Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 15 Août 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là : Ch.23 Al-Mominoon V.13-16  Nous fine crée la race dimoune avec ene extrait la terre mouille. Dans bane versets avant Allah pé explique couma Li fine crée bane créatures. Tous bane créature qui existe lors le ciel et lors la terre, zot tous prosterner devant Allah. Chacaine ena so façon pou prier et prosterner devant Allah. Alors Allah pé explique dans ça verset là, couma Li fine crée l’homme. Si l’homme assizé li réfléchi li même, li réfléchi lors bane versets ki dans le Quran Sharif kot Allah fine faire comprend, définitivement l’homme ti bizin le premier pour tourne vers Allah. Que ce soi dans le difficulté, que ce soi dans contentement, l’homme ti bizin de l’avant pou prier so créateur. Là dans Allah pé faire comprend couma la race humain, couma fine crée li. Et si ou guette bane matière, ou guette li coumsa, pour ou personnellement, ou capave penser ki li ene zaffaire initile ; ou pas prend conte. Mais par contre Allah pé faire ou comprend – c’est ça ki montrer la grandeur d’Allah. C’est ça ki montrer Li ene Dieu vivant ; personne pas fine cree Li, ni Li fine crée par quicaine. Mais Allah fine crée tous kitchose et Li unique. Et dans So bane créations, ena tellement bane kitchose ki l’homme li pas vraiment facile pou comprend dans Allah So créations. C’est ça dans Quran Sharif, Allah fine dire ‘pas pose trop de questions. Si ou alle pose trop de questions, tension ou alle perdi ou Imaan.’ Alors ici Allah pé faire comprend, Ki Li fine crée l’homme avec ene extrait la terre mouillée. Ler ou guette l’homme couma fine crée, bé vraiment bane dimounes pas prend ça en considération. Kan ou guette ou le corps ou dire ki ‘mo lécorps fine créer avec ene extrait la terre mouillé’. Et kan la terre posé lor ou le corps ou bizin alle prend ene bain. Allah pé dire, ‘avec ene extrait la terre mouillé, et ça extrait la terre mouillé là, kan ou ena pour alle divant Allah, Allah dire, ‘si pena de l’eau - ou conner de l’eau vine dépi le ciel - Allah dire dans ça bane moments là kot péna de l’eau, ou servi la terre la même, ou prend so la poussière pou ou faire Tayammum. Ça de l’eau ki Allah envoyer à travers la pluie pour purifier nous, mette nous propre, pour ki nous faire So Ibaabat. Et aussi ki nous trouver ? Nous fine créer avec la terre. Et Allah dire lors la terre, ou n’importe kot ça ou été, c’est bane place kot ou capave faire ou Ibaadat. Ou Ibaadat ou capave faire n’importe ki place lor la terre (excepté deux places : bane cimitières et toilettes), et ou tourne de côté Qibla, et ki faire ? Parski Allah conne l’homme très et ici dans ça verset là, Allah fine cause spécialement pou l’homme pour zot conner ki zot fine être créer avec ene extrait la terre mouillée et fine envoye zot lor ­ça la terre là même. Après Allah pou décrire ça pli devant, ki Li pé rode dire par ça, et ki Li pé rode faire nous comprend lor nous propre création.  Après ça Nous fine place li comme ene goutte sperme dans ene réposoir en sécurité. Alors kan Allah fine créer l’homme, dans la création de l’homme même, pendant ki l’homme pé développer, Allah fini place so bane organes kot zot pou été. Par exemple ; dans Quran Allah fine dire ki Li fine créer l’homme dans pli joli formes. Allah fine fini place so lizié dans place ki bizin, pour li capave guetté ; Li place so zoreilles dans position ki bizin. Tous dimounes ki né zot pareil. Pena personne ki so lizié place lor so front ou soi so zoreilles place lor so lizié. Ou pou trouvé ki Allah fine créer l’homme dans même style. Lizié pareil, zoreilles pareil et fine créer nous dans même forme. Allah fine créer l’homme et Li fine place so bane organes dans ene façon extraordinaire ; pareil couma ou guette ene l’auto. Ler ou guetter, de côté so moteurs, bizin placer bien, et si ene kitchose mal placer, l’auto là même pas pou roulé. Ça Allah fine donne l’homme ça connaissance là. Allah conne mieux kot Li place mécanisme. Allah dire ki dans ça extrait la terre mouillé là même ki Li fine mette ene réposoir. Goutte sperme de l’homme là, Allah fine mette ça dans ene réposoir. Allah conne très bien couma pou faire développement ça sperme là dans le corps ene l’homme. Par nourriture et aussi par bane mécanisme dans nous le corps li travail ; nous disang apart et nous gagne l’énergie. Parmi Allah faire bane développement ene partie ki ça diriger dans ene réposoir en sécurité. Et kan ou guette ça li couma ene goutte d’eau – ene goutte de sperme li contenir des millions et des millions de spermotozoides. Le sperme kan li ena pou gagne contact avec l’ovule, et si la femme li ovulé, et lerlà même li faire ene développement ene l’autre créature d’Allah, et madame là so le corps aussi changer et li tombe enceinte. Mais si la femme li pas ovulé, alors quant même ena des millions et des millions de spermatozoïdes alle vers ça ovule là, alors définitivement madame là pas pou tombe enceinte. Astère beaucoup bane dimounes pose bane questions, surtout bane ki critique l’Islam – ki ça c’est ene chose de côté science. Quran Shariff fine vine dans tous aspects ki li de côté scientifique ou de côté économique ou soi de côté politique ou soit de côté familiale. Tous zot bane réponses à zot question li trouve dans le Quran Shariff. Azordi ena bane grand grand scientistes pé faire bane grands recherche. Azordi ler ou pé guette bane grand scientistes, bane grands biologistes pé causer, même bane medecins (gynécologues) tout ça là. Comme-ci dirai c’est zot pé faire ça développement là et c’est zot ki donne la vie et faire dimoune gagne bébé. Mais ou bizin conner kot so source li trouver ; li sorti dans Quran Shariff définitivement. Na pas oublier ki Allah même fine challenge l’homme dans le Quran Shariff ; « cherche tous aide ki zot capave et créer même ene la patte mouche, sans l’aide d’Allah si zot capave. » Guétté si pas ou et bane associés ki ou prend comme dieu, si pas zot capave créer même ene la patte mouche !  Ensuite Nous fine faire le sperme coller et Nous fine faire ça boute coller là vine ene morceau (la chair) et Nous fine créer avec ça morceau là, les os, et Nous fine couvert les os là avec la chair. Et Nous fine produire ene l’autre créature avec ça. Gloire à Allah ! Allah li même meilleur créateur ! Allah dire ensuite sans de l’eau pas pou capave faire nannié. Par exemple ; Nous guette ene bâtiment en construction. Pou coule so bane colonne, ou bizin batte so béton pou mélange bane matériaux. Et pour construction bizin de l’eau, sans de l’eau ou pas pou capave batte béton. Ou guette la terre, sans de l’eau li pas pou capave fertilize bane la grains. C’est avec de l’eau ki bane là grain germer. Kan la pluie tomber li gonfler la terre et la terre gagne ça minérales là. C’est ça même la terre ki donne ça bane plantes là, zot la vie. C’est ça, Allah dire guette ou même, ou pou comprend l’univers. Si ene dimoune li réfléchi couma ene lotte créature capave née, pareil couma la terre sans de l’eau li pas pou capave produire nannié. Et si zis de l’eau li pas gagne la terre, li pas pou capave faire nannié. Et si zis la terre pena de l’eau, bé péna aucaine production alimentaire. C’est ça, Allah pé dire, ki chaque goutte ki Li fine mette dans le corps de l’homme, nous appel li le sperme. C’est ça même ça, c’est ça la terre mouillé là ça. Jusqu’à l’heure l’homme encore pose question lor là. Insha-Allah dans le Quran ça bane versets là nous pour explique couma Islam li ene religion extraordinaire. Dans So Livre, le Quran Shareef, Li fine mentionne tous ça là. Azordi, bane scientistes, bane médecins, bane gynécologue pé causer, mais si zot guette ça bane versets Quran là ; par exemple : Ene dimoune ki li attacher avec Allah, avec le Quran, li lire so Quran, li réfléchi lor ça bane versets là, définitivement ça dimoune là aussi capave vine ene biologiste. Au contraire li pé gagne ça connaissance là avec le Créateur même ki fine faire ça création là, kot Allah Li-même Li pé expliquer – kan Li pé dire extrait de la terre mouillé là, Li fine créer l’homme. Allah fine fabrique ene passage dans le corps de l’homme ; Allah fine fini place so bane organes chacaine dans position ki bizin, et lerlà même kan li grandi li vine ene adulte, li vine majeur, lerlà même ki ça bane passages là commence travail, et lerlà même kot ça réposoir là, ça de l’eau là li vine ene extrait pli important dans la création de l’homme. Par exemple : Kan nous cuit du riz, nous bizin mette de l’eau. Sans de l’eau, du riz pas pou cuit. Allah fine créer de l’eau avec ene telle puissance. Kan ou cuit du riz ou fine mette de l’eau, li gagne so rannement ; li vine beaucoup. Kan li cri, li paraite bien tiguitte. Coumsa même, ça de l’eau spéciale ki Allah fine créer là, li servi nous bane l’énergie même, servi nous bane kitchose pou Li mette dans ene réposoir en sécurité ; alors Li mette des gouttes de spermes. C’est ça même kan dimoune dire fine créer l’homme avec la terre mouillé, dans Quran expliquer ; kan Allah ti créer Adam, Allah dire : ‘Mo fine créer Li avec Mo deux la main avec la terre et après Mo fine souffler Mo souffle dans li - c’est-à-dire, création l’homme fine commence avec la terre et Allah envoye l’homme lor la terre. C’est deuxième création ki Allah fine créer dans ça l’univers là après le ciel, c’est la terre (d’après Quran Shareef). Ki faire Li fine créer le ciel avant ? Parski depi lor le ciel Li pou envoye de l’eau lor la terre et ça de l’eau ki tombe lor la terre là, li pou apporte beaucoup bane les autres créatures lor la terre. Ça même kan Allah fine créer Adam avec ene extrait la terre mouillée, en plus de ça Allah pou faire comprend, ki voilà, Li fine créer l’homme Li fine place ene passage et ene réposoir kot ena bane goutte de sperme couma ene de l’eau, mais li pas pareil couma de l’eau ki ou trouver là. Li totalement différent. Kan ou analyse ça, ou alle comprend la grandeur d’Allah. Ou pas pou fini faire éloge d’Allah et ou pas pou oubliyé So bane attributs. Kan ou trouve ene goutte de sperme kan li pénétrer dans ça ovule là, li apporte ene développement. Ki développement li apporter ? Ene l’autre la vie ! C’est Allah ki fine place ça ; c’est Allah ki fine donne ça. C’est Allah ki fine faire ça travail là, sans l’homme conner. Dans Quran, kot ou lire, ou trouver, nannié pas arriver sans la permission d’Allah et Allah conne tous kitchose ki arriver, ki réussi, ki développer par l’ordre d’Allah. Le sperme li ki ça grand travail ki li faire ? Allah fine créer l’homme et la femme. Le corps pareil, mais ena différence de sexe et différent développement le corps (biologiquement zot différent). Allah expliquer ki ça sperme là représenter dans le corps dans missié ; kan ou conne so valeur, ki été ça sperme là. Kan ou guette li coumsa, li couma dire ene zaffaire normal ; li couma ene goutte de l’eau. Ou capave gagne bane dégoût aussi, pareil couma la pluie kan li tombé, li faire la boue, la mare. Ou dire li pé faire moustique ! Ou pas pé réfléchi ki ça la pluie là li fine tomber seki li pé apporter pou ça la terre là, développement ki li pé apporter, bane insecte ki vivre dans la terre zot pé profite ça de l’eau là. Par exemple, Moustique, pour nous l’homme, li faire du tort. Mais pou moustique là, ça de l’eau ki fine ramasser là, pou li c’est ene grand repas ki li fine gagner et li servi de l’eau ramasser là pour pondre so dizéf. Li extra content. Nous, l’homme, nous bizin protège nous la santé. Nous bizin détruire ça bane moustiques là. Mais coumsa même, extrait de sperme, Allah expliquer ki ça boute collé là, ça même ene morceau la chair collé. Kan ça fine fini faire so transformation, fine fini faire so forme, dans matrice ene madame, avec ene goutte de sperme ki fine gagne connections avec ça ovule là. Et faudrait ça ovule là li ovulé aussi. Si li pas ovulé, li pas pou faire aucaine développement. Alors ça aussi li ena so période kot li ovulé. Lerlà sperme là faire so travail et lerlà même ça goutte couma la colle là, li collé, li faire ene tel développement ki li vine ene morceau la chair. Astère Allah explique couma ça développer dans ene matrice d’ene madame, sans ki li conner. Madame là pé circuler partout, pé manger, boire, li pé faire so travail, mais dans so le corps ena ene développement, ena ene nouveau la vie ki pé prend naissance dans so le corps. So le corps pas pou stable couma li ti été avant. Li pou gagne différent kalité symptômes. Li pou gagne nausée, la tête fermal, lipié enflé, so tension pou monter etc. Ça vraimême li ene kitchose ki Allah même fine créer ça. Alors le miracle de la création d’Allah kot ena des millions spermatozoïdes ki vine autour ça ovule là, mais ene seul ki pénétrer li et ovule là fermer toutesuite après ça. Lerlà même ça sperme là li travail ça ovule là. Li faire li développer. C’est ça sperme collé là, li faire li vine ene morceau la chair ; premier création kot l’homme li développer. C’est la chair ki commencer, après Allah dire : ‘Nous fine créer avec ça morceau la chair là, les os.’ Ça la chair là même li développer, li vine les os. Létemps li vine les os, so travail pas fini là même. Ensemble avec ça, Li couvert les os avec la chair. Kan Allah dire ‘Nous’ ; c’est Allah avec So bane anges ki apporte la développement de l’enfant. Lerlà même ki Li dire, avec ça les os là même, lor ça les os là même, la chair commence pousser. Kan ou guette ou, ou trouve ou avec la peau, et li fine couvert avec la chair, parski ou pas avec zis la chair, parski kan ou pé lève ene zaffaire dure, ou pé attrape ene kitchose lourd ; Seki ou bizin ena ene la force dans ou le corps. C’est-à-dire, ou les os, Allah couvert ça bane les os là avec la chair. Guette ça création ki Allah faire avec l’homme. Peut-être ki ou pas réaliser ! Et tous ça là, kot ça pé dérouler, sans ki ou pé trouve ça. L’homme, nous conne zis la-haut. Par exemple, Endans nous, nous pas conner ki pé traverser, couma disang pé circuler, couma nous pé gagne l’énergie, nous pé diboute, nous pé marcher. Tous ça là c’est ene très grand grâce et faveurs de côté d’Allah. Alors létemps développement de l’enfant, ça les os là commence couvert avec ene la chair, ki ou, ou pas pé trouve ça, ça développement de l’enfant là dans matrice ene madame pé donne ene développement là-dans. Allah créer ça morceau la chair là avant. Li faire ça la chair là vine les os, Li faire ça les os là recouvert avec la chair et ensuite Allah dire ‘Nous fine créer ene lotte créature avec ça.’ Guette dans combien étape ça fine passer, kot li couvert avec ça la chair là. Allah redonne li so bane forme, et chaque la chair li dans so place et chaque les os dans so place. Et Allah dire ‘Nous fine produire ene l’autre créature avec ça. Ça goutte ki Allah fine faire réserver li reposer dans ene réposoir ki Allah fine garde ça dans ene place en sécurité. Ça même ça goutte là li apporte ene développement extraordinaire et kot li couvert l’homme. Létemps li prend naissance, kot li produire ene lotte créature. Letemps li né tous dimounes guette ça zenfant-là, zot content, zot embrasse li et ena ene la joie dans zot le cœur. Maintenant kan li vine lor la terre, Allah fine donne li ene guide. Ça même ki Allah dire ‘et Nous fine produire ene lotte créature’. Pendant ça production là et kan Li fine complète so production, là ena bane anges faire zot travail. Allah donne bane l’instructions ki ‘Nous fine donne toi to place sans aucaine zéffort , to pou recevoir tous par la grâce d’Allah. Mais kan to alle lor la terre, to pas oubliyer Allah. To bizin assizé réfléchi lor to-même, et létemps to fine né, to fine né comme ene bébé, to pas capave faire nannié.’ So maman ki bizin baigne li, so maman faire li manger, boire etc. So parents faire tous le nécessaire et doucement doucement, bébé là commence grandi. Couma l’Islam fine dire, couma ça créature là li vini, li bizin propre. Bizin raze so la tête, bizin faire so ‘Aqeeqah’. Si li ene tifille, ou faire ‘Aqeeqah’ ene bouc. Si li ene garçon, ou bizin faire ‘Aqeeqah’ deux boucs ou cabri parski so responsabilité li double. Ki faire li important pour faire ‘Aqeeqah’ ene zenfant ? Li ene forme de Sadqua. Kan li né, Allah protège li contre tous l’éffet de shaytaan. Li fine né pure, so l’âme pure. Alors li pas influencer avec bane zaffaires satanique lor ça la terre là. Ça c’est ene résumé de ‘Aqeeqah’. Lerlà Allah dire ‘Et kan Nous fine produire ene l’autre créature avec ça ene goutte de sperme là, et voilà ki li fine gagne so la vie, li commence grandi, li dormi à plat ventre après li viré, li commence bouge so lipié, so la main, li ouvert so lizié et li commence guetter. Li commence vine ene tape-recorder ; li ricorde tous seki li tender. Li identifier ki sanlà so maman, so papa et so bane famille. Premier action li commence riyé. Li commence dévirer doucement doucement, li commence marcher. Guette tous ça l’étape ki Allah faire l’homme faire ! Ça même ça premier la chair, ki fine former là, ki vine ene les os, ki ça les os là faire ça zenfant là appuye avec so la main, marche quatre pattes. Li commence attrape tous zaffaire pou li comprend ki été ça. Ki faire ça ? Parski li fine sorti dans ene l’autre monde. Li fine vine dans ça le monde là, li trouve tous différent. Après li commence galoupé et voilà doucement doucement, li grandi, li alle l’école maternelle, primaire, secondaire, l’université. Maintenant ça même ene goutte de sperme dans ene réposoir là, guette kot li fine amène l’homme et guette kot li capave retourne ça l’homme là aussi. Ça même nous dire : Gloire à Allah ! Allah Li-même nous Créateur pena personne le meilleur Créateur ki Allah. Avec ene goutte de sperme ki dans ene réposoir en sécurité guette ça kantité transformation ki li apporter là. Ça kantité population l‘homme lor la terre là. Personne pas pé glorifier Allah. Zot pé donne les autres pli grandeur ki Allah. Allah donne ou explication de l’homme, couma l’homme fine créer et l’homme ti bizin le premier pou rentre dans ça but là, ki li bizin prosterner, couma li ti été, li ti ene nannié ditout. Avec ene goutte de sperme guette kot li fine arriver. Et tous ça là c’est Allah le meilleur Créateur. Li fine créer nous dans ene meilleur forme extraordinaire, mais ki arrive l’homme ? Li oubliyer tous. Li attache li avec bane zaffaires mondaines, tous bane zaffaires Chirk, idoles ki Allah pas content. Si ou donne plisse l’importance bane zaffaire mondaines ki nous Allah, li vine ou idole. Si nous réfléchi lor nous développement avant ki nous vine ene adulte, nous pé marché, nous pé travail, tous ça là c’est par la grâce d’Allah. Et Allah fine donne nous connaissance pour nous conner ki bon et ki mauvais et nous reconnaite faveur d’Allah plisse ki bane les autres. Nous l’homme nous fail là-dans. Nous vine pli bas ki ene animal. Ene animal li prosterner devant so Créateur. L’homme ki li faire ? Li pas reconnaissant, envers so Créateur. Et tous zaffaire ‘Moi’, ‘Moi’ ki fine faire ça (l’homme manifester so ego). Li oubliyer si Allah ki fine créer li. Li pas Dieu lor la terre ! Allah dire, ‘Mo ti créer toi avec ene extrait la terre mouillée. Mo capave faire toi mort et pourri. Ça les os là tous pourri’ et c’est Allah le meilleur Créateur.  Ensuite après ça, ou pou mort. Ensuite après ça, Allah définitivement Li pou donne ou la mort. Ou pou bizin alle kot Allah kot ou ena ene compte pou render. Allah fine faire tous ça là pou ou. Li fine donne ou ene meilleur forme. Li donne ou courage. Li fine envoye ou lor ça la terre là pour ou capave conne ça le monde là, et ou capave conne beaucoup kitchose ki Allah fine montrer ou par So grâce et So faveur et ki ou conne la grandeur d’Allah, que ce soi dans Akhérat, que ce soi dans ça le monde ici-bas là. Mais l’homme li fail là-dans. L’homme li prend li comme héro, ene ténore, li pas réfléchi ki ene coup Allah capave faire li retourne à zéro. Alors nous bizin reconnaissant envers Allah et nous soumette nous totalement à Allah. Ki Allah donne nous le Tawfeeq, ki bane les autres kan zot lire ça Khutba là, zot gagne Imaan (la foi) et réalise zot propre création même et pou faire zot comprend ça même ça extrait la terre mouillée ki fine créer nous là. Li fine faire nous vine ene quelqu’un. Voilà après nous pou retourne ene nannié ditout même, nous pou retourne la terre. Ça même la terre extrait mouillé ki fine créer nous là, kan pou mette nous en bas la terre, lerlà nous pou décomposer, nous pou pourri et nous pou fini nette lor ça la terre là. Nous retourne la terre même et c’est nous l’âme (ruh) ki retourne kot Allah. Ki Allah donne nous le Tawfeeq pou comprend ça et guide nous dans le droit chemin et faire nous vine ene créature reconnaissant envers nous Créateur plis ki bane les autres créatures et parmi tous créatures ki Allah (swt) fine créer, c’est nous ki pou retourne vers Allah et ena ene compte pour render pour tous seki nous fine semer lor ça la terre là. Si nous fine sème bonnes actions et nous fine être obéissant envers Allah et So prophète et Insha-Allah ça même meilleur récompense nous pour recevoir. Ameen.