بسم الله الرحمن الرحيم

 

Khutba Eid-ul-Fitr

HADHRAT AMIR’UL MUMINEEN MUHYI-UD-DIN

 

Munir Ahmad Azim

 

29 Juillet 2014

(01 Shawwal 1435 Hijri)

 

 

(Résumé Khutba)

 

Après ki li fine envoye so « Assalamoualaikum Warahmatullah Wabarakaatouhou » et EID MOBARAK à tous so bane disciples (et tous bane musulmans) du monde entier– en mentionnant bane l’Iles avoisinants, l’Inde, Kerala, Trinidad et Tobago etc. – le Messager d’Allah Hazrat Khalifatullah (atba) fine commence so Khutba Eid avec Tashahhud, Ta’uz, Surah Al Fatiha, et ensuite li fine dire:

 

 

 

 

 

Ramadhan fine terminé pour ça l’année là. Mais nous banne bon action ki nous ti pé faire pendant le mois de Ramadhan bizin pas terminé, li bizin continuer jusqu’à l’autre Ramadhan. Roza li l’essence même de tous banne adorations et li permette l’homme pour remplir tous so banne obligations envers les autres et aussi envers Allah, dans ene façon parfait.

 

Pendant le Ramadhan banne membres du Jamaat Ul Sahih Al Islam fine élève zotte niveau de Namaz, pareille couma zot fine levé le matin de bonne heure pour faire le Sehri pour garde zot Roza. De la même façon ça l’habitude là bizin continuer, kot nous lever pour le Tahajjud, faire Namaz Fajr dans l’heure et faire récitation du Quran Shareef le matin surtout kot ena beaucoup thawaab (bénédictions).

 

Malheureusement, pour banne ki encore vivant et fine gagne ça mois béni là, mais ki pas fine tire aucaine profit et pas fine gagne aucaine bénédiction divine, pense bien ki zotte la vie fine alle en gaspillage si zotte pas fine conne observe ça mois béni là couma bizin. Et en plus de ça, couma eski zotte capave content aujourd’hui le jour de Eid quand zotte fine laisse ça bane jours exceptionnelles là sapé de zot la mains ? Kan néglige le Roza sans aucaine raison valable, ça li ene manquement très sérieux. Alors couma est-ce qui zotte pou capave content aujourd’hui quand zotte pas fine établir tous bane actes Ibaadat de Ramadhan couma bizin ?

 

Alors chaque dimoune ki dire ki li croire, ki li ene croyant, alors li bizin mette en pratique bane bon l’intention ki li faire, et surtout li pas ratte pou cherche bane bénédictions divine pendant le Ramadhan. Pour ça, li bizin faire banne tel supplications avec Allah, ki tous séki lors lé ciel tendé, kot banne anges d’Allah zotte diffuse ça banne supplications à travers le monde entier.

 

Le jour de Eid, c’est pour banne dimounes ki fine passe éne mois dans l’obéissance d’Allah, tous séki ti permettre pour zotte, zotte fine quitte tous, zotte fine montré zotte l’amour, zotte l’obéissance seulement pour Allah seul. Quand banne ki soumettre zot totalement avec Allah et zotte faire ène mois de sacrifice seulement pou Allah, Allah (swt) donne zotte ène jour de Eid. Ene jour de contentement pour banne ki fine passe sa mois béni là dans l’obéissance Allah Ta’ala.

 

Mo raconte zotte ene ti anecdote, dans l’époque du Saint Prophète (saw), ki fine passé ene jour Eid. Banne croyants, le matin même, zotte tous ti dans ène grand préparation et Madina ti envahi avec contentement, kot l’heure Namaz Eid ti pé approche bien vite, et banne jeunes et banne vieux, zot tous fine prépare zotte bon linge et fine dirige zot vers Masjeed. Dans zotte nature, banne zenfants content zotte linge neufs.

 

Après Namaz Eid, banne zenfants fine alle jouer avec la joie. Quand le Saint Prophète Mohammad (saw) fine sorti depuis dans Masjeed, li trouve ène garçon ki ti pé pleuré en silence, li tout seul dans so coin. Hazrat Mohammad (saw) fine vine vers li et pose so la main doucement lors so z’épaule et li dire garçon là, « Qui faire to pé pleuré mo garçon? » Garçon là retire la main du Saint Prophète (saw) avec colère sans ki li fine guette li et li dire: « Laisse-moi tranquille. » Hazrat Mohammad (saw) mettre so banne lé doigts dans garçon là so cheveux et avec calme li (saw) dire garçon là : « Dire ki fine arrive toi », et garçon fine enfonce so la tête entre so genoux et li fine pleuré. Li dire : « Mo papa fine mort (martyre) pendant la guerre ensam avec le Prophète Mohammad (saw). Mo maman fine remariée avec ène l’autre missié. Quand mo fine alle kot mo maman, missié là fine pousse moi et ene quelqu’un fine cokain mo du bien. Azordi banne les zotte garçons dans la joie et zotte pé fêter avec zotte banne linge neufs et guette moi, mo pas fine mange nannié, mo pas conné kot mo pour aller et mo péna ène place pour resté. »

 

Quand Hazrat Mohammad (saw) fine tende ça, so larmes fine roulé lors so la joues et le Saint Prophète (saw) fine essaye faire ene sourire et li dire sa garçon là avec douceur : « Moi aussi mo fine perdi mo parents quand mo ti zenfant. » L’heure là zenfant lève so la tête, li guette ki sanlà pé cause avec li, et li alle trouve c’est le prophète Hazrat Mohammad (saw).

 

L’heure là le Saint Prophète dire garçon là : « Est-ce qui si Moi mo vine to papa, Ayesha to maman et Fatima to sœur, to pou content mo garçon ? » Garçon là  fine bien content, et alors le Saint Prophète (saw) amène zenfant là kot li et Hazrat Ayesha (ra) fine faire li prend ene bain, fine donne li quitchose pou manger et li fine alle rode ene jolie linge pour zenfant là et puis Hazrat Ayesha (ra) fine dire li alle dehors pour jouer avec banne les autres enfants et ensuite to ré-retourne là même et ki c’est ça so la caze.

 

Zenfant là fine alle jouer, et ensuite retourne la caze kot Hazrat Mohammad (saw) avec la joie et contentement. Tous banne les autres zenfants fine étonné par changement de ça zenfant là et banne zenfants là fine pose li question et li fine raconte tout en détails. Parmi ça banne zenfant là éna fine marmotté, zotte dire « Ki faire nous papa aussi pas ti mort couma li, li bien chanceux. »

 

Alors leçon ki nous tiré de ça anecdote là, c’est ki Néki (bonne action) li exister dans tout forme, et ena ene tas l’occasion, ene tas l’opportunité pour chaque croyant pour faire du bien tout autour de li. L’homme ena dans li la compassion, et li essaye partage ça avec les autres. Nous bien-aimé prophète Hazrat Mohammad (saw) ti le meilleur des hommes et li fine montrer ene l’exemple de sagesse, de tacte et de sensibilité et de générosité quand li fine prend ene orphelin sous so protection le jour de Eid, parski ki sanlà ki conne souffrance perdi mama-papa ki li ? Ki sanlà conne la peine plisse ki li ? Alors celui ki donne refuge à ene orphelin, ou sois li faire bane les autres bonnes actions ki attire le plaisir d’Allah, alors ça ramène nous à vrai identité d’ene musulman, kot li bizin ene ti représentation de so rôle modèle Hazrat Mohammad (saw).

 

Astaire là, nous guetter couma ti pé célébré Eid-ul-Fitr dans l’Islam la première fois? Premier Ramadhan ti observé dans deuxième l’année de l’hégire et c’est au cours de ça même Ramadhan là ki banne musulmans ti combatte bane Quraish dans premier bataille victorieuse de l’Islam, c’est-à-dire, bataille de Badr, et ene vrai croyant pas capave oublier ça banne massacres et banne blessures dans ça la guerre là. Concernant Eid de bane premiers musulmans, fine mentionné dans Hadiths ki le Saint Prophète (saw) ti tellement épuisé ki li ti appuyé lors Hazrat Bilal (ra) et li fine prend l’aide de Bilal (ra) pour déboute et prononce so Khutba. Quelques jours avant fête Eid-ul-Fitr, Hazrat Mohammad (saw) ti annonce le Sadaaqaat-ul-fitr, ki ça fine vine obligatoire lors chaque musulman et aussi, li ti annonce le fitrana, kot banne compagnons fine contribué généreusement. L’argent ki fine recevoir fine distribué parmi banne pauvres avant et après fête Eid.

 

D’après Hazrat Jabir bin Abdoullah (ra) le Saint Prophète (saw) dans so Khutba fine mettre beaucoup l’emphase lors la gloire et le Hamd (louanges) d’Allah. Hazrat Mohammad (saw) ti faire  éloges d’Allah dans ène façon extraordinaire et spécial.

 

Dans ène l’autre hadith rapporté par Jabir (ra) concernant le déroulement de l’Eid, li dire le jour de Eid, nous ti avec le Saint Prophète (saw). Avant le Khutba, li ti faire deux Rakaat Namaz kot pas ti éna ni Azaan et ni Iqaamat. Namaz terminé le prophète Mohammad (saw) fine mettre li débout et li fine appuye lors Hazrat Bilal et li fine exhorte banne fidèles pour pratique le taqwa. Li très probable ki c’est le première Eid ça et li fine rappel zotte, zotte statut d’amitié, et aussi li fine donne zotte banne conseil et après li fine alle coté banne madames et aussi li fine donne zotte aussi banne conseils.

 

Mentionné dans Hadiths Muslim et Bukhari, comment Hazrat Mohammad (saw) ti pé célébré so Eid. Hazrat Ayesha (ra) dire un jour d’Eid le Saint Prophète Mohammad (saw) ti kot li et ti ena deux ti filles ti pé chante banne chanté et aussi zotte ti pé jouer aussi la musique. Le Saint Prophète (saw) ti pé allonger lor lili et ti fine tourne so visage de l’autre coté. Dans ça moment là même Hazrat Abu Bakr (ra) fine vini et li fine demande Hazrat Ayesha (ra) comment to fine oser laisse ça banne la musique satanique là jouer en présence du prophète Mohammad (saw). Alors Hazrat Mohammad (saw) fine dire Hazrat Abu Bakr (ra) : Laisse zotte, azordi Eid, et Hazrat Ayesha pas ti attane ki so papa pour rentré éne coup et li fine signale sa deux ti filles là pour aller. Ça incident là mentionné différemment dans éne l’autre hadith kot pé rapporté ki Hazrat Mohammad (saw) fine faire Hazrat Abu Bakr (ra) comprend ki chaque peuple (de Musulmans) éna zotte façon de faire Eid. Alors nous bizin respecté, fraudé pas nous agir dans éne tel façon pour offense ou dégrade zotte.

 

Pour terminer, le conseil pour tous nous banne membres Jamaat Ul Sahih Al Islam, le vraie Eid c’est quand nous partage nous la joie avec les autres ki dans la peine et nous, nous protège nous et garde nous toujours lors le chemin droit et faire ki tous le temps EID MOBARAK pour tous, Insha-Allah.

 

Yéhi hé tamannaa yéhi arzoo hé yehi to sounaané ko jee chaahtaa hé, Eid Mobarak.

Ça c’est mo vœux et mo désire ki plus cher ki mo envie partage avec zot c’est Eid Mobarak.

 

O Allah accorde nous to bénédiction partout kot nous été, et dans sa moment de joie là aussi, nous ena aussi ene tristesse profond pour nous bane frères, sœurs et zenfants de la Palestine et de bane les autres pays musulmans ki pé passe par bane souffrances extrêmes dans la main de bane Kafirs ki oulé extermine l’Islam, et établir zotte propre la loi parce qui zotte prend l’Islam comme ene menace et comme ene la religion de terrorisme. O Allah, vine en aide à lécorps de bane musulmans, de l’Islam et consolide membres de nous lécorps et guéri nous afin qui nous capave deboute en bonne santé physique, morale et spirituelle pour rétablissement de la gloire de l’Islam dans quatre coins du monde, Ameen.

 

O Allah, guide le Jamaat Ul Sahih Al Islam (mo bane suivants sincères) vers bane bonnes actions, accompli nous bane désires et attentes. Illumine nous les cœurs avec To l’éclairage, laisse sak partie nous lécorps suivre so l’effet par To la lumière. Ouvert pour nous bane la portes les ciels et ferme bane la portes l’enfer, aide nous pour récolter Quran.

 

O Allah, montré nous la voie pour gagne To plaisir, pas laisse Shaytane gagne moyens lors nous. Nous demande Toi pour ce ki plaire Toi, et nous cherche refuge en Toi. Mo demande Toi pour accorde nous l’occasion pour obéir Toi et pour pas désobéir Toi.

 

O Allah, faire nous parmi bane ki content To bane camarades, et haïr To bane l’ennemies. Change nous bane difficultés en facilité.

 

O Allah, purifié nous de bane impuretés et saletés. Faire nous patient lors bane évènements et accorde nous capacité pour être pieux et garde nous, O Allah loin du mensonge, ghibat, hostilité, rancune, méchanceté, l’arrogance, jalousie, la bataille et le dézordre. Et protège nous contre Dajjal so bane fitna, Shaytane so méchanceté et nous bane désires matérielles.

 

O Allah! Donne nous ene Imaan complète et guide nous tout le temps. Envoye To Rahmat lors nous, envoye la pluie de bénédictions lors nous et donne nous nourriture Halal. Guide-nous pour nous amène ene la vie complète dans Jamaat Ul Sahih Al Islam et protège nous contre tous bane maladies grands et petits. Donne nous sa l’occasion là pour servie To Jamaat ki To fine établie par To Khalifatullah de sa l’époque là, loin avec la misère, la peur, la frayeur et bane dettes. Faire nous Jamaat Ul Sahih Al Islam propager dans quatre coins du monde.

 

O Allah, accorde tous nous bane membres Jamaat Ul Sahih Al Islam dans l’Inde, Kerala, Tamil Nadu, Bihar, Sri Lanka, Maldives, Dubai, Abu Dhabi, Mayotte, Comores, Madagascar, La Réunion, Seychelles, Rodrigues, Trinidad & Tobago, Japon etc. Taqwa et piété. Ameen Soumma Ameen Ya Rabbal Aalameen.

Khutba Eid-ul-Fitr du Khalifatullah Munir A. Azim en intégralité (Audio)