بسم الله الرحمن الرحيم

 

 

Khutba Jummah

 

HADHRAT AMIR’UL MUMINEEN MUHYI-UD-DIN

 

Munir Ahmad Azim


14 Mars 2014 ~

(12 Jamad’ul Awwal 1435 AH)

 

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

 

 

 

À la lumière de bane persécutions contre bane musulmans de par le monde, l’ambition pour la domination mondiale fine être en grand partie la cause de bane mals ki pé arriver tous les jours et ki pé fer actualité. Li fine divise le monde en deux bloc majeurs, avec zot bane satellites ou bane alliés, ki change camps, là kot ena zot bane l’avantages. Azordi jour, ki nous trouver ? Ena ene pariaze ki sanlà pour ena plus beaucoup armements, et ki sanlà pou touyé pli beaucoup. Nous trouver de nos jours couma la science pé servi dans ene bien mauvais façon pour fabrique bane nouveaux z’armes ki de plus en plus, pli dangéré, et ki touye zot bane cibles encore pli vite et fer beaucoup massacres. Le monde li actuellement sous  l’entreprise d’ene crainte constant d’ene troisième guerre mondiale, ene telle la guerre ki, si li éclaté, pour certainement détruire sa joli planète ki Allah (swt) fine créer là, ensam avec civilization extraordinaire ki so bane habitants fine travaille dure pou construire pendant des siècles.

 

C’est l’adoption de système islamique d’ene gouvernement mondiale tousel ki capave donne ene soulagement à sa grand tracas là. Avec ene tel système, tous bane l’états gagne ene l’occasion égale pou progresser librement et avec indépendance, sakaine d’après so propre tradition, so bane coutumes et so tempérament. Aucaine l’état ou même, aucaine groupe d’états pas pou capave nourri et entretenir, d’après sa système là, bane plans agressifs, rempli avec la haine contre ene l’autre l’état ou groupe d’états. De ce fait, ene lé monde de gouvernement unifié capave créé si tous bane l’états groupé ensam et forme ene Commonwealth et travaille ensam, sakaine donne ene coup de main vers ene même l’objectif.

 

Bien entendu, sa représente ene condition idéale, ene la fin ki nous souhaiter de tout cœur. L’islam envizage de plusse ene l’organization unie kot nous capave soumette bane disputes entre bane l’états ou groupe états. Ene membre ki retire li et ki refuse pou soumette à décision de l’organisation pou bizin être discipliné au moyen d’intervention militaire afin ki li conforme li à discipline ki bane les autres états membres pé suivre. Et si deux groupes de croyants la guerre ensam, alors tout comme Quran Shareef enseigne nous (Al-Hujurat 49 : 10): « faire la paix (réconciliation) entre zot. Et si ene des deux groupes dépasse limites contre l’autre, combatte groupe ki dépasse limites là, ziska ki li accepter l’ordre d’Allah. Si li accepter, faire la paix entre zot avec justice. Faire l’égalité, parski Allah content bane ki faire l’égalité. » (Al-Hujurat 49 : 10)

 

Dans ene l’autre place dans Quran (Ta Ha 20 : 132) Allah dire : « Pas tire lizié lor séki Nous fine accorde ene partie parmi zot, comme décor de sa la vie lor la terre là pou jouir, parski Nous tester zot avec sa. C’est provision ki to Maitre donne toi ki meilleur et pli duré. » (Ta Ha 20 : 132)

 

Nous bizin mentionné ici ki l’organisation moderne de bane Nations Unies, par l’expérience fine sous l’obligation pou différer de so prédécesseur « la Ligue des Nations » par so bane projets et méthodes, et alors li fine capave de ce fait évite aussi bane dangers dans plusieurs sphères, dans plusieurs domaines. Quoi-ki le but li encore loin, mais selman nous bizin dire ki ene pas en avant fine fini commence fer vers sa but là. Eski zot pas trouver ki sa c’est en fait système islamique ki zot (bane Nations Unies etc.) pé mette en pratique, bane telles l’enseignements couma fine établir dans le Quran Shareef, dans bane versets ki mo ti fek mentionné?

 

D’après saki fine déjà écrire et dire, li claire ki l’islam li ene la religion pli pratique ki spéculatif. Li pas philosophie ki ene savant dire et établir, ni li ene théologie, malgré ki li contenir tous les deux (philosophie et théologie). Li (l’Islam) décourage bane dispute obscure de bane l’écoles (de pensées) de bane l’époques anciens. L’Islam li ene règle de conduite, ene mode de vie. So l’aspect pratique ki représente so élément supérieur fine permette li (l’Islam) pou gagne ene grand l’influence bienfaisant et pou vine ene source constructif de la civilization à travers so carrière historique. Couma sa ?

 

1) Intellectuellement en la science et la philosophie, kot li fine apporte la lumière dans ene grande partie du monde ;

2) Moralement, li fine établi la sainteté et l’aspé inviolable de bane relations humains ;

3) Spirituellement, kot li fine aide l’homme pou conne ene à l’autre, et pou apprane pou vivre par Allah, en Allah et pour Allah.

 

En tant ki ene religion, l’Islam li incarne la simplicité à tous niveau, sans ki li ena bane l’enseignement ou rites compliké, li péna aucaine clergé (couma l’église catholique), parski sak musulman li so propre prêtre. L’Islam pas encourage la vie moine et pas ordonne ki bane musulmans oblizé vivre ene la vie retiré de la civilization, pou vivre ene la vie ascétique (en retraite), coupé de tout. Pour la purification de l’âme, l’Islam pas trouvé ki li indispensable pou ki ene kikaine pique li-même ou sois laisse li-même mort de faim ziska li dépéri, ou sois ki li torture so lécorps dans bane drôle de façons. Zamais aussi l’Islam fine encourage le célibat, renoncement du monde et de bane l’avantages légale ki li-même (l’Islam) fine prescrire. Mais selman li condamne catégoriquement ki dimounes sauver de zot bane responsabilités sociales ou familiales. Li (l’Islam) pas croire en ene cycle sans fin de l’existence. La foi dans l’au delà li ene article de la foi principal dans Islam. Mais selman, l’Islam pas croire ditout dans réincarnation de l’âme, ki li au niveau de lécorps physique ou d’ene l’état à ene l’autre l’état dans sa lémonde là-même après la mort. Kan ou mort, c’est ou mort. Ou coupé avec sa le monde là. L’Islam aussi croire dans le jour ki Allah pou fer So jugement finale, li croire aussi dans paradis et à l’enfer, non pas couma ene kitchose incertain ou bien dans le doute, mais comme ene kitchose bien sûre ki pou arriver, et ki pou commence lors sa la terre la même et pou aller même ziska li accompli dans l’autre lémonde.  L’Islam enseigne ene musulman aussi pou cherche le bien de sa lé monde ici-bas là et aussi le bien de l’autre lémonde et pou pas renonce li à ene, ni à l’autre.

 

Sa pas veut dire ki l’islam li sans idéalisme. Mais so idéalisme li pas léger et fragile : li concret, li ena ene forme (li ena ene lé corps et l’âme) et li raffermi par ene réalisme bien établi et discipliné. So bane valeurs morales et spirituelles zot éxister en harmonie. Poteau de l’islam ou nous capave dire colonne vertébrale de l’Islam li consolider dans ene la foi profond en ene Dieu Unique, ki Tout-Puissant (c’est-à-dire, Allah) dans ene l’amour pour l’humanité.

 

L’islam trouve li maintenant dans 15ème siècle et azordi nous en 1435 Hijri et l’histoire fine enregistré bane l’étapes de so progrès pendant sa période là. Li fine révèle so grand puissance et beauté et so capacité pou survivre dans tous situations. Li pas du tout ene la force ki fine épuizé, ki fine fini pareil couma certains critiques ki rempli de bane préjugés croire.  L’Islam pas du tout expiré. Même en ce temps de crises et de tension, bane dimounes et mêmes bane gouvernements ena recours à so bane l’enseignements pour ramène bateau de la civilisation à bon port. Bane ki ena lizié pou trouvé pou capave trouver couma, par la force de bane circonstances, le monde pé rapproche, consciamment ou inconsciamment, de bane idéales islamiques.  Sa ene pratique ki pé toujours contigné. Et pas bizin être ene  prophète pour dire ki à l’avenir, bane dimounes pou recherche la coopération de l’islam de plus en plus, dans tous bane tentatives bien sérieux afin pour établir l’ordre nouveau, le Royaume du ciel, sa rêve tant désiré de bane Messagers d’Allah, de bane saints et de bane philosophes.

 

Ki Allah aide nous tous bane musulmans et tous bane humains en général pou collaborer ensam pour atteindre sa l’ordre nouveau là, ki représente ene tel but ki promette ene la paix interne et externe pour l’homme de par le monde. Insha-Allah, Ameen.

Écoute le Khutba Jummah du Khalifatullah Munir A. Azim en intégralité (Audio)