du peuple et le peuple, la guerre contre li. Sans retire li de la société, pas capave redresse la société. HADITHS Apparte Versets Quran, ena plusieurs Hadiths ki mette l’emphase lors l’importance bonne conduite. Nous pou essaye étudier quelque uns. Hazrat Abu Darda (r.a) rapporter ki Rassoollullah (s.a.w) fine dire : « Jour Qayamat pas pou ena narien dans balance ki plus lourd ki bonne conduite. Sans doute, Allah pas content banne ki faire bane magouilles (pou passe bon). » Signification sa Hadith la c’est ki jour du Qayamat, juste banne bon actions ene personne ki pou vine à so secours et parmi sa banne actions pou ena bonne conduite ki pou bénéficier li. Ummoul’ Momeneen Hazrat Aisha (r.a) rapporté ki Rassoollullah (s.a.w) fine dire : « Sans doute Allah Li Pardonneur et Généreux et parmi tous vertus Allah plus content Générosité. » Dans ene l’autre Hadith Hazrat Anas (r.a) rapporté ki Rassoollullah (s.a.w) fine dire : « Vive bien avec bannes dimounes, pas agir sévère. Toujours amène bon nouvelles et pas crée la haine. » Hazrat Abdullah Ibn Umar (r.a) rapporter ki quelqu’un ti demande le Saint Prophète (s.a.w) ki acte ki meilleur devant lizié Allah. Li fine réponne ki le meilleur acte c’est ; « donne la nourriture à ene affamé et faire salaam à ene personne même si to pas conne li. » Hazrat Umr Ibn Shouaib (r.a) rapporte sa bane mots là de Rassoollullah (s.a.w) ki li fine dire : « Ene personne li pas parmi nous si li pas ena pitié lors banne petit et respecter banne vieux. » Ene l’autre hadith rapporte par Hazrat Anas (r.a), Rassoollullah (s.a.w) fine dire : «  Si ene jeune respecter ene vieux à cause so l’age lerla Allah aussi pou faire li être respecter kan li vine vieux » Hazrat Abdullah Ibn Umar (r.a) rapporté ki Rassoollullah (s.a.w) fine dire: « Si ene personne prive n’importe ki de so travail (moyen de subsistance) li assez pou faire li vine ene pécheur. » D’après sa bannes hadiths la, nous Rassoollullah (s.a.w), montrer nous ki bonne conduite constitué comme suite : Nous besoin traite les autres avec gentillesse et crée facilités pou zot, pour dire bannes choses ki faire les autres joyeux ; pour reste humble devant les autres ; pas fier, pas agir brutal avec les autres, offert mange, et jamais essaye pou faire quelqu’un vine chômeur. Nous Saint Prophète (s.a.w) fine aussi enseigne nous plusieurs les autres façons pou améliore nous conduite. Mais est ce ki ou pas penser ki en pratiquant sa banne bon qualité là nous pou vine banne personnes idéales ? Rassoollullah (s.a.w) pas fine juste donne l’enseignement mais fine aussi comporte Li d’ene façon exemplaire pas juste avec so peuple mais aussi avec banne étrangers, ki évident dans bannes exemples ki suive :- EDUCATION PRATIQUE Hazrat Abu Huraira (r.a) rapporté ki «  kan ti présente nouveau fruits à Rassoollullah (s.a.w), en premier Li ti demande doah pou bon récolte après li ti distribuer fruits là parmi banne zenfants. » Hazrat Abdullah Ibn Umar (r.a) rapporté ki quelqu’un ti demande Rassoollullah (s.a.w) combien de fois nous besoin pardonne nous serviteur ? Le Saint Prophète (s.a.w) réponne ki nous besoin pardonne serviteur soixante fois par jour. Hazrat Sahal Ibn Saad (r.a) raconté ki ene fois ene madame ti présente ene la toile ki ti faire par li au Saint Prophète (s.a.w). Ene jour ki Rassoollullah (s.a.w) ti mette sa linge la, ene Sahabi fine remarquer : « O Prophète d’Allah (s.a.w), mo content çsa linge là. » Rassoollullah (s.a.w) fine alle la caze tout de suite et fine change so linge et fine donne li (Sahabi là) sa linge la, linge ki li ti content et ki ti lors Rassoollullah (s.a.w). Hazrat Bilal (r.a) ti trésorier du Saint Prophète (s.a.w). Ene jour Abdallah Hawazni (r.a) ti demande li lors condition la caisse. Hazrat Bilal (r.a) réponne : « Jamais nannié pas reste dans la caisse. Kan ena ene demande d’aide, Rassoollullah (s.a.w) demande li, Bilal (r.a), pour aider. La plupart du temps mo ti besoin prend loan pou obéir l’ordre. Très rarement ene personne ti quitte la cour Rassoollullah (s.a.w) avec so demande pas agrée (accepter). » Pendant la guerre Uhud l’ennemi ti cause beaucoup troubles et misères. Même le Saint Prophète (s.a.w) ti blessé et so lédent ti endommagé. Ene Sahabi ine vini et demande Rassoollullah (s.a.w) pou donne malédiction l’ennemis là. Même dans ene moment pareil le Prophète (s.a.w) ti faire sa duah là: « O Allah pardonne mo nation parcequi li ignorant lors Mo statut. » Banne infidèles de Mecca ti habitué abuse du Prophète (s.a.w) et zot appelle li Muzammum, Le Censuré, (ki Allah pardonne moi) au lieu de Muhammad (s.a.w), Le Glorifié. Banne Sahaba ti naturellement senti zot blessé et zot ti vine vers Rassoollullah (s.a.w) et ti dire li. « Kan nous entendre de tel ordures, nous le cœur saigné. » « Qui faire ? » Le Prophète (s.a.w) ine demandé, et ensuite li fine dire : « Zot pé appelle banne noms pou Muzammum, pas moi ; moi mo Muhammad. » Après ki le Saint Prophète (s.a.w) fine proclame so révélation, banne kafirs ti cause li tortures mentale et physique tellement ki li ti obliger quitte Mecca, au lieu prend revenge contre bannes ki ti habituer sikane et torture li. Rassoollullah (s.a.w) déclaré : « Azordi pas pou prend revenge avec zot. Zot tous libres. » Ti ena ene madame ki ti appelle, Hind Bint Utba. Pendant la guerre Uhud li ti masse avec so le dent lé foie Hazrat Amir Hamza (r.a) (l’Oncle du Saint Prophète (s.a.w)). Le jour de la conquête de Mecca, li fine vine vers Rassoollullah (s.a.w), avec figure cachiette et li fine embrasse L’Islam. Aussitôt ki li fine embrasse L’Islam li fine découvert so figure ene coup et dire : « To conne moi, mo même Hind Bint Utba ? Rassoollullah (s.a.w) fine reste tranquille. Ene comportement courtois comme sa fine oblige madame là dire : « Mo faire serment par Allah, avant sa, mo ti haïr toi et to famille au plus profond mo le cœur. Mais après ki mo fine trouve to gentillesse, astère là mo content toi et to famille plus ki tout les autres kitchoses. » Hazrat Abu Huraira (r.a) raconté ki ene fois ene villageois ti uriné dans Masjid. Banne dimounes inne galopé pou batte li. Rassoollullah (s.a.w) arrête zot et dire : « Laisse li aller, nettoye place là. Li pas juste ki zot sans pitié. Rappelle zot besoin toujours polis et tolérant envers le peuple. » Dans Quran Shareef et dans Hadiths nous trouve ki li devoir chaque musulman pou vive bien avec les autres. Nu tous conne bannes profits ki ena dans bonne conduite. Zordi jour la plupart nous banne problèmes zot causés par mauvais conduite. Si nous change nous conduite, nous capave resourde beaucoup problèmes. Faire pitié ki nous attache beaucoup l’importance à juste nous l’avantage et affaires personnelles. Personne pas prend la peine pou aide les autres. Donc si, nous conduire nous bien et nous arrête reste égoiste, nous pour capave résoudre nous problèmes par nous même et nous misères et problèmes pour disparaître automatiquement. Sa pas pour juste dans nous l’avantage mais pour ene gain national et international. En adoptant bons principes, nous capave vine ene peuples uni et respectable. Ameen ! Thuma Ameen !