بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

09 Septembre 2011  ~

 

(10 Shawwal 1432 de l’Hégire)

 

(Résumé Khutba)

 

Après Salam, Hazrat Khalifatullah fine commence so Khutba avec Tashahhud, Tauz, Surah Al Fatiha, et ensuite li fine dire:

 

 

وَاعْتَصِمُواْ بِحَبْلِ اللّهِ جَمِيعًا وَلاَ تَفَرَّقُواْ وَاذْكُرُواْ نِعْمَتَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىَ شَفَا حُفْرَةٍ مِّنَ النَّارِ فَأَنقَذَكُم مِّنْهَا كَذَلِكَ يُبَيِّنُ اللّهُ لَكُمْ آيَاتِهِ لَعَلَّكُمْ تَهْتَدُونَ ۝

 

Wa’-tasimuu bi-Hablil-laahi jamii-‘aww wa laa tafar-raquu. Waz-kuruu ni’-ma-tallaahi ‘alaykum  ‘iz kuntum ‘a’-daaa-‘an fa ‘al-lafa bayna quluubikum fa-‘asbahtum bi-ni’-matihiii ‘ikhwaanaa; wa kuntum ‘alaa shafaa hufratim-mi-nan-naari fa-‘anqazakum minhaa. Kazaa lika yu-bayyinul-laahu lakum ‘Aayaati-hii la-‘al-lakum tahtaduun.

 

Attrape la corde d’Allah fort, tout dimoune ensemble, et pas cause division parmi ou. Rappler faveur ki Allah fine accorde ou. Ou ti l’ennemis et Allah fine mette l’acorité dans ou lé cœur et ou fine vine frères par So grâce. Ou ti lors bord difé et Li fine sape ou depuis là-dans. Coumsa Allah explique ou So verset, afin ki ou trouve bon chemin. (3 : 104)

 

Sa verset de ‘Attrape la corde d’Allah fort, tout dimoune ensemble’ là, ena deux interprétations. C’est pourquoi nous bizin prend tous les deux en considération.

 

Premièrement reste avec Jamaat, ensuite écoute le Imaam. Maintenant sa zaffaire de écoute le Imaam là c’est bane Ahmadi ki fine traduire sa dans zot façon pou dire ki sa Imaam là c’est le Khalifa (élu par l’homme). Mais en fait, pé faire référence avec Imaam de l’épok kot Hazrat Muhammad (saws) fine prophétiser ki à la tête de chaque siècle ene Mujaddid pou vini (ici Mujaddid, c’est réformateur)  et Jamaat ki fine mentionner, c’est sa Jamaat kot ena sa Mujaddid ki fine vini de coté d’Allah là.

 

Ene Hadith dans Bukhari ena connexion avec sa sujet là, kot Hazrat Abu Moosa Ashari (ra) rapporter ki li fine tanne Hazrat Muhammad (saws) dire: « Mo l’exemple et l’exemple de bane zaffaires ki Allah fine donne moi et fine envoye moi, li pareil couma ene dimoune (Messager d’Allah) ki vini avec l’ordre d’Allah, alle vers so peuple et fine dire so peuple ki avec mo lizié mo fine trouve l’armée de bane l’ennemis et mo fine vine averti zot clairement.  Alors sauve zot. À ce moment là quelque dimounes fine écoute li et le soir même zot fine sauver, et prend précaution ziska zis zot la vie népli en danger, tandis ki ene l’autre groupe parmi zot pas croire li (le Messager d’Allah) et reste emplace dans zot la caze ziska le lendemain matin kan bane l’armée (de bane l’ennemies) saisir zot, touye zot et ruine zot complètement... »

 

Li pareil comment l’histoire de Hazrat Loot (as). Li ti fine averti clairement so peuple, mais fine ena quelque dimounes même ki fine écoute li et le soir zot fine quitte l’endroit zot fine aller. Mais le reste du peuple pas fine porte aucun attention à séki fine dire zot et quelque dimounes fine dire ki sa c’est ene menteur sa, pas bizin nous aller; et reste dans nous place et effectivement zot fine reste dans zot place. Finalement le lendemain matin, l’armée de bane l’ennemis fine vini et fine détruire zot.

 

Maintenant en connexion avec Hazrat Muhammad (saws), li (saws) ti averti so peuple, ki mo pé trouve ene l’armée de bane l’ennemies. Quoi ki l’armée de bane l’ennemies ti bien beaucoup, mais Allah fine fer so peuple trouve sa bane l’ennemies là comme peu, et, par So grâce immense, Li (Allah) fine fer dessane bane l’armée de bane anges pou combatte dans rang de bane croyants afin pou donne bane croyants courage pou la guerre et remporte la victoire. Alors, sa bane croyants là pas fine trouve l’armée de bane l’ennemies, mais zot fine trouve l’armée de bane anges ki fine dessane comme l’ennemies de zot bane l’ennemies pou fini zot (sa bane l’ennemies là). Si bane croyants ti trouve le grand nombre de bane l’ennemies, alors zot ti pou perdi courage, mais Allah fine fer So prophète (saws) trouve le nombre de bane l’ennemies comme peu et par sa Allah donne Li et bane musulmans courage pou fer face l’ennemies ki ti en grand nombre.

 

Donc n’importe quand bane l’ennemis fine détruire, c’était en fait l’armée de bane anges ki fine détruire zot. Sinon bane musulmans ki ti âgés et ti pé la guerre là, kot zot ti pou capave ena sa la force là pou détruire sa bane ennemis puissants la ?

 

En plisse de sa, sa l’armée ki Hazrat Muhammad (saws) pé causer là, c’est l’armée de bane anges à propos duquel fine faire promesse dans le Quran plusieurs fois, kot bane anges dessane pou détruire bane peuple ki fine bafouer l’enseignement du prophète d’Allah. Sa c’est à travers ene Envoyé d’Allah même (et fer li donne bane avertissements), kot Allah (swt) envoye So serviteur choisi et Li donne li bane l’instruction et kot zot (bane messagers d’Allah) vini et donne sa bane l’instruction divine là à bane dimounes, à bane peuples.

 

C’est seulement avec la venue d’ene messager d’Allah ki bane l’armée de bane anges descende kot ou lire dans Quran, Allah (swt) cause l’armée de bane anges ensemble avec So serviteur choisi. Pas fine mentionne bane Imaam ki à la tête de chaque Jamaat, ni ene quelqu’un ki fine voté par l’homme et fine mette li là couma zot Imaam. Pas sa ki pé faire référence ici. Coumsa commié Imaam ena à travers le monde et commié Jamaat ena dans l’Islam et zot tous pé prend zot plus supérieur ki l’autre Jamaat là ? Eski sa bane Imaam là zot fine fini avec le Ruh-il-Qouddouss (bane Imaams ki divinement guidés) ? Eski tous sa bane Imaams là capave dire ki Allah fine élève zot comme Imaam de sa l’épok la et zot fine vini comme ene réformateur et zot recevoir révélation divine ? Eski sa Jamaat ki fine mentionné là c’est Jamaat ki sak Imaam occupé ki pé faire référence?

 

Non, si ou comprend sa bien ki dans le peuple de Loot (as) aussi sa même bane zaffaires ti arriver. Bane anges ti vini pou donne bane punitions mais zot fine change couleur de sa bane punitions là, alors ki dans l’épok de Hazrat Muhammad (saws) punition là ti ena ene lotte couleur. Allah faire sa bane zaffaires là vine vrai. Li pas possible ki quand ene avertisseur vini et ki bane dimounes pas écoute li, et Allah pas envoye So punition ! Définitivement punition là pou vini. Pas pou saper avec sa !

 

Hazrat Muhammad (saws) dire dans sa Hadith ki mo fine mentionner la haut là (c.à.d dans Bukhari)

 

« Sa même l’exemple pou bane ki fine écoute moi et pou bane dimounes ki fine désobéir moi et pas fine écoute mo l’ordre, pou zot aussi ena sa même l’exemple de destruction la. »

 

Nous aussi pé averti bane opposants du Jamaat Ul Sahih Al Islam, ena ene ki fine vine Maurice pou passe vacance ici avec so famille. Non, au lieu sa, li pé fer campagne contre moi et tous séki suive moi, ki pas bizin fer nous Salaam, et séki fine faire nous Salaam bizin alle faire Tauba ; Tauba (repentir) avec qui, mo demande li ? « Passe to vacance bien avec to famille, en tranquillité, ki to pas gagne aucun humiliation de côté d’Allah! Attention to venue dans Maurice ti nek pou fer nous trouve to humiliation. Prend précaution pou to pas gagne humiliation. Pas défier Allah et So Messager, parski l’armée de bane anges ensam avec le Messager d’Allah pou réduire en poussière tous bane l’ennemies ki rode fini la vérité, humilier le Messager et la religion d’Allah ! » 

 

L’autre ena Moollah Ahmadi dans Kerala, Muhammad Ismail pé dire ki péna manifestation divine ici dans Maurice ; li dire ki ena dimoune dépi Qadian fine vine Maurice et zot pas fine trouve aucun manifestation divine. Zot fine trouve zis manifestation fraudeur et magouillère dans centre Ahmadiyya à Maurice, mais seulement zot fine garde sa l’information là dans zot poche et zot dévier l’attention et fer fausseté vine la vérité et la vérité vine mensonge. Voilà bane pires Mollahs de sa l’épok là (ki fine prophétiser par le Saint Prophète (saws)!

 

Si ou fine vine Maurice, bane opposant Jamaat Ul Sahih Al Islam pé promener ou, amène la mer, diner lors diner, déjeuner, breakfast partout kot bane missiés là. Bé kot ou trouve manifestation divine. Ou lizié fine fermer avec manger-boire, et alle promener partout. Ou fine trouve zis disable partout. Ou voyage tous sa là, ou vine Maurice pou trouve manifestation divine, alors ou pas vine kot sa la fontaine ki Allah (swt) pé déverse So de l’eau pure là ? Si ou ti intéresser pou conne manifestation divine, ou ti bizin intéresse ou pou vine kot la fontaine de l’eau pure là, si vraiment ou soif spirituellement! Mais malheureusement ou fine intéresse ou seulement avec saki matériel.

 

Ou assizer ensemble avec bane opposants manifestation divine ; zot pé mettre ou dans l’amusement mondaine, kot sa bane dimounes ki lors zot lizié ena ene voile là, dans zot zoreille ena diplon et le cœur fine vine dur couma ferraille et fine vine noir. Eski bane là pou dire ou, ki oui ena manifestation divine dans Maurice. Bane l’ennemis d’ene prophète, ki zot pou causer ? Zot pou cause bane causer n’importe contre sa dimoune ki Allah fine envoyer là ! Eski ou croire zot pou dire de bon pou li ? Bé si zot dire de bon, zot ti bizin trouve zot ensemble avec sa dimoune ki Allah (swt) fine envoyer là et zot ti bizin dans ene Jamaat kot ena manifestation divine.

 

Ki opposant de tous bane prophète fine dire quand ene prophète fine vini ? Zot dire li ene menteur, fou, etc. Zot mettre tout sorte kalité blâmes lors li et lors bane ki pé suivre li. C’est sa bane kalité dimounes ki Allah (swt) fine dire dans Quran, ki c’est zot-même ki barre les autres dans le droit chemin et c’est zot même ki faire désordre et quand dire zot ki zot pé faire désordre, zot dire ‘Au contraire, nous pé mettre l’ordre’.  

 

Voilà, ou fine croire zot couma dire parole l’évangile fine descende et sans aucaine preuve et aucaine argument solide ou aller, ou aussi alle répande sa bane mauvais causer là dans Qadian et dans l’Inde et Kerala pou empêche bane les zot croire dans sa vérité là et ou fine baze ou lors bane mensonges et ou fine alle répande sa mensonge là partout et les autres aussi prend sa mensonge là répande sa pou barre bane les autres dimounes pou reconnaitre sa vérité là.

 

Ena ene ki dans so Khutba Jummah ki croire ki ene Messager d’Allah li bizin prend l’ordre avec li et so Managing Committee. Astaire là ki li gagne problème avec so Managing Committee ki li dire, ki li pas prend l’ordre personne, so l’ordre seulement vine d’Allah. Maintenant li causer ki bizin obéir ene Imaam ki vine de côté d’Allah, tandis ki li-même li pas fine tini so Bai’at avec Allah et So Messager Choisi ki fine vine pou tous bane religions, pas zis pou ene Jamaat ! Et li ena le toupé, l’audace pou li dire ki c’est moi et mo bane suivants fine aller, fine abandonne zot, fine abandonne la manifestation divine. Non... Li oublier tous bane révélations ki li fine noté dépi commencement Manifestation Divine, et kot li-même kan li fine demande Allah guidance pou conner si pas Munir Azim tous so bane révélations vrais,  alors Allah fine donne li-même ene révélations ki tous mo bane révélations divine zot vrais, ki pas ena aucun doute là-dans, et c’est li-même ki fine deboute lors micro pou convaincre bane dimounes pou reconnaite le Choisi d’Allah de sa l’époque là. Li même li fine dire, ki même si li ena pou deboute kot Ka’aba Shareef pou attester mo véracité, alors sans aucun doute li pou fer li ! Azordi Allah fine tester li avec so bane propres révélations ki li gagner. Mais mo fer duah pou li, ki ene jour na pas ene jour, ki li trouve réalisation de bane promesses d’Allah ki Allah fine fer moi et li réalise so erreur kot li reconnaite la véracité de sa humble Messager d’Allah là avant ki li trop tard pou li. Allah pé donne li bane révélations pou li comprend, mais li pas pé comprend même. Li fine dire dans so Khutba Eid-ul-Fitr sa l’année là ki c’est moi ki fine délaisse mo bane responsabilités. Sa zamais, à aucun moment mo pas fine délaisse mo bane responsabilités. Au contraire, saki Allah fine dire moi fer, mo fine fer. Mo pé seulement obéir mo Créateur, Celui ki fine choisir moi, mais pas bane créatures ! Eski zot conner ki à chaque fois ene prophète d’Allah vini, nul n’est prophète dans so pays ? Li gagne problèmes aussi avec bane ki autour de li-mêmes, pas zis avec bane opposants mais aussi avec bane ki soi-disants ti croire.

 

Pense bien, zot bane fouteurs désordre ; la vérité pou triompher, mensonge pou disparaître. Allah (swt) pou perfection sa vérité là plisse et sa mensonge là pou amène zot vers zot destruction petit à petit sans ki zot réaliser. Sa punition ki zot pou gagner là, li pou à travers zot zenfants, zot famille, zot dibien, au niveau zot Jamaat, dans l’environnement ki zot pé vivre, dans la société et au niveau pays aussi.

 

Mo pé toujours averti zot et pou continuer averti zot – zot pas pé trouve bane anges d’Allah. Bane anges ki Hazrat Muhammad  (saws) ti trouver là et nous aussi (dans Jamaat Ul Sahih Al Islam) nous pé trouve sa bane anges là. Zot, zot pas pé trouve sa parski zot fine rejette la manifestation divine avec l’arrogance et zot fine croire plisse dans zot idole ki zot ena, ki zot fine mette emplace, bé kot zot pou trouve sa l’armée de banes anges là ? Alors li pas possible ki sa bane anges là faire ene bon traitement are zot. Avant tous, sa bane ange là zot l’obéissance envers Allah, et l’ordre ki zot gagner de coté d’Allah, c’est par sa l’ordre là même ki sa bane anges là gagner ki zot vine détruire sa bane kalité dimounes là.

 

Définitivement azordi aussi sa bane anges là pou écoute l’ordre ki vine depuis Allah. Ki pou arriver ? Allah conne mieux. Mais en donnant bane avertissements, mo envie réveille tous nous bane opposants et tous bane peuples, zot fine intoxiquer par zot puissance, zot penser ki zot bien puissant là et alors couma Allah capave attrape zot ?

 

C’est dans sa condition là même ki bane grand, grand puissance du monde, Allah (swt) fine amène zot vers zot destruction; guette l’Amérique et bane Juifs ki kalités puissance ki li fine acquérir dans le monde et guette couma Allah (swt) pé amène zot vers zot destruction petit à petit sans ki zot réaliser et certainement zot pou détruire encore. C’est zis Allah ki conner ; Li conne mieux quand sa bane jours de destructions là pou arriver et sa cet ene promesse d’Allah et li pou accompli So promesse et certainement li pou arriver.

 

Li impossible ki sa promesse là li pas accompli. Comment Li pou accompli sa, Allah conne mieux. C’est Allah ki décider kan sa pou arriver. Nous le Jamaat Ul Sahih Al Islam à travers le monde, nous soumette nous  à  la volonté d’Allah, mais pas pou capave ena obstacle dans sa promesse d’Allah là. Aucun puissance du monde pas pou capave arrête sa promesse là ; alors prend patience – Attane, nous aussi nous attane avec zot. (Insha-Allah).

 

Allah fine faire sa faraz (obligatoire) ki seulement Li (Allah) et So serviteur ki Li fine envoyer ki pou certainement gagne le dessus. Après sa déclaration d’Allah là, ki sanlà capave penser ki Allah et So serviteur choisi pas pou gagne le dessus ? Si dans le cœur de n’importe ki dimoune ena ene ti doute lors la, bé so la foi fine gagne cogner et pas fine reste nannié de so la foi. Pas capave ignore sa zaffaire là ; c’est parole d’Allah sa. Personne pas capave change sa.

 

Pense bien, dépi création Adam (as) vine jusqu’à Hazrat Muhammad (saws) et vine l’épok Hazrat Massih Maoud (as) et azordi aussi et bane serviteurs d’Allah ki pou vine après moi aussi, ki résultat de sa bane serviteur d’Allah là jamais pas pou mauvais, tous les temps zot pou gagne le dessus lors zot bane opposants. Allah So promesse li bien vrai et li accompli quand bane dimounes faire oppositions, ridiculise So bane prophètes. Sa pas veut dire ki li pas accompli quand zot pas faire opposition, Non. Mais li veut dire ki quand zot opposer, bé capave trouve accomplissement extraordinaire de sa promesse là. Sinon dans n’importe ki situation Li accompli sa promesse là. Si zot pou arrête faire opposition aussi, bé normalement là aussi Allah et So prophètes pou gagne le dessus. Si zot pou faire oppositions, zot pou gagne défaite et en plus Allah So promesse pou accompli, li vrai sa. Sa l’heure là bane dimounes pou trouver ki Allah So promesse pé accompli et li accompli sa l’heure là quand bane dimounes oppose So banes prophètes. En fait dans le monde jamais bane dimounes oppose bane menteurs, bane magouillière, bane faussaires. Quand bane serviteurs d’Allah gagne bane oppositions, bé sa même c’est ene preuve de zot véracité.

 

Maintenant guette dans le monde islamique, commié de bane fausseté ki zot pé faire au nom d’Allah. Ena bane dimounes ki dire ki avec zot ena bane tel pouvoirs ki avec ene simple soufflement nous capave change to destin nette.

 

Bane ki alle prier lors bane tombe pé appelle bane dimounes vers zot et dire ki en adorant sa tombe là nous  gagne bane tels zaffaires et toi aussi to pou capave gagne sa. Sa kalité mensonge et déception là ki n’importe ki dimoune ki ena sense et ena vrai l’intelligence (bane Ulul-al-Baab) pas pou capave accepter sa pou ene seconde aussi !

 

Mais bane dimounes ki oppose bane prophètes et bane serviteurs d’Allah, zot en fait fine perdi tout zot raisonnement. Zot fine perdi zot raisonnement parski zot égoïste. Zot religion c’est seulement pou gagne et atteindre zot propre objectif ; à part sa rien d’autres.

 

Et quand à travers bane moyens mondaines zot, c’est-à-dire, bane adorateurs de tombes là, pas réussi atteindre zot objectif, à ce moment là zot galoupe vers sa bane fausse peer là. Et zot penser ki peut-être zot, c’est-à-dire, bane peers là, capave faire zot gagne zot objectif.

 

Mais sa pas capave sa, li impossible parski après ki zot fine oppose bane vrai serviteurs d’Allah, bé zot fine ferme tout zot la porte de bien-être. Et c’est bane vrai serviteurs d’Allah ki zot opposé. Zot pas oppose bane ki na pas bane serviteurs d’Allah ; au contraire pou sa bane ki pas serviteurs d’Allah là, zot saryé zot souliers, zot suivre zot bane pas de sorte ki n’importe comment, sa bane dimoune là faire zot réussi atteindre zot objectif.

 

En séki concerne bane vrai serviteurs là, zot passe par bane testes, par bane cyclones, mais zot supporte sa avec patience ; bé Allah (swt) accompli tout zot bane désires. Donc, O bane membres du Jamaat Ul Sahih Al Islam, si ou trouve bane testes, bane problèmes, bé pas bizin ou tracasser, passe sa bane teste là avec patience et ensuite ou pou réussi tout ou bane objectif.

 

Allah fine faire sa système là pou ou même afin ki ou vine ene coté et ou séparer de bane dimounes matérialiste, bane ki nek adore bane zaffaire mondaines. C’est sa la sagesse ki bane vrai serviteurs d’Allah ena, kot bizin passe sa bane teste là avec patience et Allah envie montrer sa bane matérialiste là et bane ki fine rejette Allah So serviteur et manifestation divine. Allah adresse sa bane imbéciles là, ‘Guette ene coup, malgré zot fine rejette la manifestation divine, zot fine comploter, zot fine barre dimounes de sa chemin de la vérité là, mais guette Mo serviteur choisi, couma li courageux et brave, sa quelqu’un ki Mo fine choisir là.’

 

Donc quand sa bane opposants là trouve sa persévérance là, bé zot même zot abandonner. Finalement zot bizin admette ki sa c’est persévérance de bane vrais. Lors la vérité quand même ou mettre des milliers de obstacles là aussi la vérité triompher.

 

Ena ene grand leçon pou le Jamaat Ul Sahih Al Islam là-dans. Pou tout bane qualité opposition, accepter sa destin ki Allah fine donner là et pas faire capon, continuer reste ferme jusqu'à ki bane l’ennemis abandonner, kan tous zot bane zeffort fine alle dans de l’eau, sa l’heure là le monde même pou dire ki c’est persévérance de bane vrai sa.

 

Sa bane opposants là même pou dire finalement ki pas capave la guerre avec bane véridiques et pas pou capave ébranle zot patience. C’est ene la lumière ki finalement pou manifester et triompher. Insha-Allah. Donc pou sa bizin faire bane préparation, bizin courber devant Allah seul, attrape tous ensemble la corde d’Allah fermement, pas laisse ou diviser et rappelle bien sa grand faveur ki Allah fine faire ou kot Li fine envoye So serviteur choisi dans sa l’épok là avec révélation divines (le Ruh-il-Qouddouss) avec sa humble serviteur choisi d’Allah là.

 

Si parmi zot ti ena l’ennemis, Allah fine mette l’amour dans zot le cœur de par So grâce et fine faire zot vine bane frères de sa Sahih Al Islam là (sa vrai Islam) kot Allah (swt) fine sauve ou de sa punition du feu là, parski sa bane les autres là fine prend créature d’Allah, fine faire li vine zot idole et népli dire ki Allah (swt) fine dire tel ou tel zaffaires. Allah (swt) pas fine content sa du tout, avant ki Li envoye So punition, Li envoye So messager avec révélation divine pou tire ou de sa bane Shirk là, parski sa Shirk là même ki pou amène ou dans le feu de l’enfer.

 

C’est coumsa même ki Allah (swt) explique ou So bane signes pou ou gagne ene vrai guide afin ki ou vine ene vrai musulman ki ou soumette ou totalement seulement à Allah (Dieu unique) et faire ou retourne vers sa vrai l’Islam, vrai l’enseignement de l’Islam ki fine prêcher par nous bien-aimé prophète (saws),

 

Ki Allah ouvert bane les zot les cœurs ki pas encore reconnaitre sa vérité là. Ameen.