بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim


20 Mai 2011 ~

 

(16 Jamadul Aakhir 1432 Hijri)

 

(Résumé Khutba)

 

Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine dire:

 

 

قُلۡ لِّلۡمُؤۡمِنِیۡنَ یَغُضُّوۡا مِنۡ  اَبۡصَارِہِمۡ وَ یَحۡفَظُوۡا فُرُوۡجَہُمۡ ؕ قُلۡ  لِّلۡمُؤۡمِنٰتِ یَغۡضُضۡنَ مِنۡ اَبۡصَارِہِنَّ وَ یَحۡفَظۡنَ فُرُوۡجَہُنَّ

 

“Dire bane zomme qui éna la foi, qui zot baisse zot lizié et protége zot chasteté... Dire bane femme qui éna la foi qui zot baisse zot lizié et protége zot chasteté...” (24:31-32)

 

Par la grâce d’Allah, mo pé continuer mo Khutba lors bane madames et le Pardah, et mo pou cause aussi lors l’égalité de bane missiés et madames et systèmes ki régler zot et zot bane droits.

 

Bane madames modernes de l’Ouest fine mal-juge bane valeurs fondamentales. Bane madames Européen interprète la liberté comme émancipation (libéralisation) de bane obligations morales. Zot envie égalise bane missiés dans tous phases de la vie, ki li dans le senteur politique, économique, éducationnel et industriel, et zot pé fer tout zot possible pou adopter tout bane aspects ki d’ordinaire réservé zis pou bane missiés.

 

Zot mette bane arguments de l’avant ki position honorable de maman li ene grand tracas pou zot, li ene responsabilité trop lourd et ki sa empêche zot pou fer bane progrès dans la vie. La femme (moderne) détesté la maternité (li népli ena goût pou vine maman). Fine ena beaucoup bane théories et suggestions ki fine mette de l’avant pou prouver ki la maternité li pas essentiel dans la vie d’ene madame, pou ki li vivre dans contentement, et zot fine suggérer ki ena bane institutions alternatif ki capave créer ki pou libère bane mamans de fardeau de grandi et entraîne zot bane zenfants. Et ki alors zot pou capave gagne pli grand liberté de mouvement, kot sa pou fer zot capave partage bane activités dans diverses secteurs, ki li sociale et politique avec bane z’hommes.

 

Dans certain pays, fine ena bane écrivains non-Musulmans ki jamais pas fine manque ene l’occasion pou coule l’Islam ouvertement ou en cachiette et zot fine sans cesse fer bane madames pense pareil couma zot. Alors zot dire bane madames : « Délaisse zot bane vieux traditions ; sorti en dehors de zot la caze et mélange zot avec bane missiés courageusement ; zot pou réussi fer sa kan zot pou presser pou alle travail dans bane l’usine et bane la boutiques, pas à cause ki ena ene nécessité pou ki zot alle travail mais seulement pou ki zot débarrasser de zot bane responsabilités couma mamans et bane ki prend soins de la race humaine. »

 

Zot fine dire aussi ki la femme marche lors chemin avec lizié baissé zis à cause li manque courage et confiance en soi et ki li peur beaucoup bane z’hommes. Mais kan li pou tente l’expérience et réussi prend lors li-même, alors sa pou agir comme ene la lumière pou li et alors c’est à sa moment là ki li pou capave fer face à bane z’hommes avec courage. Sa bane écrivains là zot pas prend compte l’histoire kot Hazrat Aisha (ra), malgré ki li ti ene femme, mais li ti participe activement dans politique de so l’époque, et li fine même dirige ene l’armée dans bataille Jamal et kan li ti ena pou cause avec bane missiés, li ti pé faire sa depi derrière ene rideau. Alors de ce fait, l’Islam permette ki madames cotoye bane missiés pou ene travail, mais avec le Pardah ki fermement institué. Nous bizin garde à l’esprit aussi ki le Saint Prophète Muhammad (saws) fine dire so l’Ummah ki : Alle apprane la moitié de zot la religion (Islam) avec Aisha. Alors bane missiés et bane madames, tous les deux ti bizin alle pose bane questions avec Hazrat Aisha concernant zot Deen, et Hazrat Aisha (ra) ti ena le devoir en tant ki ene Ummul Momineen et gardienne de bane l’enseignements d’Allah pou donne bane détails couma pou vivre à tout l’Ummah (ki li missiés et madames), et li fine fer li toujours dans Pardah ; sois derrière ene voile ; kot missié ene côté, et li de l’autre côté, ou sois li ti habiller correctement et barré couma Allah fine instruire dans le Quran et li fine adresse bane missiés.

 

En plisse de sa, sa bane écrivains de l’occident là zot oublier pou mentionner ki baisse lizié li pas ene zaffaire étrange, et ki reserver zis pou bane madames. L’Histoire raconte nous couma le Saint Prophète Muhammad (saws) li pli modeste (et gagne honteux), même plisse ki bane filles vierges. Eski en tant ki ene missié, eski li pas ti possède la confiance de soi, ou bien eski li ti manque la conscience d’ene Messager d’Allah ? Pou commié létemps sa bane kalités écrivains là pou contigne répète et dire à haute voix sa bane raisonnement stupides ki zot ena là

 

De bane faits ki mo fine fek mentionner, li clair ki bane madames mal-guidés de l’Ouest pas fine élève zot bane statut et prestige mais au contraire zot fine moralement dégrader à cause zot fine alle trop en-dehors de limites ki ti prescrire pou zot, kot zot l’envie pou gagne liberté fine dépasse tout limites de la décence ; ene tels liberté ki fine tourne zot la l’esprit en-bas là-haut. L’effet pou porte le voile et observe le Pardah c’est ki li apporte la sécurité, la sauvegarde (de la vie et la chasteté), l’honneur et contentement. Bane vrais madames musulmanes, c’est zot ki amène ene la vie chaste, respectable, rempli de vertu, ene tel la vie ki donne zot beaucoup satisfaction ou lieu de insatisfaction et tristesse. L’Islam fine accorde zot ene foyer kot là-dans zot pou gagne contentement et amène ene la vie de paix. Zot libre de tous bane tracas et compétition avec bane z’hommes dans le domaine kot, zot bane madames pas bizin couma ene missié alle gagne sa tracas pou alle rode ene travail, ki li dans bane l’usine et business afin ki zot gagne zot la vie. L’Islam pas fine donne zot (bane madames) sa kalités tracas là. Alors kifer ou ou bizin alle mette tracas lors zot la tête ? De ce fait, bane madames musulmanes zot jouir d’ene la vie kot zot missiés ena le devoir pou respect zot et en plisse de sa zot jouir d’ene vrai la paix dans zot foyer. Sa la fièvre fort ki fine attrape bane madames et filles kot zot trouve zot ki zot bizin suive bane la mode et zot passions afin ki zot vivre ene la vie de plaisirs et de luxe, alors ene tels kalité la vie pareil (ki touche bane lézot madames), sa kalité la vie là pas affecter ene aucun cas ene vrai musulmane.

 

Islam li pas seulement ene vrai religion mais aussi ene l’ordre social, ki permette bane dimounes pou arrive à zot but dans gagne ene contentement et bon considération au niveau matériel dans sa le monde ici-bas là et pou prépare zot pou l’autre lémonde à travers la droiture et bane bons actions. Tous bane bénédictions de l’Islam zot pas séparer de la beauté de l’esprit et de force de caractère. L’Islam li ene guide extra solid en ce ki concerne la vie morale et li sauve so bane suivants pou pas tombe dans bane bassesses et pou pas tombe dans la dégradation morale. Au contraire, li permette ene dimoune pou atteindre vraie grandeur de caractère et aussi bane hauteurs de la vie spirituelle.

 

Dans la société occidentale, égalité entre missié-madame ti pé considérer comme veut dire ki l’homme et la femme pas zis egale au niveau statut morale, mais aussi égale en ce ki concerne bane droits humains, mais ki aussi la femme li aussi libre pou fer n’importe ki travail ki missié fer, et ki bane restrictions morale lors li (la femme) bizin diminuer pareil couma pou missié là (dans bane travails ki li faire).

 

Sa mauvais concept d’égalité là fine amène bane madames dans l’égarement et fine fer zot pas prend compte de zot bane fonctions naturels, kot c’est lors sa bane performances là ki dépanne l’existence de la race humaine et la civilisation. Li fine vine totalement absorbé dans so bane poursuites pour gagne liberté dans le domaine économique, politique et sociale. Astaire là ou trouve madames pé fer campagne électoral, pé travail dans bane bureaux et l’usine, pé fer compétition avec bane missiés pour atteindre bane buts commerciale et industriel, zot aussi dans le domaine de sport et bane exercices physiques, zot dans toutes kalité l’amusement, ki li dans bane clubs, lors bane plateau pé fer défilé de mode, chanter, danser, dans bane concerts de musique. Si nous guette bien, madames astaire partout dans tous domaines, dans tous la sauces. Zot tellement occuper astaire ki vine indifférent à zot bane responsabilités de femmes mariés. Azordi jour, prend soin de l’éducation et bon grandissement de zot bane zenfants et occupe zot foyer fine arrêter vine zot priorité. Mais seulement ena certains exceptions. Pas tout madames ki coumsa. Ena madames, tellement zot bane maris soulard ou irresponsable, alors c’est zot ki bizin occupe zot la caze et alle travail dehors pou nourri zot familles. Ici dans mo Khutba Jummah, c’est pas pou sa bane kalités madames là ki mo pé causer, mais bien pou la plupart de bane madames du monde entier ki fine prend sa le monde là comme ene terrain de jeu, kot zot fer saki zot envie, et zot même fer compétition avec bane missié pou arrive au plus haut lors l’échelle du succès matériel.

 

En plusse de sa, la femme moderne azordi jour fine développe ene dégout envers so bane responsabilités naturel, kot sa fine affecter le système familiale ki la baze de la civilisation. En résultat de sa, la vie familiale, lors ki depanne bon rendement d’ene missié dans so bane responsabilité, malheureusement sa pé bien vite disparaite dans l’Ouest (bane pays occidentales – l’Europe, l’Amérique etc.). Le lien sacré du mariage ki ene forme pratique de la coopération entre missié et madame dans rende service et fer le développement de bane civilisations, sa pé rapidement disparaite. Occupe so foyer et so mari et zenfants népli la priorité de la femme. En d’autres mots, madames astaire ki pé fer rôle mari dans la caze et zot pé commande zot mari et zot pé choisir pou zot-mêmes ene le monde de destruction au lieu ki, si zot ti reste la caze et préserve zot chasteté, alors zot vrai progrès ti pou trouve zot bane zenfants pé grandi avec bane bon cultures et bon manières, au lieu vine bane divoltaires et amène ene mauvais la vie. Astaire là aussi la population pé fer face ene crise à cause ena trop beaucoup l’emphase lors family planning kot astaire conseils bane femmes pou pas gagne beaucoup zenfants, kot ena préservatifs pou empêche gagne zenfants, l’avortement - destruction de fétus et zenfants ; ena même azordi jour kot parents pé touye zot bane zenfants ; ena même bane mamans ki vende zot bane tifilles pou fer la prostitution. Tous sa là fer au nom d’ene bien mauvais concept de l’égalité morale ; kan sa mauvais concept là fine établir entre les deux sexes (missiés-madames), alors définitivement sa fine créer ene égalité immorale (kot na pas ena aucaine respect de moralité) entre zot. Tous sa bane mauvais acts, rempli de péchés là ki ene temps ti mal vue par bane missié mêmes (kot zot pas ti tolère l’immoralité, et surtout ki zot bane madames gagne ene tels liberté excessifs), alors azordi jour, sa népli amène aucaine la honte ni pou zot, ni pou bane madames aussi. Tout est permis, et zot à l’aise dans vivre dans bane tels décadence !

 

Islam, dans so système fondamentale li prend compte le fait ki la femme aussi ene être humain ; et ki li ena ene l’âme pareil couma l’homme. Le Quran Shareef dire : « O dimoune, suive chemin ou Maitre qui fine créer ou à partir ene seul personne et fine créer ene compagne pou li à partir sa personne là-même, et Li fine répande (lors la terre) à partir sa deux personnes là boucou z’hommes avec femmes. Suive chemin Allah, car c’est par So grâce ki ou faire bane demandes l’un à l’autre. Respecter bane liens de sang (c-à-d, ou proche parent). Allah surveille ou tout létemps. » (4:2)

 

De ce fait, bane z’hommes et femmes zot dans ene certains limites égale ene envers l’autre dans zot l’origine, zot l’environnement et place kot zot vivre et aussi dans zot retour vers Allah, et alors tous les deux (missié-madame) zot gagne bane droits similaire et égale. L’Islam fine donne la femme le droit pou vivre so la vie dans ene façon correcte (pas malpropre), pou li recevoir l’honneur et pou hériter et vine propriétaire pareil couma bane z’hommes. La femme (surtout la femme vertueuse) li ene dimoune honorable et li pas permette pou n’importe ki sanlà pou trouve bane défauts dans li ou pou cause derrière so lédos (et dire bane mauvais kitchoses lors li). Personne pas permette pou espionne li ou ena la haine pou li zis à cause li ene femme. Sa c’est bane droits ki tous les deux, bane missiés et madames ena, kot na pas ena différentiation entre zot.

 

Alors, personne pas capave renier le fait ki comme bane êtres humains, l’homme et la femme zot égale. Tous les deux zot fer (ensam) la race humaine, et sakaine égale et bizin sakaine d’entre tous les deux pour arrive à sa but là (la procréation) et tous les deux (avec le mariage) zot forme ene seul personne (pareil couma mentionner dans verset Quran ki mo fine mentionner). Tous les deux ki créer la civilisation, et ensuite, c’est zot ki servi l’humanité (zot faire le Khidmaté-Khalq). Tous les deux fine recevoir d’Allah lékaire, l’esprit et le pouvoir de raisonnement, et tous les deux ena bane sentiments, bane désires et bane lézot l’instinct humains. Tous les deux zot bizin bane l’entrainement mentale et intellectuel et zot bizin l’éducation afin ki zot capave contribuer à bon déroulement et contentement de la société.

 

Bane missiés et madames zot aussi égale dans zot droits pou réalise zot bane besoins matériels dans le monde en incluant bane droits pareils pou tous les deux pou ena bane propriété lors zot noms (ki li héritage ou autrement) et tous les deux ena droits pou fer saki zot envie avec sa bane dibiens là. Le Quran Shareef dire : « Z’hommes gagne ene part de séki parents et proche parent laisser (comme héritage) et bane femmes aussi gagne ene part de séki parents et proche parent laisser, ki li tiguine ou boucou. Zot part fine fixer. » (4:8)

 

« ... Bane z’hommes pou gagne la part ki zot mériter, et bane femmes la part ki zot merité. Demande Allah So faveur ; Allah conne tout kitchose. » (4:33)

 

Islam occupe ene position unique kot li reconnaite statut indépendant économique de la femme et li donne li le droit pou ena bane biens lors so nom, et li servi li et jouir li couma li content, parski sa so droit sa, sans ki aucaine les autres dimounes (ki li ene gardien ou médiateur) mette zot boute néné là-dans. Pas zis là-dans ki so droit fine établir, mais aussi dans le plus important problème de so la vie, c’est-à-dire, dans so mariage et aussi dans so statut Independent. Dans l’Islam, li (la femme ou la fille vierge) pas capave être marier sans so consentement ; aucaine mariage pas valide ziska ki li accepter sa mariage là. Le Saint Prophète (saws) fine dire : Aucaine veuve pas bizin marier sans consulter li ; et aucaine vierge pas marier sans gagne so consentement, et so consentement c’est so silence.  (Bukhari & Muslim)

 

Saki mo fine dire li suffit pou réfute et prouve tous bane allégations fausse ki soi-disant l’Islam accorde la femme zis ene statut secondaire ou bien ki li gagne ene telle traitement kot li l’esclave de l’homme ou sois ki so rôle dans la vie, d’après l’Islam, pena aucaine l’importance ditout. Si tout sa bane allégations là ti vrai, alors l’Islam pas ti pou attache ene telle l’importance pou ki madame aller recherche la connaissance. Le fait ki l’Islam fine donne madames sa droit là, alors li ene preuve ki l’Islam li reconnaite le statut noble et honorable de la femme dans la vie, ki li dans lizié d’Allah, et aussi dans la société.

 

L’Islam zamais en faveur d’ene séclusion exagérer de la femme. La séclusion ou le système islamique du voile (Pardah) li définir comme enveloppe (déssamment) le corps de la tête au pieds, et li clair ki dans sa sense là, li pas incompatible avec le fait ki ene madame li alle endehors so la caze, particulièrement kan l’occasion demander, et kan li gagne consentement de so missié ou tuteur (pou alle dehors de so la caze, pour kit travail etc.) Ena cependant quelques restrictions à so bane mouvements couma mo ti mentionner avant, et sa c’est à cause de bane considération morale et aussi bien à cause ene fait ki d’habitude ignorer, ki madame so place légale kot li ena l’autorité et l’influence, c’est so propre la caze. Missié ena le devoir pou sorti dehors pou alle travail afin ki li capave occupe li-même, et occupe so madame-senfant ; et la femme li liberer d’ene tel responsabilité, et li reste à la maison afin pou veille lors amaanat ki so missié fine laisse lors so responsabilité kan li alle travail dehors ; et alors la femme li, li bizin accomplir so bane responsabilités, comme ene maman et ene épouse – sa c’est conception islamique de la relation entre les deux sexes (missié-madame). 

 

Maintenant le vrai Pardah de l’Islam, ensam avec le système sociale ki fine créer kot bane la lois en faveur de protection de Pardah li opérer li devant zot. Bane plusieurs piliers de sa système là li en harmonie avec pilier Pardah ki fine accorder l’homme (et la femme) aussi fine mette de l’avant. L’homme fine gagne bane faits scientifique lors quoi sa système sociale là li basé. Tous bane dimounes de bane différents religions capave examine sa bane faits là de près et zot capave cibler n’importe ki faiblesse, n’importe quoi ki pas correcte dans sa système là. Zot capave aussi considérer kot sa dans sa système là capave amène possiblement ene reforme seulement lors base scientifique, aparte bane tendances d’ene section particulier de bane dimounes. Mo certifier ki mo penser ki sa système là li basé lors bane même principes de la justice et de l’équité, kot ena ene balance et répartition égale de droits ; tous sa là trouver dans sa système là et li fonctionner correctement et ou pou trouve sa balance là aussi dans façon ki la terre, bane atomes, l’univers et le système solaire li opérer. Sa système là (le système islamique) li totalement liberer de bane excès et pena parti pris ki ene faiblesse inévitable dans travail de l’homme. Dimoune pas capave retourner et fer li vine pli correcte. Si li essaye fer zis ene ti changement là-dans en servant so pouvoirs intellectuels très limité, li pou débalance tous sa système (ki fine établir par Allah) au lieu de réforme li. Ki Allah (swt) béni zot tous pou comprend sa Khutba là ki li ene sujet bien bien important. Insha-Allah. Ameen.