Text Box: Bismillah-ir-Rahman-ir-Rahim KHUTBA JUMMAH HAZRAT AMIR’UL MOMENEEN MUHYI-UD-DIN AL KHALIFATULLAH MUNIR AHMAD AZIM 01 Août 2008 (Résumé du Khutba Jummah) Après ki le Khalifatullah fine saluer zot tous, li fine commence lire le Tashahhud, Taouz et Surah Al Fatiha et ensuite li fine lire ça bane versets suivants là :  « Allah ine permette bane opérations commerciales et Li fine interdit l’intérêt. » (Ch.2 : V.276) Ene problème ki pé touye nous tous: C’est le RIBA (L’Intérêt) dans bane pratiques commerciales et bane transactions bancaires. A l’époque du Saint Prophète (s.a.w), ki ti été le RIBA ? Le Riba ti l’intérêt ; c’est ene dimoune ki ti pé crazé par ene lotte dimoune. Dans ki forme ki le RIBA exister aujourd’hui ? Li pas seulement l’intérêt. C’est tout bane revenu financier ki nous conné (bane revenues économiques) ki pas vine de bane travail honnête et moral. Chaque l’année plus ki 600,000 dimounes mort dans bane pays pauvres zis à cause l’effet de dette ki arrivé, principalement à cause RIBA – 600,000 ! Incroyable ! Li fine vine ene problème ki Allah (swt) ine déjà cozé 14 siècles de cela. Allah (swt) ine averti nous de ça fléau là (ça calamité là) :  « Allah ine permette la vente et ine interdit l’usure (l’intérêt). » (Ch.2 : V. 276) Hier Riba ti paraître banal et sans l’importance. Azordi li pé pollué tout le commerce mondiale. Li fine vine couma ene nécessité (pour ça le monde là). La presse, bane médias zot nék délivrer en grand partout bane désires ou bane messages ki même enfoui dans le cœur de bane consommateurs. Et ça bane maîtres du commerce là, zot but c’est pour augmente indéfiniment kantité de bane consommateurs ziska ki zot tous zot vine couma bane pantins ki tiré par bane la corde ki dirigé par ça bane « maîtres » là. Ene fois ki nous fine habitué avec ça bane maîtres là, nous vine de telle façon ki nous pas capave sans passe de ça. Nous dégradé. Nous vine esclaves de ça bane désires là. La liberté pou amène (vivre) ene la vie simple couma l’Islam dire li vine bien difficile, si tant nous vine bane victimes bien consentant de ça société consommatrice là. Ça grand malheur là, c'est-à-dire, le RIBA, ine gâte l’esprit et le cœur de nous bane frères. Li fine faire nous gagne ene mentalité de possession, de méfiance et de convoitise (désire). Li fine éfface de nous le cœur la douceur de nous bane frères longtemps ti ena. Pourtant nous, bane musulmans nous croire fermement ki nous tous pour goûte la mort ; nous ena ene compte pou rendé avec nous Créateur. Nous possède zis ene seul kitchose : ça bien tiguitte létemps ki nous ena pou passé lor ça la terre là ! Aujourd’hui nous pé assisté à ene pratique du RIBA ki ena plusieurs facettes : la vente ambivalente (c’est-à-dire, crédit avec zéro dépôt ou bane prêts de la banque avec l’intérêt etc.). Pourtant le Saint Prophète (s.a.w) fine interdit tout intérêt, toutes sortes de commerce (ventes) ki ena préjudice ou ki constitué ene procédé pou bane gains malhonnêtes et ene fraude ki évoque (suscité) la haine et la discorde parmi bane dimounes. Le Saint Prophète (s.a.w) ine dire : « Kan bane dimounes montré zot avare avec zot l’argent, zot pratique l’intérêt, zot suive ‘la queue vaches’ et zot renonce Jihaad. Allah pou frappe zot d’ene malheur ki seulement zot retour à la religion capave sauve zot. » L’intérêt (Riba) li tout séki vine ajouté à bane biens ki fine déterminé (bane bien fixés). Nous trouve l’intérêt soit dans bane échanges inégal de bane detrois kalité d’aliments ou de métal, soit dans bane prêts avec intérêt à terme. Allah (swt) ine décrire l’intérêt comme suite : « O bane croyants ! Pas pratique l’intérêt, doublant de ça façon là zot bane profits. » (Ch.3 : V.131) Le Saint Prophète (s.a.w) ine dire : « Allah ine maudit celui ki nourri li-même avec l’intérêt, celui ki donne ça (l’intérêt là) à ene lotte dimoune, celui ki fine témoigne d’ene transaction d’intérêt et celui ki établi ene contrat pou gagne l’intérêt. » « Ene kitchose ki vine dépi l’intérêt et ki fine dépenser avec empressement par l’homme pour so nourriture, li pli pire ki 36 adultères ki ene dimoune capave commette. » « Ena 73 façons pou pratique l’intérêt. C’est ki moins pire là, li équivaut avec commette l’adultère avec ça dimoune ki pratique ça là, so propre mama. C’est ki pli pire c’est la diffamation d’ene musulman ; (c-à-d mette blâme lor ene musulman innocent.) » « Evite bane 7 péchés ki amène à la perte. ‘Ki ça bane péchés là?’ Bane dimounes (compagnons) ine demande le Saint Prophète (s.a.w). Li fine réponne : C’est prend ene partenaire en égale avec Allah (swt), pratique la magie, essaye touye ene dimoune kan Allah (swt) ine faire la vie ene zaffaire sacré, sauf pou ene cause juste, pratique l’intérêt, mange du bien de l’orphelin, sauvé le jour de la guerre et accuse bane madames mariées ki vertueuses et croyantes d’adultères sans ki zot capave faire kitchose. » L’interdiction de l’intérêt li vise à préserver du bien de bane dimounes faibles de bane dimounes malhonnêtes, pou oriente aussi bane musulmans vers bane sources de gains honnêtes ki péna aucaine manœuvres (transactions) malhonnête pou trompe kikaine. L’interdiction de l’intérêt li élimine bane cause de la haine et bane contrariétés ki ena dans la société, couma l’agriculture, l’industrie et commerce légale. Li empêche tout bane forme d’hostilité et d’ennemité ki ene musulman capave ena envers so frère. Li aide ça musulman là pou ki li pas alle vers so propre la perte. Ça dimoune ki prend l’intérêt là (c-à-d, l’usurier) li seulement rebelle et injuste. L’injustice ena bane conséquences catastrophiques. Allah dire :  « C’est lor zot même ki zot bane injustices tombé. » (Ch.10 : V.24) L’interdiction de l’intérêt li ouvert pou bane musulmans bane chemins pou faire bane bonnes actions afin ki li faire de ça, so provision pour l’autre monde (Akherat) : prêter à so frère sans l’intérêt, attane so bane périodes d’aisance (facile) pour permette li rembourse l’argent là, donne li bane facilité de paiements et montrer ou-même rempli de compassion envers li et ou faire tout ça juste pou gagne la satisfaction d’Allah (swt). Ça manière d’agir là li répanne l’amour parmi bane dimounes et li créer ene sentiment de fraternité entre zot. Mais ki pou faire (à propos l’intérêt) dans le monde moderne d’aujourd’hui ? La plupart de bane la banque pratique l’intérêt et zot fondé lor ene base ki purement basé lor l’intérêt et li interdit au musulman pou ena recours à ça bane kalité la banque là sauf en cas de nécessité extrême. Bane musulmans bizin réuni et consulté sakaine so camarade afin pou établir ensemble ça la banque Islamique là. Le but de ça l’institution là li pou : 1) Garde gratuitement bane dépôts, 2) accorde bane prêts sans l’intérêt, 3) participe dans bane domaines de l’agriculture, commerce, construction et l’industrie et 4) prend part dans tout bane activités ki rentables, 5) Transfère gratuitement bane fonds d’ene pays à l’autre, kot ça la banque là ena ene filière. 6) Établir ene bilan sak l’année et distribuer bane bénéfices en proportions avec bane actions et bien sûr Allah (swt) pas pou abandonne jamais bane dimounes ki pou prend ene telle initiative. Pas oublier ki au temps de l’Islam, nous ti ena nous l’indépendence d’esprit. Nous ti ena nous propre civilisation avec bane traditions authentiques. L’Islam ine regné dépi douze siècles lor ça grand région dépi bane rives de l’Atlantique ziska la mer de l’Inde, de bane la plage de la Méditérranée ziska bane désert de l’Afrique. Bane populations ki ti pé habitent ça bane places là ti ena la même réligion (c-à-d, l’Islam), la même langue, bane même institutions, bane même arts et zot ti faire ene temps parti d’ene même empire. Bizin faire impé z’éfort dans la recherche et Insha-Allah, l’idée pou créer ene la banque Islamique pou capave réalizé. Mo ti pé reste bête, tant de l’emphase ki Allah (swt) et So Rassool fine metter dans Quran Shariff et ki kalité grave, li grave pour ene dimoune ki prend l’intérêt et ki paye l’intérêt aussi. L’Association Ahmadiyya ki fine croire dans le Messie Promis et Mahdi (a.s) et nous ti bizin montrer plisse attention avec le riba et faire bane programme pour expliquer comment Allah (swt) et So Rassool fine condamne le riba, ça zot pas pour faire, zot plito veille zaffaire dimounes, au lieu montrer la gravité de riba dans lizié d’Allah, zot plito faire le ribat. Ene kitchose étonnant et délicat ki li sous contrôle ene Khalifa et zot fine dérivé complètement de l’enseignement divine (le Quran Shariff) et zot prend riba (l’intérêt) dans la banque kot zot faire bane publication livres, journal kot pé mentionne nom d’Allah. Kot nous pé aller, prend riba même et propage parole d’Allah, kan Allah même fine complètement défanne avec ene ferme sévérité concernant riba. Jamaat Ahmadiyya ti bizin ene l’exemple, li même. Ça bane l’argent ki rentrer tous les mois et par l’année combien li faire, kan zot ti capave ouvert ene la banque Islamique et faire bane développement, ki halal et récolté l’argent halal et aussi aide bane pauvres dans zot besoin, sans ki zot ena bane dette haraam lor zot la tête ; ça zot pas pour faire, plito faire maja-karo avec l’argent ki dimounes pé dépenser dans chemin d’Allah, et ena pé bizin voyager kot, kot ena Jalsa Salana dans bane pays et pocket money dans poche et encore bane les autres maja-karo ki pé faire avec ça bane l’argent ki bane frères et sœurs pé faire sacrifices kan tandique ti capave faire beaucoup de travail de Deen et sociale et faire bane publication livres, journal avec l’argent halal, non l’argent haraam. Zot pé plito faire gaspillage. Ça même tracas Hazrat Massih Maoud (a.s) ti pé gagner, kan ti ena zis 2 anna dans so tiroir, kot li ti pé penser ki ene l’époque pou vini kot pou ena beaucoup l’argent dans so Jamaat mais pas pou ena bane dimounes honnêtes ki pou conne gère ça l’argent. Dans nous l’époque astère, nous pé témoigne couma ça pé réalisé, mot par mot. Pas pour nannié, Allah fine éleve ene l’autre Jamaat ! Mo pé adresse moi aussi avec tous bane Mullah ki pé prend zot couma bane grand défenseurs de l’Islam et aussi zot conne juge la foi dimounes ki sanlà musulman et ki sanlà kafir, ki pas bizin faire salaam, empêche zot alle faire Hajj. Lor ça sujet de riba là zot pas apporte aucaine jugement d’après l’enseignement d’Allah et So Rassool (s.a.w) kot ena beaucoup de nous bane frères et sœurs musulmans pé mettre l’argent fixed déposit pour gagne l’intérêt et pour zot vivre lor l’argent l’intérêt, et ki conné, c’est juste Allah ki conné ena pé donne ça kalité l’argent sale là dans le travail d’Allah et Allah Li même fine considère ça comme ene grand péché. Et aussi, ki conné, Allah ki conné, ena bane frères er sœurs musulmans ki pé prête bane dimounes en difficulté l’argent lor l’intérêt, et pé prend bane objets de valeurs ou terrains même en gage avec ene pourcentage l’intérêt bien fort, et kot ça bane pauvres dimounes là, kan pas capave render, pé mette saisi lor tous kitchoses ki zot fine mette en gage. Kot Allah et So Rassool (s.a.w) zot bane paroles fine allé ? Au contraire Allah et So Rassool (s.a.w) fine enseigne nous, kan kikaine en difficulté, si nous ena moyens, nous bizin aide ça bane dimounes là, et non pas pour abuse lors zot faiblesse financièrement pour tire l’argent plisse avec zot. Pense bien ki ene jour nous tous pou retourne vers Allah et nous ena ene compte pour render avec Li. Emplace bane Ulema ou sois bane Mullah pé la guerre entre zot et pé apporte division, nous unir nous sous bannière la loi du Tawheed (l’unicité d’Allah) So l’enseignement et So Rassool (s.a.w) ; kot nous capave éloigne nous même et nous bane frères et sœurs musulmans contre bane péchés ki capave détruire nous la foi et attire la colère d’Allah lor nous. Alors ou trouve so l’importance zordi kot ene homme d’Allah bizin là pour unir tous nous bane frères et sœurs sous l’instruction divine et kot sakaine parmi nous capave épargner avec la colère d’Allah et nous vine ene Ummat exemplaire Insha-Allah. Alors dans ça siècle là, ene la banque Islamique li très nécessaire et important pour contrecarrer tous bane transactions kot récolter bane l’argent malpropres (l’intérêt). Alors nous tous bane frères et sœurs musulmans nous faire ça duah là. « Rabbana laa taj’alnaa fitnatal lilkawmiz Zalimeen wa najjina bi rahmattéka minal kawmil kafériin. » O Allah ! Pas laisse nous vine victimes de la tentation d’ene peuple ki opprime dimounes ! Par To Miséricorde, protége-nous de bane infidèles. AMEEN