بسم الله الرحمن الرحيم

 

Khutba Jummah

 

HAZRAT AMIR’UL MUMINEEN MUHYI-UD-DIN

 

Munir Ahmad Azim

 

 

14 Juin 2013 ~

(04 Shabaan 1434 Hijri)

 

(Résumé Khutba)

 

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

لَتُبْلَوُنَّ فِي أَمْوَالِكُمْ وَأَنفُسِكُمْ

“La tubla-wunna fii am-waalikum wa anfusikum.”

Pour tester ou avec ou du bien, et avec ou propre lécorps. (Al-Imran 3 : 187)

 

Sa verset Quran Shareef ki mo fine récite devant ou là ena ene très grand l’importance kot Allah testé bane croyants avec zot du bien et zot propre lécorps – surtout bane ki dire zot croire dans l’unicité d’Allah. Eski ou pas penser ki Allah (twa) pou tester nous? Donc, nous, l’homme, concernant sa duniya là, nous pas contente nous avec l’essentiel. Nous cherche toujours l’idéal. Ene simple mange li suffi pou rempli nous l’estoma mais nous pas satisfait tanque péna so salade, piment, achar, ketchup etc. Coumsa meme ene simple tissue li suffi pou couvert nous lécorps mais nous rode bane tissue de classe et de marque.

 

Dans tout domaine de la vie nous cherche toujours en plisse et nous faire l’étalage. Ena des fois l’étalage et bane kitchose supplémentaires li coute nous plisse ki l’essentiel mais nous faire li acoze nous content li. Mais concernant Deen nous toujours réticient. Nous toujours essaye rode ene chemin sorti. Nous tire tout kalité plan. Kan dire nous faire tel ou tel kitchoses, alors nous toujours ena ene prétexte « Li Sunnat sa, Li pas Faraz sa ! », « Le cœur ki compté », « Allah pas guette ou l’habillement », ou bien ena dire ki « Deen ne se mesure pas à la longueur de la barbe » etc. Tout sa là c’est prétexte. C’est ene manque de volonté de nous part pour applique ou mette en pratique nous Deen. Couma dire Deen c’est ene kitchose ki bizin existé ziss dans le cœur ! Li péna nannié à faire avec l’apparence ! Pourtant Shariah fine donne bane directives ki concerne nous l’apparence aussi.

 

Ene dimoune ena parfaitement raison kan li dire ki ene bonne apparence pas nécessairement li ene indication d’ene bon l’intérieur. Mais sa aussi li ene vérité ki l’apparence pas capave pas bon si l’intérieur bon. Kan ou ena admiration pour kikaine, sans doute ou pou imite li. Ou pou rode copié li. Bane jeunes conne sa très bien. Zot accepter mette linge sale, déchiré, habille en dézordre, pique z’oreille, mette gel dans cheveux, faire cheveux pik pik dans le but pour imite bane ki zot admiré. Ki kalité Iman et l’amour pour Nani (saws) nous capave ena ki li pas incite nous pour suive li et pour imite li ? Nous péna admiration pour nous Nabi (saws), sinon nous pas ti pour tire plan kan arrive tour pour suive li. Assez tire plan. Vive ene boute le temps dans compagnie bane ki ena vrai l’amour et admiration pour Nabi (saws). Assez écoute et suive bane ki coze grand grand cozé sans ena Sunnat de Nabi (saws). Reste loin avec bane ki dire « Deen ne se mesure pas à la longueur de la barbe ». Lerlà nous pou gagne vrai Mohabbat et l’amour pour Nabi (saws). Péna Deen ni ena Imaan sans l’amour pour Nabi (saws). Hazrat Muhammad (saws) dire : « Par Celui ki mo la vie trouve dans So la main, personne parmi ou pas capave être croyant tanque ki mo pas vine cher à li plisse ki so parent et so zenfant et entier l’humanité. » (Bukhari)

 

Ene croyant sincère et ki tous les temps faire bane kitchoses ki pour faire seulement so Rab plaisir même dans bane moments ki li en raison, li ene innocent, li accepter prend perdi pour faire plaisir so Créateur, parski so l’amour pour so Créateur et pour Allah So prophète li passe avant tout kitchose, même si li ena pour donne so la vie, verse so disang, accepter humiliation et déshonneur pour seulement pour l’amour d’Allah et So prophète. Kan ene dimoune reconnaite ene erreur et faire le nécessaire pour corrige li c’est ene kalité très noble ki pas tout dimoune ena l’honneur possède sa. C’est ene qualité ki nek bane dimounes digne et noble même ki capave ena sa. Ene dimoune ki rode camouflé so erreur ou bien rode cachiette so erreur, ou bien ki amène ene tas prétexte pour justifié so erreur dans le souci pour sauve li de so bane faiblesses ou erreur, c’est bane kalité dimounes là ki indigne parski sa li vine à partir l’orgueil, ene dimoune ki jamais li accepter so erreur, so faiblesse, li prend li-même toujours pli supérieur ki so prochain – tandique ki ene dimoune ki ena ene dignité et noble, li pour toujours garde li loin de sa vilain manière là.

 

Ene dimoune pas capave être ene dimoune sérieux et sincère si li ena sa manière ki ti ranne Ibliss détestable dans lizié d’Allah Ta’ala. C’est ene manière ki expose ene dimoune à la colère divine. C’est ene manière ki prive ene dimoune de so bien-être réel parski li pou empêche ene dimoune rentre dans Jannat kan même si li bien bien tiguitte aussi. Imagine consékance bane ki ena sa bane kalité manière là dans zot. Le monde pé gagne tracas avec cancer. Sa aussi li ene cancer ki débalance entier société et créer dézordre et instabilité à tout niveau.

 

Au contraire sa cancer ki nous conne li par l’orgueil li pour suive nous et pour ruine nous la vie après la mort aussi. Eski ene dimoune capave prétendre être propre si so lécorps patouyé dans impureté ? Ki manière ene dimoune capave déclare sincère, sérieux dans Deen et propre kan li ena sa impureté de l’orgueil là rempli dans so le cœur ! L’orgueil li ranne nous indigne et impure. Li très important et même indispensable pour nettoye nous et débarrasse nous de sa impureté là pour être ene bon dimoune dans le vrai sens du mot. Et sa li pli important pour bane ki faire travail de Dawah et bane ki faire discours lors micro. Zot bizin comprend ki zot capave faire erreur dans cozé. Zot capave dire ene kitchose ki pas existé couma zot capave refuse ene kitchose ki existé. Ena ene quantité erreur capave glissé dans cozé. Erreur li tout à fait naturel et inévitable. Pas capave dire nannié lors-là. Mais séki pas bon et bien pas bon ki ene dimoune li refuse rétracté kan li arrivé conne so erreur. C’est ziss àcoze ki sa pour faire li perdi point devant public. Acoze sa li préfère laisse le public dans noireté et l’égarement et camouflé la vérité. Li bien malheureux ki ene dimoune donne 10 à 15 ans dans so la vie bien précieux pour gagne bane degré et diplômes mais là aussi li pas pense pour débarrasse li de sa impureté là. Donc l’orgueil, li ene maladie ki fausse ou jugement ; c’est-à-dire, li faire ou justifié l’injustifiable et li faire ou critique séki louable dans le souci pour préserve ou propre dignité ou bien pou passe pou bon dans lizié dimounes.

 

Ene vrai musulman li guette l’intérêt de Deen avant so l’intérêt personnel. Li considère la gloire de Deen avant so propre l’honneur. En faisant cela li pas pou dézonnore li mais au contraire li pou honore li. C’est Allah Ta’ala ki pou accorde li l’honneur. Péna personne capave dézonnore li kan Allah Ta’ala pour honore li. Rassulullah (saws) fine dire ki celui ki humilié li àcoze Allah Ta’ala, alors Allah Ta’ala pour élève li, Insha-Allah.

 

Allah (twa) dire dans Quran Shareef ki celui ki travaille pour le péché et pas répenti, li faire ene tort à so propre nâme et Allah (twa) continuer dire ki celui ki travaille pour ene faute ou pour ene péché, et puis envoye le blâme lors ene innocent, li pou sans aucaine doute saryé ene fausse accusation et ene péché lors so lédos, et Allah (twa) continuer dire ki pas plaide pour bane ki trahir zot propre nâme. Allah pas content celui ki trahir et faire péchés. Sa bane kalité dimounes là, zot cherche cassiette zot bane péchés avec bane dimounes, zot rode passe zot pour bon, mais zot pas capave cassiette zot péchés de Allah et Allah (twa) parmi zot kan zot discuter la nuit et servi bane paroles ki pas faire Allah plaisir. Allah (twa) encercler zot dans tous séki zot faire.

 

Allah (twa) fine dire dans Quran Shareef :

 

اِنَّ اللّٰہَ لَا یُحِبُّ مَنۡ  کَانَ  مُخۡتَالًا  فَخُوۡرَا ۙ۝

« Innallaaha laa yuhibbu man-kaana mukh-taalan fakhuuraa. »

Allah pas content bane ki agir en traitre et bane vantards. (An-Nisa 4: 37)

 

Bane orgueilleux, avares et bane ki ordonne dimounes vive comme orgueilleux, ou avares et ki cassiette faveurs ki Allah fine faire zot. Allah (twa) dire, ki Nous fine prépare pour sa bane kalité mentalité là ene punition ki pour humilier zot. Allah (twa) oulé nous bien-être. Li oulé diminué nous difficulté parski l’homme fine créé faible.

 

Ki Allah donne nous le Tawfeeq pour mette sa bane conseilles là en pratique, Insha-Allah. Et ki Allah (twa) pardonne nous pour tous nous bane péchés, fautes graves ki nous fine faire, Insha-Allah, Ameen.