Text Box:   Bismillah-ir-Rahman-ir-Rahim.

Khutba Jummah 
Hazrat Amir’ul Momeneen Muhyi-ud-Din Al Khalifatullah
Munir Ahmad Azim

18 Janvier 2008

Après ki le Muhyi-ud-Din  fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :

Surah An-Nahl, Ch 16, Ruku 6, V 50&51.

50) Tous ce ki ena lors bannes les ciel et zanimaux lors la terre prosterner divant Allah et bannes anges aussi, et zot pas montrer aucaine fierté.

La dans Allah pé dire, pou faire l’homme comprend couma tous créatures ki Allah fine créer, lor la terre péna ene creature ki zot pas prosterner devant Allah. Tous séki ena lor bane léciel ki ou capave remarker lor leciel, soleil, la lune, z’etoiles, planètes, tous kalités zoiseaux pé envoler lor léciel. Allah dire:

“Tous sala prosterner devant zot Rab!” Allah fine créer l’homme avec bane facultés de connaissances, Allah fine donne l’homme ene bane qualités ki l’homme ki bizin pli à la hauteur, surpasse tous bane créatures ki exister, que ce soit lor léciel et la terre. Li ti bizin faire pli beaucoup prosternations parce ki Allah fine faire pli beaucoup faveurs lor li. 

Ça soleil ki Allah fine créer lor léciel là, Allah pas fine créer ça pour nannié Li! Li fine créer ça pour nous service, pour servir l’humanité toute entière. Et Li fine créer ça pour nous et pour zot tous. Que ce soit ene animal, que ce soit plantes, nous-mêmes et surtout l’homme bien bizin soleil. Allah dire: “Mo fine créer la lune.” Beaucoup dimounes apporte discussions lor la lune. 

Allah dire: “Ça la lune ki Mo fine créer là, pour ou propre bien, pou ou capave calcule bane jours, bane létemps, et calcule le nombre de jours kan la lune pour prend naissance et Allah dire: “Ça la lune ki ou trouve dans l’obscurité là, ça aussi li au service pour toute l’humanité et li paraître dans l’obscurité. Couma li joli ça la lune là.”

Exemple: La lune prend naissance. Ou garde Roza et après ou faire Eid-ul-Fitr. 

Dans Maurice, ou pé faire Jummah ça l’heure là mais tandis ki dans ene l’autre pays li pé faire Jummah ene l’autre l’heure, mais ça la lune là, li ene seul ça. Et kan so naissance, le monde en entier dans n’importe ki pays ou été, ou trouve ça lune là. Et ça soleil là aussi pareil; ena ene seul soleil! Pena l’autre soleil. 

Chaque pays gagne soleil par l’ordre Allah et par l’ordre d’Allah la pluie tomber et même ena bane tempête couma aussi ena la sècheresse. Ena bane z’étoiles ki briller dans le ciel. Allah dire:

“Tous ça là ki ou pé trouver dans le ciel, ça bane kitchoses là prosterner devant zot Maître et en même temps, zot mette zot au service de zot Maître et de toute l’humanité, mais zot prosterne seulement devant Allah, et zot pé montrer zot l’obéissance zis devant Allah.

Ki arrive l’homme?

Allah fine donne li tous bane qualités, tous capacité pour trouver à n’importe ki distance. Et Allah fine donne nous z’oreilles pou tender, pour entendre même tous kalité sons.

Nous entendre zoiseaux pé chanter. Nous dire ki oiseau là pé chanter, mais en fait li pé glorifier Allah so Maître, li pé chante louanges so Maître. Ki conné ça bane zoiseaux là zot pé faire zot la prière de Vendredi. Nous pé tende tous kalité sons. 

Tous bane insectes faire zot prosternations devant Allah. Tous bane kitchoses là Allah fine créer, li pas seulement à nous service. Nous ena pli grand capacité; Fine donne nous la main, lipié, nénez pour respirer et aussi Allah envoye ça bane faveurs dépi lor léciel pour 	So bane créatures lor la terre. Ça la brize là pé vini avec l’ordre Allah et zot montrer zot l’obéissance. 

C’est ça Allah fine dire ki Jour Qayamat; ki sanlà ena ene compte pour render devant Allah? C’est seulement l’homme. Bane les autres zot fine montrer zot l’obéissance, et Allah donne l’homme connaissances. Par exemple, l’esprit, l’intelligence. 

Nous guette ene bâtiment, c’est Allah ki fine donne nous ça l’intelligence là pour nous capave monte ene bâtiment; couma nous bizin mette ene colonne, bîme, dale, etc. Ou trouve au milieu ene plafond, ki péna aucaine colonne pé tini droite. 

Couma ena beaucoup bane zaffaires ki Allah fine donne chacaine parmi nous connaissances. Pareil couma ene tailleur li coudre linge. C’est Allah ki donne li ça connaissance là. Li fine montrer li couma pour coudre ça bane linges là. Ça montrer nous, ki avec nous la main nous capave faire beaucoup kitchoses; nous planter, nous arroser, cuit, bouilli, etc.

Mais tous ça bane kitchoses ki pé planter là, zot péna ene compte pour render devant Allah. Mais zot ena ene frayeur pour Li. Zot prosterner devant Li. Allah dire: “Ou envie trouve trouve Mo signes? Nek dibouter, guette Mo l’univers ene coup, guette léciel ene coup; péna ni ene bîme ni ene colonne, ni nannié. Guette lor ça la terre là ena tout.”

Allah dire, ziska même zanimeaux lor la terre prosterner divant Li tousel. Sak zanimeau ena so façon ki li prosterner devant Allah, mais c’est ou ki pas conner!

Allah pas fine mette “zanimeaux” au singulier. Li fine mette zot au pluriel. Tous zanimeaux ki ou trouver, zot prosterner devant Allah.

A cause ça même le Saint Prophète Muhammad (s.a.w) ti ena beaucoup l’amour pour bane zanimeaux. Bane zanimeaux même fine montrer ene grand l’example à l’homme. Kan ou donne ene zanimeau manger, li faire duah pour ou, pareil couma ça hadith là dire:

Ti ena ene mauvais madame ki ti retire so soulier, li fine donne ene lichien boire, kot li fine passe so la soif, et kot ça madame là aussi fine gagne paradis.

Par contre, ti ena ene lotte madame ki religieuse, li ti ferme ene chatte, li pas ti donne li, ni manger, ni boire. Ça madame là fine gagne l’enfer. 

Après ki Allah fine fini explique lor léciel couma la lune li dans so l’orbite, mais li prosterner devant Allah et ça li pareil pour soleil aussi, et pour bane lezot kitchoses.

Zanimeaux na pas faire Shirk. Mais Parcontre, Allah fine donne l’homme connaissance, fine faire li comprend ki été ene roche. Par example, Si li pé prier ene statue et si li fine alle tape are li, li capave tomber casser.

Chaque zanimeau prier dans so propre façon. Parcontre l’homme kan li ena richesses, li oublier Allah, mais kan li dans problème, lerlà ki li faire longue longue Sijda. Allah fine créer ça bane zanimeaux là, mais pas tout ki l’homme capave manger. C’est zis séki halaal (permis par Allah) ki li capave manger. 

Allah dire ki bane anges aussi prosterner et aussi zot glorifier zot Maître, Allah. Allah donne zot l’ordre pour faire bane travail, et zamais zot pas néglige zot Créateur et So bane l’ordres et zot pas montrer aucaine fierté. Mais si l’homme faire beaucoup bane bon actions pour l’amour d’Allah, zot capave réussi dépasse rang de bane anges.

Que ce soit dans Quran ou Hadith, ki kan ange de la mort, li tire Ruh (l’âme) de bane bons dimounes, li faire salaam avec beaucoup de respect et li tire Ruh de ça bane dimounes là avec beaucoup de précaution. Et kan ça Ruh là alle dans léciel (paradis), ena aussi des miliers de anges ki faire li salaam. Mais Par contre, l’ange de la mort kan li alle tire la vie d’ene mauvais dimoune, li tire so Ruh brutalement, parski dimoune là péna aucaine reconnaissance envers Allah. Li ti penser ki li pou éternel lor ça la terre là.

L’homme ti gagne beaucoup de facilités. Là aussi li montrer so l’arrogance. Guette ene zoiseau, li sorti là-haut, li ramasse ene la paille. Ene la paille par ene la paille, li arrange so la caze. Guette ki façon, li construire so nid. Nek dire ene dimoune arrange ene nid!  C’est sure ki li pas pou capave arrange ça pareil couma ça zoiseau là. 

Ça zoiseau là li reste dans so nid, li pondre, li gagne bane ti bébé oiseaux. Li alle cherche manger pour zot, et après, le matin de bonne heure et à soir, zot faire zot la prière. Mais l’homme ki li faire gramatin et à soir? Li même pas pense Allah! Nek li habiller sorti, alle travail, li pas pense Allah. Mais Par contre bane oiseaux zot pense Allah.

Ene coq ena so l’heure pour li chanter. Kan ene coq chanter veut dire ki li fine trouve ene ange; à l’époque pas ti ena réveille. Ene dimoune li léver kan li entende ene coq pé chanter, et li conner fine arrive l’heure de Namaz.

Chaque zanimeau ena so travail pour li faire. Chaque dimoune aussi ena so travail pour li faire. Ena ki travail dans bureau, ena ki travail dans cannes. Tous dimounes pas capave travail dans bureaux, sinon ki sanlà ti pou travail comme maçon etc.?

Ene bon mémoire, c’est ene grand bénédiction ki vine d’Allah ça. Dans tout domaine de la vie, la valeur d’ene bon mémoire li nécessaire à chaque étape. Ça médecin ki envie réussi dans so profession li bizin mazine tous bane noms de bane médecines importés là et li bizin rappel tout bane symptômes de bane maladies ki exister. En avocat ki envie dirige ene grand pratique, li bizin au courant de tous bane nouveaux connaissances ki ena dans so filière, lor bane differents cas de la lois. 

Nous pou être juger devant Allah, concernant nous bane comportements, si pas nous ena raison ou si nous en tort – si nous fidèle ou fou pas mal avec So bane la loi. Nous bizin ena la crainte d’Allah.

Tout sala zot pas réfléchit ditout. Ici, dans ça verset là, Allah pas fine mentionne l’homme ditout. Eski ou trouve dimoune pé marcher lor léciel ou? Allah dire, lor la terre bane zanimeaux pé prosterner. Bane anges ki près avec Li, zot montrer zot l’obéissance; zot prosterner devant Li. 

Par contre, l’homme li fatigue vite. Surtout kan ena pour li tourne vers Allah, pour faire Namaz, pour faire travail Allah; zot fini fatiguer. Nek mette ça dimoune là devant ene lotte kitchoses, tout so fatigue fini. Nek mette li devant ene télévision, so lizié pas batté ditout. Li dans ene grand concentration. Surtout de nos jours ki nous pé vivre, bane jeunes zot pli intéresser  avec bane zaffaires mondaines. Zot pas réfléchit ki ene jour zot ena pour quitte ça le monde là, zot aller et zot ena pour alle rendre ene compte devant Allah. 

Allah attane de nous ki nous rempli nous devoir envers Li. Le devoir li étendre à tout bane stations dans la vie et à tout bane rangs dans la société. Tout dimoune, riche et pauvre, haut et bas, jeune ou vieux ; zot doit certains devoirs et obligations à Allah ki zot bizin rempli et prend en charge dans la vie. Ene devoir li varié dépendant de bane l’âge et circonstances ! Seki nous attane d’ene adulte, nous pas capave attane le même d’ene zenfant.

Pour rempli ça bane devoir là li nécessaire ki nous soigne constamment tous bane facultés ki Allah fine accorde nous. Si nous néglige pour faire nous bane devoirs, nous bane pouvoir de facultés pour vine inutiles, malgré ki li là, et lerlà nous pas pou capave atteindre complète le niveau mental et moral de nous bane capacités  

51) Zot ena frayeur pour zot Maître en haut, et zot faire séki fine ordonne zot.

Allah dire, tout séki lor léciel et tous ça bane zanimeaux là, et bane anges, zot tous ena ene frayeur pour zot Créateur. 

Bane zanimeaux, zot maître (l’homme) ki trouve en bas (lor la terre), kot li pé donne zot manger et boire et li zot maître. Allah dire, “Non! Zot ena ene frayeur pour zot Créateur séki en haut là”.

Zot faire séki Allah fine ordonne zot, zot pas montrer vantardise, ni aucaine l’arrogance, ni zot vire lédos. Ene lichien li reconnaissant kan ou donne li manger. Li balance so la queue. Ici, l’homme pas montrer zot reconnaissance envers Allah, malgré ki Allah fine faire beaucoup de faveurs lor li. 

Allah fine envoye bane Messagers et bane Livres pour reforme l’homme lor la terre. Mais l’homme fine montrer li pli bas ki ene zanimeau. 

Ene zanimeau, séki so Maître dire li faire, li pour faire. Ene dimoune, kan ou dire li faire tel tel travail, li dire ou pas so travail ça ! Dimounes zot égoïste. Zot bizin prend l’exemple lor zanimeaux. 

Mais Malheureusement, l’homme pas pé tire aucaine profit là-dans, avec tous ça bane signes ki Allah fine mette lor la terre. Li commence lor léciel pour li montrer ou ki li exister. Et ki c’est Li, le Créateur unique. Li fine créer soleil, la lune, pour dimounes capave distinguer ki été (le jour et la nuit). Zot prend ça même soleil et zot commence prier li. Par contre, eski ou trouve kit zanimeau pé prier soleil ou prier kit idole? Non! 

Ene zanimeau, kot li été li tourne vers so Créateur. Nous dimounes, ena tout. Nous bizin obéir Allah et So prophète. 

Chacun parmi nous, alle réfléchit lor ça deux versets là. Lerlà ou pou réfléchit ki ene zanimeau, li pé prosterner devant Allah, ki kan tandis ki l’homme pé montrer so vantardise lor ça même la terre là. 

Si sakaine parmi nous réfléchit lor ça bane paroles d’Allah là, alors ou pou changer (en bien) et ou pou rapproche ou plisse avec Allah. Et ou pou reconnaître faveurs Allah. Et ou pou faire compétition dans travail Allah, et ou pou mette la frayeur d’Allah plisse dans ou lécoeur. 

Ki Allah content avec nous et nous pou alle rendre ene compte devant Allah, et nous faire duah ki tous les temps nous marche lor le droit chemin. Ameen.