Text Box: Bismillah-ir-Rahman-ir-Rahim

Khutba Jummah de Hazrat Muhyi-ud-Din Munir Ahmad Azim 
le Vendredi 17 Mars 2006

Surah Al Ikhlaas – Pureté de la Foi (Ch.112)

Après ki Hazrat Amirul Momeneen Muhyiuddin, Munir Ahmad Azim fine addresse le salaam, li fine lire le Tashahhud, Ta’ouz et ensuite li fine lire Surah Al Fatiha du Saint Coran et puis li fine lire le Ch.112 Al-Ikhlaas en entier. 
1. Qoul Hou Allah Ahad
2. Allah Us-Swamad
3. Lam-i-a-lid wa lamd youulad
4. Wa lam yakoul louhou, Kou fou’an Ahad

1. Dire : C’est Allah l’Unique,
2. Allah, Li indépendant et nous dépende lors Li (pou tout nous nécessaire).
3. Li pas éna zenfant et personne pas fine donne Li naissance,
4. et pas éna personne qui semblable (ressembler) à Li

Quoi qui li bien courte, ça surah là résume en quelques mots et d’ene manière définitive l’unicité d’Allah. Nous cause souvent de l’Unicité d’Allah, mais éna beaucoup dimounes ki pas comprend li et zot apporte ene quantité innovations ki alle à l’encontre de ça verset Quran là. Ene l’exemple même comme Darga. Ça surah là ou capave trouve li petite mais so interprétation et commentaire, si ou reflechi lors chaque verset, mais ene la mer de connaissance capave emerger dans nous l’esprit. Si nous reflechi ça surah là avec la foi, sincérité et taqwa, qui faire Allah pas pou illumine ou et donne ou ça connaissance là pour ou capave comprends ça surah là. Alors bane ki éna ene la foi ferme et pure, li bizin attache Li avec Allah seul. Éna ene seul Allah, Le seul et l’Unique, ki Éternel, Qui pas bizin nennié, et ki tous dépendre de li et c’est vers Li ki tous bane kitchoses dans l’univers et même ça l’univers là pour retourne vers Allah. Li péna ni garçon, ni papa, ni partenaire. Péna aukaine être ki capave ressembler Li.
 
Ça c’est bane qualité essentiels d’Allah. Nous l’esprit li tellement petit et borné ki nous pas pou capave jamais faire ene l’idée lors la grandeur d’Allah. Nous pour capave simplement penser dans ça façon là :

Allah li toujours près are nous. Li prend soin de nous et nous doit nous l’existence à Allah. Li le Dieu seul et Unique, Li touseul Li mérite nous l’adoration. Bane saints et bane idoles, et tous bane lézot kitchoses, zot simplement So bane créatures. Tous ça bane kitchoses là inférieur devant Allah et ki pas dignes ki nous adore zot. C’est Allah, qui L’Éternel, c-à-d, Li péna ni commencement, ni la fin, tandis ki nous, et tous bane lézot créatures d’Allah, nous éna ene commencement, par la naissance et ene la fin par la mort. Allah ti toujours exister et pour exister pour toujours. Li péna ni garçon, ni papa, ni maman, et nous pas capave attribué li bane kalités inférieur de l’homme, et ni nous capave compare Li avec l’homme.

Ça surah là indique nous c’est ki nous bizin accepter pour purifier nous la foi et nous conviction (certitude) dans bane vérité de l’Islam et  li établi fermement la base même de l’Islam ki ordonne nous pour adore ene seul Dieu, Allah, Le Grand Créateur de tout séki nous capave trouver ou imaginé.

V.1 : « Dire : ‘C’est Li Allah, l’Unique ».

Ça bane mots là donne nous ene indication de la nature d’Allah et de so bane qualités ki pli importants, dans ene langage qui nous capave comprend. Bane qualités d’Allah fine mentionné dans plusieurs places dans Quran, mais dans ça surah là, Allah enseigne nous couma pour évite bane pièges ki bane dimounes et même bane nations de bane l’époques d’avant ti tombé de temps à autre, kan zot ti pé essaye comprend tout lors Allah avec zot tipti l’esprit.

Premier kitchose ki nous bizin remarquer c’est ki : (1) So nature li tellement sublime (grand et extraordinaire), Li tellement au dela de la portée de nous bane connaissances limitées, (2) Qui meilleur façon pour réalise So présence, c’est senti ki Li ene la force Suprême qui englobe tout ene Li. 

‘C’est Li Allah’ – Ça affirmation de l’existence d’Allah, li pas ene conception abstraite mais li réel kot Allah exister pour de vrai; Li extra près avec nous, et Li dans nous ; et Li prend nous compte et occupe nous, et nous doit nous l’existence grâce à Li touseul.

Deuxième kitchose ki nous bizin réaliser, c’est ki Li Unique et c’est Li touseul ki Dieu, Le seul ki tous créatures bizin adorer. Tout bane lézot kitchoses ou lézot dimounes à ki nous penser, zot nec So bane créatures et zot pas capave être comparer avec Li.

Troisième kitchose ki nous bizin réaliser, c’est ki Li Éternel ; Li péna ni commencement, ni la fin. Li Absolu (partout). Li pas limité par létemps ou l’endroit ou bane circonstances. Li la Réalité même et tout bane lézot kitchoses et bane lézot place zot seulement bane l’ombrages ou bane reflets face à Li.

Quatrième kitchose ki nous bizin réaliser c’est ki jamais nous bizin pensé ki Allah Papa ou garçon ene kikaine, parcequi si nous faire ça, c’est couma dire nous pé attribuer bane qualités animal are Li dans nous pensées.

Cinquième kitchose ki nous bizin bien mette dans nous l’esprit c’est ki Li (Allah) pas ressembler personne ou ene kitchose ki nous connaît ou ki nous capave imaginer : So bane kalités et So nature li unique.

Quand nous dire : « Li Unique », nous pé écarte nous-même de tous bane l’idées polythéistes, c-à-d, l’adoration de pluzieurs « dieux » ki bane dimounes adopté. Ça system là li tous le contraire de nous system de vie ki pli véridique et pli profond. Si nous guette dans la nature même, nous pour trouve l’unité (ou l’unicité d’Allah) dans bane l’ordres de bane kitchoses, l’unité dans bane faits fondamentales de l’existence, ki proclame l’unicité du Créateur.

V.2 : « Allah, Li indépendant et nous dépende lors Li pou tout nous nécessaire ».

« Swamad » li ene mot très difficile pour traduire par ene seul mot. Li traduire par 2 mots, « Éternel » et « Absolu ». « Éternel » - Indépendant de tout kitchoses, « Absolu » nous dépend lors Li pour tout nous nécessaire. Le deuxième mot « Absolu » implique l’existence absolue, ki pas capave attribuer ça à personne à part Allah, tout bane lézot existence zot zis pour ene courte durée lors ça la terre là ou bien zot conditionnelle. 

Li (Allah) indépendant de tous dimounes et de tous kitchoses, parcequi tout dimounes et tous kitchoses dépanne lors Li. Ça repousse l’idée de plusieurs « dieux » ki ti simplement bane dimounes ki ti pé manzé et boire et qui ti pé lutté, et ki ti pé faire bane complots, qui ti pé dépend lors bane dons de zot adorateurs etc… ou bien ça bane fausses « dieux » là ti simplement bane être bane imaginaires ki l’homme fine inventer. C’est dans légendes (zistoires imaginaires) ancienne qui nous trouve l’existence de plusieurs « dieux » fine enseigner.

V.3 : « Li pas éna zenfant et personne pas fine donne Li naissance,

Ça verset là contradire l’idée de bane Chrétiens ki zot éna lors la divinité. Ça verset là casse l’argument de trinité, kot bane Chrétiens avance ça souvent. Zot croire dans Dieu comme étant le ‘Père’, ‘le fils’ et ‘le Saint Esprit’. C’est pour ça ki Allah fine casse ça bane croyances fausses là, kan Allah fine révèle ça verset là et de ce fait li établir fermement So pureté et So l’unicité dans tous aspect.

V.4 : et pas éna personne qui semblable (ressembler) à Li ».

Ça verset là, Li ene avertissement pour l’homme kot li bizin arrête concevoir Allah dans bane formes humains spécifique – Ça c’est ene temps de l’homme pour précise so l’idée (pensée lors Allah) mais faudé pas li faire ça. Li bizin arrête associer d’autres choses avec Allah. A travers le temps aussi fine éna ene tendances pour faire bane créatures vine Dieu et mettre Dieu (Allah) dans la peau humain. Alors nous bizin à tout prix évite ça bane zaffaires là ; surtout pour ene Musulman, li bizin place so confiance totale en Allah, so Créateur et non pas dans créatures et li bizin éna la crainte d’Allah dans so le cœur et non pas la crainte du créature. Si li réussi cultive ça dans li, Insha-Allah, li pou approche bien près avec Allah. Et quand li pour approche bien près avec Allah, li pou vine ene grand défenseur de l’unicité d’Allah (Le Tawheed). 

Qui Allah donne nous le Tawfeek pour vine ene bon Muslimeen (celui qui soumette li totalement seulement avec Allah). Ameen.

« Subhaanallahi wa ta-aalaa ammaa yushrikuun »
(Gloire à Allah. Li bien plus haut qui bane associés ki zot donne Li là)