Text Box:  DISCOURS JALSA SALANA 2012  Discours lors l’Éducation Hazrat Khalifatullah Hazrat Munir A. Azim (atba) (Vendredi 06 Octobre 2012 ~ 19 Dhul-Qaddah 1433 Hijri) Après Salaam, Hazrat Khalifatullah (atba) fine lire le Tashahhud, Ta’uz, Surah Al-Fatiha, et ensuite fine dire: Par la grâce d’Allah, aujourd’hui mo pé addresse spécialement bane jeunes et bane parents, pou présente devant zot ene message de côté d’Allah ki mo ti recevoir en premier pendant ene Safar Zikrullah dans la Manifestation Divine de nous l’époque, afin ki maintenant zot profite de sa bane même bénédictions et conseils ki vine de Allah et de So Muhyi-ud-Din de sa siècle là. Et sa, afin ki zot capave reste loin avec le mal ki Allah et So Muhyi-ud-Din pé averti zot, et afin ki zot capave reforme zot dans ene telle façon ki zot vine bane vrais soldats de l’Islam. Mo conné ki li pas facile ki du jour au lendemain zot reformer ene sel coup, mais kan ena ene volonté, alors bizin ene chemin pour ki sa l’entreprise là réussi. Kan zot gagne confiance et fermeté dans Allah, alors Allah Li-même pou aide zot. Alors écoute attentivement séki Allah et sa humble serviteur là ena pou dire zot : O Zot bane jeunes, L’espoir d’ene nouvo jour... Zot couma l’or pure. Zot fine gagne bane qualités nobles. Zot la vie bien précieux. Mais bane dimounes mal-intentionner capave essaye mette zot lors mauvais chemin. Même si bane les autres essaye égare zot, pas laisse zot dévier de zot chemin choisi (le bon chemin). Deboute ferme. Zot pou alors, Insha-Allah, gagne ene bon nom et le monde en entier pou fer zot louanges. O Muhyi-ud-Din! Dire zot, sa c’est Mo conseil à zot tous concernant zot l’éducation. O bane membres du Jamaat Ul Sahih Al Islam, personne (azordi jour vraiment) enseigne l’éducation morale ; Jamaat Ul Sahih Al Islam pou bizin enseigne bane dimoune l’Éducation Morale, Insha-Allah. La Moralité li l’aspé le plus important de l’éducation. Sa pou fer zot gagne ene bon nom dans la société. Gagne ene full confiance dans Allah. Allah Li zot Seul Refuge n’importe kot sa sa zot été, ki li dans ene la forêt, dans les ciels, dans la ville ou village, lors sommet d’ene montagne ou au milieu d’ene la mer profond. Cultive bane qualités nobles. Mo prêt pou sacrifier tout à bane ki cultive bane qualités nobles et à bane ki enseigne sa bane qualités là. Jamaat Ul Sahih Al Islam fine être créer pou mette zot lors le droit chemin. Alors amène ene la vie noble et fer zéffort pou gagne ene bon nom. Sa c’est séki zot Rab oulé de zot. Zot bizin vine dans ene position pou recevoir Mo Grace. Mo pou zot et zot pou Moi. Essaye comprend Mo l’amour pou zot. Caractère c’est zot Pli Grand protection dans la vie. Pas senti zot fiers (avec l’arrogance) ki zot pé fer bane l’étude avancer. Li pas vaut charité ki ene mendiant recevoir lors la rue. Au lieu de tasse derrière bane dégrés, ene dimoune bizin cultive dans li bane qualités noble. L’Éducation sans caractère li sans utilité. En fait, l’éducation bizin trouve so résultat dans caractère (bon caractère). Azordi beaucoup étudiants lire bane livres n’importe. Bane tels livres pas ti bizin vender lors le marché. Bane Sahib-al-Faraj, bane Muntaqa, bane Mujtaba et bane jeunes Siraj Makin bizin lire seulement bane livres ki pou developpe zot caractère. Zot bizin participe dans bane sports et jeux sportifs dans ene vrai l’esprit de sport. Sa conseil là li applique également pour bane Mujtaba et jeunes Siraj Makin (pas seulement pour bane garçons et jeune hommes). O Muhyi-ud-Din! To conné, azordi, ena beaucoup de bane institutions educationelle tout autour du monde, mais personne pas pé paraite comprend saki l’éducation vraiment veut dire. Bane étudiants rempli zot l’esprit avec seulement bane connaissances ki zot gagner dans livres, zot assize pou bane l’examens, zot sécurise bane « pass marks » et zot déclarer ki zot fine vine éduquer. Sa procès d’enseignements et appranne là pas révèle bane vérités éternels à celui ki pé apprane (l’étudiant). Vrai l’éducation c’est sa ki developpe zot vision interne, donne zot l’illumination spirituelle et aide zot pou expérience ene félicité éternelle. Dans ki façon bane étudiants bénéficié de sa système de l’éducation actuelle là ? Zot seulement gagne bane degrés sans ki zot comprend vrai signification de l’éducation. Système moderne de l’éducation pé fer bane étudiants vine ti l’esprit au lieu de développe zot pouvoir de discrimination (c’est-à-dire, pou fer différence entre le bien et le mal). Li pas donne zot vrai sagesse ni aide zot pou vine ouvert d’esprit. L’Éducation aujourd’hui fine vine alors sans utilité. Bane livres ki fine prescrire pou bane étudiants zot pas contenir l’essence de vrai l’éducation. Li suprenant couma le gouvernement approuve bane tels livres de classe ! Li paraite ki bane ki responsable pou recommende sa bane livres là pas pé mette le gouvernement au courant de sa réalité là. Le gouvernement pas pé réaliser ki sa capave amène ene mauvais nom pou li. En fait, sa tendance dans l’éducation là li pé augmenter dans le monde en entier. Bane étudiants azordi zot pé interresser seulement dans gagne ene connaissance ki vine dépi dans livres, et non pas l’essence de l’éducation même. Zot seul tracas c’est pou gagne ene degré et sécurise ene travail. Zot pas compran vrai signification de l’éducation. Bane parents pas pé donne des peines pou guetter si pas bane livres de classe contenir bane connaissances ki bizin ou non. Zot seulement content si zot zenfants gagne bane bons résultats dans zot bane l’examens. Zot pas gagne tracas à propos bane nombreux mauvais remarques ki zot zenfants gagner. Si seulement zot ti préoccupe zot pou guette au profond de sa bane remarques là, zot ti pou alle vraiment comprend le type de l’éducation ki zot bane zenfants pé recevoir. Le seul but de l’éducation azordi c’est pou gagne ene degré. Avec ene augmentation de sa tendance là dans l’éducation, l’étude du Quran Shareef et le Sunnah du Saint Prophète (saws) fine diminué. Aucaine musulman pas pé fer zéffort pou comprend Mo Divinité et Mo l’existence ; en d’autres mots, l’Unicité d’Allah et le Sunnah de Mo Prophète bien-aimé, Hazrat Mohammad (saws). Dans sa situation là, couma eski le présent système de l’éducation pou capave donne la vraie connaissance à bane étudiants ? O Muhyi-ud-Din, dire zot ki bane parents bizin prend la responsabilité pou inculquer bane vertu dans zot bane zenfants. Oh bane étudiants ! Zot bizin acquérir ene tel l’éducation ki pou bénéfier la société et le monde en génerale. Ki l’état présent de la société : Dans ki façon nous capave fer li vine idéale ? Couma eski nous bizin travail pou so l’avancement ? Sa c’est bane questions ki nous bizin pose nous-mêmes. Mais personne pas pé paraite pense lors même longueur d’onde. Le présent système de l’éducation pas pé addresse li-même à bane besoins de la société. Dans sa situation là, bane aînés bizin prend la responsabilité pou donne ene bon direction à zot bane zenfants. Nous bizin suive bane l’enseignements du Saint Prophète (saws) ki fine donne nous vrai signification de l’éducation. C’est ene signe de stupidité pou vine égoiste par simplement gagne détrois degrés. Nous bizin comprend bane besoins de la société et utilize nous l’éducation pou so progrès. Bane dimounes dire ki zot pé servir la société. Mais ki utilité sa service là été sans ki zot comprend bane besoins de sa société là ? Ene tel service c’est pas service social mais ene activité sans vie. Ene bon système de l’éducation li essentiel pour l’avancement de la société et pour le progrès de bane dimounes. Pli la folie pou gagne ene l’éducation moderne fine augmenter, pli dimounes fine oublier même ziska le ABC (c’est-à-dire, l’essentiel) de bane système ancien de l’éducation. Bane parents bizin enseigne à zot bane zenfants saki bon et saki pas bon dès zot l’enfance. Zot satisfait kan zot bane zenfants sécurise ene siège dans ene collège (ou université) et gagne ene degré. Zot pas concerner sipa zot zenfant pé inculquer dans li kit vertu ou non, dans procès de zot l’éducation. C’est travail bane parents pou guetter si pas zot garçon/tifille pé grandi comme ene dimoune responsable et ki servi so talent pour le service de la société et de la nation. Sa responsabilité là pas capave laisse entièrement à bane l’autorités éducationelle et le gouvernement. En fait, bane parents ti bizin encourage zot bane zenfants pou travail pour le pays et pour le Jamaat Ul Sahih Al Islam et travail pou gagne ene bon nom. Mais de nos jours bane parents zot pas ena ene tel l’esprit ouvert. Bane professeurs de l’autre côté penser ki zot responsabilité terminer seulement dans donne à bane z’élève connaissance ki trouve dans livres. Zot pas même demander si pas information ki ena dans sa bane livres de classe là ena kit bénéfice là-dans pour la société ou bien non. Même si quelques professeurs lève la tête lors sa zaffaire là, zot alors après décourager par l’indifférence dans réaction de bane l’autorités. Dans sa façon là, bane institutions éducationelle fine converti en bane l’usine, ki produire bane diplomés. Bane étudiants tousel zot pas blâmer pour sa l’état des choses là. Erreur vine avec bane parents, bane professeurs et le gouvernement aussi. Li pas suffit ki ene étudiant li sorti premier dans so classe. Li bizin aussi travail pour le Progrès de la société et de la nation et alors amène ene bon nom à so bane parents. Bane parents de zot côté bizin surveille progrès de zot bane zenfants de temps en temps, et inculquer dans zot bane vertu et moule zot (c’est-à-dire, forme zot) en bane citoyens responsables. Zot pas bizin reste satisfait si zot zenfants fine gagne bane bons résultats (bon points dans l’examen). Zot bizin aussi observe ki types de livres zot bane zenfants pé lire dans la caze. Ena quelques étudiants ki lire bane romans n’importe. Mais bane parents pas pé prend la peine pou corrige zot. Au contraire, zot dire : « Ki ena là-dans si zot lire bane romans ? Li suffit (pou nous) ki zot content. » Sa c’est ene grand erreur. Dans sa façon là, zot pé gâte zot bane zenfants zot-mêmes. Zot pas prend compte pou observe couma, et comment zot bane zenfants pé jouer, et ki zot pé fer en zot l’absence. Péna aucaine utilité dans seulement expose bane zenfants à ene l’éducation formelle sans corrige zot bane comportements. Bane parents moderne bizin copier l’idées de nous bane anciens (grand-dimounes) ki fine élever zot bane zenfants dans ene meilleure façon. A present l’agitation de bane étudiants pé augmenter même. Toutefois, c’est pas zot faute. Zot en zot-mêmes bien bon. La faute li avec bane livres ki zot lire et bane professeurs ki montrer zot, et aussi (la faute vine) de bane l’autorité dans le domaine de l’éducation ki fine prescrire zot sa bane livres là. Péna sorti de là ki le présent système de l’éducation pas capave amène aucaine progrès dans la vie de bane étudiants. Li grand temps ki bane parents réalise gravité de la situation et prend bane dispositions ki bizin pou fer zot bane zenfants gagne l’éducation ki bizin. Ki utilité ene l’éducation ki pas dirige kikaine vers l’immortalité ? Ki type de l’éducation ki fer ene kikaine vine immortelle ? C’est (en vérité) l’éducation spirituelle. O Muhyi-ud-Din! Le Da’wa Academy (L’Académie de Dawa) li ene grand opportunité pour zot. Bane parents bizin alors encourage zot bane zenfants pou alle de l’avant dans l’éducation spirituelle. Bien sûr, l’éducation séculaire bizin être complémenter avec l’éducation morale, éthique et spirituelle. Le Caractère li zot Pli Grand Protection dans la vie. O bane jeunes ! Pas mal comprend mo bane paroles. Mo pé dire zot tout sa pou zot propre bien-être et progrès. Zot bizin gagne ene tel l’éducation, ki pou amène ene bon nom pou zot et pou tini ferme réputation de zot famille. Pas vine égoiste et (pas) prend bane mauvais chemins au nom de la liberté. Mo pé averti bane jeunes pou pas guette par-ci par-là kan zot pé marcher lors chemin. Ena quelques-uns d’entre zot ki kan zot pé monte bicyclette ou dans l’auto, zot reste guette bane tifilles ki pé passé. Maintenir ene grand caractère. Si ou sauvegarde ou caractère, ou caractère pou protège ou. Alors, veille ou lizié (ou la vue), ou capacité de tender et paroles. Kifer fine donne zot lizié ? Eski c’est pou guette par-ci par-là ? Non. Lizié c’est pour trouve joli Forme de ou RAB. Kifer ou ena zoreilles ? Eski c’est pou écoute palabres ? Non. Zoreilles c’est pou entende bane gloires (louanges) de ou RAB. Ou fine gagne zoreilles pou entende bane bons paroles et pou amène ene la vie de vertu en mettant sa bane (bons paroles là) en pratique. Hazrat Buddha (as) ti réaliser ki Allah fine donne bane humain la vie afin ki zot cultive bane vertu et pou ki zot pas trempe dans bane plaisir sensuelle. Alors, après ki li fine établir ene but pou li-même dans la vie, Hazrat Buddha (as) fine quitte so la caze après ki li fine renonce à so madame et so zenfant unique. Mo pas pé toutefois dire zot quitte zot madame et zenfants et alle dans la forêt couma Hazrat Buddha (as). Zot bizin prend zot (madame et zenfants) compte bien et rempli zot devoir envers zot. Montrer zot bane zenfants bane qualités noble et fer zot arrive loin dans la vie. Amène ene la vie de vertu. Sa c’est séki Hazrat Buddha (as) fine enseigner. Après ki li fine réaliser ki Allah fine donne l’homme bane sense de bane organes pou ki zot amène ene la vie vertueux, Hazrat Buddha (as) fine délaisse tous bane les autres pratiques et fine essaye contrôle so bane senses. Li fine réaliser ki la conscience ti so vrai Maître. Li fine comprend ki si lizié et la langue contrôler, alors tous bane les autres senses pou automatiquement contrôler. Si zot capave exerce contrôle lors zot vision et la langue, alors le monde en entier pou vine sous zot contrôle. Pas prend compte bane mauvais conseils de bane les autres. Cultive bane qualités nobles. Si zot capave contrôle zot bane senses, sa pou en li-même égale à réalise l’essence du Quran Shareef. L’étude du Quran Shareef li là pou ki zot transforme zot-mêmes en bane z’hommes de vertu. C’est zis kan zot pou gagne ene contrôle lors zot sense ki zot pou capave vine ene dimoune sage dans le vrai sense du mot. Alors, contrôle zot bane senses et vine ene maître du monde. Sa séki zot bizin fer zeffort pou faire azordi jour. Explique à zot bane parents aussi à propos de zot bane priorité dans la vie. Dire zot bane parents ! Ou envie ki mo alle cherche ene travail avec ene bel la paye. Mais bel la paye pas important couma ene la vie vertueux li important. Si nous donne préférence à l’argent au lieu de bane vertus, alors nous la vie même pou ruiné. Ou pou vine ene z’homme de vertu seulement kan ou maintenir ou bane senses sous contrôle. Ou pou aussi gagne force de caractère. Hazrat Massih Ma’oud (as), le dévôt extraordinaire de so Maître, Hazrat Mohammad (saws), li ene l’exemple de bane tel qualités noble. Nous conne li comme ene dimoune serein, vertueux et valeureux. Li fine vine le Messie Promis et Mahdi à cause de so bane qualités nobles. Zot tous bizin suive so l’exemple. Vrai l’éducation c’est saki développe zot vision interne, ki donne zot illumination spirituel et aide zot pou expérience ene félicité éternelle. Dans ki façon ki bane étudiants pé tire bénéfice du présent système de l’éducation ? Zot pé seulement accumule bane degrés sans vraiment comprend signification réelle de l’éducation. Pas laisse zot influencer par la société moderne. Mais pas laisse zot perturber par sa bane influences (ki casse zot bane concentration). Avant tout, utilise zot bane senses dans ene bon façon. Respecter bane ki pli grand ki zot, couma ou papa et maman. Construire pou zot ene bon nom à travers zot bane bons paroles et bons actions. A travers Mo Muhyi-ud-Din, Mo fine introduire le Study-Circle tous les semaines dans Jamaat Ul Sahih Al Islam, sa c’est ene grand opportunité pou zot tous. Joine bane bons compagnie de bane dimounes, causer et écoute bane bons paroles, cultive bane bons visions et fer bane bon l’étude (poursuive bon l’éducation). En fait, sa c’est saki zot bane parents oulé. Aucaine papa ou maman pou content ki zot zenfant prend le mauvais chemin. Mais zot pas capave nek dire sa à zot bane zenfants dans bane façons claires, à cause quelques sortes de la pudeur (la honte) ki zot ena (kan zot cause sa bane zaffaire là). O Muhyi-ud-Din, conseille zot, et mette beaucoup l’emphase lors là parski sa c’est Mo Commandement. Le sacrifice li ene de bane pli noble qualités ki ena. Reste loin de bane plaisirs sensuelle. En fait, bane plaisirs sensuelles pou amène zot vers la maladie. O Muhyi-ud-Din! Alà Mo révèle toi sa bane versets en Sanskrit là: Na karmana Na prajaya Dhanena Thya genaike Amruttattwa Manasu. L’Immortalité pas gagner à travers action, zenfant ou richesse ; sa gagner seulement à travers sacrifice. O bane membres du Jamaat Ul Sahih Al Islam, cultivate bane qualités noble. Prépare zot pou sacrifier tout pour Moi. Mais zot bizin aussi dans ene position pou recevoir Mo (Allah) grâce. Mo pou zot et zot pou Moi. Essaye comprend l’Amour d’Allah. Tout saki Mo pé dire c’est pou mette zot lors le droit chemin. Ena zenfants dans Jamaat Ul Sahih Al Islam ki pas réaliser couma zot bane parents passe par beaucoup de bane difficultés pou fer zot l’éducation. Ou bane parents sacrifier ziska même zot manger afin pou éduque zot bane zenfants. Bane parents zot bane premiers professeurs. Pas désobéir zot bane parents. Cause bien (dans ene bon façon ; avec ene la voix doux) avec zot. Le temps pé vini, kot bane étudiants pou joine nous Dawa Academy, Insha-Allah. Dans le Dawa Academy, pas pou ena l’éducation couma ene commerce, mais seulement la paix. Mais kot sa la paix là été ? Eski ou capave asté li dans bazarre ? Na pas ena la paix aucaine part ; ou pou trouve li seulement boute boute. Ou capave gagne la paix seulement kan ou inculquer bane vertu dans ou le cœur. Bane dimounes envie vine bon mais zot pé suive ene mauvais chemin. Zot envie mange kitchose doux mais zot pé gagne tout saki amère parski na pas ena coordination entre zot bane pensées et actions. Bane, ki zot bane pensées, paroles et actions en parfait harmonie, c’est zot bane pli nobles ; bane ki manque l’harmonie zot bane méchant. Mo content bane tel dimounes ki zot bane pensées et actions marié-piké ensam en parfait l’harmonie. O bane membres du Jamaat Ul Sahih Al Islam! Avec connaissance ou sois par l’ignorance zot fine capave commette bane erreurs dans le passé. Mais au moin, astère là zot cultive bane bons qualités, et essaye fer zot bane parents et aussi bien ki Mo serviteur (Mo Muhyi-ud-Din de sa siècle là) content. Kan zot pou content avec ou, Moi aussi Mo pou content avec zot tous. Insha Allah. Zot pou remarquer ki Allah fine mette bien l’emphase lors ene Dawa Academy. Insha-Allah, mo pou addresse zot lors sa sujet précis là demain : L’Histoire, l’importance et actualisation de Dawa, et l’institution d’ene Dawa Academy (Académie de Dawa). Ki Allah béni zot tous – spécialement zot, bane jeunes, ki représente l’espoir de bane générations futures – et ki Allah permette zot pou mette en pratique sa bane conseils précieux là, afin ki zot la vie vine ene partie rafraichissant de Jannat (paradis) lors la terre. Insha-Allah, Ameen.

Khutba Jummah (Écrit & Audio): 05 Octobre 2012

 Discours d’Ouverture du Jalsa Salana 2012

 Discours de Cloture: 07 Octobre 2012

 

Retourne à Page Principale

Écoute le Discours de Huzur (atba) l’Éducation  ~ Jalsa Salana 2012 (Audio)