Text Box: Le Muhyi-ud-Din Munir Ahmad Azim.

LE COURS DE SO LA VIE - MONDIANE ET SPIRITUELLE.
SO LA FAMILLE ET SO L’ENFANCE.

Le Muhyi-ud-din Munir Ahmad Azim fine né le 7 Janvier 1961 dans ene famille Musulmane Ahmadi d’origine bien modeste. 

So papa, Solim Azim, ti ene entrepreneur du bois très renommer à Rose-Hill, Ile Maurice et so mama, Momin Azim, li ene madame dans la caze couma li dans la tradition de la plupart famille musulmane. 

Hazrat Muhyi-ud-Din Munir Azim li le dernier garçon de la famille ki composée de quatre garçons et deux filles. 

Li fine passe so l’enfance à Trèfles (ki trouve à Rose Hill). A l’age de 14 ans, so la famille déménager et zot vine habite dans le centre de Rose-Hill, 200 mètres de Masjeed Ahmadiyya, Dar-us-Salaam. Li fine poursuivre so l’étude au T.I collège Ahmadiyya. Li fine gagne sa l’occasion là pou partage so le temps libre entre le travail et Masjeed. Li fine gagne l’occasion en sus de sa, li ti bien content quand li ti ena pou alle accompagne banes missionnaires de la Communauté Musulmane Ahmadiyya dans zot mission partout dans l’île. Li fine suivre so l’étude secondaire pendant 5 ans. Mais li pas fine réussi prend part dans l’examen final du School Certificate (à cause problème financier – pas ti capave paye fees l’examen). 

SO LA VIE SPIRITUELLE ET LE NOUVEAU PAS DE SO LA VIE. 

	D’ene bien jeune âge, li ti inspirer par banes paroles de Hazrat Mousleh Maoud, Mirza Bashir-ud-din Mahmud Ahmad (ki Allah (swt) satisfait avec li), qui encourage banes Ahmadis pou suivre l’exemple du Saint Prophète (saw), et pou vine couma ene « P’tit Mohammad ». Donc li travail très dure pou ki li arrive à sa l’objectif là. 

	En 1983 Hazrat Muhyi-ud-Din Munir Ahmad Azim fine marié avec Nasira Oleemohamed, la fille de Mons. Abdul Wahab et Mme Mariam Oleemohamed. En l’an 2001, zot fine adopter ene garçon dès so naissance. 

En 1987, Hazrat Muhyi-ud-Din Munir Ahmad Azim ti employé comme chauffeur par la Communauté Musulman Ahmadiyya. Là, so l’intérêt pou travail pou la cause d’Allah prend ene la montée extraordinaire. Et de là, en l’an 1990, de so propre poche (waqfi arzi) li coummence alle faire quelques voyage à l’ile de la Réunion pou propage l’Islam. 

Plutard, la Communauté Musulman Ahmadiyya fine faire tous le frais de so voyages (billets + argent dépense) pou la propagation de l’Islam. So bane séjours fine allongé, par la grâce d’Allah, li fine réussi passe le message de l’Islam à travers la Radio et interviews par bane magazines. Et par la grâce d’Allah li fine réussi enregistrer la Communauté Musulman Ahmadiyya à la Réunion en 1991. Li fine faire de même à Mayotte en 1997 et dans Seychelles en l’an 2000. 

L’an 2000, kan li fine sorti la Réunion et Mayotte, li fine alle trois mois Rodrigues (la fin Septembre jusqu’à la fin Décembre). Trois mois de travail remarquable kot fine ena en autres : tarbiyyat, interviews à la Radio (MBC Rodrigues), articles dans bane journal de Rodrigues, trois Majlis-é-Amla (Committée Centrale), Dawa, Faire bane dimounes ki ti quitte Jamaat ré-intégrer dans le Jamaat) ; causeries dans bane centres sociales concernant la drogue et boissons alcolic. 

Li fine passe Ramzane là-bas en 2000 avec le matin fine ena Daras Quran et Hadiths, dans la journée, li fine réuni bane membres pour le Tarbiyyat – Le soir Tarawee. Après Tarawee, Daras Quran, ena bane jours kot li ti pé aussi déplacer pour alle faire Tarawee dans bane les autres branches. Fine ena aussi préparation pour Eid-ul-Fitr et présentation à la Radio pour ça l’occasion là. Préparation de déjeuner, et distribution de Vermicelles à tous bane voisins. Le même jour fine ena deux Nikah ki fine prononcé après Namaz Zohr. 

Ti ena aussi fète Maktab ki fine organiser et kot bane certificats et cadeaux fine distribuer, kot bane membres Ahmadiyya de Rodrigues dire ki c’est ene première dans l’histoire du Jamaat Ahmadiyya de Rodrigues.

Après ça fine bane travail sociales ; distribution des gâteaux dans bane l’hôpitales de Rodrigues et aussi dans Prison. Le jour de Eid fine célébré depuis le matin jusqu’à le soir pour ça jour là, et zot tous ti bien enthousiaste avec beaucoup de contentement. Fine célébrer ene Eid pas couma les autres Eid !

Et le Vendredi le 30 Décembre 2000, avant prend avion pour vine Maurice, li fine faire so dernier Khutba Jummah dans Masjeed à Port-Mathurin kot ti ena beaucoup membres ti réuni et so Khutba fine touche lecoeur de tous bane dimounes présent à tel point ki zot tous fine pleurer. Et après Jummah, zot fine dire, ki « d’après ça Khutba là, comme-ci dirai, Ou pas pou ré-tourne parmi nous encore. »

Alors le 01 Janvier 2001, lé temps qui li retourner depuis l’ile Rodrigues sans conné ki bane là à Maurice fine comploter contre li, li fine gagne la mauvaise surprise qui li fine alle en dehors le Nizam-é-Jamaat, kot zot fine expulser li. Li pas au courant di tout ki li ti fini alle en dehors du Nizam-é-Jamaat. Tous dimounes ti conné, excepté li. Li en innocent, li fine continuer alle Namaz ça jour là et ti ena ene Amla Central avec le sois-disant amir Maurice à la tête et so alentours pour humilier li. Depi ça jour là, ziska zordi, zot encore pé humilier li dans tout façon possible. Et dans tous zot bane programmes zot ti pé humilier li et Mons. Zafrullah Domun lor mimbar de Hazrat Muhammad (s.a.w).

En 1991 Hazrat Muhyi-ud-Din Munir Ahmad Azim fine assisté la conférence annuel de la communauté à Qadian et en 1999 à Londres. 

Quand li fine alle Londres, la bas le Calife, Hazrat Mirza Tahir Ahmad (Ki Allah pardonne li) fine bien accueille li et fine félicite li de so succès de so bane travail lors bane l’ile. Et li fine faire li aussi prendre la parole deux fois dans « International Tabligh Seminar » kot derrière so lédos le sois-disant amir de Maurice ti faire plan pour faire boycott li pour li pas causer dans ça séminaire là et kot li (amir de Maurice) fine envoye nom ene lotte missionnaire ki fine alle assister Jalsa pour causer. Mais là-aussi missionnaire là fine fail dans so tâche. Kan ti pé criyé so nom, li pas ti présent dans séminaire là. Et c’est à la dernière minute ki li fine vini pour li causer. 

C’est pendant ça l’occasion là ki le 4ème Calife fine faire Tabshir rode le Muhyi-ud-Din Munir Ahmad Azim partout et fine demande le sois-amir de Maurice kot li (Munir Azim) pé resté dans Londres parski le 4ème Calife pé bien bizin li. Le sois amir, fine cause menti pour dire ki li pas conné kot ça sa li pé rester, kan li conne très bien l’adresse kot li ti pé rester. C’est à travers ene missionnaire ki fine mettre Hazrat Muhyi-ud-Din Munir Ahmad Azim au courant ki Tabshir et Huzoor pé bien bizin li. Et c’est là-même ki li ti gagne ene cadeau spécial de la main du 4ème Calife et kot le Calife fine dire li : « I am very proud of you about your work which you have done in the outer islands. » Et ça fine faire le sois-disant amir et so alentours zot figure bien décomposer et là-même maladie là prend place dans so lécoeur kot li et so bandes faire complots lor complots.

LA MANIFESTATION DIVINE

Le 19 Janvier 2003, Allah (swt) fine élève li au rang de « Amirul’Momeneen » - le Chef des Croyants ; et dans sa même l’année là, Allah donne li la directive pou alle forme so propre Jamaat, communauté. 

C’est là ki li fine recevoir la révélation pou appel ça Jamaat là « Jamaat Ahmadiyya Al Mouslemeen ».  C’est Allah même ki fine choisir ça nom là. Et le 8 Mai 2003 la JAMAAT AHMADIYYA AL MOUSLEMEEN fine enregistrer officiellement à Maurice. Le 6 Décembre 2003, sous l’instruction Divine, li fine proclame li le Muhyi-ud-Din de sa l’époque la (Celui qui faire revivre la foi). 

En fait, l’existence de Jamaat Ahmadiyya Al Mouslemeen fine arriver à cause Allah (à qui appartenir la gloire suprême) fine élève so messager, le Muhyi-ud-Din dans ça siècle la. 

BANE DIFFERENCE D’OPINIONS DANS JAMAAT AHMADIYYA AL MOUSLEMEEN.

Pendant 3 à 4 ans le Muhyi-ud-Din, comme le Chef Spirituel fine dirige so Jamaat. Mais doucement doucement, dans le Jamaat même (Jamaat Ahmadiyya Al Mouslemeen) fine commence ena ene bombe tranquille de la part de quelques membres. Zot fine commence ena doute lors Hazrat Muhyi-ud-Din so banes révélations ki li recevoir de côté d’Allah. Alors ti ena so Frère en Islam, Mons. Zafrullah Domun ki li ti aussi ensemble avec le Muhyi- uddin kan li fine expulser de la Communauté Ahmadiyya, même jour, même date, même l’heure, parcequi li fine croire dans révélations Divine qui Hazrat Muhyi-ud-Din Munir Ahmad Azim pé recevoir. Par la grâce d’Allah, par so l’obéissance ki li ti ena pou Allah et so Muhyi-ud-Din, Allah fine béni li avec le Ruhil Quddus. C.à.d. li aussi li fine commence gagne la révélation. 

Bien souvent, le Muhyi’uddin faire boucoup doah (la priere) avec Allah pour ki li béni tous dimounes de so Jamaat avec le Saint Esprit. Alhamdollillah M. Zafrullah Domun ti ene parmi zot.

Mais, malheureusement, ki arriver plus tard ? Voila ki li fine rénonce so croyance dans le Muhyi-ud-Din de sa l’épok la et aussi tous membres de so la famille alle suive so pas. De bouche à l’oreille, zot fine monte la tête les autres membres du Jamaat. Zot tous fine commence lève contre le Muhyi-ud-Din (sauf ene ti groupe). Zot fine écrire bane lettres contre li, zot fine envoye papier légale contre li et ménace li pour pas servi le nom du Jamaat Ahmadiyya Al Mouslemeen ki Allah fine révélé à li seulement. 

ENE BREF APERÇUE LOR LE JAMAAT AHMADIYYA AL MOUSLEMEEN.

La Jamaat Ahmadiyya Al Mouslemeen ti le nom donner par Allah à travers so Muhyi-ud-Din de sa l’epok la. Allah même fine choisir sa nom là pou donne protection à So Muhyi-ud-Din et so bane vrai suivants. 

Tous bane principes du Jamaat Ahmadiyya Al Mouslemeen ti baser d’après banes révélations ki le Muhyi-ud-Din ti gagner. Jamais Hazrat Muhyi-ud-Din Munir Ahmad Azim prend bane décisions par li même. Li tout le temps tourne vers Allah et c’est Allah ki donne l’instruction couma pou faire revive bane l’enseignement.

Doucement doucement, le temps le Jamaat commence ne plus servi sa faveurs ki vine de côté d’Allah là et ne plus réalise l’importance de la révélation divine, donc zot prend en otage la Jamaat Ahmadiyya Al Mouslemeen en servant papier légale, papier mondaine, zot fine manifester zot colère et zot la haine envers le Muhyi-ud-Din tout comme Ibliss (Satan) ti manifester li quand Allah ti créer li le premier homme, Adam. Mais Allah réconforte So Muhyi-ud-Din et dire li ki prend patience, sa bane dimounes là jamais pou gagne le dessus lor li parcequi Allah avec li. Et ki avec certitude pou guide li couma Allah ouler. Allah faire ce qu’Il veut. 

Sa révolte la, li pas nouveau dans le domaine de la religion - chaque fois quand Allah (swt) fine envoye So  messager, c’est bane propres dimounes ki fine croire dans le Messager au début ki révolter après et zot alle contre Allah et So prophète. Sa fine arriver dans le temps Moise, et guette ki le Quran dire lor là.

« Et Nous fine certainement donne Moïse (Musa) le Livre, mais bane différences ti créer à propos de ça ; et si ene parole pas ti fine déjà vini depuis côte to Maître, alors ça zaffaire là ti pou fini être réglér entre zot depuis longtemps ; et maintenant ça bane dimounes là, zot dans ene doute inquiétant à propos ça (bane révélations là). »  
               
Avant n’importe ki activités, ou décisions ki bizin prend, Hazrat Muhyi-ud-Din Munir Ahmad Azim tout le temps li prend la permission d’Allah avant. Jamais li pou exécute ene l’ordre avec pression de l’homme - alors ene jour M. Zafrullah Domun et bane membres du Jamaat Ahmadiyya Al Mouslemeen, ki la plupart trouve dans so la famille, zot tous ensemble mette pression, oblige li pou assister ene comité ki bane la fine mette déboute.  Zot oulé pose li bane questions lor bane révélations divines ki zot pé douter et ki  pas claire dans zot l’esprit. Alors le Muhyi-ud-Din fine réponde zot ki li pé faire douah avec Allah si pas li gagne permission pou assister ene telle réunion mais aussitôt couma li gagne la permission, définitivement li pou agir d’après l’instruction et li pou laisse zot conner. Mais sa réponse là pas fine satisfaire zot ditout. Allah ti conne très bien dans zot le cœur ki ti ena !

Ena encore les autres membres fine force li pou réponde bane questions remplie de bane doutes mais Allah toujours mette dans so le cœur ki li bizin continuer prend boucoup patience.

Ti nomme M. Zafrullah Domun comme le président de Jamaat Ahmadiyya Al Mouslemeen (de côté l’enregistrement mondaine) et ti ena aussi banes membres exécutif. D’après la loi du pays pou ki ene Jamaat ou ene association enregistrer officiellement et ki li capave fonctionner li bizin passe par certains principes du pays. Donc ti choisir Mons. Zafrullah Domun comme le président. Et dans le statut du Jamaat devant la loi mondaine, le Muhyi-ud-Din ti considérer comme ene simple membre du comité. M. Zafrullah Domun et bane membres exécutif ki tenir la barre. Zot décider maintenir ki le Muhyi-ud-Din ki fine élevé par Allah, obliger reste sous zot commandement. Tous zaffaires Jamaat obliger passe dans la main de M. Zafrullah Domun.

Malheureusement, les membres du Jamaat Ahmadiyya Al Mouslemeen pas fine comprend ki Allah fine tester zot avec sa. Zot fine préfère suivre la loi mondaine, obéir M. Zafrullah Domun et so alentours au lieu zot obéir Allah à travers So Muhyi-ud-Din. Donc zot tourne le dos carrément avec le serviteur choisi d’Allah et zot prend control du Jamaat, ene Jamaat ki le nom fine révéler par Allah à travers So Muhyi-ud-Din. 

Banes membres exécutifs fine prend l’initiative pou envoye li ene lettre kot zot oblige li pou vini pou réponde certaines questions pou ki zot capave ena ene full control lor le Muhyi-ud-Din de so banes activités comme le messager d’Allah et aussi so la vie privée. 

Mais toujours pas de réponse de coté d’Allah pou ki li capave alle dans sa qualité réunion là. Mais ene matin après namaz  Fajr après boucou de doahs, là Allah (swt) donne li l’instruction pou écrire zot ene lettre en leur donnant de bons conseils et en même temps li dire zot ki zot bizin tenir l’engagements ki zot ti prend avec li, et continuer obéir l’instructions ki li donne zot. 

Donc c’est à travers sa lettre la meme ki Allah (swt) faire li réaliser qui maladie ti ena dans zot le cœur. Sa même banes dimounes ki ti côte à côte avec le Muhyi-ud-Din, banes premiers disciples qui fine déclarer lor micro, papiers, recordes et website du Jamaat Ahmadiyya Al Mouslemeen tous banes signes claires de côté d’Allah ki zot fine recevoir pou montrer ki Munir Ahmad Azim li vrai, et li fine vini comme le Muhyi-ud-Din de sa l’epoque là pou le monde entier. Hazrat Muhyi-ud-Din fine adresse zot ene lettre bien polie, remplie d’amour fraternel et li fine conseil zot qui bizin oublier banes divergences d’opinion, banes petit petit problèmes qui arriver partout, li dire zot continuer travaille normalement, faire tous banes activités du Jamaat fonctionner pareil couma Allah fine ordonner comme le Study Circle, Classes Dawah, etc…. 

Apres ki zot fine recevoir ça lettre du Muhyi-ud-Din daté le 01Août 2007, voila qui zot fine gagne colère et à l’unanimité, le président du Jamaat Ahmadiyya Al Mouslemeen, bane membres exécutifs du comité centrale  et bane les zot membres encore, zot dire dans ene lettre qui zot népli associer zot avec le Muhyi-ud-Din, zot fine renonce zot la foi dans li, c.à.d. zot népli croire ki li le Muhyi-ud-Din et le chef spirituel du Jamaat Ahmadiyya Al Mouslemeen et en sus de sa zot menace li, zot dire li ki li pas gagne droit servi le nom du Jamaat Ahmadiyya Al Mouslemeen pou adresse le monde.

Sa lettre la ti écrire en creole et ti servi de telles mots, qui si met sa dans l’ocean, li ti pou polluer l’océan. En voici quelque mots mentionner dans lettre là:- « pou nous pas dire qui nous croyance dans ou zero, be laisse nous dire ki li bien faible. » 

Allah donne li inspiration, mette dans so le cœur ces quelque versets du Quran a propos banes ki fine sépare zot même d’Allah et de So messager, Muhyi-ud-Din. 

« Et dire bane ki pas ena la foi : ‘Agir couma ou content, nous aussi nous pé agir, et attane, nous aussi nous pé attane.’ » (Ch.11 Hud V.122 & 123) 

Tous banes membres du Jamaat Ahmadiyya Al Mouslemeen inclu le président Zafrullah Domun, zot ti prend le Bai’at, serment d’allégeance, dans la main du Muhyi-ud-Din. 

A propos bane ki prend Bai’at, Allah explique bien dans le Quran, à plusieurs reprises qui si ene croyant li casse so Bai’at avec Allah qui représenter par So prophète qui Li envoyer, dans so la main, zot lipié pou glisser et zot pou tombe dans ene du feu bien flambant. 

« Complète contrat qui ou fine faire avec Allah, et pas alle contre ou serments après qui ou fine confirme zot, et après qui ou fine prend Allah comme ou garanti. (Pas oublier qui) Allah conne tout ce qui ou faire. 

Pas faire couma ça femme qui, après qui li fine file ene la corde solide, case li par brin. Ou servi ou serments couma ene moyen pou trompe dimoune et faire ene groupe vine plus nombreux (et plus riche) qui ene l’autre. Allah tester ou et Li pou éclairci tout lor qui ou pas d’accord, le jour du jugement. 

Si Allah ti oulé, Li ti capave mette ou tous dans ene seul communauté, mais Li laisse égarer ce qui Li oule et Li guide ce qui Li oule. Mais pas ena doute qui pou interroge ou lor ce qui ou ti faire. 

Pas servi ou serments pou trompe l’un à l’autre. Sinon ou lipied pou glisser malgré qui ou fine place li ferme, et ou pou goutte ene mauvais kitchose, parcequi ou fine barre dimoune dans chemin Allah. Ene grand punition atane ou. 

Tout ce qui ou posséder pou ena la fin, mais ce qui avec Allah pou dure toujours. Nous pou accorde à bane ki endurer, zot récompense, d’après plis bon action qui zot ti faire. » (Ch.16 An Nahl V. 92-96) 

FAVEUR IMMENSE D’ALLAH ET NAISSANCE DU JAMAAT  UL SAHIH AL ISLAM :-

Après plusieurs mois de patience, et de réconfort de côté d’Allah, le 10 Decembre 2007, Allah donne à so bien-aimé Hazrat Muhyi-ud-Din pou alle forme ene l’autre Jamaat qui pou accompli sa travail qui ti donne Jamaat Ahmadiyya Al Mouslemeen là pou faire. Par la grâce d’Allah, le Très Puissant, le Jamaat Ul Sahih Al Islam (la communauté de bane qui soumette zot totalement et sincèrement à Allah) fine enregistrer officiellement le 10 Mars 2008 c.à.d. le 1er Rabi-ul-Awwal 1429 A.H. 

Donc, le Jamaat Ul Sahih Al Islam, avec le Muhyi-ud-Din à la tête, dans tous so aspects li là aujourd’hui pou faire so travail couma Allah fine instruire li et pou invite dimoune pou quitte zot bane activités banales de sa le monde la et pou embrasse ene seul Dieu, le créateur des cieux et de la terre et la race humaine. Le Jamaat Ul Sahih Al Islam li ni ene secte ni ene nouveau religion, mais li juste la pou satisfaire ene nécessité pou réunir l’humanité sous ene seul bannière de « l’unicité de Dieu » (Tawheed). 

A la racine de tous bane religions du monde, tous prophètes qui fine vini, zot vine prêche le même message c.à.d. adore ene seul Dieu, le créateur. Mais avec létemps dimounes zot dévié par satan, le lapidé, et zot reste loin avec banes enseignements qui banes prophètes vine donne zot. Et zot renier tous banes signes et messages qui Allah fine manifester. Pareil couma tous banes messages d’Allah du passé, dans sa siècle là aussi, le messager d’Allah, l’humble serviteur de Dieu, Hazrat Muhyi-ud-Din Munir Ahmad Azim. 

Hazrat Amir’ul Momeneen Muhyi-ud-Din Muslih-ud-Din Musli’Maoud Khalifatullah Munir Ahmad Azim (Ki Allah reste toujours so Protecteur) fine vini pou prêche le message de l’unicité d’Allah et pou réuni toutes les communautés sous un seul toit de la soumission totale d’un seul Dieu. Et aussi pou établir l’amour fraternel dans le cœur coumsa nous capave expérience sa croissance spirituelle là sous les yeux d’Allah, le Très Gracieux. Le Muhyi-ud-Din li là dans le cœur de l’Islam pou renforci la foi des croyants et pou unir banes âmes qui assoiffées pou gagne zot créateur. Le cœur d’ene messager d’Allah li bien sensible pareil couma ene parent envers le bien-être de so zenfant, l’Islam sa même l’essence de la vie. Sans doute, le pas de Muhyi-ud-Din fine tracer par la main d’Allah, pareil couma tous les autres prophètes ki fine vini avant. Et pas ena doute aussi ki le Muhyi-ud-Din ki li pas le dernier messager de Dieu. D’autres messagers pou vini dans le futur pou préserve la foi dans l’unicité de Dieu. La majorité bane musulmans zot fine ferme la porte de la révélation quand zot fine annoncer ki après le prophète Mohammad (saw), ki pas pou ena encore prophète ki pou vini. Mais couma le Quran, le livre le plus parfait pou reste vivant jusqu’à le Jour du Jugement ? 

« Pas ena doute, c’est Nous ki fine envoye ça Coran là, et Nous pou préserve li » (Ch. 15 Al Hijr V. 10)

« Fausseté pas capave joinde li, ni divant ni derrière ; c’est ene révélation ki vine depuis côte le Sage, ki mérite nous louanges » (Ch. 41 Haa Mim Al Sajda V.43) 

« …qui sa, cest le noble Quran, dans ene livre bien preserve ; seulment bane purifies touche li ; li ene revelation descende depuis Maitre l’univers. Est-ce-qui ca message la qui ou traite a la legere… ? » (Ch.56  Al Waqiah V.  76 -82)

C’est ene quelqu'un ki fine envoyer de  côté d’Allah ki vini pou faire revivre tous bane l’enseignements de l’Islam, banes l’enseignements ki bane prophètes depuis création la terre fine amener. Et Hazrat Mohammad (saw) ti vini pou prêcher dans le monde. La vie spirituelle d’ene messager jamais ti facile. Li tous le temps passe so la vie dans blâmes et persécution. Li passe des jours, des semaines, des mois, d’années jusqu'à so dernier soupir lor sa la terre à être blâmer, persécuter pou la cause d’Allah et comme ene messager d’Allah, li, li ena la responsabilité pou propage le message de Dieu clairement, et quand li quitte sa la terre la, li retourne kot so créateur satisfait et Allah aussi satisfait de li, comme ene bien-aimé prophète et messager. Li pou lutter jusqu'à so dernier goutte du sang. Même si le monde tourne  contre li et prend le mauvais chemin, sauf banes vrais croyants ki soumette à Allah et ki ena la crainte d’Allah dans zot le cœur. 

«…Aujourd’hui Mo fine rende ou religion parfait, et Mo fine complète Mo faveur lor ou, et li faire Moi plaisir donne ou l’Islam comme religion. »  (Ch.5 Al Maida V.4) 

Ki Allah, le créateur, le Dieu Tout Puissant aide nous pou gagne sa crainte d’Allah là et qui Li montrer nous le chemin qui amène vers Li, qui Li même li la source de tous faveurs et bénédictions dans sa le monde là et dans l’autre monde. AMEEN.