Text Box: Bismillah-ir-Rahman-ir-Rahim

KHUTBA EID-UL-FITR 

HAZRAT AMIR’UL MOMENEEN MUHYI-UD-DIN
AL-KHALIFATULLAH

MUNIR AHMAD AZIM

JAMAAT UL SAHIH AL ISLAM

1er Octobre 2008

(Résumé du Khutba Eid-ul-Fitr de plus de 1¾ hrs)

Après ki le Khalifatullah fine faire zot tous Salaam, li fine commence lire le Tashahhud, Taouz et Surah Al Fatiha et ensuite li fine dire:

A l’occasion de la fête Eid-ul-Fitr 2008 mo souhaite ene EID MUBARAK à tous bane frères, sœurs et zenfants dans le Jamaat Ul Sahih Al Islam à travers le monde entier et à bane pays kot ena nous bane membres ki pé prend Khutba Eid en direct et aussi à Maurice. Mo espéré sakaine parmi nous ki fine profite le mois béni (Ramadhan), pour purifier nous spirituellement et nous fine montrer ene l’obéissance totale envers nous Rab et azordi le Eid c’est ene jour de contentement, de joie pour bane ki fine montrer ene l’obéissance totale envers Allah, et zordi Allah donne nous tous bane Ibaadur Rahman ene Eid, ki Allah fine content avec sakaine parmi nous, nous bane bonnes actions et zéfforts ki nous fine faire durant ça mois béni là. Ameen !

Mo faire duah ki sakaine parmi nous garde ça  bane bonne l’entraînement spirituel et obéissance envers Allah et So Rassool (s.a.w) ki nous fine passé dans ça mois béni là et Insha-Allah nous continue lor même l’entraînement spirituel ; non pas couma Eid fini, nous retourne nous dans nous bane mauvais actions ki nous ti pé faire avant ; sinon, nous pas pour capave dire ki nous pé célébrer ene jour Eid zordi et tous bane bon travail, actions et l’obéissance ki nous fine faire durant ça mois béni là, tous pour dans vide et nous finalement nous pas fine profite ene vrai mois béni (Ramadhan) ; nek nous fine faire ça par routine ou formalité. Faudé, kan ça Ramadhan là fine quitte nous, nous ena grand changement dans nous la vie spirituellement, physiquement et de côté mondain. Insha-Allah, Ki Allah garde sakaine parmi nous toujours lors ça même chemin ki nous ti prend dans mois Ramadhan, et aussi ça message là mo adresse li aussi à tous mo bane frères, sœurs et zenfants de foi islamique à travers le monde et sans oublier mo bane frères, sœurs et zenfants de Maroc, Indonésie, la Réunion, l’Inde, Mayotte, Madagascar et les autres membres du Jamaat Ul Sahih Al Islam ki fidèle dans zot la foi et ki en contacte régulier avec nous.

Et mo tenir à rappeler à bane membres ki présent ici ki après ki nous bane frères, sœurs et zenfants fine fini faire salaam, accolades, échange de cadeaux et nous tous ensemble pour prend ene repas et après Salaat-ul-Zohr, zot tous reste là-même pour nous alle faire nous « Khidmat-é-Khalq » à travers l’Ile.

Mo souhaiter et mo faire duah ki nous continuer pratique ça bane bon l’entraînement ki nous fine gagner pendant le mois de Ramadhan et aussi ki Allah aide nous et donne nous courage et la santé pour nous continuer nous « Khidmat-é-Khalq » dans bane les autres jours ou mois ki pé vini – pas zis azordi.

Maintenant mo commence mo Khutba Eid, pour ça l’année 2008 là :

Alors, Aujourd’hui li connu comme ene jour de fête pour les autres, mais pour nous aujourd’hui li aussi connue sous ene lotte nom. C’est-à-dire nous appelle ça le jour de EID. Mais ena bien peu de personne ki conné ki été EID ? Bane tipti zenfants ki pas encore même conné ki été Eid, zot dire maman, papa zot content aujourd’hui parceki zot trouve bane les autres pé content.

Ensuite ena bane ki un peu pli grand zot aussi zot content aujourd‘hui parceki zot fine prend ene linge neuf, pé donne zot bane gâteaux et bane Mittaï (gâteaux sucrés). Compare zordi avec bane les autres jours, aujourd’hui zot pé gagne pliss l’attention. Ena bane pli grand ki alle travail zot aussi zot content parceki zordi ene jour EID et aussi ene jour congé.

Ena tellement ene contentement zordi, ki dans chaque la caze musulman ou trouve pé cuit briani, gâteau, échange des cadeaux, rendre visite etc.

Ki bane zaffaires en plisse ki zot fine gagner zordi, ki zot pas ti ena avant et ki faire zot content dans ene tel façon si extraordinaire coumsa ? Si contentement là li juste à cause bon manger, gâteaux et cadeaux ou mette bon linges, bé ena les autres aussi capave faire ça pas seulement zordi – bane les autres jours aussi !

Donc, ça bane zaffaire là ki paraite comme la cause de contentement, là-dans, péna aucaine zaffaire ki connecter avec EID seulement et exclusivement. Ça bane zaffaires là li possible dans bane les autres moments de l’année. Mais l’heure pose bane dimounes questions, bé la majorité d’entre zot, réponse ki zot donné, « c’est à cause de EID ki nous content aujourd’hui ». Li paraite ki le mot EID li même li la raison de zot contentement. Ena certain bane mots ki comme ça ki ena zot signification et zot résultat ensemble avec zot et ene fois ki ou entende mot là, ou fini senti ki ça veut dire et ou le cœur consolé. C’est même zaffaire avec le mot EID. Ene majorité de bane musulmans pas conné même ki sagesse ena dans le mot EID.

Mais ça li pas travail ene dimoune sage, ene dimoune intelligent, pou content lor simplement ça mot là. Ene dimoune intelligent cherche toujours sagesse de ça mot là. Ene dimoune ki content lor ene zaffaire sans ki li comprend so signification et ni li comprend so sagesse, bé ça kalité contentement là péna aucaine signification, péna aucaine réalité.

Aujourd’hui ki contentement ena, pou ki zot content. A part réponse de la fierté péna aucaine réponse. Mais bane dimoune ki conne règlement de Shariyyat, zot, zot capave donne so réponse, ki aujourd’hui parceki bane musulmans fine présent devant Allah pour remercier Li ki zot fine gagne l’occasion pendant ene mois montrer zot « Aboudiyyat ».

Donc, aujourd’hui so contentement li pas à cause aucaine raison mondaine mais ena contentement parceki promesse ki bane musulmans ti faire à zot Aka et Maula zot fine accompli ça promesse là. Et ene mois dans ça 12 mois là, zot fine écarte zot de bane zaffaire ki permette pour zot juste pour gagne le plaisir d’Allah. Mais celui ki pendant Roza, sans aucaine raison fine continuer manger boire, accompli so bane désires, sans aucaine raison li fine continuer renvoye bane instructions Allah. Bé, li fine faire ene grand injustice lor so propre la vie. Pour ça dimoune là, péna aucaine l’occasion pour ki li content aujourd’hui. Pour li aujourd’hui, c’est ene jour de tristesse, ene jour de deuil.

Après celui ki fine gagne ça Ramzaan là, mais malgré ça li pas fine amène aucaine changement dans li, li pas fine accompli aucaine promesse de « Aboudiyyat », li pas fine prépare li pou faire aucaine la paix avec Allah de sorte ki li pas gagne bénédictions Allah. Pour ça kalité dimoune là aussi péna aucaine raison de contentement. Pour li c’est ene l’occasion de détresse, d’agonie. Li pas du tout ene occasion de tranquillité et confort pour li. Mais li ti bizin senti ça la peine là, mais ki faire li pé rier ? Si li pas fine amène aucaine changement spirituelle dans li, si li pas fine accompli aucaine promesse Allah.

Si li pas fine faire aucaine pas de progrès vers la spiritualité, estceki li bizin content ? Du tout pas ! Li ti bizin pleurer. EID veut dire ene zaffaire ki vini chaque chaque fois. Mais ene dimoune ki ena deuil dans so la caze, estceki li pour dire, ou soit estceki li pou souhaiter ki bane jours coumsa revini souvent ? Jamais li pou souhaite ça.

Li exactement pareil pour ene dimoune ki pas fine faire aucaine progrès spirituelle dans le mois de Ramzaan. Li pas fine amène aucaine changement dans li. Li pas fine faire la paix avec Allah. Au contraire, li fine désobéir Allah. Li fine casse so promesse ki li ti fine faire avec Allah. Li fine commette des péchés. Bé couma ene dimoune coumsa capave dire et souhaiter ki bane jours pareil vine lor li encore ?

Mais pou celui ki en vérité fine apporte ene bon changement dans li pendant le Ramzaan, li fine faire la paix avec Allah. Li fine faire Ibaadat Allah. Pour ça kalité dimoune là ena EID. Et c’est so droit d’être content dans n’importe quelle façon. Nous trouver ki celui ki gagne ene promotion dans so travail, li bien content et so famille et so bane camarades aussi content. Bé pou ki raison ki celui ki Allah fine donne ene promotion, celui ki fine gagne l’approche Allah, « Kurb-é-Ilaahi », ki faire li pas bizin content ? Li bizin bien content même. Li bizin faire beaucoup bane EID.

Ki été le EID de l’Islam ? Li vine après ki ou fine faire le sacrifice de vie. C’est ki pendant ene mois ou fine bizin reste à l’écart de bane zaffaire ki ti Halal, ki ti permette et après ki ou fine faire ça maintenant ou présente ou remerciements. Ou dire : « O Allah nous remercier Toi et c’est par To Miséricorde ki nous fine réussi accompli ça instruction ki vine de Toi là. »

Ene 2ème Eid c’est sacrifice financier. Ou dépense ou bane l’argent lors là. Islam pas approuve bane EID kot péna le sacrifice et si ça bane sacrifice là pas pour Allah. Islam so EID c’est ki ou sacrifier ou la vie et du biens dans le chemin d’Allah, et après ça bane sacrifice là, ena contentement.

Li pou ene l’occasion de contentement pour ene dimoune seulement kan li pou ena ça capacité et ça courage là, pour sacrifier tout dans le chemin d’Allah. Le mois de Ramzaan ti vine donne nous ça même leçon là. Alors prend ça leçon là. En qualifiant bane Momin (croyants) Allah dire : 

Innallaa-hashtaraa minal Mu’miniina anfusahum wa amwaa lahum bi’anna lahumul Jannah : yuqaa’tiluuna fii sabiilillaahi fayaqtuluuna wa yuqtaluun : wa dan’ alayhi haqqan fit’Tawraat wal Injeel wal Qur’aan : wa man ‘awfaa bi’ Ahdihii minallaahi fastab’shiruu bi bay’i kumullazii baaya’tum bih : wa zaalika huwal fawzul azim.


« Assurément Allah fine acheter à bane croyants zot personnes et zot dibien en échange d’ene jardin celeste ki zot pou gagner. Zot combatte pour la cause d’Allah et zot tuer et zot victime de la tuérie. C’est ene promesse infaillible ki Li fine ranne obligatoire pour Li-même, dans Tauraat (la Torah), l’Évangile (Injeel) et le Quran. Et ki sanlà ki pli fidèle ki Allah lor so promesse ? Alors réjouir ou avec pacte (marché) ki ou fine conclure avec Li et c’est bien ça le triomphe suprême. » (Ch.9 At-Tauba V.111)

Alors vini, à nous conclure ça marché là avec Allah ki nous pou présente nous la vie, et nous dibiens dans So chemin en échange de Jannat (Paradis). Et faudrait pas ki nous ena aucaine hésitation dans donne ça bane zaffaire là. Donc, kan nous fine conclure ça avec Allah, et kan nous pou arrive lor ça stage là lerlà Allah dire, ki ou bizin être content parceki ou fine conclure ene joli marché.

Dans le monde bane dimoune conclure beaucoup marché avec objectif pour zot retire profit et gagne bane avantages de ça bane deal là. Mais péna aucaine certitude de zot l’avantage. Mais Allah dire kan zot pou faire deal avec Moi bé lerlà ou bane gains pour certain (sure). « wa zaalika huwal fawzul azim ».

Maginer ki ça c’est ene grand succès et ena beaucoup de bane l’avantages là-dans. Donc, ene Momeen (croyant) so EID c’est ki li donne so la vie dans la guerre dans chemin Allah.

Bane dimoune ki présent ici, tanne bien ça, ki chaque dimoune bizin penser ki dans ça période là, ki changement li fine apporté dans li, ki faire li content. Allah dire contentement c’est pour celui ki fine sacrifier tout dans le chemin d’Allah.

Ena beaucoup bane dimounes ki pas oulé mette zot la vie dans difficulté, dans problèmes pour la cause Allah. Ena certain les autres ki pas dépenser dans le chemin d’Allah. Mais magine ça bien ki ou pou gagne cadeau Allah seulement kan ou pas pou hésiter pou présente ou bane zaffaire dans le chemin d’Allah.

Aujourd’hui li pas nécessaire mentionner dans ki kalités difficulté le monde de l’islam pé traverser. De partout bane l’ennemi pé attaque li. Jamais fine ena ene période si dangereux ki ça, lors l’Islam façon ki li été aujourd’hui.

Shaytane fine vini avec tout so bane l’armée. Et la situation de l’Islam aujourd’hui li couma dire ene ti zenfant ki encore boire di lait et li dans la forêt et de quatre coté bane zanimaux pé attaque li.

Aujourd’hui li pas ene jour de contentement pour bane vrai musulman. Certainement bane innocent capave content. Mais pour celui ki conner dans ki situation l’Islam été, jamais li pas capave content. So contentement c’est seulement kan li sacrifier tout ça ki li ena dans ça chemin là.

Donc, ki contentement ena pour ene musulman ki trouve Islam plongé dans autant de difficulté. Ah oui, si ene dimoune fine faire tout so zéffort, à ce moment là li capave content « ki de mo côté tout séki mo ti capave faire mo fine fini faire. Et pas fine ena aucaine zeffort ki mo ti capave faire et ki mo pas fine faire ». Donc, tant ki l’Islam pas gagne so full capacité et so full pouvoir, pour nous aussi péna full contentement. Parceki nous pli grand tracas c’est ki l’Islam en danger. 

Donc, aujourd’hui ou bizin faire ça promesse là, ki kan le prochain EID vine lor ou, pour ena déjà ene changement dans ou. Au contraire de maintenant, ou bizin commence faire bane changement dans ou l’intérieur. Ça l’époque là, li bien troublante.

Maintenant ki nous pé témoigne 1429 ans après Hijra, jamais ene situation coumsa fine vini lor l’Islam couma li été maintenant. C’est pourquoi pou bane suivants de Hazrat Massih Maoud (a.s) Allah fine garde bane même cadeaux ki li ti accorde à bane suivants de Hazrat Muhammad (s.a.w). Si nous perdi ça le temps là, si nous gaspille ça le temps là, bé jamais nous pas pou ré-gagne ene le temps pareil. Donc, faire zeffort pour établi la véracité de l’islam dans le monde en entier. Et faire bane kitchose pour ça. Lerlà tout bane ki fine gagne bane grand grand cadeaux, nous aussi nous pour gagne ça. Et ça bane la porte là pou ouvert pou nous, et c’est ça l’époque là ki pou vrai Eid pour nous. Kan nous pou gagne ça bane jour ki pas pou retourner encore. Alors gagne respect pour ça bane jours là. Et pas gaspille ça bane jours là. Si ou faire ça, lerlà ou pou gagne ça bane cadeaux là.

Allah dire « Waadan alayhé Hakkan fit-Tauraat wal Injeel wal Quraan ». Ça li pas ene promesse fausse, mais li ene vrai promesse ça. Parce ki dans chaque l’époque fine ena ça. Avec bane suivants de Tauraat aussi, là-bas aussi ça fine accompli. Maintenant pé faire ça bane traitements là avec bane suivants de Quran, bé ki faire bane même promesse pas pou accompli ?

Ça li impossible. Donc, bane ki fine conclure ene marché avec Allah jamais zot fine reste désolé. Alors lévé pou aide et supporte l’Islam. Accompli bane promesses ki ou fine faire avec Allah, de sorte ki Chirk et Kafir ki fine encerclé l’Islam et le monde actuellement, zot éloigner. Et dans tout façon avec dibiens, avec plume, avec la langue, n’importe ki façon, servi Islam. Ça bane jours là pas pou revini pou ou encore. 

APPEL A TOUS BANE MUSULMANS ET AUSSI AU CINQUIEME CALIFE HAZRAT MIRZA MASROOR AHMAD:

Anou raye tous nous bane divisions, nous bane divergences d’opinions, arrête la guerre entre nous-même, et pas traite nous bane les autres de Kafirs (non-croyants); c’est Allah ki juge la foi de chacaine parmi nous. Nous pas là pour juge la foi de personne. Et à l’occasion de ça Eid là, Hazrat Muhammad (s.a.w) fine enseigne nous ki nous bizin retire tous bane la haine envers tous nous bane frères et sœurs et même bane les autres religions kot nous bizin respecter chaque religion pour ki zot en retour zot respé nous.

L’ISLAM EN DANGER! L’ISLAM EN DANGER! L’ISLAM EN DANGER! 

Anou réuni nous seulement pour la cause d’Allah, nous tous ensam attrape la corde de Tawheed fermement pour ki le Tawheed (l’unicité d’Allah) - La Ilaaha Illallah - uni nous et anou attache nous fermement à Allah comme ene sel lécorps. Et si ene place dans ça le corps souffert, entier ça lécorps là souffert. Coumsa même l’Islam pé souffert; alors nous aussi nous bizin souffert pour la cause d’Allah.

Mo invite Hazrat Khalifat-ul-Massih Khamis et tous bane Chefs Religieux de la foi Islamique pour ki nous capave vine Ene pour le plaisir d’Allah, afin pour rétablir la suprématie de l’Islam lor le reste du monde. Nous travail c’est amène dimounes vers Allah. Anou oublier nous bane problèmes passés. Si nous conné couma pour gère la situation, avec l’aide d’Allah, alors bizin rétire tous bane dimounes ki péna Taqwa dans zot lécoeur (et ki créer divisions), pour ki bane dimounes pure, ki ena ene vrai l’amour pour le travail Deen vine de l’avant ensam pour la cause d’Allah. Anou donne nous la vie entière pour l’amour d’Allah, pour So cause; pour ki demain nous capave mort en paix, satisfait avec Allah, et Allah satisfait avec nous.

Pour bane vrais Mouslemeen, aujourd’hui Eid li pas vraiment ene jour de réjouissance à cause difficulté ki l’Islam pé faire face couma mo fine mentionner. Ene vrai croyant pour heureux si seulement l’Islam li victorieux lor la haine, et li victorieux lor so bane l’ennemies ki prêt pour attaque li (l’Islam) à tout moment. Zot pou content aussi si zot faire tout zot possible pour faire le bien triompher lor le mal, et aussi pour ramène la gloire de l’Islam à travers zot bane duahs et sacrifices.

Plusieurs fois au commencement de la Manifestation Divine mo ti dire ki beaucoup pays, petit et grand - le monde - pour faire face à bane crises économiques énormes. Et guette la situation ki pé traverser aujourd’hui.

Alors anou tous bane musulmans, frères, sœurs, et zenfants consolide (raffermi) l’Islam; guéri ça lécorps de l’Islam ki en souffrance, pour ki nous capave gagne bane faveurs et cadeaux d’Allah. En vérité la promesse d’Allah li VRAI.

Faire beaucoup zefforts pou succès de la religion Allah et demande Duah avec Allah pou ki Allah capave récompense nous. Ki Allah donne nous tous hommes et madames l’occasion pour mette nous pas dans le chemin d’Allah et nous faire ene zeffort tout ça ki ena dans nous capacité nous dépense ça pour la religion d’Allah. Au contraire, ki nous dépense chaque chose avec contentement. De sorte ki nous vine digne pou ça grand nouvelle ki Allah fine donne nous là. Ene partie de ça fine accompli dans l’époque du prophète et bane sahaba et nous pou complète ça 2ème partie là. Ki Allah montrer nous ça jour côte Islam pou répandre partout et la grandeur du prophète d’Allah (s.a.w) établi lor la terre. Ki bénédictions Allah et faveurs Allah tombe lor nous. Ki bane dimoune du monde vine vers Allah lerlà zot pou content avec Allah et Allah pou content avec zot. Ki Allah ena pitié lor nous tout. Ameen.
***   ***   ***
Après le Khutba Eid, fine ena ene Nazam en Chorus ki ti révélé au Khalifatullah. Après ça encore, Hazrat Khalifatullah Muhyi-ud-Din Munir Ahmad Azim fine souhaite bane invités spécials la bienvenue et li fine faire ça en adressant à zot bane conseils précieux. Clique ici pour lire Nazam Eid Mubarak.
Insha-Allah très bientôt, nous pou posté bane le reste de bane activités de ça jour de l’Eid là lor website.