بسم الله الرحمن الرحيم

 

Khutba Jummah

 

HAZRAT KHALIFATULLAH AL-MASSIH AL-MA’OUD

 

Munir Ahmad Azim

 

02 Décembre 2011 ~

(06 Muharram 1433 Hijri)

 

(Résumé Khutba – 2ème Partie lor la Polygamie)

 

Après Salam, Hazrat Khalifatullah fine commence so Khutba avec Tashahhud, Tauz, Surah Al Fatiha, et ensuite li fine dire:

 

 

فَانكِحُواْ مَا طَابَ لَكُم مِّنَ النِّسَاء مَثْنَى وَثُلاَثَ وَرُبَاعَ

 

...Fan-kihuu maa taaba lakum-minan-nisaaa-‘imasnaa wa sulaasa wa rubaa

 

« ...Mariez avec séki faire zot plaisir, bane madames, deux, ou trois ou quatres. » (An-Nisa 4: 4)

 

Par la grâce d’Allah, azordi mo pé continuer mo 2ème partie Khutba Jummah ki mo ti faire lors la polygamie. Ene kitchose encore ki ene madame bizin comprend, c’est Allah ki fine mettre ene l’envie fort dans ene missié pou ki li capave marier plisse ki ene. Si Allah (swt) pas ti mettre aucaine l’envie dans ene missié, bé c’est sure ki missié là pas ti pou ena aucaine goût du mariage. Pas ziss, pas marier deux, trois ou quatre, kitfois li pas ti pou marier du tout même.

 

Azordi jour ou trouver même bel mariage capave faire, mais kan ena pou faire le Honeymoon, missié la pas pé capave satisfaire sa nouvelle marier là (so madame); voilà ki le lendemain ti fille la quitte la caze garçon là et ene tas causer circuler dehors ki garçon pas bon, li pas ene z’homme, humilier garçon là, et la famille garçon là aussi tombe dans sa humiliation là et kot ti fille là et la famille ti fille là alle raconte tout sorte qualité mauvais causer partout. Est-ce-ki ou croire Allah content avec sa situation là ? Alors sa ti fille là et so bane famille crée boucou des fitna (désordre) à cause lendemain mariage so mariage pas fine abouti et garçon pas fine réussi faire narien. Le Saint Prophète (saw) fine dire: « Après mo la mort, mo pas pé quitte aucun fitna plus nuisible pou bane zommes ki bane madames. » (Bukhari)

 

Hazrat Muhammad (saw) ti fini conner ki qualité certain bane madames pou crée fitna pou certain missiés ; dans ki façon zot pou mal azir contre bane missiés là. Bien souvent ena ene bane madames ou bane filles pas ouler vine ene 2ème ou 3ème madames pou ene missié. Zot accepter reste coumsa même, amène ene la vie dur, difficile, problème et capave tombe dans bane tentation ki la colère d’Allah capave tombe lors zot.

 

Alors ene kitchose ki parfois capave empêche ene ti fille ou ene madame pou accepter la polygamie c’est so pensée ki vine ene deuxième ou troisième ou quatrième madames d’ene missié, alors pou li c’est ene kitchose ki pou diminuer so rang dans la société. Mais sa c’est simplement ene inspiration satanique, parce ki dans la loi d’Allah, ena nous l’honneur et non pas nous déshonneur. Ensuite nous tous conne valeur et l’honneur ki Aisha (ra) ti ena parmi bane Sahaba et pourtant li pas ti première madame du Saint Prophète (saw).

 

De la même façon, nous trouver ki Umar (ra) ti propose Uthman et ensuite Abu Bakr pou marier avec so ti fille Hafsa malgré ki li conner ki zot déjà mariés. Rapporté par Abdullah Ibn Umar: « Quand (mo sœur) Hafsa so missié Kunays ibn Huzaifa fine mort, Umar dire: « Mo fine vine kot Uthman et mo fine propose li pou marier avec Hafsa. Uthman fine dire: « Mo pou réfléchi ». Mo fine traverse certaines nuits, ensuite li fine joindre moi et li fine dire moi, « Mo fine trouve ki là mo pas pou marier! » Umar dire: « Mo fine joindre Abu Bakr As-Siddique et mo fine dire li : « Si to ouler, mo marier toi avec Hafsa fille de Umar ! »  Li fine reste tranquille et li pas fine dire moi narien. Mo fine plus en colère avec li ki avec Uthman. Mo fine traverse certaine nuits, et ensuite, le Messager d’Allah (saw) fine demande moi Hafsa en mariage, et mo fine marier li avec le Saint Prophète (saw). » (Bukhari)

 

Normalement bane jeunes content pou marier avec ene jeune fille vierge et zot pas content pou marier avec ene madame ki fine déjà marier. De l’autre coté, li connu ki passion d’ene madame pas mort ensemble avec la mort de so missié ou bien avec so divorce. Donc, ki mauvais ena là-dans si au lieu d’ene jeune garçon c’est ene zomme marié ki prend charge (à travers le mariage) ene veuve ou ene madame divorcée pou aide li financièrement, préserve so dignité et madame là aussi conner ki ena ene quelqu’un ki à coté de li et pas pou ena bane voyous et mauvais hommes pou vine piège li, et abusée de li lors so faiblesse ki li péna ene missié à so coté. Ene missié (ki bon, sincère et croyant) à cote ene madame ki fine tombe dans bane épreuves et désespoir c’est ene grand zaffaires, kot li faire Nikah avec sa madame là et li préserve sa madame là so l’honneur et dignité et aussi aide madame là pou satisfaire madame là dans tous ki Halaal.

 

Ou conner, dans ene Jihad, bane ki mort en quantité c’est bane zommes. Donc, est-ce ki tous bane madames ki zot missiés fine Shahid, zot bizin reste sans missiés jusqu’à zot la mort, ou bien ki zot capave vine ene deuxième madame pou celui ki fine survivre dans Jihad?

 

D’après Hadith, dans dernier lépok pou ena ti filles plus ki garçons. Est-ce ki ena ene l’autre solution à part la polygamie ki Allah (swt) fine fini donne so solution et fine résoudre sa problème là dans Quran Shareef Chapitre 4, Verset 4 pou ki chaque tifille gagne ene missié pou li ?   

 

Seulement ene bon missié ki Imandaar, attacher avec Deen, Namaz, Quran Shariff et faire travail Dawa, pas sa bane qualité garçon ou missié ki madame ou ti fille là alle ramasse ene tabismah problème, so la vie vine amère et regretter ki faire li fine bizin marier avec ene tel mari pareil, kot so la vie vine pli difficile, ki li seul, et passe boucou misère dans la main sa bane qualité garçons et missiés là.

 

Céki mo pé faire ou comprend dans mo Khutba Jummah c’est pas sa bane qualités garçons ou missiés ki pou rendre ou la vie amère ki mo pé faire référence, sa bane mauvais garçons ou bane mauvais missiés là non! Avant ou vine ene deuxième ou troisième madame pou sa missié là, ou bizin conne ene ti peu comportement de sa missié avant tous, couma li amène so la vie de tous les jours et si li attacher avec Deen-é-Islam et Quran Shareef aussi ; pas pé cause pou sa bane qualité missiés ki péna Deen dans so la vie et ki gaspille so le temps dans tous bane vices ki péna so tourne-à-vice (c’est-à-dire, zot fini zot la vie dans bane péchés).

 

Donc céki mo ti pé rode faire ou comprend à travers sa Hadice ki mo pou cite pli devant là et si nous bane croyants dans la religion d’Allah, nous pas résoudre sa problème là, est-ce ki pas pou ena boucou l’immoralité, désordre, kot haya perdi so valeur dans sa le monde ki Allah (swt) fine envoye nous là? Alors mo cite sa Hadice là kot Hazrat Muhammad (saw) fine dire : « Parmi bane signes Qiyâmah c’est ki bane zommes pou diminuer et bane madames pou augmenter, jusqu'à ki 50 madames pou ena ene seul (zomme) responsable. » (Bukhari)

 

Au lieu ene madame veuve ou divorcé ou ene fille reste sans mariage, li préférable li accepter marier avec ene bon missié ki Imandaar et sérieux et madame là ou ti fille là péna narien pou li préparer. Li juste bizin donne so consentement kot li dire « Oui ! » Sans consentement ene ti fille ou ene madame, ou pas gagne droit force li pou marié avec tel garçon ou tel missié.

 

Allah (swt) et So Rassool (saw) fine claire et nette lors sa sujet là. Personne pas gagne droit force ene madame ou ene fille pou marier avec tel missié. Donc si ti fille là so consentement li positif, et li dire oui ki li content pou marier avec tel garçon ou tel missié et alors c’est garçon là ki bizin faire préparation pou ena ene la caze pou mettre li là-dans avec so bane conforts d’après moyen missié là aussi et missié là bizin travail dur pou nourrit madame là ou fille là sans faire li misère et bizin traite tous égale couma Allah (swt) et So Rassool (saw) fine faire comprend.

 

Ena 2, 3 ou 4 madames, pas coumsa même sa et ou bizin comprend zot caprices aussi et ou bizin conne faire ene bon jugement kan ena problème fine arriver entre zot (bane les autres madames là). Pou ene missié li pas facile sa pou cope avec 4 madames, 4 différent mentalité, 4 différent caprices, 4 différents l’esprit pou traite zot avec égalité; bizin ena boucou de patience et persévérance là-dans et ce pou sa ki pou ene missié coumsa so récompense bien grand dans lizié d’Allah. Li fine accepter toute sorte qualité des difficultés et épreuves pou préserve l’honneur et dignité de sa bane madames là et traite zot bien d’après tous so zéffort et capacité ki li ena et li faire tous sa là seulement pou le plaisir d’Allah.

 

Ce pou sa raison ki Nabi Kareem (saw) fine dire pou sa bane qualité missié là ki « Zot ena 6 cadeaux pou gagner auprès d’Allah... et ene parmi sa 6 cadeaux là pou marie li avec Hur ki ena jolie gros lizié. » (Ibn Maja) Et dans ene l’autre Hadice, Hazrat Muhammad (saw) fine dire « Pou marier li avec 72 Hurs ki ena jolies gros lizié. » (Tirmidhi)

 

Donc si Allah (swt) fine réserve sa bane récompenses là pou sa bane bon missiés là, sa pas indique nous narien excepter ki Allah (swt) pou donne zot céki zot content. Azordi jour, li très connu ki ena tiguitte bons garçon ki dans Deen et pé pratique Deen ; alors est-ce ki ene madame ou ti fille intelligente préfère vine ene deuxième ou troisième madame d’ene bon garçon ou ene bon missié, ki li vine l’épouse unique d’ene mauvais garçon ou missié ki pas ena Deen dans li? So la vie dans gambling, la boisson alcoolisée, droguée, li pé commettre l’adultère dehors, ou li pé batte so madame?

 

Nous bien-aimé Prophète (saw) fine encourage so Ummat pou ena boucou zenfants. Péna family planning dans l’Islam, pense ene coup, est-ce ki ena ene l’autre façon Halal (dans lizié d’Allah) à part la polygamie pou ki ene dimoune gagne boucou zenfants? Donc ce pou sa raison là ki nous bien-aimé Prophète (saw) fine dire: « Marier avec bane madames ki content zot et pou capave gagne boucou zenfant, parce ki mo pou montrer moi fier à bane peuples (avant) par zot (par quantité suivants ki zot pou été). » (Abu Daoud)

 

Azordi jour boucou madames passe misère avec zot missiés, surtout bane missiés ki péna Deen et dans le péché nuit et jour et malgré sa, madame là pas demande so Kula, parceki li peur attention ki li pas gagne ene bon missié pou occupe li. Si la polygamie ti être pratiquer dans bane pays kot ena musulman, ene la frayeur pareille enlevé parce ki madame là ti pou conner ki au moins mo capave vine ene deuxième madame d’ene bon missié. Alors, au lieu continuer vivre dans la misère, li capave au moins vive so la vie dans la tranquillité, Insha-Allah

 

Ou conner, la polygamie enlève bane disputes ki ena entre ene missié et madame. La polygamie, c’est ki li faire ene madame prend tous so précautions pou pas mal azir envers so missié, attention ki missié là alle plus vers so deuxième madame. Donc dans sa façon là, pou toujours ena compétition entre sa bane madames là pou ki chacun plus attire so missié vers li. Alors, dispute entre missié-madame diminuer et zot tous vivre en paix et prospérité.

 

L’Islam c’est ene religion parfait ; dans tous so l’aspé li parfait. Ce dimoune ki faire sa vine imparfait alors zot pou répondre pou sa. Ou conner mo bane frères et sœurs, nous bane musulman, bane les zot religions ti bizin copier lors nous, prend nous comme ene modèle et l’exemple dans zot la vie tous les jours. Chaque musulman pas conne so vrai valeur ki Allah (swt) fine crée li musulman; li pas réfléchi, li pas realise lors so dignité et l’honneur ki Allah (swt) fine crée li musulman. Malheureusement, bane musulmans pé copier, imite bane les autres religions kot bane les autres religions ti bizin imite et copier lors nous (l’Islam). Ou conner couma li ene grand Dawa sa et aussi ou fine mettre ene commandement d’Allah en pratique seulement pou le plaisir d’Allah et donne l’Islam tous so valeur divine comme ene religion pure, soumettre à ene Dieu unique et kot ena la paix et soumission total ; kot ene missié li fine faire Nikah avec 2 ou 3 ou 4 madames et kan pé sortie tous les 4 sorti ensemble avec missié là et vivre avec accorité ; ou conner couma Allah (swt) pou content avec ou, kot ou fine montrer la beauté de l’enseignement de l’Islam, (Allah et So Rassool (saw)) et de l’autre cote ou fine défendre l’honneur de nous bien-aimé Prophète (saw) pou tous céki les autres religion fine dire lors li.

 

Insha-Allah dans prochain Khutba Jummah mo pou répondre nous bane adversaire lors la polygamie.