Text Box: KHUTBA JUMMAH DE HAZRAT AMIR’UL MOMENEEN MUHYI-UD-DIN 14 MARS 2008 (BAIT-UL-ZIKR – NORD DE MAURICE) Hazrat Amir’ul Momeneen Muhyi-ud-Din fine commence Khutba avec Tashahhud, Ta’ouz et Surah Al Fatiha, après li fine lire ça bane versets suivant là: Surah ‘Fraudeurs’ Ch.83 V.22-27 “Innal Abraara lafii Naiim alal araaa-iki yanzuruun tarifu fii wujuuhihim nazratan Naiim. Yus qawaa mir rahiiqim makhtuum: khitaamuhuu misk: wa fii zaalika fa-yatanaafasil muta naafisuun. Wa mizaajuhuu min Tasniim.” Bane bon pour dans ene jardin de délice lor bane divans, zot guetté. To pour reconnaîte lor zot visage la joie de la félicité. Pour donne zot à boire ene nectar pure, cacheté; Cacheté de Musk. Alor bane ki oulé rentre dans competition pour ça, ki zot rentré; ça li pour mélanger avec de l’eau Tasnim. Dans ça bane versets Quran là, Allah fine mentionne ene l’autre la source de paradis ki fine reserve pour bane Abrar, c’est Tasnim. Ene l’autre la source dans paradis appel salsabil kot fine faire mention dans Quran. “Zot pour boire dans ene coupe ki so mélange pour gingembre; Rétiré dépi ene la source nomme là-bas “salsabil”. (Ch.76,V.17 & 18) La question la nuit, li jour ou la lune, soleil pour différencié ene jour lor la terre pas pose dans paradis. Péna la nuit, li jour dans paradis mais par contre pour éna ene la Lumière éternel. Zot pour conné kan la nuit pour vini parce ki pour ena bane rideaux ki pour ferme et bane la porte et zot pour conné kan li jour, parce ki bane rideaux pour lève et bane la porte ouvert. Paradis rempli avec parfum et ene parfum ki bien loin capave senti (ça morceau là kan mo ti pé écrire, Allah mo Témoin, ça moment là mo fine senti ene parfum extra et pas capave décrire). Dans Quran Allah pé dire: “Bane z’arbres et bane fruits dans paradis zot pour tout létemps et toutes sortes qualité pour ena.” “Pour bane pieux ça pour être ene réussite. Bane jardins et bane vignes.” (Ch.78, V.31 & 32) “Zot contenir bane fruits, bane dattiers et bane grenadiers.” (Ch.55, V.68) “Et bane compagnons de la droite. Ki ça bane compagnons de la droite? Zot pour parmi bane sidr jujubiers sans épines; Et parmi bane bananiers avec bane régimes bien fournis; Dans l’ombrage étendu. Et ene de l’eau ki coulé sans arrêt. Au milieu bane fruits abordants.” (Ch.56, V.27-32) “Concernant le paradis ki fine promette pour bane pieux. Emba li ena bane la rivière ki coulé. So bane fruits et so l’ombrage li pour tous létemps. Voilà la récompense pour bane pieux ...” (Ch.13, V.35) Couma Allah fine faire nous conné ki ça bane fruits dans paradis-là pour continuelle, pas pour ena couma nous dire, “fruits fine fini lor pié”. Bane fruits-là capave pareil couma lor la terre mais so goût l’autre. Allah dire dans Quran: “Donne bon nouvelle bane ki ena Imaan (la foi) et bane ki faire bon travail ki pour zot ena bane jardins ki bane la rivière passe là-dans. Sak fois ki pour donne zot bane fruits pour mangé, zot dire: “Ça nous fine mangé avant”. Mais zot fine gagne (fruits) dans resemblance ...” (Ch.2, V.25) Bane fruits du paradis pour à la porte bane habitants du paradis, kot zot péna pour faire aucaine z’éffort. “Zot pour accoudé lor bane tapis doubles de brocard et fruits de deux jardins pour être à zot porte.” (Ch.55, V.54) “Là (dans paradis) accoudélor bane divans, zot pour être à l’abri de la chaleur et du froid glacial. So l’ombrage pour dessane bas lor zot et so bane fruits incline bien bas à la portée de zot la main.” (Ch.76, V.13-14) Dans ene Hadith ki trouve dans Bukhari: Abu Saïd Al-Khudri (r.a) fine rapporté ki le Messager d’Allah (s.a.w) fine dire: “Dans paradis ena ene pié ki ene cavalier lor ene cheval vite pour prend 100 banané pour passe emba li.” Dans ene Hadith ki trouve dans Ahmad, récité par Abdullah ibn Amr (r.a), li pé dire: “Ene homme fine vine kot le Prophète (s.a.w) et fine dire: “O Messager d’Allah, dire nous à propos bane vêtements de bane dimounes du paradis: Estce ki zot être créer ou coudre?” Bane dimounes fine riyé. Le prophète (s.a.w) fine dire: “Ki faire zot pé riyé? Estce ki parce ki quelqu’un ki pas conné fine demande quelqu’un ki conné?” Ensuite li fine tourné et li fine demandé: “Kot celui ki fine pose la question?” L’homme fine dire: “Mo là même! O Messager d’Allah!” Li (s.a.w) fine dire (3 fois): “Non, zot pour être produit par bane fruits du paradis”. Et le Saint Prophète (s.a.w) fine dire ene Hadith ki trouve dans Tirmizi, rapporté par Abu Huraira (r.a): “Tous bane pié dans paradis zot tronc en or.” Ene lotte Hadith ki trouve dans Tirmizi, rapporté par Anas: “Le Messager d’Allah (s.a.w) fine être questioné ki été Al-Kawthar?” Li fine dire: “C’est ene la rivière ki Allah fine donne moi, c’est-à-dire, dans paradis, li pli blanc ki du lait, et pli doux ki du miel et là-dans ena bane z’oiseaux avec li cou couma li cou chameaux.” Umar fine dire: “Ça bane z’oiseaux là pour merveilleux”. Le prophète (s.a.w) fine dire: “Bane ki mange zot pour pli merveilleux”. Seulement bane croyants ki fine croire ki ena ene seul Allah et ki pas fine commette shirk ki pour gagne paradis. “Et donne bon nouvelle bane ki ena Iman (la foi) et bane ki faire bon travail ki pour zot ena bane jardins ki bane la rivières passe là-dans.” (Ch.2 V.25) Le Saint Prophète (s.a.w) fine faire comprend d’après ene Hadith la majorité bane habitants du paradis pour être bane pauvres. Ene hadith ki trouve dans Bukhari et Muslim récité par Ibn Abbas, ki le prophète (s.a.w) fine dire: “Mo fine guette dans paradis, et mo fine trouve ki la plupart de so habitants bane pauvres et mo fine guette dans l’enfer et mo fine trouve ki la plupart de so habitants bane madames.” Zenfants bane croyants ki mort avant gagne l’âge de maturité pour rentre dans paradis, Insha-Allah. “Quant à bane croyants ki zot descendants fine adopté la foi, Nous pour réunir zot avec zot descendant sans pour diminué récompense zot actions. Sak dimoune pourr responsible de saki li fine faire.” (Ch.52, V.21) Plusieurs Sahaba fine rapporte ene Hadith kot le Prophète Muhammad (s.a.w) fine dire ki c’est Abu Bakr et Umar ki pour leaders de côté bane z’hommes du paradis pour toutes generations. Dans ene lotte Hadith ki trouve dans Tirmizi, Al-Hakim, et Ahmad, récité par Abu Saïd Al-Khudri (r.a), ki le Messager d’Allah (s.a.w) fine dire: “Hassen et Hussayn c’est bane leaders de bane jeunes du paradis”. Dans ene lotte Hadith ki récité par Jabir, le Messager d’Allah (s.a.w) fine dire: “Bane leaders de bane madames du paradis après Maryam bint Imran, pour ena Fatima, Khadijah & et Asiyah ki la femme de Pharaon. Et Hadith fine faire mention leader de bane ki fine martyre dans le chemin d’Allah pour ena Hamza Ibn Abd’al-Muttalib. Ene Hadith ki trouve dans Ahmad et Tirmizi, le Prophète Muhammad (s.a.w) pé faire mention de dix sahaba ki fine gagne la bonne nouvelle ki zot pour dans paradis: (1) Abu Bakr (2) Umar (3) Uthman (4) Ali (5) Talha (6) Al Zubayr (7) Abd-al Rahman ibn Awf (8 Sad ibn Abi Waqqas (9) Saïd ibn Zayd (10) Abu Ubaydah ibn Al-Jarrah. Ene lotte Hadith cité par Abu Huraira (r.a) et li trouve dans Bukhari, et Muslim, le prophète Muhammad (s.a.w) pé dire ki bane dimounes dans paradis zot pas pour craché, mouché ou alle toilette. Ça bane kitchose ki fine faire mention là, c’est bane inconvenient ki nous gagné dans ça le monde-là alors ki dans paradis pas pour ena tous ça là. Bane habitants du paradis pas pour dormi. Jabir Ibné Abdullah et Abdullah ibn Abi Awfa fine rapporté ki le Messager d’Allah (s.a.w) fine dire: “Dormi c’est le frère de la mort.” Bane madames dans paradis pour pure. Zot pas pour souffert contre Haïz (menstruation) ou les autres bane douleurs ki accompagne zot Haïz. Allah dire dans Quran (Ch.2, V.25): “Et pour zot ena bane madames pures et zot pour reste là-dans éternellement” (Ch.2, V.25) Bane causer malpropres ou indecent ou mensonge et n’importe ki causé ki pas bon pas pour ena dans paradis. Allah dire dans Quran: “Zot pour passe de main en main ene coupe ki so contenue pas provoque ni paroles vains ni péchés”. (Ch.52, V.23) “Zot pas pour entendre aucaine parole futile excepté “la Paix!”. Là-dans zot pour gagne zot nourriture matin et soir. (Ch.19, V.62) Ça la vie lor la terre là, arrive ene l’âge ou bizin contrîle ou mangé pour pas gagne diabète ou tension. Tandis ki dans paradis, mange quantité ki ou envie et saki ou envie sans aucaine crainte. Couma Allah même pé dire dans Ch.69 V.24: “Manger et boire agréablement pour saki zot fine accomplir dans les jours passés.” La soi c’est défendu pour bane z’hommes lor ça la terre là mais dans paradis c’est la récompense: “Li pour récompense zot pour zot patience en leur donnant ene jardin et bane vetement de la soie”. (Ch.76, V.12) “Zot pour rentre dans bane jardins d’Eden, décoré avec bane bracelets en or et perles et là zot vetement pour en la soie.” (Ch.35, V.33) “Pour ça bane là, ena bane jardins d’Eden kot bane la rivières coulé. Zot pour décoré par bane bracelets l’or et zot pour vêtir de bane habits verts, de la soie fine et brocard, allongé lor bane trine ...” (Ch.18, V.31) Dans ene Hadith ki trouve dans Muslim et cité par Abu Huraira (r.a), le prophète Muhammad (s.a.w) pé dire: “Celui ki entre dans paradis li pour être béni et li pas pour miserable, so vêtements jamais pour usé et so jeunesse jamais pour disparaître.” Dans paradis, Allah pour créer bane garcons ki pour servi bane dimounes ki fine rentre là-dans. “Parmi zot, bane garcons pour circulé éternellement jeunes avec bane coupes, bane brocs et bane verres rempli d’ene liqueur de source.” (Ch.56, V.17 & 18) Bane dimounes dans paradis pour joindre ene à l’autre et zot pour pense zot la vie couma ti été lor la terre et zot pour trouve ça faveur ki Allah fine donne zot kan Li fine mette zot dan paradis. Allah dire dans Quran: “Et Nous fine enlève la rancune ki trouve dans zot lécoeurs et zot fine vine comme frères lor bane lili de répos vis-àvis”. (Ch.15 V.47) “Zot pour tourne les uns vers les autres en s’intérrogeant. Zot dire: “Nous ti pé vivre au milieu de nous famille dans la crainte d’Allah. Allah fine accorde Nous So grâce et fine préserve nous contre punition ça grand chaleur là.” (Ch.52 V.25-27) Ene croyant so madame pour avec li dans paradis, si madame là li pieuse. Allah fine faire mention dans Quran: “Les jardins d’Eden. Zot papa, zot épouses et zot zenfants. Et bane anges, pour rentre auprès zot par tous bane la portes. “La paix lor zot parce ki zot fine ena patience: la demeure finale li excellente.” (Ch.13, V.24). “Zot et zot épouses, pour dans l’ombrage appuyé lor bane divan.” (Ch.36, V.56) “Entre dans paradis! Zot et zot épouses! Zot pour être bien traite.” Quant à ene madame ki fine marié plisse ki ene fois, li pour dans paradis avec so dernier mari. Le prophète Muhammad (s.a.w) fine dire ki ene madame pour avec so dernier mari. Asma bint Abu Bakr (r.a) ti marié avec Al-Zubayr ibn Al-Awwan et ki ti bien dur envers li. Asma fine vine kot so papa et li fine plaigne so difficulté. Abu Bakr (r.a) fine dire li: “O mo tifille, ena patience car si ene madame ena ene bon mari et li mort et madame là pas re-marié après so la mort, zot pou unir dans paradis.” Dans ene lotte Hadith, Huzaifa (r.a) fine dire à so madame: “Si to oulé être mo madame dans paradis, pas re-marié après mo la mort car la femme au paradis pour être avec le dernier de so mari lor la terre.” Pour ça raison là, Allah fine empêche bane madames du Prophète (s.a.w) pour re-marié parce ki zot pour so bane madames dans paradis. ‘Hur’ c’est ene madame ki zot parti blanc de zot lizié extrêmement blanc et so noire bien noire. ‘Hur’, c’est créature ki Allah fine faire spécialement pour bane croyants dans paradis et ki (vierges). C’est bane joli madames ki Allah pour marié zot à bane croyants, ki pas ti zot madames dans ça lémonde là. Dans Quran Allah fine mentionne ça: “C’est ainsi et Nous pour donne zot comme épouses bane Houris au grand yeux.” (Ch.44 V.54) “Pour bane pieux ça pour être ene réussite. Bane jardins et bane vignes. Bane filles jolies et de même l’âges”. (Ch.78 V. 31-33) “C’est Nous ki fine créer zot (bane Houris) à la perfection. Nous fine faire zot bane vierges plein d’amour et toutes même âge; Pour compagnons de la droite.” (Ch.56, V.35-38) “Dans ça bane jardins là zot pour trouve bane houris aux regards chastes et ki avant zot aucaine z’homme ou Jinn pas fine déflorés.” (Ch.55 V.56) Séki nous trouvé ki bane croyants zot pour gagne zot madames pieuses dans paradis et aussi bane Hur ki Allah fine creer dans paradis. Dans ene Hadith, le Prophète Muhammad (s.a.w) pé faire nous conné ki kalité récompense ene shaheed pour gagné dans paradis. “Ene Shaheed pour ena sept l’honneur dépi Allah. Li pour être pardonner dépi so premier goute disang ki fine tombe. Pour montrer li so position dans paradis. Li pour être protégé contre punition tombe. Li pour être protégé contre punition dans paradis. Li pour épargne dépi bane horreurs du Jour du Jugement. Ene couronne de dignité pour place lor so la tête, ki ene rubis de ça couronne-là meilleure ki ça lémonde là et de tout saki li contenir li pour être marié à 72 Al-Hural-yn. Et li pour ena droit intercède pour 70 de so famille.” Courage ki Allah pour donne ene croyant dans paradis c’est 100 z’hommes so courages. Anas (ra) fine rapporté ki le prophète (s.a.w) fine dire: “Ene croyant dans paradis pour gagne tel et tel courage”. Fine demande li: “O Messager d’Allah! Estce ki vraiment li pour capave faire ça?” Li fine dire: “Li pour gagne courage cent z’hommes.” Et ça Hadith là fine rapporté dans Tirmizi. Pour ena aussi conversation entre habitants du paradis et habitants de l’enfer. Allah fine faire nous conne ça, dans Quran et ça li trouve dans Surah 7, V.44: “Et bane compagnons du paradis pour crié bane compagnons de l’enfer. ‘Nous fine trouve la vérité séki nous Rab fine promette nous. Estce ki zot fine trouve vrai saki zot Rab fine promette zot?’ Zot pour dire: ‘Oui. Certainement.’ Puis ene annonciateur pour annonce ceci parmi zot: ‘Malédiction Allah lor bane injustes.” Plus grand cadeau pour ene croyant dans paradis séki li pour trouve Allah. Dans Quran Allah fine dire: “Ça jour-là pour ena bane visages briyé, ki pour guette zot Rab.” (Ch.75 V. 22 & 23) Abu Huraira (r.a) fine rapporté ki quelqu’un fine demander: “O Messager d’Allah, Estce ki nous pour trouve nous Rab, le Jour de la Résurrection?” Le Messager d’Allah (s.a.w) fine dire: “Estce ki ou ena doute pour trouve la lune kan li pleine lune?” Zot dire: “Non. O Messager d’Allah!” Li dire: “Estce ki zot douté ki pas pour trouve soleil kan aucaine nuages pas pé cachiette li?” Zot dire: “Non”. Li dire: “Alors zot pou trouve Li bien.” Ça Hadith là trouve dans Bukhari & Muslim. Nous séjours lor ça la terre là li bien courte. Nous bizin vivre pour cherche le plaisir du Créateur. Nous dire Allah donne nous du bien dans ça lémonde là et dans l’autre monde aussi. L’Islam pas dire nous ki nous bizin isole nous ou garde roza tous les jours ou bien faire Namaz toute la nuit pour gagne accès au paradis. Nous pas rentre dans l’extrêmiste. Faire saki Allah fine ordonne nous vivre lor la terre sans ki nous transgresse So la loi. Manger et boire saki Li fine ordonne. Priez Li tout seul. Demande Li tout seul. Pas associé avec Li. Allah pour content nous et Insha-Allah Li pour admette nous dans So paradis ki Li fine reserve pour So bane serviteurs pieux. Insha-Allah. Ameen.