Text Box: بسم الله الرحمن الرحيم

Khutba Jummah

HAZRAT AMIR’UL MUMINEEN MUHYI-UD-DIN

Munir Ahmad Azim


05 Juillet 2013 ~
(25 Shabaan 1434 Hijri)

(Résumé Khutba)

Après ki li fine souhaite « Assalamoualaikum Warahmatullah Wabarakaatouhou » à tous so bane disciples (et tous bane musulmans) entier le monde – en mentionnant bane l’Iles avoisinants, l’Inde, Kerala, Trinidad et Tobago etc. – Hazrat Muhyi-ud-Din (atba) fine commence so Khutba avec Tashahhud, Ta’uz, Surah Al Fatiha, et ensuite li fine dire:

Le mois sacré de Ramzaan, 9ème mois de calendrier islamique li considéré comme le chef (supérieur) de tous bane mois parski c’est pendant sa mois rempli de bénédictions là ki Allah Ta’ala fine révèle le Quran Shareef, So dernier commandements, et ki considéré comme le chef de tous bane livres sacrés, à So bien-aimé Rassool, Khataman Nabiyeen, sceau et chef de tous bane prophètes, Hazrat Muhammad (saws) par l’intermédiaire de  Hazrat Jibreel (as) ki le chef de tous parmi bane anges. C’est entre autres pour respecter tous sa bane évènements et commandements ki ena tellement de valeur dans lizié d’Allah ki Allah fine impose lors nous le jeûne (Roza) pendant sa mois sacré là. Bien entendu, le jeûne li obligatoire lors tous bane ki physiquement ena le moyen pou observe li, c’est-à-dire, zot l’état de santé bizin bon, ene la santé ki permette zot pou garde Roza. 

« Zot ena ene mois ki pé approché, ene mois ki ena ene valeur incomparable, ene mois de bénédiction, ene mois ki contenir ene la nuit meilleure ki mille mois. »

Sa c’est bane paroles ki le Saint Prophète (saws) fine prononcé pendant ene so discours vers la fin mois Shabaan. Sa Hadith là li rapporté par Hazrat Salman Farsi (ra). Dans ene l’autre Hadith, Hazrat Ubaadah bin Saamit (ra) rapporté ki le Saint Prophète (saws) fine ene jour dire, alors ki Ramzaan ti bien proche :

« Ramzaan, le mois de bane bénédictions fine vine à zot ; pendant sa mois là Allah tourne vers zot, couvert zot de So grâce spéciale, pardonne bane péchés, accepter bane duah, admire zot compétition pou faire pli bon travail et Li flatte zot avec bane anges. Alors, montrer Allah bonté ki vine de zot. »

Nous trouver ki le Saint Prophète Muhammad (saw) fine prend la peine pou faire sa bane discours là dans le but pou mette bane musulmans en garde contre l’inactivité pendant sa mois là. Li bon pou nous rappelle ki Hazrat Muhammad (saws) ti pé cause avec bane Sahaba alors ki sa bane là ti bane pratiquants bien ferme. Alors nous bizin comprend ki sa l’enseignement là li addressé pas seulement à bane Sahaba, mais en fait c’est ene moyen pour faire tout l’Oummah conne sa ziska Qayamat, afin ki bane musulmans zot consacrer zot plisse à l’adoration d’Allah pendant Ramzaan parski c’est ene mois vraiment bien spécial. Ramzaan li ene mois d’ene telle importance ki au commencement de l’année même Paradis faire préparation pour embellir li pour sa mois béni là.

Hazrat Ibn Abbas (ra) rapporter ki li fine tende  le Saint Prophète (saws) dire : « Depuis commencement ziska la fin l’année, Paradis li décoré et parfumé en l’honneur Ramzaan. Ensuite, kan premier la nuit de Ramzaan Moubarak vini, ene di vent ki appelle Massirah souffler dépi enba Trône d’Allah et battants de bane la portes, feuilles de bane piés de paradis la guerre entre zot, zot agiter, frissonner et produire ene tapaze bien agréable ki zamais avant fine tendé. Et bane houris (Hours), avec bane grands lizié noir, zot sorti de zot bane la caze et zot vine kot balcons Paradis et zot demander : « Eski ena kikaine ki pé demande Allah pou ki li gagne ene d’entre nous comme madame ? » Ensuite zot pou demande Ridwaan, portier Paradis : « Ki sa la nuite là sa ? » Alors Ridwaan pou réponne : « Labbaik ! C’est premier la nuite Ramzaan, kot bane la portes Paradis ouvertes pour bane Rozédaar de l’Oummah de Hazrat Muhammad (saws). »

Le Saint Prophète (saws) fine aussi dire: « Dans sak la nuit Ramzaan, Allah recommande ene ange pou lance sa l’appel là : Eski ena kikaine ki pé répenti pou ki Mo pardonne li ? Eski ena kikaine ki oulé prête l’argent à ene riche, ene riche ki pou rembourse li tout ? » Alors tout sa faire nous comprend ki Ramzaan li ene mois ki renferme ene très grand bénédiction. Insha-Allah, mo pou cite so bane différents aspects.

Ramzaan li avant tout le mois ki consacrer pou nous garde Roza (carême). Le principe de Roza c’est ki ene musulman bizin reste sans manger, boire et sans relations sexuelles avec so conjoint pendant le jour, pendant tout le mois de Ramzaan. Allah Ta’ala dire nous dans le Quran : « C’est pendant mois Ramzaan ki Quran fine dessane, pou guide l’humanité, en versets clairs, pou servi comme la loi. Bane ki arrive joine sa mois là bizin jeûner (garde Roza). » (2 : 186)

A l’exception de bane zenfants, bane malades et bane voyageurs, li obligatoire à tout musulman homme et femme pou garde Roza dans Ramzaan. Hazrat Muhammad (saws) fine dire dans ene Hadith : « Celui ki néglige ene seul Roza Ramzaan volontairement et sans aucaine cause majeure et sans ki li malade zamais pas pou capave remplace li, même si li garde Roza tout au long de so la vie. » 

Alors nous pou capave garde Roza pendant tout nous la vie dans le but pou remplace ene sel Roza manqué volontairement pendant Ramzaan, mais zamais nous pas pou capave ré-gagne sa bénédiction ki ena dans sa ene sel Roza ki nous ti bizin garder pendant sa mois sacré là. Le Saint Prophète (saws) fine oulé démontrer ki ene Roza ki garder pendant Ramzaan li irremplaçable par rapport à bénédiction ki li contenir pendant sa mois là. Dans ene l’autre Hadith, li fine dire : « Celui qui observe Roza Ramzaan avec la foi et l’espoir pou gagne récompense, (alors li) pou gagne le pardon pour so bane péchés passés. » Allah Ta’ala bien content celui ki garde Roza, tellement Li content sa Rozédaar là ki l’odeur ki sorti de sa Rozédaar là so la bouche li meilleure dans lizié Allah, plus doux pou Li ki parfum musc. En plisse de sa, ene Rozédaar li recevoir so récompense dans ene façon tout à fait spécial. En fait dans ene Hadith-e-Qoudsi, Allah Ta’ala dire : « Roza li pou Moi et c’est Moi personnellement ki pou donne so récompense. » Eski ena ene pli grand l’honneur pour ene croyant ki li recevoir so récompense de so Créateur personnellement? 

Allah (swt) zamais rejette duah d’ene Rozédaar. Le Saint Prophète (saws) fine dire dans sa sens là : « Duah de trois catégories dimounes zamais rejeté ; celui d’ene lé roi juste, celui d’ene Rozédaar ziska ki li casse so Roza (faire Iftaar), et (duah d’) ene opprimé (ki dimoune fer zouloum lors li). »

Li surtout recommandé pou faire beaucoup de duah quand l’heure Iftaar approcher, parski bane moments zis avant l’heure Iftaar zot bane moments kot Allah Ta’ala accepter bane duahs. Mais malheureusement bane musulmans pas assez profite de sa moment là, parski nous trop occuper pou prépare manger. Li même arriver ki nous (bane musulmans) oublier faire duah pou Iftaar.

Li aussi malheureux pou trouver ki bane musulmans pou alle dépasse limite concernant manger et boire pendant sa mois béni là, couma dire zamais fine gagne manger. Nous pas calculer ki ena bane les autres musulmans ki zot na pas gagner même manger pou casse zot Roza ou zot pé passe misère et péna assez kitchose pou satisfaire zot bane besoins immédiats. Ene tel comportement li contre l’esprit de garde Roza et de bane l’enseignements de l’Islam, parski l’Islam continuellement commande bane croyants pou mette ene frein à zot l’égoïsme : Le Saint Prophète (saws) ti humble et modeste, et li ti pé refuse li-même le luxe pou mange plusieurs kalité de dattes, di pain et la viande dans ene même repas. 

Malheureusement nous pas capave dire autant de bane musulmans azordi jours pour ki Ramzaan fine vine ene mois kot zot manger encore plisse et surtout bane meilleures menu. Ous bizin mette sa dans nous la tête ki Ramzaan c’est pas ene mois kot nous rempli nous l’estomac de bane aliments ki riches et bon. C’est le mois kot nous bizin essaye, en même temps ki pas manger, nous bizin mette ene restriction lors nous bane instincts animal, nous bane passions et nous retrouve ene certain l’équilibre. 

Alors mo termine mo Khutba d’aujourd’hui, bane frères, sœurs et zenfants, kan zot trouve la lune de Ramzaan, faire sa duah là:

« Allahumma Ahillahou alayna bil-amni wal imaan was-salamati wal islaam wattawfiqi lima touhibbou watardwa Rabbouna wa Rabboukallah. »
O Allah, faire li apparaite à nous avec sécurité, la foi, la paix, soumission et guidance vers saki To content et saki faire Toi satisfait ; (Oh la lune) nous Maitre et to Maître c’est Allah.

(i) Niyyat Sehri :

Allahoumma aswoummou radal laka faghfirli ma kaddamtou wama akhartou.
O Allah ! Mo pou garde Roza pou Toi demain ; pardonne mo bane péchés passés et futurs. 

Si faire Niyyat la veille au soir, lire :

Nawaytouan aswouma rhadan lillahi min fardhi Ramadaana haazan.

Si faire Niyyat le matin, lire :

Nawaytouan aswouma haazal yawma lillaahi min fardi Ramadaana.

(ii) Niyyat pou Iftaar : 

Allahoumma laka soumto wabika aamantou wa’alayka tawakaltou wa’ala rizkika aftartou fatakabbal minni.
O Allah ! Mo fine garde Roza pour Toi, mo ena la foi en Toi et mo pé casse Roza avec manger ki To fine accorde moi ; accepter sa Roza là de moi.

Nous faire duah ki Allah (swt) donne sakaine parmi nous le Tawfiq, pour profite de sa mois rempli de bénédictions là et li ene mois de l’entrainement pour les 11 mois à venir, Insha-Allah, kot nous gagne l’occasion pour nous purifier nous et retire tous bane impureté de nous lécorps physique, morale et nous l’âme spirituellement. Insha-Allah, Ameen.