بسم الله الرحمن الرحيم

 

KHUTBA JUMMAH

 

HAZRAT AMIR’UL MOMENEEN MUHYI-UD-DIN

AL KHALIFATULLAH

 

MUNIR AHMAD AZIM

 

03 Avril 2009

 

(Résumé du Khutba Jummah lors Zikr Allah)

 

Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça verset Quran suivant là:

 

 

Yaaa ‘ayyuhallaziina ‘aamanuz-kurullaaha zikran kasiira ; Wa sabbihuuhu bukratawwa ‘asiilaa. Huwallazii yusallii ‘alaykum wa malaaa’ikatuhuu liyukhrijakum minaz zulumaati ilan-Nuur : wa kaana bil’ Muminiina Rahiima.

 

« O bane ki éna la foi! Faire Zikr Allah en abondance et faire So louanges, gramatin et soir. Li envoye So bénédiction lors zot aussi bien ki So anges, pou retire zot dépi noirté et emmène zot vers la lumière et Li ena beaucoup pitié pou bane croyants. » (Chapitre 33 Al-Ahzaab V. 42 – 44).

 

A la lumière de sa verset Quran là, mo pé continue mo Khutba Jummah lors Zikr Allah. Sa 3 verset ki mo fine lire devant zot la, li montré ki Allah envoye So Rahmat (bénédiction) et bane anges faire duah pou sa bane qualité dimounes la. Ki sa bane dimoune ki anges faire doah la ?

 

C’est bane ki faire beaucoup Zikr ; pli nous pou pense Allah beaucoup, pli Allah pou pense nous et pou à coté de nous.

 

Mo recommande tous bane membres Jamaat Sahih Al Islam, à Maurice, bane l’îles et aussi mo message addresse à tous pays du monde et aussi mo message addresse à tous mo bane frères, sœurs et zenfants musulmans à travers le monde entier ki zot engage zot dans le Zikr Allah autant ki possible et mettre en pratique le Zikr en abondance. Li pou vine ene protection dans ene forteresse, contre tout sorte malheur, difficulté, malade, complot, travail satanique etc. Le Zikr Allah li pou sape ou avec tous sa bane kitchose la et contre tous bane les autres problèmes dans ki ou pou été ; ou pou sous l’ombrage d’Allah.

 

Faudé pas ki bane souci ou bane obstacle mondaines faire ou éloigner avec Zikr. Couma, mo fine fék dire ou, ki Zikr même ki pou protége ou contre tout tracas et tout calamité.

 

Mo faire duah ki à la lumière Khutba lor Zikr ki mo fine fine faire et si nous tous ensam nous prend sa détermination solide la et dans chaque ti moment ki nous gagner, nous profite le maximum dans le Zikr, ou pou trouver ou même, ene changement terrible pou ena dans ou la vie et croire moi, ki l’heure la ou pas pou capave rester sans faire Zikr Allah.

 

Zikr Allah dans li-même, li ene guérison pou nous le cœur, c'est-à-dire li guérit tout maladie le cœur couma l’arrogance, jalousie, rancune etc. Et reste a affirmé ki celui ki régulier dans pratique Zikr pou gagne protection contre tout forme calamité.

 

Zikr Allah li consolide la foi de bane dimounes ki ena ene l’amour sincère pou Allah et So bane prophètes (Ki la paix lor zot tous) et aussi quand ou faire Zikr ene « Sakina » (la paix – tranquillité) descendre en dans ou le cœur et kot ou gagne sa grand récompense et bénédiction d’Allah là dans tous les deux le mondes.

 

Pense bien ki Allah li Noor (la lumière) celui ki cherche So lumière, Allah (swt) pou projette ene ti étincelle So la lumière lors li et sa ti étincelle là même li pou illuminée.

 

Si ou faire saki mo pé dire ou faire, c.à.d, Zikr Allah ou pou trouver ki ou même, ou la case aussi pou briller avec la lumière d’Allah.

 

Ene la case kot pé faire Zikr Allah li briller et scintiller pou habitants le ciel pareil couma nous trouve étoiles briller. Sa bane la case la briller couma étoiles grâce à la lumière ki ena dans Zikr. Ena certaines dimounes ki Allah de par So grâce, Li (Allah) fine donne capacité spirituelle, kot Allah Ta’ala faire zot trouve sa lumière ki briller dans sa bane qualité la case ki sa bane dimoune la engage zot dans Zikr nuit et jour, pas bane la case nek cause bane zaffaires mondaines, ni zaffaires ki business bizin faire pou gagne beaucoup l’argent, ni la case ki pé faire bane mauvais sujets de conversation, ki bizin faire pou faire ministre, gouvernement, ou monsieur là content pou capave gagne promotion lors promotion, rode monte lors la tête de bane les zot dimoune ki mérite licitement (halal) et ou, ou rode monté la haut, passe lors tout zot la tête couma fizête, et ou conné pli montre la haut, li pli facile pou tombé couma ene papaye pourri ki donne l’odeur et moustique. Couma ou pé trouvé zordi jour dans nous pays l’Ile Maurice, scandale Air Mauritius et d’autres encore (avant arrive tous sa la Allah (swt) ti donne moi bane révélation, messages et Kashafs aussi)

 

Lerlà même mo fine écrire sa ti livret là : « La République de l’Ile Maurice – les visages changent… La fraude, la corruption, les mensonges restent ». Et mo pé encore recevoir beaucoup message et Kashafs saki encore pou traverser dans sa pays la, mais sa c’est pas le sujet de mo Khutba Jummah, pou ki mo dire Insha Allah sous l’instruction Divine, mo pou écrire à tous sa bane grand fraudeurs, corrupteurs, manigance etc. bane lettres ouverts et aussi pou adresse bane chef d’états à travers le monde, si zot pas change zot mentalité ki pou arrive zot. Ene zaffaire mo ena pou dire ou, pas alle cherche l’honneur par ou même avec bane bribes ou d’autre moyen pou ki ou vine populaire, pou dimoune conner ki ou été et l’heure la ene l’arrogance développé dans ou, ki ou conne bien Allah (swt) détesté sa bane qualité dimoune la. Éna sa bane qualité dimounes la causer beaucoup, travail zéro et zot même ki pou devant devant, camera braquer lors zot ou sois la gazette pou flatte zot et quand ou étudier zot bien alors ou alle trouver ki les zot ki travail dure, mais c’est zot ki gagne grandeur dans sa le monde la, couma ene causer dire, bœuf travail, cheval manger.

 

Dans sa le monde là, et surtout à Maurice fine vine coumsa, ti dimoune pou travail dur même li, et les autres (monsieur la) nek assizé dans bureau cause bane causer comme si dirait, li même pé casse ene grand paquer, l’heure guetter les autres pé travail nuit et jour, monsieur là ki pé gagne l’honneur, mais devant Allah sa pas traverser sa ! Li (Allah) donne zot ene ti délai. Li (Allah) guetter combien temps zot pou sauter coumsa, l’heure Allah pou attrape zot et faire zot sauter couma bouchon champagne. Sa même hauteur ki ou fine monter, sa même hauteur ou pou tomber, pli bas encore avec humiliation lors humiliation.

 

Mo pé dire zot zordi ki ena 10 ans avant sa, kot li ti dire moi faire doah pou li et mo fine faire doah concernant problème ki li ti pé gagner dans so travail et mo fine dire li, à la lumière de doah ki Allah fine montrer moi et sa chef ki pé persécute li là ki pou arrive li ! Et après couma li pou gagne bane promotion jusqu'à li pou arrive top dans so travail. Sa l’époque là, sa dimoune là ti croire dans mo rêve, dans mo doah, mo bane texte reçu, li vine kot moi lire jusqu'à fort tard dans la nuit. Li fine témoigne mo bane travail lors bane l’îles (et li ti vini kan mo ti à l’extérieur, et li-même fine témoigne miracles de sa bane travail ki fine faire là) et li-même kan li ti rentre Maurice, le lendemain matin même, li fine alle raconte mo bane famille, mo travail lors l’île et moi sa l’époque là mo ti encore pé travail lor sa l’île là.

 

Maintenant l’année 2001 quand fine mettre nous en dehors Nizamé Jamaat, sa même dimoune tourne le dos avec manifestation divine et li faire grand grand meeting lors mimbar Hazrat Mohammad (s.a.w). Li prend li-même comme le plus grand défenseur Nizamé Jamaat et so sois disant Amir magouiller la, pou renonce tous saki li fine témoigner. Allah pé donne li ene délai et pé monte li là haut. Si li pas réaliser et li pas change li même et so comportement arrogant, li croire li fine vine ene grand petto dans pays, pense bien so conséquence pou bien grave. Seul Allah conner couma pou attrape li, couma fine attrape ene de so bane proche (Insha Allah).

 

Mo pé écrire ene livre lors sa bane qualité dimounes la, et ki pou arrive zot, livre là près pou fini et bientôt li pou à l’imprimerie.

 

Oui, laisse-moi retourne lors mo Khutba Jummah, Zikr Allah.

 

Mo pas ti bizin même alle cause tous sa la, définitivement Allah même fine manifester li à travers moi, pou ki li capave repenti pou tous sa ki li fine faire.

 

Alors mo ti pé dire ki c’est Allah Ta’ala même ki donne sa bane qualité dimoune ki tourne vers Li nuite et jour, la capacité spirituelle pou trouve la lumière Allah ki briller lors sa dimoune là, et ki dans so la case aussi zot tous engager dans Zikr Allah nuit et jour.

 

En effet ki sa bane dimoune là ki trouve sa bane lumière ki briller lors ene dimoune ou la lumière d’Allah refléter dans sa la case ene dimounes ki engage dans Zikr Allah ? ki sa bane ki trouver la ? C’est bien bane serviteurs d’Allah ki capave trouve la lumière ki rayonner dépi sa la case là, ou sa dimoune là.

 

Ene grand vérité sa ; la case kot faire Zikr Allah, sa la case briller, pareil couma ou trouve étoile briller dans le ciel à soir.

 

Quand ou pou conne beauté et valeur étoile ? C’est dans l’obscurité ! Li jour ou pas pou trouve sa, c’est dans l’obscurité ki ou pou trouve sa beauté de sa étoile là, kan li briller.

 

Coumsa même, là ou pas conne valeur, beauté de Zikr parceki ou fine attacher avec tous bane choses mondaines. Si ou pé  faire ene deux Ibaadat, sa aussi li vine ene routine, péna ene vrai et réelle l’amour d’Allah pou faire sa bane Ibaadat là et pendant ki pé faire Ibaadat, ou pé faire bane actions physique, mais moralement ou l’esprit pas lors Allah ; ou l’esprit dans l’autre zaffaire. Kan ou pou conne vrai valeur et beauté de sa bane acte Ibaadat et Zikr là ki ou fine faire toute longue ou la vie ? C’est après ou la mort, quand ou pou trouve le jour jugement dernier Allah pou lève certains groupes dimounes ki ti attacher nuite et jour avec tous bane actes Ibaadat et Zikr Allah, zot figure pou briller avec la lumière et zot pou près avec Allah.

 

L’heure la, ene bane les autres dimounes pou cause entre zot même et pou pose question ki sa bane ki pé illuminé la et l’heure la zot pou alle conner, c’est bane dimounes ki fine sorti dépi différent familles, différents l’endroit et zot ti engage zot dans Zikr Allah.

 

Zikr Allah, c’est ene signes de la foi solide envers Allah. Zikr Allah, li préserve nous dépi l’hypocrisie, bane fraudeur, magouille et Zikr Allah donne nous ene protection garantie contre Shaytan. Zikr Allah délivrer nous dépi difé l’enfer et aussi li bien efficace surtout couma ene protection contre Shaytan.

 

Shaytan accroche li avec le cœur dimoune. Kan sa dimoune là faire Zikr Allah, Shaytan vine impuissant, humilier et li éloigner.

 

Mais quand ene dimoune néglige Zikr Allah, Shaytan contamine so le cœur avec toute sorte qualité mauvais pensée.

 

C’est sa ki nous bizin faire beaucoup Zikr Allah en abondance pou ki nous le cœur capave reste protéger dépi mauvais penser et le cœur là développe ene la force spirituelle exceptionnelle.

 

Donc, li pas ti autant nécessaire pou alle contaminé avec bane zaffaire de sa le monde là, si vraiment nous ti attache nous avec « Laa-Ilaaha Illallâh ». Ki fine arrivé ? Bane choses mondaine fine vine pli important ki la spiritualité. La force spirituelle pou résisté contre shaytan fine diminué complètement. Sa même nous trouver ki le monde musulman pé souffert dans tous so aspect.

 

Azordi jour, le cœur fine tellement malade spirituellement ki malgré commié traitement nous pou prend, et surtout quand maladie là fine faner partout et fine prend forme ene l’épidémie, Shaytan prend possession le cœur dimoune, Shaytan la assizé couma ene z’aiguille ki li diriger dans direction le cœur. Si li trouve ki le cœur faire Zikr Allah, li retire sa z’aiguille là tout de suite mais si le cœur la négliger, li introduire so poison et mauvais penser à l’intérieur.

 

Alors nous cherche aide avec Allah Ta’ala pou Allah même aide pou reste attacher avec Zikr Allah et nous faire doah aussi ki Shaytan pas empoisonne nous le cœur et dévier nous dépi le droit chemin, Insha Allah. Ameen