بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim


18 Avril 2014 ~

(17 Jamad’ul Akhir 1435 Hijri)

 

 

(Résumé du Sermon)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Alhamdulillah, mo contigné azordi lors le sujet de Khutba Jummah de la semaine dernière. Couma mo ti dire zot, mo ti envie cause avec zot lors bane anges et zot bane fonctions et aussi lors la réalité et l’importance de bane révélations prophétiques, bane révélations divines.


Bane anges zot faire partie de la création d’Allah. Zot faire saki Allah commande zot pou faire ; zot dépanne lors Allah pareil couma bane dimounes et bane les autres créatures dépanne lors Allah. Allah pas dépanne de zot pour la manifestation de So puissance. Si Li ti oulé, si Li ti envie, Li ti capave créer l’univers sans anges, mais So sagesse parfait fine envie ki Li faire zot forme partie de So création. Donc bane anges fine créer. Allah fine créé la limière pour lizié et dipain pour la faim. Li fine créé la limière et dipain non pas
parski Li ti bizin tout sa, mais parski l’homme bizin sa. Bane anges zot nek manifester la volonté et la sagesse d’Allah.


Bane révélations prophétiques et divines zot bane mots, paroles et instructions d’Allah et Allah cause à So bane serviteurs choisis et révèle zot So plan. Récipiendaire (de révélation) là pas capave prévoir ni le sens ni bane mots de la révélation. Tous les deux vine de Allah. Révélation fourni vrai subsistance pour l’homme. L’homme vivre par li, et à travers li, l’homme arrive rentre en contact avec Allah. Bane mots, ki incarne ene révélation d’Allah, zot uniques dans zot puissance et majesté. Aucaine dimoune pas capave invente ou fabrique bane tels mots. Zot saryé bane trésors de la connaissance et
de sagesse, et zot très profonds de sens. Zot couma ene la mine, ki so pierre li pli précié, pli ou fouyé aller même. En fait, ene la mine li nannié comparé à révélation divine. Ene la mine capave fini, mais pas sagesse de la révélation divine.


Révélation divine li couma ene la mer avec ene surface parfumé et ene fondeur ki éparpiyé avec bane perles ki pli précié. Bane ki reste seulement là-haut à la surface, zot apprécié sa parfum là, et bane ki décide pou plonge dans profondeur la mer là, zot, zot alle trouve bane perles ki trouve enba là. Ena plusieurs types  de révélation; parfois, li compozé de bane commandements, et de bane la lois, parfois de bane exzortation. Parfois, révélation apporte ene connaissance de l’invisible, parfois aussi la connaissance de bane vérités spirituelles. Parfois, li transmette la bonne volonté et l’approbation
d’Allah, parfois So dézapprobation et mécontentement, parfois So l’amour et considération, parfois bane avertissements et réprimandes. Parfois, li enseigne bane points de morale, parfois aussi li enseigne perspicacité Allah pou même conne bane mals ki dimounes rode cachiette, rode garde en secret. En bref, nous conviction c’est ki Allah communique So volonté à So bane serviteurs. Sa bane communications là varrié selon bane circonstances et l’état spirituel de sa dimoune à ki Allah pé déverse So révélation là.


Kan l’obscurité régné dans le monde et bane dimounes pénétrer au profond dans péché et le mal ; kan, sans l’aide d’Allah, li vine difficile pou zot pou libére zot de l’emprise de Shaytan, alors de par So miséricorde et bonté, Allah choizir de parmi So bane propres serviteurs ki Li content et ki fidèles, bane tels dimounes ki Li donne zot mission pou guide le monde.


Avec la venue d’ene messager d’Allah, dans sak partie du monde capave trouve so bane disciples incliner et prosterner devant Allah (twa), ene Dieu ki unique, ki pas ena So égale. Mette sa bien dans zot l’esprit ki c’est avec la venue d’ene messager d’Allah ki la justice commence régner à la place de l’injustice, gentillesse à la place de cruauté. Grâce à ene messager d’Allah, Allah révèle So volonté et So but. Bane ki détourne zot de la volonté d’Allah et de So but ki Li fine fixé pour l’homme, alors zot pou dégradé. Mais bane ki accepter la
volonté d’Allah et So but et pas détourne de So bane messagers, alors c’est zot ki gagne l’amour d’Allah. Bane la portes de So bane bénédictions ouvert pou zot. So grâce et So miséricorde dessane lors zot ; zot vine bane proféssaires spirituels pour bane générations à venir et zot arrive atteindre ene grandeur extraordinaire dans sa le monde ici-bas là, et dans Aakhérat aussi.


L’Islam azordi li népli l’Islam ki le Saint Prophète (saws) fine enseigne à so bane compagnons. Bane sel dimounes ki en désaccord avec bane l’enseignements originales c’est bane soi-disant Maulvis et dans Jamaat Ahmadiyya c’est bane soi-disant Mullahs, soi-disant Amirs ki pas hésité pou déforme bane l’enseignements divines pour faire sa concorder avec zot perception de la religion et sa afin pou maintenir la masse de bane dimounes sous zot l’emprise ferme. Dans sa but là, zot pas hésiter pou mette boycott lors
​​nous à cause révélations divines. Zot croire ki Khalifat-ul-Massih tousél ena le droit pou gagne révélation divine et zot fine vine insensibles à cause de bane discussions religieuses continuelle. Pas ena aucaine doute ki manque quelque chose dans l’Islam azordi. Nous bizin admette ki l’Islam ki bane musulmans pratiquer azordi li pas vrai l’Islam, et à cause sa, l’Islam pas produire bane résultats ki li ti bizin produire.


Le Saint Prophète (saws) fine dire:
« Ene lé temps pou vini kot pas pou reste nannié de l’Islam excepté so nom ». Certainement le moment fine vini. Pas reste nannié de l’Islam, excepté so nom, c’est-à-dire, ki dimounes pratique l’Islam seulement là-haut là-haut, et ki alors l’essence intérieure de l’Islam, so substance, so signification intérieure népli existé. Kalité l’Islam ki dimounes croire et pratiqué azordi zours pas capave produire même résultats ki ti produire dans le passé. Sa type de l’Islam azordi zour là contigné impressionne bane suivants de bane les autres religions, malgré so l’état déplorable, mais malheureusement, kan zot rentre dans le cercle de l’Islam, zot pas capave saizir so bane l’enseignements véritables à cause ena ene manque de bane vrai explications et guidance par bane savants ki proclamer ki zot bane défenseurs et préservateurs de la religion finale d’Allah.


Ena ene l’autre Hadith ki mo bizin citer ici c’est kot le Saint Prophète (saws) fine dire:
« Mo l’Oummah li couma la pluie. Mo pas conné si pas so premier partie là ki meilleure ou sois so dernier partie. » (Musnad Ahmad, Tirmidhi). Sa veut dire ki l’Islam en tant ki religion finale d’Allah ena le potentiel infinie pou régénère li de temps en temps, et sa promesse là li aussi précisé dans Quran Shareef et sa aussi fine confirmé par le Saint Prophète Hazrat Muhammad (saws) ki fine promette ki bane réformateurs et bane prophètes et Calife d’Allah (Khalifatullah) non porteurs de loi pou vini dans l’avenir comme bane dimounes ki pou confirme li et pou préserve bane l’enseignements divines jusqu’à Qayamat. Kan Allah fine déclaré fermement dans Quran ki Li pou gardien Quran Shareef, pareil couma mentionné dans Surah Al-Hijr:


« En vérité, c’est Nous ki fine fer dessane le Quran, et en vérité, c’est Nous ki pou Gardien (préserve) li. » (15 : 10)


Alors, couma eski Allah pou préserve Quran pou fer li reste vivant, ki li dans l’esprit de l’homme et aussi fer l’homme pratique li, non pas seulement comme ene
« simple livre, ene simple l’écritire » pareil couma le Saint Prophète Muhammad (saws) ti décrire pour bane dimounes de bane derniers jours, bane tels dimounes ki pou proclame zot musulmans kan en fait zot pas ena ditout fibre Islamique dans zot?


Le Saint Prophète (saws) aussi fine fer référence à bane derniers jours comme ene kitchose ki pou quelque peu semblables à celui de bane compagnons de so l’époque, ki ti couma ene premier rayon de lumière dans la gloire de l’Islam. Li cite parabole de la pluie, la pluie de bénédictions ki pou ene source continuel de guidance pour so communauté après so l’époque (en tant ki prophète). Saki sa veut dire c’est ki, parmi bane ki pou vini plus tard, pou ena parmi sa bane dimounes là bane musulmans fidèles ki pou ressemblé bane ki fine vini dans le
passé, et zot pou tellement près de bane premiers croyants, ki li pou difficile pou compare zot. Nous tous conné, ki la gloire de premier l’époque de l’Islam vraiment incomparable à tout bane les autres l’époque, d’après nous humble opinion ; mais Allah et So Messager (saws) fine ouvert la porté de sa la pluie ki pou manifester dans bane derniers jours là, comme promis dans Quran Shareef, kot Allah dire:

 

« Bane premiers, c’est bane ki pou premiers (dans Aakhirat); Sa bane là zot pou bane ki pli rapproché avec Allah dans bane Jardins sublimes, ene grand partie pou vine de parmi bane premiers, et ene ti nombre parmi bane derniers. » (Al-Wakia 56: 11-15 )


« Et (Allah pou envoye li – le Prophète) à d’autres d’entre zot ki pas encore joinde zot. Et Li le Puissant, le Sage. » (Al-Jumu’ah 62: 4)


En plisse de sa, ena ene Hadith kot rapporté ki le Saint Prophète (saws) fine dire:


« Le meilleur de mo communauté c’est bane premiers et bane derniers, et entre zot, pou ena ene certaine déviation. Ah, si mo ti capave trouve mo bane frères ! » Zot (c’est-à-dire, bane compagnons) fine demande li:« Eski nous pas to bane frères ? » Li fine réponne, « Zot mo bane compagnons ».


Dans version de Muslim concernant bane « frères» là, précision ki fine fer c’est au sujet de sa bane dimounes ki le Saint Prophète Muhammad (saws) pas fine zamais trouvé avant, et ki pou vini après so la mort, beaucoup plus tard. Par conséquent, parmi bane nombreux interprétations de « frères », en particulier concernant bane dimounes de bane derniers temps, alors bane élus ou prophètes d’Allah zot tous zot bane frères. Zot vine confirme l’autre et tenir ferme même serment ki zot fine prend avec Allah pou apporte vrai guidance. Le Saint Prophète (saws) fine dire:
« ... Bane prophètes zot bane frères d’ene même papa, zot mamans différents, mais zot religion enn. » (Bukhari, Muslim)


Par conséquent, le Quran et bane paroles du Saint Prophète (saws) précise l’avènement de bane messagers d’Allah ki pou vini dans l’avenir, bane tels choisi d’Allah ki pou conforme zot à l’image du dernier prophète porteur de loi (saws) pour revivre bane vrai l’enseignements ki li (Hazrat Muhammad (saws)) fine recevoir d’Allah, bane tels l’enseignements et codes de vie ki Allah fine promette pou préserver jusqu’à Qayamat.


Concernant sa bane hadiths là, ena beaucoup désaccords parmi bane musulmans même. Aucaine groupe musulman pou capave imite l’exemple de bane compagnons du Saint Prophète (saws) et bane frères ki le Saint Prophète (saws) ti bien envie rencontrer, sauf si sa bane dimounes là (sa bane musulmans là) fine effectivement (dans zot l’époque) fine trouve l’avènement d’ene Messager d’Allah en chair et en osse, à moins ki zot (sa bane musulmans là) zot fine vine sous so l’influence spirituelle.


Avant ki mo termine mo Khutba, ena ene point ki mo tenir à bien préciser dès le départ, c’est ki le nom Jamaat Ul Sahih Al Islam li pas veut dire ene nouvo religion. Mette sa bien dans zot la tête. Nous pas fine vini pou divise l’Islam encore plisse, mais pour identifier nous couma Allah oulé ki nous identifié nous, en tant ki So bane instruments afin pou ramène la gloire de l’Islam.


Par conséquent, le nom de sa Jamaat là li pas l’adoption d’ene nouvo religion. Le nom Jamaat Ul Sahih Al Islam li le nom d’ene ré-interprétation ou d’ene ré-formulation de la religion du Quran. C’est ene renouvellement ki fine présenté sous direction divine à sa humble serviteur là, ki choisi par Allah (twa) de sa l’époque là. Par la grâce d’Allah (twa), le nom Jamaat Ul Sahih Al Islam li le nom ki Allah (twa) Li-même fine donne à So serviteur choisi de sa l’époque là, c’est-à-dire, le Khalifatullah de sa l’époque là. Aucaine nom pas capave
pli béni ki nom ki Allah (twa) donné Li-même, ki Allah Li-même choisir pou So serviteur et ki Allah même fine fer sa vine important, afin pou apporte la ré-génération, la réforme de So Deen, l’ISLAM. Différents groupes musulmans, par égar pour zot croyances et perspectives particuliers, fine adopté bane noms différents, et donc li fine vine nécessaire pour nous dans la manifestation divine, kot Allah (twa) fine élève sa humble serviteur là, So Khalifatullah et fine envoie So révélation divine pour ki nous gagne ene Jamaat divine afin pou distingue nous de bane les autres. Mo espère donc ki sakaine d’entre zot fine comprend mo message ki mo fine présente devant zot dans mo Khutba Jummah azordi.


Mo fer duah ki Allah accorde à bane musulmans ene perception illuminé afin pou distingue la vérité de nous cause honorable, de sorte ki, en tant ki ene être uni, nous capave vine saki Allah oulé de nous avant tout, ki nous vine complètement soumis à Li et nous abandonne toutes formes d’attractions sataniques, ki nous reconnaite l’essence de So l’existence, et le rôle ki Li fine zoué pou amène tous So bane serviteurs choisi ensam pour ene cause commun, pour la sauvegarde de l’humanité et de la spiritualité de l’homme, ki li dans sa le monde ici-bas là
et dans Aakhérat. Insha-Allah, Ameen.


Insha-Allah, ki Allah (twa) béni zot tous. Ameen.

Écoute le Khutba Jummah du Khalifatullah Munir A. Azim en intégralité (Audio)