|
بسم الله الرحمن الرحيم
Khutba Jummah
HAZRAT KHALIFATULLAH AL-MASSIH AL-MA’OUD
Munir Ahmad Azim
(08 Rajab 1432 Hijri)
(Résumé Khutba)
Après Salam, Hazrat Khalifatullah Al-Massih Al-Maoud fine commence so Khutba avec Tashahhud, Ta’uz, Surah Al Fatiha, et ensuite li fine dire:
اللّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ
‘Allaahu laa ‘ilaaha ‘illaa Huu. ‘Al-Hayyul-Qayyuum. Laa ta’-khuzuhuu sinatuww-wa laa nawm. Lahuu maa fissamaawaati wa maa fil-‘arz. Man-zallazii yashfa-‘u ‘indahuuu ‘illaa bi-‘iznih ? Ya’-lamu maa bayna ‘aydiihim wa maa khalfahum. Wa laa yu-hiituuna bi-shay-‘im-min ‘ilmihiii ‘illaa bimaa shaaa’. Wa-si-‘a Kursiyyu-hus-Samaawaa-ti wal ‘arz ; wa laa ya-‘uudu-huu hifzuhumaa wa Huwal ‘Aliyyul-‘Aziim.
« Allah, pas ena ene l’autre Bondié à part Li. Li vivant. Li là pou toujours. Ni assoupissement, ni sommeil affecter Li. Tout lors bane léciel et lors la terre pou Li. Ki sanlà qui pou capave intercède auprès Li excepté par So permission? Li conne zot présent et zot futur, mais zot pas capave saisi nannié de So connaissance, excepté séki Li oulé. So trône étende lors bane léciel et la terre et So surveillance lors sa deux choses là pas fatigue Li. Li-même plus haut, plus grand. » (2 : 256)
Ayat-ul-Qursi, li ene parmi bane plus grand verset ki Allah fine faire révéler lors So prophète (saws) ki trouve dans Surah Al-Baqarah, Verset 256. Sa verset là fine dessane dans la nuit et Rassoûlullâh (saws) ti ordonne Zayd bin Thabît (ra) pour écrire sa verset là.
Dans ene Hadith, rapporté par Hazrat Anas (ra) rapporté ki Rassoûlullâh (saws) ti demande ene dimoune : « Eski to marié ? » Sahabi là dire : « Non, pas ena nannié kot moi pour mo marié. » Rassoûlullâh (saws) dire : « Eski pas ena (Qul Huwallâhu Ahad) Surah Al-Ikhlaas avec toi ? » Sahabi là dire : « Oui ». Rassoûlullâh (saws) dire : « (Li représente) ¼ Quran. » Rassoûlullâh (saws) dire : « Eski pas ena (Qul Yaa Ayyuhal Kaafiroun) Surah Al-Kaafiroun avec toi ? » Sahabi là dire : « Oui ». Rassoûlullâh (saws) dire : « Li représente ¼ Quran. » Rassoûlullâh (saws) dire : « Eski pas ena (Izaa Zoulzilat) Surah Az-Zalzalah avec toi ? » Sahabi là dire : « Oui ». Rassoûlullâh (saws) dire : « Li représente ¼ Quran. » Rassoûlullâh (saws) dire : « Eski pas ena (Izaa jaa’a Nasrullâh) Surah An-Nasr avec toi ? » Sahabi là dire : « Oui ». Rassoûlullâh (saws) dire : « Li représente ¼ Quran. » Rassoûlullâh (saws) dire : « Eski pas ena Ayat-ul-Qursi avec toi ? » Sahabi là dire : « Oui ». Rassoûlullâh (saws) dire : « Li représente ¼ Quran. Alors marié (li dire sa trois fois)! » (Ahmad)
Dans ene l’autre Hadith rapporté par Hazrat Hassan bin Ali (ra) ki Hazrat Muhammad (saws) fine dire : « Celui ki lire Ayat-ul-Qursi après sak Namaz Farz, li pour reste dans protection Allah ziska prochain Namaz.
Ibn Abbas (ra) rapporter ki Hazrat Muhammad (saws) fine dire : « Celui ki lire Ayat-ul-Qursi après sak Namaz Farz, Allah pour accorde li ene lékaire reconnaissant, action de bane véridiques, Allah pour verse so Rahmah dans so côté droite, et personne pas pou capave empêche-li rentre dans Jannat (Paradis), excepté so la mort, alors li pour rentre là-dans (Jannat).
Ibn Massood (ra) dire ki Hazrat Muhammad (saws) dire pas ena nannié dans le ciel et la terre, ni la plaine, ni montagne plus grand ki Ayat-ul-Qursi et Ibn Massood (ra) continuer rapporté ki ene dimoune ti dire : « Ya Rassoûlullâh (saws), enseigne moi ene kitchose ki Allah pour faire moi gagne profit par sa. » Rassoûlullâh (saws) dire : « Lire Ayat-ul-Qursi, li pour préserve toi, to descendant, et li pour préserve to la caze, ziska habitation autours to la caze. »
Et dans ene l’autre Hadith, Hazrat Muhammad (saws) dire : « Celui ki lire Ayat-ul-Qursi et la fin Surah Al-Baqarah kan li fine toucher par ene malheur, Allah donne li secours. » Ena encore beaucoup Hadiths ki cause lors l’importance lire Ayat-ul-Qursi.
Maintenant mo donne certain explication de sa bane versets ki mo fine lire là :
« Allah, pas ena ene l’autre Bondié à part Li. »
Allah, li ene nom ki appartenir seulement au Dieu Unique, sans partenaire, dans la main de Qui nous la vie, nous la mort trouver et c’est Li-même nous Créateur et Créateur de les ciels et la terre et toute la création couma nous conner et aussi saki nous pas conner, ki caché dans So secret. De ce fait personne d’autres pas gagne droit garde sa nom-là. Même dans Ayyâm-e-Jahiliyyah (bane jours de l’ignorance), bane Arabes ti pé servi le mot Allah pour appelle Allah. Couma mo fine dire Allah Li le Créateur, Celui ki fine créer tout kitchoses. Nous tous dépanne de lors Li sans ki Li (Allah) dépanne lors quelqu’un. Allah Li Unique – pas ena personne ki associé avec Li. Personne pas semblable à Li, pas ressembler Li, ni dans So qualité et ni dans So action. Allah fine créer Insan (l’homme). Li fine envoye bane messagers et les livres pour guide dimoune vers le chemin droit et le succès.
« Pas ena aucaine Dieu apart Li » - Sa c’est le mot du Tawheed (l’unicité d’Allah); et tous bane prophètes fine appelle dimounes vers sa même croyance ki Allah Li seul et Li pas ena aucaine partenaire. Allah dire dans Quran :
« Et zot Bon Dieu, Li ene seul Dieu. Pas ena aucaine dieu apart Li, le Clément, le Tout-Miséricordieux. » (Ch.2 V.164)
Pas ena personne associé à Allah. Tous Ibaadat (acte d’adoration) ki nous faire, li zis pour plaire Allah. Allah Li seul, Li unique et Li tout seul ki mérite tous adoration. Apart Allah, personne pas mérite Ibaadat telle comme bane z’arbres, z’étoiles, soleil, la lune, le roi ou autre choses. Allah dire dans Quran :
« Sans doute, Celui ki mette (ki que ce soit) associé avec Allah, alors Allah fine interdit paradis lors li, et so place c’est l’enfer. » (Ch.5 V.73)
Alors celui ki associé ene l’autre à Allah, li fine commette Shirk et so place li l’enfer, parski c’est zis Allah ki mérite tous Ibaadat. Shirk li ene plus grand péchés auprès d’Allah. Allah dire dans Quran :
« Sans doute, Shirk, li ene plus grand injustice. » (Ch.31 V.14)
« Li vivant (par Li-même). Li là pou toujours (comme Soutien pour les autres). »
Allah Li vivant, Celui ki jamais la mort pas capave touche li. Allah Li vivant pour tous les temps et éternel. Li subsiste lors Li-même. Allah Li ene soutien pour So bane créatures. Sans ki Li bizin kit soutien pour Li-même. Allah Li organise tout kitchoses pour So bane créatures. Allah Li ena connaissance lors tous kitchoses et nannié pas capave cachiette de Li. Allah dire :
« Eski Li (Allah) ki surveille tous bane actions de sak dimoune et li conne tous séki li fine gagner. » (Ch.13 V.34)
« Et confié lors sa Vivant (Allah) ki jamais Li pour mort. » (Ch.25 V.59)
« Ni assoupissement, ni sommeil affecter Li. »
Allah, Li pas assoupi, ni sommeil prend Li et ni Li dormi. Ene dimoune li assoupi kan li senti li fatigué. Mais Allah Li pas fatigué, ni Li assoupi et Allah pas faire aucaine action comme So bane créatures. Pas ena personne égale à Allah même dans So action. Alors la question assoupi ou sommeil pas touche Allah du tout ; Allah, Li parfait. Allah fine faire sommeil pour So bane créatures afin ki zot gagne repos. Allah dire : « Et nous fine faire zot sommeil comme ene kitchose pour repos. » (Ch.78 V.10)
Hazrat Muhammad (saws) dire : « Sans doute, Allah pas dormi et Li pas ena aucaine utilité pour dormi. » (Muslim)
« Tout lors bane léciel et lors la terre pou Li. »
Allah, Li-même Maître tous kitchoses ki exister dans bane les ciels et lors la terre. Allah ena contrôle lors tout kitchoses ki Li fine créer dans bane sept les ciels et la terre. Allah fine créer tous séki dans les ciels et la terre pour faire So Ibaadat. Même nous l’âme ki trouve dans sa le corps là appartenir à Allah ; nannié na pas pour nous lors sa la terre là. C’est l’homme ki tappe so l’estomac et dire sa pour moi ; moi mo ena beaucoup dibiens, beaucoup l’argent, beaucoup zenfants etc. etc.
Kan la mort arriver, ki ou trouver ? Tous bizin quitte là-même, parski li pas ti pou ou sa, li ti ene amaanat (dépôt) dans ou la main ki Allah fine donne ou pour ene certain temps. Kan ou mort, linge lors ou même pas pour alle avec ou ; pou enveloppe ou avec la toile blanc et enterre ou 6 pieds en bas la terre.
« Ki sanlà qui pou capave intercède auprès Li excepté par So permission? »
Dans sa phrase-là Allah pé défier tous, pour montrer So pouvoir et So l’autorité en disant ki sanlà capave faire Shafa’ah (intercession – intercéder) auprès de Li jour Qayamat ? Ensuite Li dire : « excepté par So permission ». Kan Allah fine dire sa, li veut dire pour ena permission pour Shafa’ah jour Qayamat, sinon Allah (swt) pas ti pour dire « excepté par So permission. » Allah dire dans Quran :
« Et bane là pas pour intercède en faveur personne, mais pour séki Li (Allah) oulé. » (Ch.21 V.29)
Jour Qayamat personne pas pour ena ene telle darjah (stage) comme Hazrat Muhammad (saws). So stage pour plus haute ki tous bane créatures car c’est li-même ki pli meilleur créature ki Allah fine créer. So tour pour Shafa’ah pour même avant tous prophètes. Allah ena tous pouvoir pour choisir le Shaafi’ (Celui ki pour faire Shafa’ah et sa fine confirmé par plusieurs Hadiths, ki Hazrat Muhammad (saws) pour faire Shafa’ah avant zot tous, même avant tous prophètes et so Shafa’ah pour accepter.
Hazrat Abu Hurairah (ra) rapporté :
« Nous ti amène la viande pour Hazrat Muhammad (saws). Li ti prend z’épaule, ene partie ki li ti pli préféré ; li fine morde ene morceau là-dans et li dire : « Mo chef tous bane dimounes jour Qayamat. Zot conner ki faire sa ? Allah pour rassembler bane premiers et bane derniers lors ene seul niveau de la terre pour ki ene annonciateur pour entende bane là et so vue pour trouve tous. Soleil pour approche avec bane là (bane dimounes). Bane dimoune pour dans l’angoisse et difficulté et zot pas pour capave supporté. Bane dimounes pour dire entre zot même : Eski zot pas pé trouver dans ki l’état nous été ? Eski zot pas pé trouve quelqu’un pour faire Shafa’ah pour zot auprès de zot Rab ? Alors ene partie bane dimounes pour dire : Alle guette Adam (as).
Bane là pour vine kot Adam (as) et zot pour dire li : « To papa bane dimounes ; Allah fine créer toi par So pouvoir, et Li fine soufflé Ruh dans toi et Li ti ordonne bane anges faire to Sajdah, faire Shafa’ah pour nous auprès de to Rab, to pas pé trouver dans ki l’état nous été ? To pas pé trouver kot nous fine arrivé ? Alors Adam (as) pour dire : Mo Rab fine éprouve ene telle colère aujourd’hui ki jamais Li pas fine gagner auparavant et Li pas pour gagner ene telle colère pareil dans l’avenir. Li ti ordonne moi (pas mange) depuis ene z’arbre et mo ti désobéir Li. Mo bizin guette mo-même d’abord (3 fois) ; Alle kot ene l’autre. Alle kot Nuh (as).
Tous pour alle kot Hazrat Nuh (as) et bane là pour dire : « O Nuh (as) ! To premier Rassool ki Allah fine envoye vers dimoune, et Li (Allah) fine appelle toi le serviteur reconnaissant, alors intercède dans nous faveur auprès de to Rab. Nuh (as) pour dire : « Mo Rab fine éprouve ene colère aujourd’hui ki jamais Li fine en colère avant et jamais Li pour en colère comme sa dans l’avenir. Mo fine invoke Allah contre mo propre communauté. Alle guette Ibrahim (as) et zot pou dire : O Ibrahim (as) ! To Allah So Prophète et So camarade ki Li fine choisir toi en préférence pour bane habitant lors la terre. Faire Shafa’ah pour nous auprès to Rab. Hazrat Ibrahim (as) pour dire pareil couma Adam et Nuh (as) fine dire (kot li pou dire li fine dire 3 mensonges dans so la vie) et Li dire zot alle kot Moussa (as).
Zot tous alle kot Hazrat Moussa (as) et zot dire : O Moussa (as) ! To messager d’Allah. Li fine choisir toi en préférence pour transmette So message et So parole, faire Shafa’ah pour nous auprès to Rab. Hazrat Moussa (as) pour donne zot même réponse lors la colère d’Allah aujourd’hui et dans l’avenir et (li dire ki li fine touye ene dimoune et alors) li dire zot alle kot Issa (as).
Zot vine kot Hazrat Issa (as) et zot dire : O Issa (as) ! To prophète d’Allah, to fine recevoir le Ruh-il-Qouddous et to ti cause avec bane dimounes kan to ti encore dans berceau. Faire Shafa’ah pour nous auprès to Rab. Li aussi pour donne même réponse lors la colère d’Allah aujourd’hui et dans l’avenir et Issa (as) dire zot alle kot Muhammad (saws).
Tous pour alle kot Rassoûlullâh (saws) et bane là pour dire : O Muhammad (saws) ! To Messager d’Allah et le sceau de prophète. Allah fine pardonne to bane (péchés) antérieurs et futures, faire Shafa’ah pour nous auprès to Rab. Hazrat Muhammad (saws) dire : « Mo pou aller et mo pou vine enba Arsh (Trône) et mo pour faire Sajdah pour mo Rab Celui ki possède tout puissance et gloire. Allah pour faire moi apprane bane formules de louanges et compliment ki Li pas fine enseigne personne avant moi, et ensuite pour dire moi : « O Muhammad (saws) ! Lève to la tête et demander ; Mo pou accorde toi. Faire Shafa’ah, to pour être accepter.
Rassoûlullâh (saws) dire : Alors mo pour lève mo la tête et mo pour dire : « O Rab, mo Ummah ! O Rab ! Mo Ummah ! O Rab ! Mo Ummah ! Quelqu’un pou dire : O Muhammad (saws) ! Faire bane ki pas ena compte pour rendé rentre par la porte droit, ene la porte dans Jannat. Bane là pour bane associé ki pour rentre par bane l’autre la porte. Ensuite li pour dire : Serment lors Celui ki mo la vie dans So capacité, distance ki sépare les deux vantaux (battants) de la porte Jannat li égale à saki sépare Makkah et Himiar ou celui ki sépare Makkah et Basrah. » (Bukhari)
Dans ene l’autre Hadith Hazrat Anas (ra) rapporter ki li fine entende Rassoûlullâh (saws) dire : « Jour Qayamat, mo pour faire Shafa’ah et mo pou dire : « O mo Rab ! Faire bane ki dans zot le cœur ena ene poid d’ene la grain moutarde so Iman rentre dans Jannat, et bane là pour rentre (dans Jannat). » Puis li (saws) pour dire : « O Rab ! Faire bane ki dans zot le cœur ena moinse Iman (ki la grain la moutarde) rentre dans Jannat. » (Bukhari)
Hazrat Anas (ra) dire : « Couma dire mo encore pé trouve Rassoûlullâh (saws) faire signe pour sa avec so les doigts. »
« Li conne zot présent et zot futur... »
Séki devant bane là, c’est Duniya (sa le monde temporaire là) et séki derrière bane là c’est Aakhirat (l’autre le monde). Allah Li ena connaissance lors tout kitchoses ki fine arrivé avant, séki pé arriver et séki pou arriver dans Aakhirat.
« ... zot pas capave saisi nannié de So connaissance, excepté séki Li oulé. »
Bane créatures d’Allah, pas conne nannié depuis Allah So connaissance excepter pour séki Allah oulé Li donner, séki Allah oulé faire So créature conne Li faire li conné. Allah fine faire nous conne dans le passé et dans le future à travers So prophète (saws) et Li fine faire nous conne quantité Li envie. Allah fine informe nous concernant Sidrat-ul-Muntaha, So Arsh, bane anges et bane kitchoses du Ghayb. Pour séki Allah oulé Li fine informe li plus et pour séki Li oulé Li informe li moinse.
« So trône étende lors bane léciel et la terre... »
Les ciels et la terre li contenu dans le Trône d’Allah. Al-Qursi li réfère à soit Allah So connaissance ou So pouvoir ou so Arsh. Allah ti exister kan pas ti ena aucaine place. Alors Li fine créer Al-Arsh et Al-Qursi et Li pas bizin nannié comme place. Et après Li fine créer la place. Li exister (sans place) pareil couma Li ti exister avant la création. Allah Li pas bizin ena place et ni Li bizin Arsh ou Qursi comme ene place.
« ... et So surveillance lors sa deux choses là pas fatigue Li. »
Li pas lourd lors Allah pour préserve la terre et les ciels. Allah, Li le Créateur et Li pas fatigué pour contrôle tous So créatures. Allah Li puissant lors tout kitchoses.
« Li-même plus haut, plus grand. »
Allah plus haut veut dire ki Allah Li ena ene rang et stage bien haut et pour montrer ki Allah Li plus supérieur ki tous et Allah plus Grand. « Al-Aliyyu » veut dire élevé dans grandeur et rang et pas so place là-haut, parski Allah Li exempté de tout localisation. Donc, Allah Li pas bizin ene place ou Li pas dans ene direction. Séki nous empranne, ki Allah Li pas localizé dans ene place ki So bane créatures été. Allah Li haut par So Swifah (attribut). Allah dire :
« Et gloire d’Allah plus haut. » (Ch.16 V.61)
Aucaine place pas contenir Allah et le temps pas passé lors Allah. Allah avec So bane Swifât (attributs), Li existé toujours et Li pou exister pour toujours. Li pas ena aucaine commencement et ni la fin.
Apart Allah, tout kitchoses ena ene commencement et la fin, ene quantité, ene limite, ene poid, ene mesure, ene dimension, ene direction, ene épaisseur, ene largueur, ene longueur etc.
Allah Li parfait de tous sa bane kitchoses là. Li (Allah) reste comment Li été avant la création, sans aucaine changement et sans aucaine évolution et Li pour reste couma Li ti été pour toujours. Allah Li pas ena ene place aussi. Li pas permette aussi pour dire ki Allah partout. Oui, n’importe kot nous été, nous prié Li, nous invoque Li, Li écoute, entende nous l’appelle à Li.
En terminant, mo fine essaye par la grâce d’Allah explique l’importance et valeur Ayat-ul-Qursi d’après Quran et Hadiths, kot sa bane explications là pas trouve dans mo Al-Azim Tafsir-ul-Quran et li (Ayat-ul-Qursi) ene parmi bane plus meilleur Ayat (verset) dans Al-Quran (le Quran) kot Allah fine explique concernant So grandeur, So l’autorité, et So bane les autres attributs. Ene Ayat ki ena beaucoup vertus pour bane ki comprend et lire li. Insha-Allah ki sakaine parmi nous lire souvent le Ayat-ul-Qursi, dans zot la vie de tous les jours. Ameen.
Annonce : 1. Ene phénomène étonnant fine arriver sa semaine (Mardi le 7 Juin) là. Soleil fine émette ene tel radiation par ene explosion difé, ki bane scientistes fine dire ki zamais auparavant fine gagne ene tel explosion, kot li pli fort ki saki soleil fine emette en 2006 ; et alors sa capave gagne bane l’effet dévastatrice lors le monde en forme de plus de destruction (bane calamités).
2. Fine ena aussi dans Haïti ene grand inondation depuis Lundi 6 Juin, kot fine fer un peu plus ki ene vingtaine de morts. Sa pays là depuis le 12 Janvier 2010 ti toucher par ene tremblement de terre terrible kot fine fer des milliers de morts, et de sans-abris, kot l’économie fine vine à genou. En plus de sa, dans Octobre 2010, Haiti ti touché par choléra et ziska azordi jour, sa épidémie là fine fer plisse ki 800 victimes, et plisse ki 10,000 fine bizin hospitalisé.
3. Inondation fine aussi touche ene l’autre pays : la République Dominicaine et fine ena plusieurs tremblements de terre dans différents pays, mais malgré zot dans les environ de Magnitude 3-4, mais tous sa là bizin fer nous, l’homme prend conscience ki tous sa bane calamités là pas pé arriver coumsa même. Kan eski zot pou arrête dormi et prend conscience le fait ki ena ene sel Bondié pou prié, kot zot salut et survie trouve dans So la main ? Ki Allah aide l’humanité pou prend conscience de zot devoir envers Li (Allah), et ki zot tourne vers Li seul en adoration et zot réforme zot conduite dans ene telle façon ki Allah satisfait avec zot, et zot aussi zot satisfait avec Allah. Insha-Allah, Ameen. |
