Bismillah-ir-Rahman-ir-Rahim

 

Khutba Jummah Vendredi 24 Février 2006

 

Hazrat Amir’ul Momeneen Muhyi-ud-Din Munir Ahmad Azim

 

Le Martyre de Imam Hussein (r.a)

 

3ème & Dernier Partie

 

Après ki Hazrat Amirul Momeneen Muhyiuddin, Munir Ahmad Azim finne lire le Tashahhud , le taaouz li finne lire sourate Al Fatiha du Saint Coran et li fine lire:

 

« Wa laa tah-sabannallaziina qutiluu fii sabiilillahi am-waataa. Bal ahyaaa-un inda Rabbihim yurzaquun »

 

(Pas considère bane ki fine tués pour la cause d’Allah couma morts. Au contraire zot vivants, et auprès d’Allah, zot gagne tout séki zot bizin)

 

Mo continue ça khutba ki mo fine faire 2 ou 3 semaine de cela kot mo ti cause lors Imam Hassan et après lors Imam Muslim et so deux garçons, couma ça bane làfine shaheed. Azordi le khutba li lors le départ de Imam Hussein (r.a) pour Kufa. Kan Imam Hussein (r.a) fine recevoir premier lettre de Imam Muslim ti envoye kot dans Kufa tout correcte, li fine informe so la famille et bane habitants de Makka ki situation dans Kufa bien correcte et zot fine decider pour alle Kufa.Au commencement ti éna 17 membres ki ti décider pour accompagne Imam Hussein et après ça fine augmenter encore kot ti arrive environ 82 personnes et dans ça groupe ki pé alle avec Imam Hussein (r.a) ti éna abne vieux dimounes, jeunes filles, madames, zenfants, jeunes garçons et ti baba. Ti éna aussi 5 les autres garçons de Hazrat Ali (r.a), ti éna 2 neveux Imam Hussein (r.a), Imam Muslim so 3 neveux et aussi la sœur de Imam Hussein (r.a), Hazrat Zainab (r.a). Tous ça bane dimounes là fine shaheed dans Karbala à l’exeption de Imam Abedine ki pas ti la guerre à cause li malade. Alors zot tous fine prend la route vers Kufa. Mais en route, plusieurs dimounes ti conseille Imam Hussein (r.a) pour retourne vers Makka et pas bizin alle à Kufa. En chemin, la petite caravane de Hazrat Imam Hussein (r.a) fine rencontre Bashir bin Raalib ki sorti de Kufa pé alle vers Makka et Imam Hussein (r.a) fine demande li un peu des renseignements concernant Kufa, li dire ki bane Kufis zot bane traites, zot pas fine tenir zot promesse et zot paroles et zot plutôt en faveur de Yazid. Malgré ça nouvel choquant là, Imam Hussein (r.a) fine prend le courage pour continuer so la route et plus devant li fine rencontre encore bane lézot dimounes ki fine donne la même nouvel tel couma Farezaq ene poète et ene l’autre encore Ubaidullah bin Mutee, li fine faire tous pour essaye convaincre Imam Hussein (r.a) pour pas alle vers Kufa. Imam Hussein (r.a) fine persister pour aller parcequi li fine penser avec reign de Yazid bane Kufis pour perdi Imaan.

 

Toujours en chemin li rencontre ene l’autre dimoune ki raconte li séki fine arrive Imam Muslim et so deux garçons et couma Ubaidullah bin Ziyaad fine empêche bane Kufis soutenir Imam Muslim. Ça nouvel là Imam Hussein (r.a) pas ti conner ça ; li fine bien choquer et triste et li tourne vers tous bane ki avec li dans ça caravane là et li raconte zot couma Imam Muslim et so deux garçons fine shaheed et éna ki ti pé accompagne Imam Hussein (r.a) fine conseil li pour retourne Makka mais parmi zot même éna fine dire « nous continuer », l’heure là Imam Hussein (r.a) fine dire zot : « Celui ki oulé retourner li capave aller et celui ki oulé accompagne moi, zot capave vini ». Zot tous finalement fine décide pour alle ensemble. C’est ça bane vrai défenseur de l’Islam, malgré difficultés, zot pas fine reculer et zot accepter la mort, mais l’Islam bizin reste vivant. Après ene longue voyage, finalement zot fine arrive au bord de Kufa et kan zot fine arrive là-bas, Ubaidullah bin Ziyaad fine déjà fini envoye ene l’armée pour barre la route et empêche Imam Hussein (r.a) rentre dans Kufa. Chef l’armée de Yazid ti appelle Hoor et li ti avec ene l’armée de 1000 soldats fine présente devant Iman Hussein (r.a). C’était le 1er Muharram l’an 61 Hijri. A ça moment là, Imam Hussein (r.a) fine explique Hoor, ki l i pas fine vine Kufa pour la guerre, ni pour vine rode pouvoir, mais c’est bane habitant Kufa même fine écrire plusieurs lettres et fine invite li pou ki zot pas oulé ki Yazid détruire zot la foi et Imam Hussein (r.a) fine retire ça bane lettres là et fine nomme zot noms ça bane dimounes ki ti écrire ça bane lettres là et kan zot fine entende zot nom, zot gagne la honte et zot baisse zot la tête.

 

Alors Hoor dire ki li pas au courant de ça bane lettres là, li pé faire so travail ki fine dire li faire, li dire Imam Hussein (r.a) ou pas gagne droit rentre dans Kufa, ou bizin alle devant Ubaidullah ibné Ziyaad. Imam Hussein (r.a) pas fine accepter et li fine décide pour faire ene l’autre chemin pas vers Madina et ni vers Kufa . Caravan de Imam Hussein (r.a) fine continuer zot la route, finalement zot fine arrive à Karbala. Ubaidullah envoye ene message à Hoor pour dire li ki pas laisse Imam Hussein (r.a) alle plus devant et oblige zot arrête lors ene la plaine kot péna aukaine protection, ni nourriture, ni de l’eau.

 

Kan bane dimounes ki ti avec Imam Hussein (r.a) fine tende ça nom ça l’endroit là, zot fine pleuré beaucoup car zot conner ki Hazrat Mohammad  (s.a.w) ti prédire ki Imam Hussein (r.a) pour shaheed là.

 

Ene fois, kan Hazrat Ali (r.a) sorti dans ene jihaad, li fine passe par Karbala et li fine  demande nom de ça l’endroit là et zot fine dire li c’est Karbala ça ; Hazrat Ali (r.a) fine pleurer beaucoup parcequi ça même la terre ki Hazrat Mohammad  (s.a.w) ti prédire shahadat Imam Hussein (r.a).

 

Alors Imam Hussein (r.a) fine conseil so bane compagnons pour montrer zot patience et pour supporte bane difficultés et problèmes ki capave arrivé. L’heure Imam Hussein (r.a) fine arrive Karbala, Ubaidullah bin Ziyaad fine envoye li ene message pour dire li ki li bizin prête serment lors la main Yazid et si li refuser, li pour bizin prépare li pour la guerre et kan Imam Hussein (r.a) fine gagne ça lettre là, li fine lire et li fine jette ça par terre et li dire ça dimoune ki ti amène ça lettre là : « Mo péna rien à faire avec ça lettre là » et ça dimoune là fine alle dire Ubaidullah la façon ki Imam Hussein (r.a) fine faire et Ubaidullah fine gagne beaucoup colère kan li fine apprend ça et toute suite li fine informe Yazid et Yazid fine donne li ene l’ordre pour renforci soldats zot nombre et écrire ene lettre à ene grand générale de guerre ki appelle Amar bin Saad et Ubaidullah fine dire li, si ou accepter ça proposition là pour la guerre contre Imam Hussein (r.a), Yazid pou nomme li gouverneur ene province dans l’Iran et kan Ibn Sa’ad fine gagne ça lettre l à, li fine refuser et li pas d’accord pour déclare la guerre contre le petit fils du Prophète  (s.a.w). Ibn Sa’ad li même garçon Hazrat Sa’ad bin Abi Waqaas (r.a).

 

Alors au début, Ibn Sa’ad fine refuser pour alle la guerre contre Imam Hussein (r.a), mais Ubaidullah bin Ziyaad fine influence li par l’argent et poste gouverneur et fine dire li, si to refuse tous ça bane cadeaux ki Yazid pé offert toi, bé toi aussi, to la vie pour en danger et finalement Ibn Sa’ad tenté avec tous ça là, li prend so l’armée pour vine Karbala pour la guerre en faveur de Yazid contre Imam Hussein (r.a). C’était le 7ème Muharram l’an 61 Hijri ki Ibn Sa’ad rentre là-bas et li ordonne bane soldats ki pas laisse personne de Imam Hussein so groupe vine prend de l’eau dans la rivière Furat et li fine penser ki si li prive bane là de l’eau zot capave accepter Yazid comme chef et en même tempszot pour affaibli et zot pas pour capave la guerre. Dans  la pleine Karbala, ti éna environs 22,000 soldats fine réuni et fine mobilisé pour la guerre contre Imam Hussein et so suivant ki ti en nombre de 82 seulement. Ça bataille là c’était pas seulement ene bataille entre Imam Hussein (r.a) et Yazid, mais plutôt c’était ene bataille entre la vérité et la fausseté entre Haqq et Baatil.

 

Malgré du côté Imam Hussein, le nombre ti très peu en comparaison avec celle de Yazid, mais zot fine montrer zot courage, Imaan et bravoure, malgré trois jours consécutive zot fine privée avec de l’eau et de nourriture  dans ene soleil ardent, mais zot pas fine reculer devant l’armée Yazid.

 

Imam Hussin (r.a) fine propose 3 propositions à Ibn Sa’ad pour évite ça la guerre là :-

 

(1) Li dire Ibn Sa’ad laisse li adresse Yazid pour résourdre le problème du khilafat.

 

(2)  Li dire ki li péna aucaine l’intention pour la guerre, laisse zot aller tranquillement.

 

(3) Li dire Ibn Sa’ad puisque péna aucaine l’intention pour la guerre, laisse zot alle dans ene l’autre l’endroit pour propage Islam tranquillement.

 

Ibn Sa’ad fine trouve ça proposition là correcte, li fine informe Ubaidullah ibn Ziyaad et li aussi fine trouve ça correcte, mais ti éna ene nommé Shimar fine déconseille zot, ki rejette ça  bane proposition là, parcequi si laisse Imam Hussein (r.a) allé, situation là pour vine pli compliquer et pli difficile plustard, vaut mieux fini li par là même, pas laisse li retourner. Kan Imam Hussein (r.a) fine trouver ki la guerre li inevitable, li fine réuni tous so bane compagnons  dans la nuit du 10ème Muharram, dans so discours li fine dire zot : « Sans doure, nous shahadat fine fini écrire dans la main ça bane l’ennemi là et avec tous sincérité mo donne zot permission, séki envie retourne kot zot, aller dans ça la nuite là même et pas pou éna aucaine blâme lors zot. L’armée Yazid bizin moi et après mo shahadat, zot pas pou rode personne ». A ça moment là, Hazrat Abbas et so frères fine debouté et dans ene seule la voix zot fine dire : « Eski nous capave aller, et après ou shahadat, nous, nous reste vivant ? ». Zot dire : « Nous faire serment lors Allah, nous pour la guerre avec bane l’ennemies jusqu’à nous donne nous la vie ».

 

Tous bane compagnons Imam Hussein fine raisonner dans même façon et personne pas fine accepter pour quitte Imam Hussein. Alors Vendredi le 10ème Muharram l’an 61 Hijri Hazrat Imam Hussein et so bane compagnons fine accomplir salaatul Fajr en jamaat. Ça namaz là c’était le dernier namaz en jamaat pour plusieurs parmi zot et après namaz li fine adresse so compagnons ki la guerre là li inevitable, nous tous bizin éna sabr et courage car nous conner nous lors le droit chemin. De l’autre côté bane l’ennemies fine prêt pour la guerre, zot fine rapproche kot la tente Imam Hussein même et certains parmi zot pé faire boufon à Imam Hussein (r.a). Imam Hussein (r.a) fine lève so la main fine faire doah et Allah fine puni ene de ça bane l’ennemi ki ti pé faire boufon là, so cheval jette li par terre, so lipied cassé, l’autre scorpion pique li et li fine mort et ene l’autre So cheval fine galoupper, li galoupe derrière cheval, li tombe dans la rivière Furat, de l’eau li pas réussi boire li mort là-même.

 

Malgré ça trois là fine mort dans déshonneur, bane lézot pas fine retire aucaine leçon là-dans. Et dans les environs de Karbala, bane dimounes fine apprendre ki Imam Hussein (r.a) et so compagnons en danger, zot fine vini pour la guerre en faveur Imam Hussein et zot fine dire « Aussi longtemps ki pour éna du sang dans nous le corps, nous pour la guerre dans le chemin d’Allah ». Zot tous fine la guerre et bane compagnons Imam Hussein (r.a) aussi fine jusqu’à zot tous fine shaheed. Zot fine shaheed oui, mais aussi zot fine touille beaucoup soldats Yazid. Après ki zot tous fine shaheed fine arrive le tour de Hazrat Imamj Hussein (r.a). Li fine attache Ammama Rassullullah  (s.a.w) lors so la tête, li fine prend sabre Hazrat Ali et Bouclier Hazrat Hamza. Imam Hussein (r.a) monte lors champs de bataille et li averti l’armée de Yazid, zot bane erreur, mais zot ti aveugler par l’argent et l’honneur zot pas fine prend compte Avertissement ki Imam Hussein (r.a) fine donne zot.

 

Ene grand soldat Syrien rempli d’orgueil prend so sabre pour touille Imam Hussein (r.a) dans ça même moment là Imam Hussein (r.a) fine attaque li couma ene z’éclair et fine décapite so le corps et jette li dans la boue. Plusieurs soldats vine la guerre avec li, malgré li pas fine manger plusieurs jours, li touille ene par ene. Inn Sa’ad et les autres fine observe courage ki Imam Hussein (r.a)éna, zot fine penser encercler Imam Hussein (r.a) et lance flèche lors li en même temps. Ene la pluie flèche fine tombe lors li et li fine blesser entier so le corps. Dans ça souffrance là, ene malfaiteur lance ene flèche lors so front baigner de sang et li fine gagne 72 blessures  dans so le corps  et li tombe par terre. Dans ça moment là ene soldat nommé Nadhir ibn kharshah vine vers Imam Hussein (r.a) avec l’intention pour sépare la tête Imam Hussein de so le corps mais so la main fine commence trembler et so sabre fine échappe dans so la main. Finalement, la tête Imam Hussein (r.a) fine être décapiter par khouli bin yazid et shabil bin yazid. Hazrat Imam Hussein (r.a) shaheed lors la terre Karbala. C’était ene Vendredi 10ème Muharram et Imam Hussein ti âgé de 56 ans, 5 mois et 5 jours.